المساعد الشخصي الرقمي

مشاهدة النسخة كاملة : الرجاء الرد من الأخ نعمان بخصوص كبسة قطا


otaisa0v
28/02/2007, 10:21 AM
السلام عليكم ورحمة الله وبركاته،،

نعمان يا نعمان الله ينعم عليك بالصحة والعافية إنت والقراء الكرام بغيت أطلبك وانا خوك صراحة ما شاء الله تبارك الله على الطبخ الله يجعله بالهنا والعافية ولا يقدر عليك بشر و لا عليك أمر ابي وش المقادير حقت الطبخ وكيفية إستعمال قدر الضغط والوقت والكمية حقت الماء وشكراً وصدقني لآدعيلك من كل قلبي بالصحة والعافية.

وشكراً
نعمان الفهمان
28/02/2007, 10:34 AM
يالغالي والله شايف مشاركتك

بس مهب انا الي طاااابخ ههههههههههه

تبين امسكبك خط اشرحلك ابشر بس تراي ماهنا ذود لو تاخذ لفة بخيمة الطبخ بتلقى ازين من

وابشر ابمسكبك الخط الان الان
نعمان الفهمان
28/02/2007, 10:56 AM
بسم الله

<<<<<<<<<<<<<<< الشيف نعمان

اذا كان طبخك شحم مثل القميري او لحمة حاشي احمس البصل معة بدون زيت وقلبة لين تشوف موية بقاع القدر ما يمنع انك تقصر علية وتغطية شوي غطة بدون ما تسكر القدر
تحط الطماط الان ولا تكثر وقلب شوي
الملح والبهار الان تحطة انت ومزاجك بالبهار

نحط الماء الان
وقياس الماء يختلف طبعا حسب الرز وحسب اذا انت ناوي مرقة تمزمز علية
كل كاس رز يقابلة من كاس الى كاس ونص ماء (جرب كاس وربع )

اذا حطيت الماء صك القدر زين وخلك حولة اذا بدا يصفر ويبترم بلفة نبدا نحسب
كل نوع لحم يختلف
مثلا القميري 17-20 دقيقة
دجاج تكرم النعمة 12-15 دقيقة
حاشي 20-25 دقيقة
وانتى ماشي على باقي الانواع
بس انتبة ترانا نحسب الوقت من بعد التصفير ودوران البلف مهب من اول ما تصك القدر

بعد ما ينتهي الوقت وخر القدر واسحب بلفة لين يخلص الهواء الي فية وافتحة يالله من فضلك يالريحة
انت بالخيار الان تبي تحط الرز مع اللحم او لحالة
نقول لحالة جب قدر فاضي وطلع اللحم او القميري اااااااااااخ بس
وكب الرز على الماء ممكن تحط فوقة حبحر انت ومزاجك وممكن حبة او حبتين مايونيز قصدي ثوم انت ومزاجك
صك القدر ولا تنسى البلف انتبة رجعة لمكانة وخلة على نار هادية واذا صفر البلف اقصر علية شوي برضة وعطة 10-12 دقيقة وصك النار وصخن لحمك الي بالقدر الثاني ما يمنع انة يكون معة شوي مرقة بس تكون عامل حسابة من البداية

وبالهناء والعافية

شف عاد من الان تراي ابنتضرك لين تطبخ وتردلي هل جازتلك الكبسة او صرت ادربي راسي انا

ارجو من الاخوان الي يدخلون الموضوع يعلقون على كلامي واذا فية اضافات او اي شي نرحب
otaisa0v
28/02/2007, 12:12 PM
السلام عليكم ورحمة الله وبركاته،،

الله يعطيك العافية وشكراً على ردك وهذا يكفيني والله إني هالحين ادعيلك من كل قلبي والله بالصحة والعافية الدائمة باذن الله. والله يجمعني بك في مستقر رحمته، وراح أرد عليك إنشاء الله متى ما صلحته لأن الوالد بيطلع يم ضرما وعازمن ريجيل وإنشاء الله متى ما طلعت بأطبخ إنشاء الله وأرد عليك.
وشكراً