مشكلتي اللتي لم اجد .. والظاهر اني لـــن .!! أجد لها حل !!!

[راعي الكيف]

مشكلتي اللتي لم أجد لها حلا الى الان !!!

(( للمعلومية يمكن هذي ثاني مرة اطرح الموضوع في هالمنتدى ))

ياناس ... موتري كامري والله كامري ... >>> يعني كرييفة ماتخرب ...

وقبل فترة ... قبل تقريبا سنة وشوي ... جاها تقطيع مفاجئ إثر تعبيتي بنزين مغشوش حسبي الله على راعي المحطة ذيك !!!

ودخلتها الوكالة عشان يشوفون وش فيها .. لاني مالي بامور السيارات ابد ... وماخذن بمقولة عط الخباز خبزه !!

وصلخوني بفاتورة 1700 ريال !! ... غيرو اللي غيروه ومدري وش سوو بس ان السيارة ضبطت .... ثم بالتمااام بعد انتهاء الضمان بشهر واحد رجعت الحالة كما كانت ... يعني بعد سبعة شهور ... لان الضمان 6 شهور - ضمان عبد اللطيف جميل -

وكنك يابو زيد ماغزيت !!! ... والله وادخل سيارتي في وكالة البازعي ... قلت يمكن ذولا ابخص منهم ... ويكشفون بالكمبيوتر ويقول ذاك المصري حسبي الله على الظالم ان السيارة يبيلها تغيير بعض القطع وراح توصل التكلفة الى حدود الالف وكسر ... قلت ماهيب مشكلة ... فدوى لتس يالكامري >>> تراه عشري هالادمي ......

والله ويصلحونها ... ثم بالتماااام ... رجعت لها البلوة بعد انتهاء الضمان حقهم بشهر واحد ... مدري هي تستهبل علي السيارة ولا فيها مس ولا فيها عين ؟؟ ... طيب عين على ايش يعني ؟؟ ... كامري وموديل 2001 تماتيك ... وش بيحسدني عليه اللي يبي ينظل ؟؟

ومن ذلك الوقت ... وانا احوس من ورشة لورشة ... عجزت احدن يعرف لها .... والله ان في بالي اني ابيعها لاني ملييييت من بلاويها مع العلم بانها ماقد ابلشتني بشي الله يشفيها إلا الحين ... واضف على ذلك اني من اناس مع اني ما افهم بالسيارات ... بس تراي حريص عليها من ناحية الصيانة والاهتمام ... والدليل اني ادخلها الوكالة كل ماجاها شي !!!

ياناس ... اكسبو فيني معروف ... وش بلا سيارتي ؟؟ ... اكيد كهرب ... لان اخر ورشة قالت لي ان بلواك من الكهرب

أكلتني مصاريفها ... والله اني طفشت منها طفش مايعلم به إلا اللي رزقنيها ...

دبروني يامال الغنيمة


اعتقو رقبة الكامري من البيعة !!


انا لو تضبط السيارة ... راح اكمل دراسة الماجستير عليها ... لانها بالفعل أخذت مني حدود السنة وشوي ... مابقي إلا الرسالة والتوصيات ههههههههه



اخوكم ... ابو سعد ... راعي الكيف

[ابودجانة]

والله مشكله صعبه الله يحلها ويغتق رقبتها

[ريف النشاما]

الله يفك أسر سيارتك من الخراب


شف لك مهندس مضبوط وخله يكشف عليها ولا تفك وتربط فيها بشي لين تتأكد

والمشكلة عندك بالتقطيع يعني يبيلك تصفيه شاملة لجميع ممرات البنزيم

تبدا من التناكي لين تاصل وسط المكينة

كانها مثل السيارات العادية

ولا تفك شي الدعوى كلها تنظيف وإن كان فيها صافية غيرها

ونظف التناكي --- وانتبه لطرمبة البنزيم

طالت هههههههههههههههههههههههه

[راشد الحربي]

موترك هذا ذكرني بسفاري كان معي .. موديله 99 ..كسرة ..
اشغلني شغلة ..كل شوي طالع فيه عله .. شهريا اصرف عليه من 1500 .. إلى 2500 ..تخيل شهريا ..
وبعد سنه تقريبا عرفت انه عين .. وقلعته الله يقلعه .. رايي .. بعها واشتر اختها ..

وبتدعي لي ..

[أعذب الياس]

الله يعينك ياخوي


بس اسمحلي انت غلطان وشلون ما سألت المهندس حق الوكاله عقب ماطلعتها عن المشكله عشان تعرف وش السالفه بالظبط .


ما قد جربت انك تفحصها كمبيوتر ؟؟ ترا فحص الكمبيوتر يعطيك كل بلا وجلا بالسياره.


