&(( فقع وربيع وعلوم طيبة ))&

[رمال الصحراء]

السلام عليكم ورحمة الله وبركاته
انا يوم الخميس ذهبت مع واحد من الزملاء شرواكم وجينا منطقة صراحة حلوة بالحيل ولقينا فيها ربيع طيب وفقع لكن يوم سألنا عن المنطقة محد طعانا علم غذا احد منكم يعرف اسمها يقولنا الله يرحم والديكم عشان نسجلها بالقرامن وصف المنطقة هو :-
تمسك طريق الخرج بعدين يجيك كبري البحرية الي مقفل تروح يسار ثم تعكس الطريق ثم تبتل ويجيك شارع يسار وهي بوابة سكة القطار انت ابتل وخل السكة في يسارك ثم تمشي لين ينتهي الزفلت على فكرة تتعدا الالخزن الاستراتيجي ثم تمشي طريق ترابي والمارية في قواعد في النص وهي حقته مواسير انارة وبعد ما تنتهي يجيك بوابة يسار تدخل معها وتبتل وتباري شعيب طيب لين يجيك شبكة وترا فية فتحة تدخل مع الفتحة وتمشي مسافت حوالي ثلاثة كيلو وتجيك المنطقة الحلوة وفيها رعيان كثير بالذات هل ابل والحليب الطيب 00 وعلى فكرة فية بعد الشبك شبك ثاني وفية دخلة بالبشبك بس ما دخلنا ويقولون بعدة فيضة طيبة والغريب المنطقة كلها مشبوكة بس ان الشبك مقصوص لكن وش تصير هذي المنطقة 00 00
فنبي الله يطول عماركم وش اسم هذي المنطقة لان خويي طايح فيها صدفة 0
والسلام عليكم ورحمة الله وبركاته
:looney: :looney: :looney: :looney:

[التوباز]

الاسم ان شاء الله يعطونك خبر عنه الشباب
وين الصور اهم شي :)

[otaisa0v]

السلام عليكم ورحمة الله وبركاته،،

هذا المكان ونا اخوك ما أعرف إسمه بالظبط ولكن واحد من ربعنا وصفه لي ويقول إنه شبك الحرس الوطني.

وشكراً

[مستشار البير]

هذا الله يسلمك شعيب اسمه الحنية
وهو وادي لأنه كبير بالحيل وبدايته المنطقة اللي رحتوا لها
لكن لو باريت الشبك وخليته على يسارك كان شفت امتداده من تحت سكة الحديد
لكن بحق منطقة مربعة انا عندي صور بس اصبروا علي شوي

[ابوحماد]

أنا اذكر قبل 15 سنه كنت أجي ذي المنطقة ويجي بعدها طلعه ردمية تطلعك فوق الضلع اهي موجوده او لا قبلها بيب البترول

[tabrak]

انا رحت للمنطقه قبل سنتين تقريبا وهي فعلا منطقه ممتازه وربيعها جيد ولكن سمعت من احد الاخوه ان هذه المنطقه خاصه لتدريب افراد الحرس الوطني بالذخيره الحيه ويوجد بها بعض القنابل التي لم تنفجر بعد .

ارجو ممن عنده خبر عن هذا الموضوع ان يفيدنا مشكورا

[ابوحماد]

أخوي رمال الصحراء بعد ماشفة موضوعك بعد صلاة العصر حركة ورحة ذيك المنطقة بس الطريق مسيته ولا جتني ردميه

أول شي انا عكسة الخط حق البحرية وخلية مستودعات على يساري لين جاني مفارق خذيت يسار وطولة ثم جاني تقاطع سكة الحديد أم اشارة

عديتها ورحت شرق والشبك حق القطار على يساري وطولة كثير وجتني مخيمات على يميني وتعديت العبارة وبعها طلعة فوق لين جتني شركه على يميني فوق الضلع وتقاطع يسار بوابة فيها جيب الشرطة العسكرية وطولة بعد وغابة الشمس ورجعة طريق الخرج

[طــامــي]

اخواني الشبوك اليفوق على اليمين شبك رماية الجيش اما اليسار رماية الحرس اعرف المنطقه مثل بيتي

[رمال الصحراء]

اخوي ابو حماد حفظك الباري
انت ما قريت الوصف زين لانك تعديت البوابة الي اقول بعدين البوابة ما فيها دورية انت رحت للبوابة الثانية وهي الاوله وبعدين وشي العبار الي تقول ما فية عبارات انا اقول اول ما ينتهي الزفلت ويجيك المسحية تمسكها وترا المارية في قواعد في النص حقت عامود انارة اول ما تنتهي تجيك كوم شحن بوجهك بعدين على طول البوابة يسار مباشرة وتمسكها لين يجيك قرية مهجورة على يمينك وكمل الوصف واضح بس ركز 00
والف شكر لكل من قام بالرد على المشاركة 00 00
بس انا عندي مشكلة ودي تفزعون معي وهي اني عندي صور كثيرة بس المشكلة ما قدرت انزلها على المنتدا حاولت عده مرات لكن دون جدوى ما ادري وش السبب ياليت يا النشاما تفزعون وتعلموني لاني عند صور حلوة بالحيل عن الربيع الطيب وسلامتكم

[ابوحماد]

يمكن تكون الصور عندك عناوينها بالعربي غير أسم كل صورة وحملها على موقع مكشات شفه عندك بالصندوق السحري (الرد على الموضوع) جهة اليسار

أو حملها على هذا الرابط تم أنسخ الرابط بعد التحميل

http://www.9o9i.com/index.php

[شفق]

امنطقه اسمها شعيب الدغم بضم الدال والشبك يسمى شبك الحرس