مالموقف الطريف أو المحرج الذي صادفك في رحلتك ؟؟

[رحال]

بسم الله الرحمن الرحيم

إلى مشرفي و مستشاري وأعضاء منتدى مكشات الكرام .

السلام عليكم ورحمة الله وبركاته وبعد :



كثيراً ما نصادف وخصوصاً في وقت المقناص الكثير من المواقف المحرجة أو المواقف الطريفة ولا يتم ذكرها في المنتدى لماذا؟؟؟ !!!!!

لماذا يتم ذكر فقط علوم الصيد فقط مثال صدنا اليوم عشرين قميريه أو صدنا عشرين من الإوز أو الحبارى ولا يتم ذكر المواقف .

تعمدت طرح هذا الموضوع حتى يتم ذكر هذه المواقف الطريفة أو المحرجة التي لدى مشرفينا ومستشارينا وأعضائنا التي تصادفهم وخصوصاً في المقناص وأرجو أن يتم التفاعل وعدم الانسحاب .

ما نبي أحد يتهرب من ذكر هذه المواقف إن كانت طريفة أو محرجة . اللي صادفه موقف رجاءً يذكره فقط لمعرفة طبيعة هذه المواقف .

وبما إنني صاحب الفكرة سوف أبدأ في ذكر موقف حدث لي السنة الماضية عام 1423هـ
وكان معي (( سبع البر )) وكانت طلعة صيد الإوز وبصراحة كان الموقف محرج لي ومازال اخينا في الله يقوم بذكره لي عندما أكون معه . قصده ينرفزني .:mad: :mad: :mad:

الموقف :

عادةً نخش أماكن الصيد وقت الفجر, تمركز كل واحد في مكانه وأخينا في الله جمبي يعني مراح بعيد حوالي 6 أمتار فقط ما جانا شي الفجر طلعت الشمس قلت له شكل الدعوة اليوم مافيها صيد قال انتظر شوي , انتظرت لمدة ربع ساعة شوي إلا ثلاث من الإوز مرة علينا وراحوا في الوسط ووقعوا قام أخينا في الله يزمر يزمر ويشكل في التزمير , شوي طاروا وعلينا سنتر لا راحوا لا يمين ولا يسار يبغون الإوز الاصطناعي .
ويوم جاء وقت الرمي قلت له لي اللي على اليسار ولك اللي على اليمين قال زين وبدأ هو بالرمي وصاد الأولى ورميت انا واخطيت ورمى الثانية وصادها وأنا مازلت مع الأولى رميت الثانية وأخطيتها ورميت الثالثة واخطيت وشافني وقفت عن الرمي وهي مازالت في الأعلى من عادة الاوز اذا رميت عليه يرتفع بسرعة كبيره للأعلى , مد عليها البندق ورمى ويبسها في الجو
تعال شف حالتي بعدها وجهي صار احمر ما عرفت وش أقول , قال وش فيك قلت ها ما فيني شي أنا متعمد أخطيها أبيك تصيدها . (( عذر اقبح من ذنب )) :D :D :D

يالله اللي بعدي :;)

http://www.mekshat.com/pix/gallary/data/images/RAHAAL22.jpg

[نفل]

اخوى رحال المواقف كثيرة لاكن بالنسبة للمواقف الطريفة الى تخص الصيد اذكر هذا الموقف

:D مرة كنت طالع انا مع واحد من الشباب وقت نزول القميرى وبعد ما وصلنا لمكان الصيد المقصود وشفنا

احد الطيور قلت لرفيقي ناولني الشوزن وكانت بالمرتبة الخلفية كنت حاطها بجراب وبعد ما خذها رفيقي

وطلعها من الجراب كانت المفاجأة طلعت ام صتمة 27 قديمة ايام الحرب العالمية الثانية :D

وكل هذا بسبب انى حطيت الصتمة بجراب الشوزن بالخطأ ونسيت اشيك قبل الطلعه :D :D :D

وبعدها قمت القط وجهي

وسلامتكم

[رحال]

هلا اخوي (( نفل )) وحياك الله

الله يقطع ابليسك :D :D :D ام صتمة هاهاهاها والله موقف طريف وتشكر عليه ويمكن يساعد باقي الاعضاء على ذكر مواقفهم لكن اللي اشوفه إنهم يدخلون لكن مايشاركون هل هم محرجين ؟؟؟!!!:confused: :confused:

لكن ان شاء الله مشاركتك اخوي نفل تشجعهم شوي :) :) وانا ماقصدت غير معرفة طبيعة هذه المواقف فقط .

