المساعد الشخصي الرقمي

مشاهدة النسخة كاملة : اللي في المدينة وشلون يحصل ربيع و فقع


الأستاذ55
21/02/2007, 12:48 PM
السلام عليكم و رحمة الله
يا اخوان انا جديد في هالمنتدى و اعجبتني المواضيع بالحيل و ودي انكم تساعدوني لأني بالمدينة و ابي اعرف وش اقرب منطقة للمدينة فيها ربيع و بعد فقع اذا حصل http://mekshat.com/vb/images/smilies/biggrin.gif
مع العلم اني ابطلع مع العايلة و ما في مشكلة لو وصلت القصيم بس انتو شورو علي تكفون ....... تراني اترياكم لا تبطون علي
الأستاذ55
21/02/2007, 04:35 PM
وين الشباب مو هذي الهقوة فيكم انا قلت لوعند القصيم وخلاص ماعاد نبي فقع :mad:
الرمث
21/02/2007, 06:35 PM
أخي الأستاذ55
اماكن الربيع بالنسبه للقصيم بجانب ام حزم وطريقها مفرق ام حزم بعد تفتيش ام سدرة بسريع الرياض ثم 40 كم يجيك كوبري ام حزم وانت مخير الربيع قبل الكوبري يمين اوتلف يسار طريق العبدليه والغاط ترى الربيع يمين ويسار قبل نفود الثويرات اوتواصل من تحت الكوبري طريق شقراء اذاكان معك جيب وناوي تجلس يومين استمر حتى ترى لوحة شعيب الخويش الشمالي ثم انزل يمين وخل الشعيب على يسارك ثم اتجة غربا"حتى تصل ابراج الكهرب وادخل مع رقم 162 حتى ترى النفود يوجد فياض المستوي ولكن انتبه الطريق للفياض وعر خاصه الرجوع وعدد الفياض حوالي 8 ولكن تحتاج على الأقل يومين ويوجد فقع داخل النفود يمكن تلقى شيء بسيط
الأستاذ55
21/02/2007, 06:54 PM
ما قصرت اخوي الرمث و ان شاء الله اوصل حول اللي ذكرت و ما شاء الله وصفك واضح ودقيق :)
محمد الشاوي
25/02/2007, 03:43 PM
الاستاذ 55

طال عمرك عندكم منطقة يقال لها نفود القوز .
أنا جايه قبل شهرين والربيع توه بادي به . والحين ما أدري وش صار عليه
الطريق / تطلع مع السريع للقصيم وإذا جاك مفرق الحناكية ( محطة العاليات ) لف يمين باتجاه مهد الذهب وإذا مشيت 20كم تقريبا يصير النفود على يسارك بس ما تشوفه لأنه يبعد عن الخط 20كم
الأرض هناك ممتدة وجميلة ولو طولت وقربت لمهد الذهب تبي تلقى شعبان سمر على كيف كيفك بس تراي ماأدري عن الربيع .
وإذا بغيت إحداثيات راسلني على الخاص