بعد ما طاح الفاس بالراس ... وش أزين؟

[لعيون خلاني]

السلام عليكم ورحمة الله وبركاته ... وبعد :
قصتي طويلة مرررررررررررره لكن ودي أختصر لأني مطفر من كثر ما عبيت هالجيب بنزين ودي تشوفون لي حل غير إنكم تقولون لي بع الجيب وفك عمرك هذا مستحيل لأنه على ما قيل المهتوي يقطع المستوي
وأنا بلاني ربي وانقردت من بعد ما شريت الجيب وعلى فكرة تراه باترول 99 ربع الله لا يوريكم والله العظيم طفرت من البنزين إذا فيه أحد عنده حل اقتصادي يوفر في استهلاك البنزين وللمعلومية أكثر الجيوب اللي مثل سيارتي يقولون إذا فللت بنزين يمشي معك من حدود 400 كيلو إلى 415 كيلو وأنا إلى يومك ما مشى معي أكثر من 350 كيلو والله مدري وش السالفة والحين أكره شيء في حياتي ما ودي أمر من جنب محطات البنزين لأني كل ما مريت يتنحنح الجيب ويقول بنزين الله لا يهينك خرمانين ...والله مشكلة وش الدبرة يا رجال شاكر ومقدر لكم .:(

[القماري]

الجيب باترول عموما يصرف بنزين ( صرف ملفت للنظر وموجع للجيب والقلب ) بس ترى الموتر مسكت ومايفشلك في الطعوس والرمول .
عندك حلين ( إما تصبر على الصرف أو تصرف نظر عنه ) حتى هذه الساعة لم نرى أحد يقول أن باترول عنده لا يصرف كثير ، وقد جاوبتك من واقع خبره ومعرفة بالباترول كثيرا ( جربت 84 ، و89 و 95 والأن 2002 ) وجميعهم ربع وجميعهم يصرفون بنزين.

[لعيون خلاني]

شكرا لك أخوي القماري على الرد لكن أقول الصراحة تراي ما ودي أبيع الربع لأنه معجبني وينشد فيه الظهر بالنفود وغيره وللمعلومية أنا طالب وعايش على مكافآت وأنتم أدرى بالوضع أبي حل ......!؟

[القماري]

قلل مشاويرك :) ويقل الصرف
سمعت أنه فيه مادة تضاف للبنزين وقد تفيد (بالطبع لا أنصح بها ولم أجربها ) وقد يكون الكربريتر بحاجة لتنظيف وقد يكون بواجي الأشعال قديمة الأفضل تغيرها وتغيير مصفي ( فلتر ) البنزين وقد يكون مقاس الكفرات أكبر من المقاس الأصلي ( هذا يؤثر أيضا ) وقد يكون المحرك به خلل فني بحاجة لإصلاح..
كل هذه أسباب قد يكون لها تأثير مباشر في صرف البنزين ، لكن كما ذكرت لك سابقا الباترول يصرف وعلى العموم كثير من سيارات الدفع الرباعي تصرف وقود أكثر من غيرها.

[لعيون خلاني]

مشكور وما قصرت ما خاب ظني فيك ألف شكر لك يالقماري :good:

[الشيخ]

عندي لك حل بس اذا كان موترك كاربريتر
تروح لمكيانيكي مظبوط وتخليه ينزل عيار فتحات الكاربريتر ويقل صرف البنزين ويقل عزم المكينة بنفس الوقت او انك تصغر حجم الكاربريتر والعملية هاذي مكلفة يعني تنقص العيار اسهل وارخص
بس اذا كان بخاخ ما ادري اذا كان في مجال لتقليل العيار لعيون البخاخ
بس لو انك تستشير ميكانيكي مختص بالجيوب ومكاينهم اكيد عنده حل لمشكلتك
بس لا تنسى ان اي شي يقلل صرف البنزين يقلل عزم وقوة المكينة ويمكن يقلل عمرها

[لعيون خلاني]

تسلم يالشيخ وما قصرت مقدر وشاكر لك على الردألف شكر :good:

[قتال]

السلام عليكم ورحمة الله وبركاته ،،،

حبيت أنبه على أن مصرف البانزين يعتمد بشكل أساسي على طريقة إستعمال السيارة ..

فمثلاً .. السرعة الزائدة أكثر من 120 كيلو بالساعة يساهم مساهمة واضحة بصرف زائد للبانزين ..
ثانياً .. إستعمال السيارة داخل المدينة يستهلك وقود أكثر من إستعمالها في الخطوط الطويله ..
ثالثاً .. قومة السيارة أو فزتها بعزم كبير يصرف أكثر من السلاسة في قومة السيارة ..
رابعاً .. التحميل بالسيارة بأوزان زائدة تساهم أيضاً في الصرف الزائد للبانزين ..