على العموم ماقصرت اخوي نفل

وتقبل تحيات اخوووك رحاااااااال

http://www.mekshat.com/pix/gallary/data/images/RAHAAL22.jpg

[طراد صيد]

الموقف الي عندي والله مدري وش يندرج تحت اي بند لكن هذا عليكم
وحنا في المقناص في السودان واليا معنا واحد من العيال ما يروح في رحله غير يجيب العيد وكان هو الي يسوق موتري وانا فوق اصور والله ونلقا هاك الغويلب ونزل عليها سلوقيي انا والله ويقوم يرددها وانا اصور واحد من العيال معه بالكبس ويصير على ايمن السياره وتتجه يممنا الغويلب تا تجي من قدام السيارة واليا السلوقي يوم مسكها باذانيها وهو يقفي عليها واليا خوينا معه بالشاص وهو مقفي والله يا رياجيل انه داعس الارنب من فم السلوقي انا قلت راح فيها السلوقي لكن فكه ا لله والله يوم شفت مافيه شي ان كني مالك الدنيا ههههههههههه غالي بالحيل يطرح الضبي وعلى فكره السالفه هاذي مصووووره كمرة فديووو
وسلامتكم

[أيمن]

موضوع جميل من شخص أجمل ..
وشكرا للجميع على هذه المشاركات الطريفة التي تصور لنا جمال البر والوناسة وسعة الصدر .. والمقالب :) والمواقف التي لا تنسى أبدًا ..
أنا أتوجه باقتراح لصاحب الموضوع أولا ثم إلى الجميع بما أن الموضوع تم طرحه في الخيمة العامة، بجعل المواقف عامة إي أنها سواء في المقناص أو غيرها بشرط أن تكون فيما يخص الرحلة البرية ..
مجرد رأي ..

تحيتي

[رحال]

مساك الله بالخير اخوي (( طراد صيد )) وحياك الله .

مشكور اخوي طراد على طرح هذا الموقف .

فعلا موقفك لا يحسد عليه لو اخينا في الله طير عليك راس السلوقي وش العمل والله كبيره ومثل ماقلت انك مغلي السلوقي بالحيل .

لكن لو إني مكانك ماخليت خويك يسوق لانك قلتها مايطلع مره إلا لازم يجيب العيد (( والحمدلله ماجاب العيد في السلوقي )):D :D

مشكور وماقصرت يالغالي
اخوووووك رحاااااااااااال
http://www.mekshat.com/pix/gallary/data/images/RAHAAL22.jpg

[رحال]

مساك ربي بالخير مشرفنا (( ايـــمــــن )) وحياك الله يالغالي

اول حاجة مرورك على موضوعي هذا بحد ذاته شرف كبير لي ووسام على صدري .

ثاني حاجة الله يجازيك بالخير على إبداء رأيك فعلاً اقتراح جميل (( المهم مايخرج عن نطاق الرحلات البريه ))

ويمكن اقتراحك عزيزي ايمن يزيد من عدد المشاركات في هذا الموضوع .

اقول اخوي ايمن اشوفك دخلت وعطيتنا رأيك وماكتبت موقفك ولا ماعندك ؟؟!!!! ((( ما اعتقد ))) ;) ;) ;)

تقبل مني كل محبة واحترام
اخوووووك رحااااااااااااال

http://www.mekshat.com/pix/gallary/data/images/RAHAAL22.jpg

[أيمن]

أشكرك على هذا الكلام الجميل العطر .. إذن هل نغير العنوان إلى:

مالموقف الطريف أو المحرج الذي صادفك في رحلتك ؟

حتى يعلم الجميع بذلك؟
ما رأيك؟
أما بالنسبة للمواقف فأبشر بسعدك :) مني ومن بقية الأعضاء :) ;)

