سؤال لأهل الجيب الشيروكي

[هداج]

سؤالي لأهل الشيروكيات ( السبورت ) هل تنصحون به وماهي المشاكل التي واجهت مستخدمي هذا النوع من السيارات . وهل هي عملية وخاصة في البر ومامدى متانتها وتحملها ( الكرف ) وهل قطع غيارها غالية وهل صيانتها سهلة يعني في أي ورشة وما مدى صرفيتها للبنزين . لأن فيه ناس رافعينه فوق ويمدحونه وفيه ناس يذمونه ويسبونه

[hekloz]

هلا بك أخوي

بالنسبة للشيروكي السبورت صراحة اللي يسبونه هم أكثرهم من المراهقين اللي يقطعون كفراته عند الاشارات والمدارس واذا صار فيه شي الجيب قام يسب ويلعن فيه ويمســـــح جميع ماذكر في مدح الشروكي

أخوي الشروكي سيارة قويــه بمعنى الكلمة سواءاً في البر أو المدينة انا عندي واحد موديل 96 قديم بس هي على ركادة السواق في المدينة أما في البر فمن عندي طامر به وأطلع وأنزل به ماعنده مشكلة لأني مجرب معي أكثر من 3 سنين صراحة قوة وتحمل وعلى فكرة ترى الشروكي قطعة واحده من الصداد الى الصدام يعني نادراً ما تسمع أصوات وأنت مطامر فيه في البر وبالنسبة لقطع الغيار صراحة غالية في الوكالة , لاكن انا كنت أروح لمحل في الصناعية يجيب قطع أرحم من الوكالة وعنده قطع جيب وكلسلر فقط وأسعاره معقولة مقارنة بالوكالة النصابين طبعاً انا أتكلم لاني ساكن بالرياض ماأدري يمكن بعض المدن والهجر مستحيل تلقى له قطع وهو عموماً يحتاج لصيانة شي أكيد وأكثر شي واجهته في الجيب أصوات تطلع من الديكور الخلفي للسماعات والباب الخلفي ويحتاج لتغيير جلب وصوف الزيت لأنها تذوب في الصيف والتكييف جيد جداً أما كل الورش مايعرفون لصيانة الشروكي الا نادراً منهم , صرفية البنزين معقولة للتوماتيك أما القير العايدي فيقدر السواق يتحكم في صرفيته (( يعني اذا خف رجله من المداعس )) في السفر يمكن مايصلح للعائلة لأنه يطامر .

أتمنى أني اكون أعطيك فكرة على الشروكي .

[هداج]

ماقصرت يالغالي والله يجزاك كل خير

[قوة شرائية]

الشروكي سيارة لكن وين تجد النظيف؟؟؟؟
لان غالب المعروضات في السوق اما مكروفة او استعمال امريكي وليس مهيأ للمناخ الصحراوي!!
على كل حال احرص على النظيف ولو غلى سعره لانه يستاهل ومثله القراند شروكي السته سريندل

[hekloz]

الشروكي سيارة لكن وين تجد النظيف؟؟؟؟
لان غالب المعروضات في السوق اما مكروفة او استعمال امريكي وليس مهيأ للمناخ الصحراوي!!
على كل حال احرص على النظيف ولو غلى سعره لانه يستاهل ومثله القراند شروكي السته سريندل

والله انك صدقت وين تلقى النظيف

ولو لقيت نظيف خذه ولو غالي

[tewster]

سلام الله عليكم
ياجماعه ابي منكم الفزعه وياريت في اقرب وقت
انا عندي تاون كار موديل 96 كارتير وبصراحه جاني رجال مثلكم وشرواكم عنده جيب شروكي موديل 98 وبصراحه يا جماعه اتعب من كثر ما اقول نظيف بس عيبه المكيف خر بان بس سؤالي التالي
الرجال يبي يبادل مع موتري وايضا ظنكم موتره يجيب 25 الف ؟؟؟؟؟؟؟؟
انا موتري حمد لله انظف من الوكاله نفسها والحمد لله
وكل ما اسئل واحد يقولي انحش وش لك بالشروكي جهنم ولا احد يصلحه وانطر القطعه لما تجيك
تكفون يا جماعه اذا يصلح اخذه بسعره ولا ادور غيره ولا اهون ولا شلون
(((الشروكي موتر ولا لا)))
>>>> متزوج وعندي طفلين))))

[hekloz]

هلا اخوي والله شف اذا الشروكي قير توماتيك ولونه أبيض أو أسود فقط (خلك من الالون الثانية) 25 ألف يعني حقه وزيـــــااااااده ,

اذا الجيب نظيـــف على وصفك صراحه لاتفوته بس مشكلته المكيف أطمر به عند ورشة في الصناعية متخصص جيب شروكي أسئله أول يمكن فيه مشكله عويصه تكلفك فوق الالفيــن ريال .
وشف الشخص اللي بتشري منه الموتر هو شباب لاعب في الجيب وشف اذا عليه جنوط عريضه فتلقاه مركبها ويمكن انه لاعب فيه ولا شايــب حليـــــل :)

[sari sami]

بسم الله الرحن الرحيم ///
السلام عليكم ورحمة الله وبركاته..
اخوانى انا استعمل سيارة الشروكي منذ عام 1992 حتى تاريخ كتابة هذا المشاركة وانا استعمل الشروكي أي ما يقارب 17 سنة ولله الحمد.. وقد استعملت سيارات كثيرة منها الاندكروزر حق اخي ولكن ما جاز لى مره وحده ..وبعدها رجعت على االشروكي لانى وجدتها سيارة قوية ومتماسكة وطفت المملكة كلها ثلاث مرات به ..وما عمره سوي لى مشاكل ... عشان منتبه للصيانه وحرارة الموتر تنتبه لها أول بأول وتغيير كل شئ في وقته مثل طرمبة الماء والكلتش وتغيير الأديتر اوتسييخه
وتحافظ على السيارة بشكل عام .... اخوكم ساري
والله الموفق ,,,

[hekloz]

فعــلاً مثل ماقال أخوي ســاري أهـــم شي التشيــيــك على الاشياء اللي ذكرها
لأن حنا شعب الا من رحم ربي مايتذكر السيارة الى اذا وقفت عليه وسط الشــارع بعدين يسب ويلعن في الشروكي

ياخي خلك زي ذولي الاجانب شيك شهريـاً على الاسلاك . الطرمبة . الرديتر . صحن الكلتش مهم لانه اذا خرب عليك الله يعينك والله العظيم انك انت الي تقدر تحافظ والا تعدم موترك

مشكــور أخوي ساري على النقاش