........................... ودمتم ..

[لعيون خلاني]

مشكور يا أخوي قتال ويعطيك ألف عافية على هالنصائح :good:

[الاجودي]

انا معي باترول 2000 بابين


بس صرفيته مو بهدرجة يعني داخل المدينة يمشي حدود 500كيلو


ومع الخط حدود 750 كيلو


بس لاتحن الموتر خله ياخذ راحته


يعني موب لازم الضغط ياصل 3 لا يعني2 كافي

[لعيون خلاني]

أنا هذا اللي خلاني أكتب هالموضوع بالمنتدى يعني أبيع التسع وأشري 2002 والا وشلون مع الشكر والتقدير :)

[مهيلان]

انصحك يا صاحب الموضوع
بان تذهب لصناعية بريده وهناك ستجد من يركب لك
كلبليتر ( التيما ) وسترتاح من الصرفيه وان شاء الله تدعو لي

ودمتم سالمين

[لعيون خلاني]

مشكور يا أخوي مهيلان وما قصرت على النصيحة لكن ودي استفسر منك هل الكلبليتر حق التيما يركب على الباترول بدون ما يسبب أي أضرار على السيارة وإذا كانه مجرب وأثبت فعاليته ممكن لو سمحت تذكر لي أسماء محلات متخصصة هناك لأن الصناعية كثيرة المحلات فيها ودمت سالم:)

[Y&Y_4X4]

البنزين ما رايح ينزل سعره عندنا وهذا هو الحل الوحيد


يأخواني البترول عندنا غالي بالحيل شوفو لنا حل باهال الموضوع ( اقصد السيارة ) ؟؟؟؟؟؟؟؟؟؟؟؟؟؟؟؟؟

[laith]

اخوي لعيون خلانك....

معاناتنا وحده في الصرفيه ويمكن ازود...شايف هاب الريح اللي ..بالصوره.. هذا سلمك الله موديل 91 وكان يضربه به المثل في الصرفيه....
نصحني احد الاخوه بتخييط الابر اللي في الكربوريتر.. تقريبا نفس طريقة الاخ فضيلة الشيخ..الله يعينك.

ليث

http://www.mekshat.com/pix/upload/images/niss.jpg

[ابو راشد]

الحذر ثم الحذر انك تركب غير النيسان بترول اذا كنت راعي بر ومقطع عراجيب ولا عيش ف المدينه وخذلك ايكو تراه يخيس البترول فيها

[mohamad1121]

احفظ موترك ولا بتلقى اقرد منه البنزين تغير مدري النظر تغير
سيارتك وتعرفها احسن ماتجرب موترا ثاني،، صديقي عنده 2002 نيسان ابوقير تماتيك وقير عادي (مقرود ) لاخرب قير موتره (الله يكفيك ويكفه شر الخراب) وش بيقول قير مخلط

النصيحه واجبه في وقت الشدايد،،،،

لا لن اقول البيتين تعبت؟؟؟؟؟؟

[Y&Y_4X4]

اخوي mohamad1121 اعد الله يعافيك ترى في الاعادة استفادة القير وش فية ؟

[mohamad1121]

بيني وبينك ابي انصح العضو لعيون خلاني بخصوص سيارته البترول (( اللي يشكي من كثرة صرف سيارته من البنزين )) وقلته امسك مقرودك قبل تطيح في اقرد منه واعطيته مثال عن زميلي وعنده بترول 2002 وقلته على موضوع القير الجديد للنيسان ونسيت اكمل ان صرف السيارات اليابانيه من نيسان اكثر والدليل شكوى الكثير ومنهم تذمر زميلي المستمر من صرف البنزين وبالهبل .
اما موضوع القير الجديد للنيسان فهو قمه في التكنولوجيا والفخامه واتمنى ان تضيف شركة تويوتا هذه الميزه( وكانت كلماتي كمداعبه .

اشكرك ياعزيزي على التنبيه فقد رجعت الى المشاركه ووجدت انني سهيت عن ايضاح الصوره بشكل صحيح

ابوكاسر

[Y&Y_4X4]

الله يعطيك العافية يأبو كاسر وشكرا للأيظاح ,,

[لعيون خلاني]

شـــــــــــــــــــــاكر ومقدر للجميع اللي حاولوا جاهدين وباذلين قصارى جهدهم إنهم يجدون لهذه المشكلة الأقليمية التي يعاني منها أكثر أهل البر والمقانيص والوناسة لكن على ما قيل الحلو ما يكمل البنزين الظاهر إنه ما يبينا تستانس لكن ( باترول حتى المــــــــــــــــــــوت ) ..........