تحيتي

[طراد صيد]

مشكور اخوي رحااال والله لا يهينك انت وجماعة الربع الاعضاء ههههههههه مسلسل اردني ايه

فيه موقف ثاني بقوله لكم الظاهر ما عندكم غير بس لا يهمكم والله من موقف غير الثاني والله يستر من الجاي
رحنا لمصر وانتم تعرفون مصر ممنوع فيها الصيد وهو والله واجد مو زي بعض الديار الي ضب وجرجس ههههههههه المهم قلت للشايب والمجموعه نبي ناخذ معنا فشق شوزن 3/0 قالو بكيفك لانكم عارفين فشق المصريين نميلي وما يصلح للغزلان والوعول المهم اخذناه ودسيناه في كذا محل والله وننزل في الميناء ويكفشونا قالو الشيبان انت الي جبته وانت الي تحمل الي يبي يجيك والله واقعد كم يوم من الشرطه على النيابه على المباحث على امن الدوله
شفتو السيارة الي تجي في افلام عادل امام ام باب ذيك والله كم مرة شالوني فيها الله لا يعقلهم
لكن الحمد لله بعد كم يووم من التسحيب بين المراكز يطلع اخوكم طراد صيد سالم معافا ونعود ما صدنا غي ر بطه وديك رووومي من السوق
وسلامتكم:( :(

[رحال]

مساك الله بالخير مشرفنا (( ايـــمـــن )) وحياك الله يالغالي

مشكور وماقصرت مره ثانيه وتم تعديل عنوان الموضوع كما اشرت علي .
انا مازلت مصر على معرفة احد مواقفك قول تم :) .

الله يجازيك بالخير وماقصرت
وتقبل تحيات اخووك رحااااال



=========================================


=========================================


هلا وغلا اخوي (( طراد صيد )) حياك الله مره ثانيه .

مشكور على هذا الموقف الثاني اللي اعظم من الموقف الاول اجل تبي تهرب فشق :D :D والشيبان يوم شافوا الدعوى جد تخلو عنك :D وماكلتها إلا انت .

على العموم الحمدلله على السلامة ومأجور إن شاء الله لكن لاعاد تعودها :mad:
ومشكور وماقصرت
اخووووك رحاااااال
http://www.mekshat.com/pix/gallary/data/images/RAHAAL22.jpg

[ابو عمر اللاحم]

السلام عليكم

حياك الله يا (( رحااال )) موضوع جميل جداً .

كنا مرة في ايام الشباب طبعاً :) نعلب بجيب ربع في ايام ربيع ( انطاعس):mad: اللي حصل اننا طلعنا في نازية طويله يوم نزل وجه الموتر في الجانب الآخر من هذه النازية وإلى فيه عائله كبيرة حريم وبزارين ورجال تحتنا على طول .. اخوك نهار مسك فرامل يبي يرجع مستحيل لفيت الدركسون بديت اسايف عنهم .. الحريم بدت اتصارخ والبزارين يضحكون .. والرجال يناظرون بدهشه.

المهم نزلنا ..... كفر قدام وطى طرف الفرشه اللي عليها الحريم . انتهى هذا الموقف بسلام ودون اي مشاكل والحمدلله .

وسلامك اخوي (( رحااااال ))

تقبل فائق احترامي وتقديري.

[عاشق النحم]

مشكورين على هالمواقف الحلوه
أما موقفي أنا:
طلعت أنا وابو عقيرب و واحد ثاني للمقناص وحنا نمشي ندور طيور لقينا جول بواعيد
بالماقع (واقع) نزل أبو عقيرب ونزل الثاني يتخاتلون للفرق أبو عقيرب معه شوزن كامل أما الثاني معه نصف رمى أبو عقيرب ورمى الثاني وطار الفرق وجى لمي
أنا منطق بالسياره ما معي الا أم صتمه 25 وجى الثاني يركض و انا نزلت أبي أبي أشوف والفرق فوقي وتعداني الفرق و أخينا في الله يركض ولا رمى الفر لف يسار
وأبو عقيرب يمين رميت اللي بأم صتمه على شان الفرق ثيروح لم أبو عقيرب
ولا ظبطت الفرق سيييييييييد و أخينا بالله واقف وراي صاح الاش وقام يتميلح
يصرف والعبره صاكته و بينما أبو عقيرب ماسكن بطنه من الظحك:D
وسلا متكم