وبعدين بسألك التقطيع متى يصير وانت تمشي ولا وأنت واقف ؟

واذا السياره واقفه ترجف ولا لا ؟؟


تحياااتي

[راعي كيف]

السلام عليكم ورحمة الله وبركاته
جرب اللي يحطونه مع البنزين اللي بمحطات الدريس وغيرة علبة لونه اسود واحيانً ابيض بعشرة ريال جربتها اكثر من مرة بعددت سيارات وكانت التجربة ناجحة تصفي السيارة ولاتعبي الحين الا بمحطات معروفه او من شركات معتمدة هم اللى مايغشونك .
وسلامك.
ملاحظه : إذا مانجحت الطريقة راسلني على الخاص وبشر بعزك .
اخوك المحب راعي كيف
ابو ناصر

[الكاسر23]

أخوي راعي الكيف

اذا كانت العلة فقط من التقطيع، فهناك أمرين:
الأول: ناتج عن وسخ في تانكي البنزين أو صفاية البنزين أو طرمبة البنزين رايحه فيها، او مجرى (لي) البنزين إلى أن يوصل الى البخاخات. وتحتاج إلى فك التانكي وتنظيفه وتغيير طرمبة البنزين والصفاية وتغيير الليات. هذا اذا انك تعبي بنزين من محطات قديمة خزاناتها مليانه وسخ او اتربه (خصوصا المحطات اللي في البر). ونتيجة إلى انك تمشي على التانكي حتى تولع اللمبة الحمرا ثم تعبي التانكي، هذا يخلي الوسخ يطلع إلى الطرمبة والصفاية والليات، ويعدمهن عليك.
الثاني: ان يكون بسبب الكهرباء في السيارة، وذلك بسبب عدم وزنية الديلكو او عدم تغيير البواجي لفترة طويلة (أكثر من 6 شهور) أو اسلاك البواجي تعبانة.
وعشان اريحك .. رح للصناعية القديمة (طرق الخرج) وانت في شارع الامير سلمان ومتجه شرق، يجيك اول اشاره رح منها يمين ويصير وجهك جنوب (هذا شارع الجمعية) بعد ثاني تقاطع (ثاني فتحة للصبات اللي في نص الشارع) رح يسار، ويصير وجهك شرق ، امش في هالشارع إلى ان توصل تقاطع كبير ، قبل التقطاع هذا بورشتين، تلقى في يمينك ورشة اسمها (النيلين) تلقى سوداني عود اسمه (عوض) هذا كان من كبار المهندسين في تايوتا طلع وفتح هالورشة، ان شاء الله تلقى عنده حل لمشكلتك.
كان الله في عونك
اخوك
الكاسر23

[راعي الكيف]

ابو دجانة /



الله يسمع منك يارب





ريف النشاما /



يخوي والله اني حاطها عند كهربائي ممدوحن لي بالحيل ... ويوم جيته ... قال والله يا سيارتك ذي صرت احلم بها !!!



عجز يفهم وش علتها !! وعسى الله يعين !!





راشد الحربي /



فال الله ولا فالك ياخوووي ...!! ... والله ياهالسيارة تسوى عندي عيوني ان كانك ماتدري >>> الاخ عاشق ههههههه



ويمكن الله لايقوله يصير اللي انت تقول .... بس أسأل الله ان لايحدني على هالخيار !!





أعذب الياس /



ياخووي والله اني كذا مرة قد سألت المهندس ... ويجلس يطوطي علي وانا والله مادري وش يقول بس مسوي فااهم اني اسأله !!



وبالنسبة لفحص الكمبيوتر .. قد فحصتها عن البازعي الله يفشله ... وطلع لي المشكلة وطلعت مهيب المشكلة !!!





راعي الكيف /



ههههههههههه كنك داري ... جربت هاللي كلمتني عنه ... ونفس الشي ... ماصار جديد .... وش توقع هقوتك ؟؟؟



لا هنت ياحبيّبي وخازنك للفزعات يابعدي



الكاسر 23 /

ترا للمعلومية ... مغيرن كل هاللي قلت عنهن قبل حدود خمس او ستة شهور ... ورجعت الحالة كماكانت ... وموب طبيعي ان عمر هالقطع بهالقصر ؟؟ لاسيما اني شاريهن اصليات ..! .. البلى في شين عجزت القاه ... مار اسأل الله انه يعيد لي هالكامري ويجعلها كما كانت ...


وللكل اشكر مروركم الجميل ...

ولكم مني التحايا

[راعي الكيف]

للرفع لمن عنده علم

[سلطان العوني]

هلا والله باخوي راعي الكيف
كانت عندنا سياره من نوع كورولا
ومشكلتها تقطيع بس مو من الطربه ولا الصفاي
طلعت مشكلتها من اسلاك الظفيره غيرناها كامله
جرب وشوف بس قبلافحص الظفيره بالكمبيوتر عند 3ورش
واتمنى اني افدتك

والله يكون بعونك

[شبح الصحراء]

يا راعي الكيف لا تهمل جانب العين لأن موترك كامري2001 فالناس هالوقت تحسد على اتفه حاجة حتى الهندي على سيكله يحسدونه والنصيحة من واحد مجرب اذا عوكست معاك السيارة بعها بيعة كلب سرق هله ولا توجع راسك انت امامك رسالة ماجستير ومانت فاضي للورش ومشاكل الورش ، اشتر ان شاء الله ددسن تمضيك لين تنفك الأزمه .

[طناف]

نزلت موضوع قبل أقراء مشكلتك وقريبة منها لجمس .

والكل يفتي من عندة والبعض قال عين ؟
عـــــــيـن
8
8
8
ياالله جعلها الطسس
الشبحات والرنجات مضيقة الشوارع ولا ملت عيونهم

نصيحة :لما تروح لفني أحذر تقول لة بأني عبيت بانزين مغشوش وأعتقد بأنة ليس سبب .
بل تكرم علية باالصمت وكأن المشكلة جديدة ولاتطري البازعي وجميل والماجستير . وبأذن الله تلقى الحل .
والله يعتقها من البيع ويشفيها

أنالله وأنا الية راجعون

[فتى الوادي]

يمكن من اسلاك البواجي .....