ماهي أفضل شوزن نص

[أبو داحم]

ياشباب أبي أشتري شوزن نص ولا أدري وش أفضل نوع
فياليت تنصحوني على الزين أبي شي يسوق وكم سعره.
:confused: :confused:

[عليان الليل]

عندك ياطويل العمر الفرنسي زين لكن نادر
الي يجيك زي الخرازة شكله ويسوق بعيد
وبعده ام تاج مرسوم عليه تاج عند بيت النار والقصبة
والصناعة لم تكتب وهي ممتازة مره وزي الخرازة بعد لكن نادرة
وبعدين الامريكي والموجود الان هو الرمنقتون وهو ممتاز
ويجيك كسر زي ام حبه
وفيه الروسي زين ذاتي يدوي التعشيق
زي السكتون يعني اذا بغيت تعشق لازم تكسر البندق

هذا الي انا اعرف
وارجو اني افدتك

[ذيب البر]

للرفع للمزيد من المعلومات عن نصف الشوزن

[عبدالله الصالح]

يا شباب تكفون وشو رايكم بالنصف الشوزن الامريكي ام كلتش
الجديدة ابي المميزات والعيوب للأهمية عاجلاً جداً جداً.......

[نجمة سهيل]

اخواني:
:heart:ابوداحم:heart:
:heart:القصمنجي:heart:
عليكم بالامريكي تراها فوق الممتازه وسعرها ممتاز وخراباتها قليلاه مره وانا عندي وحده امريكيه لها 6سنوات تقريبا والله ماقد خبرت اخوي غير فيها شي . بس فيها مشكله وحده انها تزم((ترتفع))وهذي سهلة الحل انك تروح لاي محل يصلح الاسلحه الناريه ويبردها لك.وتصير البندق100% .
الي اقصدها بكلامي ام كلتش.

[عبدالله الصالح]

الله لايهينك يانجمة سهيل كم تسوى النصف ام كلتش اخت
الجديدة يعني مستعملة ما رمابة راعية الا دستستة...........؟وثاتياً الله يعافيك
بكم الجديدة بالظبط..........؟ وشاكرين على جهودك
اخوك القصمنجي.

[عليان الليل]

ممنوع ذكر الاسعار
او عرض وبيع الاسلحة

[الهلالي]

بسم الله الرحمن الرحيم

أسمع يابو داحم إذا عندك شوزن أم طلقة 0يوجد توصيله مرهمه في المخرطة تركب على الشوزن وتحول بندقك إلى نصف شوزن وسبق لى أن جربتها مع شباب من أهل الشمال . ويقولون أنهم أشتروها من الأردن. وميزة هذه التوصيله أنها تغنيك عن حمل بندقيتين وتستخدم النوع المناسب من الفشق لكل طير . وأسلم لأخيك .

[نجمة سهيل]

كلامك صحيح يالهلالي:heart:
بس اذا انفجرت البندق بوجه الرجال مااحد بينفعه.
البندق اذا ماجتك من اصلها معها وصل لاتخاطر بعمرك وترهم لها . ترى هذي مخاطره . وتذكر اخوي ان هذا سلاح ماهوب لعب.

[المولع]

السلام عليكم ورحمة الله وبركاته

بالنسبه لنصف الشوزل يوجد منها العديد من ام خمس وام اربع وام حبه

بالنسبه لأم خمس:هي أفضل شي للتماتيك وهناك منها الأمريكي وانواعها
1-الرمنغتون 2 - وام سبع ابر3-والونشستروغيرها من الشركات
ام اربع: وتجي في الدرجه الثانيه لأنها تشكل اكثر من ام خمس وقد جا عندي جديدة رمنغتون
واعني بأم خمس وأم اربع :1-أم خمس تشيل اربع رصاصات في بطنها الخامسة في بيت النار
وأم اربع:تشيل ثلاث في بطنها الرابعه في بيت النار وكلهن ضربهن مافيه كلام لكن ام خمس افضل
ماتشكل ولاتردف الرصاص

اما ام حبه فحدث ولاحرج هناك الكثير منهامثلا:
1-امريكية رمنغتون2-امريكيةام سيلان وقد مر علي وحدة طويلة جدا اطول نص مرت علي ويركب عليها ماصورة كاملة -امريكية ام سبع ابر4-امريكيةستيفن