[رحال]

مساك الله بالخير اخوي (( نهار )) وحياك الله يالغالي

موقف مخيف:eek:


:eek: :eek: الحمدلله بان الموقف انتهى بسلام كما قلت عند هذا الحد والحمدلله إنه لايوجد احد تضرر ومره ثانيه كن حذر:rolleyes:


وتقبل تحياتي



===============================


===============================

هلا وغلا اخوي (( عاشق النحم )) وحياك الله

:D :D فعلاً موقف طريف وتشكر عليه اخوي عاشق ويعوض خويك خير .

وتقبل تحياتي

http://www.mekshat.com/pix/gallary/data/images/RAHAAL22.jpg

[قناص الشمال]

السلام عليكم

صبحكم الله بالخير

شكرا لاخواننا الاعضاء على مواقفهم الحلوه وشكرا للمستشار > رحاااااال< على هذا الموضوع

الحلووووووووو صراحه http://smilies.sofrayt.com/1/9/biggthum.gif[Automated by GetSmile]


اما موقفي انا محرج بالمره http://smilies.sofrayt.com/1/p/talker.gif[Automated by GetSmile]

طلعت انا ورجال شرواكم نتقنص حول عقم محية الحره المهم وش لكم بطول السالفه ترصدن لنا ثلاث جيوب

من الجواله مع الهليكوبتر طيارتهم وطرحونا الحمد لله مامعنا صيد وبعد نقاش ومجادله حنا وهم http://smilies.sofrayt.com/1/p/2talk.gif

قالو يالله ياشباب للمركز تكتبون تعهد شي روتيني رحنا معهم للمركز مامعي اثبات انا وعلي ثلاث سوابق صيد ويعرفوني بعض الجوالين المهم اعطيهم اسم من عندي وكتبنا التعهدات يوم جينا نبصم لهم على التعهدات ونمشي والاهي بجية دوريتين من مركز ثاني وانا اناظرهم والامعهم واحد يعرف اسمي زين
لاحول الله الله لايجيبك وش جابك الحين انت انكفشنا عز الله هههههههههههههاي المهم اخوياي بصموا
انا اخر واحد ناداني المدير باسمي الوهمي ورحت له دخلت عليه بالبركسه والرجل اللي يعرفني عندهم
وانا اتصد صد عنه شافني قال اهلين وسهلين بفلان الفلاني اسمي الحقيقي كعه لهم هههههههههههاي
انا مارديت عليه لان اسمي ماهو هو اللي قاله اسمي عندهم وهمي مديرهم مالاحظ ان خويه نطق اسم غير الاسم اللي عنده بالاوراق المهم قال تعال بصم وانا اجيه وابصم وقالو يالله توكلو على الله ولاعاد نشوفكم
المهم الجوال هذا يعرفني زين جاني عند السياره قال انت ما اسمك فلان
قلت :لا ياخوي مشبه
ويناظر بي قال : الا والله انت فلان
قلت : يخلق من الشبه اربعين
قال: وهو متوهم مدري والله بس تشبهه
قلت : لا انا اسمي عندك شفه ماني هو اللي تقول
وانا امشي من عندهم وعرقي يصب ووينك يالديره مليونين ههههههههههههههاي موقف محرج صراحه
http://smilies.sofrayt.com/1/e/rocket.gif

[رحال]

هلا وغلا اخوي العزيز (( قناص الشمال )) وحياك الله يالغالي

موقفك فلم مرعب الصراحه يخرع :eek: :eek: انا حتى لو ماعندي بطاقه راح اقولهم اسمي الحقيقي واللي يصير يصير لكن مراح احط نفسي في موقف محرج مثل ماصار معك وزين انها مشت عليهم ولا كان علوم .

تسلم يالغالي على هذا الموقف وماقصرت
اخوووووك رحااااااااااال

http://www.mekshat.com/pix/gallary/data/images/RAHAAL22.jpg