محتااااااار ... وابي رايكم يالقروم ....

[الضاحي]

السلام عليكم ورحمة الله وبركاته

ما عندي الا سلامتكم ... ابي شوركم يالقروم وبالذات اهل الخبرة والتجربة

انا نويت اشري حوض ان شاء الله والاختيارات محصورة بين

تويوتا شاص من 2006 او 2005 (الشنب الاصلي) او هايلكس غمارتين دبل 2007

وبالنسبة لي فالهايلوكس بتصير انفع بكثير من الشاص في الديرة بس ادري انها ما توصل مواصيله في البر

ايضا هي الين في المطب من الشاص بس انها اضعف منه عزم وقوة

الهايلوكس يشيل ناس اكثر وبراحة والشاص في الحمول ما يقارن بالهاي

السؤال: هل الهايلوكس الدبل يوصل الى 90% من مواصيل الشاص في النفود والاراضي الوعرة والا يعجز بالذات اذا معك اثنين او ثلاثة من اخوياك وعفشكم ؟؟؟

اشري الشاص والا الهاي ؟؟؟؟؟

وش رايكم يا وجيه الخير ؟

[ابو ناصر2020]

من وجهت نضري الشاص ولاتلفت على غيروه الهايلوكس انا معي هايلوكس دبل وصحيح انه تمشي بلوعر ونفود بس موتر مايعتمد عليه وانصحك بشاص من غير كلم .
وهاذي وجهت نظر وانت حر شف الي يريحك .

[غضنفر]

هايلكس غمارتين دبل
هذا الموتر
ما عليك وشرط يوصلك مواصيل الشاص واكثر
يشيل عفشك وربعك
هذا الموتر

[ممتر البران]

ابو سعد وش جاب حر الطير لفريخ وزه خذه ولا تشاور يا مال الشحم
خذ الشاص واحلق شنبي ان لحدزك التايلندي
ابك تاخذ لك تايلندي وتقارنه ب ميدن جابان
لالالالا
مره ولا تشاور هذي مواضيع ما فيها مشاور تسنك تقول اخذ كامري ولا مرسدس

[ابـوعمر]

والله يا العافور اعرف اشخاص شروا الشاص من شئ في خواطرهم (في راس ابا زمير نهقه) وما ابطا معهم ملوا وباعوه
واذكر شخص بعد ماباع الشاص بعد سنه من مشتراه يقول لوما اشتري نبت في راس نخل بالعربي ما شراه حاجه
اما انت على حسب ان كان عندك سياره اخرى للمدينه اوللعائله فالشاص لابأس به اما كان هو السياره الوحيده فهج عنه
يستثنى راعي الابل اللي يطارد وراهن يحتاج تحميل قعدان وشعير وغيره

[الضاحي]

العزيز ابو ناصر

مشكور يا بعدي على النصيحة والله يلوم اللي يلومك في الشاص

الغالي بلاك باث
شكرا على الراي والشور بس اللي اعرفه انك صاحب شاص فرايك في الهايلوكس من خبرة ومقارنة والا رد فعل لمطب الشاص الاقشر وضيق الغمارة ؟

العزيز ممتر البران
مشكور على الراي ومرورك على الموضوع شرف

الغالي ابو عمر
كلام منطقي وانا اعرف ناس شرو الشاص وباعوه قبل لا يكمل 10000 كيلو وهذي مشكلتي بعد
الشاص ساكن في قلبي يالربع بس اني خايف من فشل التجربة والبديل الهايلوكس الدبل
فهل ينفع البديل يالربع؟؟؟؟

[.أبوعبدالرحمن]

اذا كان هذا علمك فان شاء الله ان الهايلكس ينفعك باذن الله الشاص ماعليه غبار لكن اذا تبغى اخوياك وتروح وبتجي وسط المدينة فالهايلكس بينفعك اكثر وهو اللي بيطربك وذيبان والله


فزي ما قلتلك الشاص ما اقول فيه شيء لكن اللي بينفعك انت الهايلكس ان شاء الله


ولا تنسى الاستخااااااااارة وهي اهم شيء

[فتى شنه]

والله يا العافور اعرف اشخاص شروا الشاص من شئ في خواطرهم (في راس ابا زمير نهقه) وما ابطا معهم ملوا وباعوه
واذكر شخص بعد ماباع الشاص بعد سنه من مشتراه يقول لوما اشتري نبت في راس نخل بالعربي ما شراه حاجه
اما انت على حسب ان كان عندك سياره اخرى للمدينه اوللعائله فالشاص لابأس به اما كان هو السياره الوحيده فهج عنه
يستثنى راعي الابل اللي يطارد وراهن يحتاج تحميل قعدان وشعير وغيره


عزالله ان ابو عمر عطاك العلم اللي يجمد على الشارب ولا يهون المثل حقه هههههههههه

[shaheenshah]

عيب الشاص شي واحد بس


"اذا جربته ما عاد يملى عينك أي سيارة غيره"

صحيح انه وأنت بكرامه كنه ظهر حمار من مطابه ولكن والله انها على قلبي احلى من العسل لعشقي لهالموتر


وتراه خوي تحطه على يمناك

بالنسبة للهايلوكس ماعندي خلفية عنه البعض يمدحه والبعض يذمه بس صدقني ما ياصل ولا 20% من مواصيل الشاص

[راع الابل]

عليك بالشاصي 2008 م الفل الكامل ترا مطبة خفيف وخدمته تفوق خدمة الهايلوكس بعدين اذا جاك نفود تروح تعرعر موترك تنسيم وخرابيط خصوصاًص اذا كنت محملها عفشى//// الشاصي الشاصي حملة فوق طاقته وجربة في البر والديرة وشف .