الأيطالية ام جسر وهي طويلة ويوجد منها بدون جسر وهي مخفي ماهي ديك

والروسية وهي قصيرة لكنها تسوق و بندق ممتازة وقدكان يوجد عند واحد من الشباب من القديمات وحدة
لكن مارمت الا 25ام50طلقه فقط ووصلتها حتى ------- ورفض ان يبيعها

والبرازيليةوهي من افضل الأنصاف الموجوده لأن تصنيعها ممتاز بالنسبة للقديمةوقد ورد منها الآن نوع جديد
وطويل
وهناك انواع اخرى ولكن لم اراها وقد ذكرت لي الألمانية-والبلجيكية-واليابانية-والكنديةوغيرها

والبنادق الممتازة البرازيلية-الأمريكية القديمةكل الأنواع-الروسية-الايطالية
ولعلي اجد بعض الصور وانزلها اذا يسر الله الأمر
والسلام عليكم

[الصداوي]

البرازيلية على كلام اخونا المولع وبس

[أبو عقيرب]

يا حيا الله ابو داحم ,,,

اذا كنت تسأل عن الموديلات الجديده فالصراحه ما عندي عنهن اي خلفيه لكن بالنسبة للقديم فسأل مجرب .. افضل بندق ( نصف ) هي البرازيلية وبعدها تجي الامريكيه ..
_ البرازيلية اطول من الامريكية وقليلة جدا خراباتها لكن فيها عيب .. انها تنشب .. وخاصة مع الفشق الاخضر المعروف ..

_ والامريكية بندق ممتازه لكن عيبها انها تزم والزناد يثقل ويبي له مولاة وتصليح ..

_ وأذكر كان فيه ( نصف ) الظاهر انها اسبانيه او فرنسية ما اذكر صراحة التصنيع لكن قبل تقريبا 13 سنه جربنا الرمي به بنفس الفشق مع البرازيلية واكتشفنا انها احر رمي من البرازيلية.. لكن ما ادري عن الخرابات لانه مهيب منتشره كثير ..

فيه امريكية ام اصبع تاخذ 3 فشق .. تشبه الخرازه ام خده .. اطول من البرازيليه لكنها مهيب تومانيك ورميها ممتاز ..وللمعلومية ترا فشق النصف غاااااااااااااااااااااااااالي ...


تحياتي

[أبو داحم]

مشكور ياشباب على هل المعلومات الزينه
وأعزروني على التأخر في الرد:D :D

[العودالازرق]

النص الفرنسيه لكن وينها والله ثم والله انها مسكته وسلامتكم.

[مفتون صيد]

والله شف ابوداحم ....... يمكن الاخوة اعلم مني في النصف ........ لكن من واقع تجربتي لها ...

شريت امريكية ( ستيفنس) بس مهيب ذيك الرمي يمكن علشان متعود على الكاملة .... لكن والله ما عرفت لها وما صورتها قصيره مره ........ لكن شفت مع واحد من الربع نصف ايطالية والله بدون مبالغه روعه ماصورتها طويله وتبرد الكبد ...... رميها حار تقول ام حبه وله اكثر من 15 سنه وهي معه ولا اشتكى منها ما شاء الله وانا شفت رميها هبال ..... والله النصف بعض الاحيان ما توكل عيش اذا جاء مراجل او طيار ولكن ام خمس سلمني عليها ... واذا جتك البنللي هي المنوه والله لا صوت ولا رجف

[قناص الظبي]

عليك يالغالي بام خمس

الامريكية الريمونغ تراها بالحيال عمليه وانا راح هاليومين اصور النص الي عندي وتشوف كيف هي :hot: :hot: :hot: :hot:



خذها من مجرب ولا ترد على الطبيب ...........مع كل الاحترام والتقدير للأعضاء جميع دون استثناء



اخوكم :::((قـــنــــــــــاص الظبي ))::::::::

[ابوفزعه]

احسن نص شوزن ستيفنس بس انقطعت والا :good2: والامريكيه ام سيلان

[زياد2011]

يا جماعة لقيت البرازيليه الجديدة وش رايكم فيها من ناحية الندف او الرجف لاني ابغي شي خفيف ولا يرجف احد جربها ؟؟؟؟؟