تحياتي

[جي اكس أر 3]

السلام عليكم

اخي الكريم
بلا شك الهايلكس يشل اكبر عدد عند ما يراقفك احد وهو جيد داخل المدينه ولاكن البر اخي الكريم لا يقارن اطلاقا بشاص وبحكم اطلاعي علي الشاص2007 البريمي يورد جنوط مقاس 17 و 9 سسدات فقط وبكره اماميه ودف لوك وزجاج كهرب وسنتر لوك وهو مريح جدا مثل الند كروزر،،، اما النوع الاخر بدون جنوط و 11 سسته يعني عايدي مره والمطب الله لا يوريك
تحياتي لك

[الضاحي]

شاص 2008 ؟؟؟؟؟؟؟

وين ذا الشاص ؟؟؟
يمكن تقصد 2007 ؟؟؟؟

ارجو التوضيح

[جي اكس أر 3]

السلام عليكم ورحمه الله

اخي الكريم اشكرك علي التوظيح
نعم اقصد 2007 مشكور اخي من الاعماق

[الضاحي]

يا خوي مافيه مقارنة بين الشاص (راعي المواجيب) والهايلكس مع كامل احترامي

باختصار: اذا بتستخدم السيارة في المدينة او على اسفلت بنسبة 70% او اكثر من الوقت فعليك بالهايلوكس

لكن اذا انت تبي سيارة للبر بس وعندك غيرها للمدينة فالشاص ملك بلا منازع

الله يدلك على سبيل الخير

[الربذي]

اخوي امانت طلبت شورنا اقولك تبي الارجح خذ هلي طيب انت تبي تطلع ومعك ناس اصلا الشاص مايشيل الا اثنين الثلاثه فيه شكلهم غلط اما الهلي طبعا اقل بس يالله من فضلك وين تبي تروح له يوم تقول يوصل مواصيل الشاص صح انه سياره الشاص بس سقته وبغيت ارجع ماكمل مشواري مطابه تكسر الظهر
وش حادك عليه الهلي تشيل ربعك تشيل خمسه تمام وايضا اذا بغيت تستعمله لمشاوير الاسره والبيت تشيل لكن الشاص اثنين يعني ماتستفيد منه كثر الهلي غزال النفود والقرار بيدك
انا ارشح الهلي لانه يشيل اكثر لاتقول لخويك مالك مكان!!!!!

[شاص&نص]

الشور لك و لمعوماتك ترا الشاص أبو رفارف و كفر عريض مطبه مثل مطب الاند 97 و تحت لأن كفراته عريضه و فيه 7 ريش فقط
لكن في التحميل تراه بسرعه ينزل
و إن بغيت تاخذ شاص فلا تفرط بالونش و الديف لوك بأي حال من الأحوال و لو مالقيت هالميزتين فلا تشتري و أسأل مجرب و أنا أخوك

أخوك أبو عبدالكريم

[دغيم1]

السلام عليكم
حياك أخوي العافور
بالنسبة لطلبك - الهاي لوكس 2007 - صناعة يابانية - تجميه تايلاند
ومن واقع تجربته في البر وهو دفرنشين - جيد بس تعرف تايلندي - الواجهة ماتتحمل شغل لأنها كلها فيبر - وطلع لنا صوت في الدفرنش - والا وسيع شوي والصندوق اوسع من أول -
والشاص - مافيه كلام - راعي مواجيب - ويزبن الواحد - لكن السعر - والمطب - والسعة في الركاب .
عليك بركعتي الاستخارة
تمنياتي لك بالتوفيق وان يبارك لك فيما اشتريت
تقبل تحياتي - دغيم 1

[الضاحي]

اشكر جميع من شارك في الاجابة على هذا السؤال
وادعي لكل واحد فيكم كل باسمه

وابشركم استخرت وقررت على الملك الشاص ابو شنب الاصلي (ليس 2007)

ادعوا لي بالتوفيق

[هاوي الله]

و إن بغيت تاخذ شاص فلا تفرط بالونش و الديف لوك بأي حال من الأحوال و لو مالقيت هالميزتين فلا تشتري و أسأل مجرب و أنا أخوك

أخوك أبو عبدالكريم

هذا هو الكلام الصح ومايصح إلا الصحيح .

الشاص بسرعه يتعلق عشان الهيكل غير مرن يعني قاسي وبتحتاج الديف لوك ضروري . والونش إستعماله قليل جداً لكن ينفع بقوه في ظروف صعبه .

وأذكر لك واحد من الربع معه شاص يقول لولا الله ثم الونش كان مُمكن إنه يموت أو يجلس مقابل موتره كم يوم . لكن الله ستر .

ومبروك مقدماً والله يعطيك خيره ويكفيك شره .

إذا ماعندك حموله ثقيله على الموتر فعليك بالشاص اللي يجي 7 ريش وديف لوك وونش .