وسائل النقل الأخرى

[كتاب]

شفت هالصورة في الانترنت وقلت خلني أروح لاخواني في مكشات وأهذر يمهم

أول شي خطر ببالي ليش كل الاجهزة والاختراعات والعربات لها استعمال ممتاز في البلدان الثانية واحنا ما عندنا إلا الاستعمال السيء . وما عندنا شغل لها الدبابات الا التفحيط في أماكن التنزه ؟

النقطة الثانية أن الصورة تبين ناس يركبون هذه الدبابات لرحلات تستغرق يومين خميس وجمعة أو سبت وأحد. فخطر ببالي كيف هم يقدرون يمشون حالهم بأقل القليل وحمولة صغيرة على دباب بينما احنا لازم نشيل البيت كله معانا في الشاص أو فوق الباترول ؟ وأقصد الشباب طبعا . أما العوائل فطبعا موضوعهم يختلف .


http://www.heavenleeacres.com/Photo_Gallery/Socials/Site_20_ATV_Weekend.jpg

خلاص يا اخوان
قلت اللي في نفسي وجزاكم الله خير.

[كتاب]

تبون الصراحة ؟

لما أشوف مثل هذه الرحلات أتمنى أكون معاهم
وتشيل معاك ما خف حمله وارتفعت أهميته . طبعا في هذه الصورة ما معاهم أغراض لأنهم في جولة قصيرة لكن بعضهم يروح يومين أوثلاثة ( وحتى أسبوع ) ، وهذا هو الاختبار الحقيقي .



http://www.whistleractivities.com/usrimage/atv4group.jpg

[مكشاتي غير]

احنا مشكلتنا ان اهم شي بالكشته

الاكل وكل اللوازم اتكون كامله جنى في البيت,,, التلفزون ومكيف والكوايه وكمبيوتر

عيل الافضل الكل يكشت في حوش البيت

حلات الكشته بتامل الطبيعه وبعض الصعوبات الي تخلي للكشته ذكرى طيبه

وتسلم الغالي عالطرح الطيب

[شبح الصحراء]

عاد تخيل نفسك كاشت للبر على دباب فضيحة :D تلقاك داق لطمه وماغير تتلفت يمين يسار لا يطلع عليك واحد يعرفك وتصير فضيحة بجلاجل :p .
ياخي هالدبابات للأطفال والمراهقين في الثمامة وما صممت للرحلات الطويلة أولاً ما تشيل عفك (فراش نوم - جراكل ماء - حطب - مواعين طبخ - عزبة القهوة والشاهي ... الخ ) ثانياً البنزين في هالدبابات يخلص بسرعة ما راح يوصلك للمحطة الثانية في طريق رحلتك! :light:. وبعدين وش دخلنا بالغرب لازم نقلدهم يعني أخاف لو دخلوا جحر ضب دخلنا وراهم :no2: .

[كتاب]

أخي العزيز شيخ الصحراء
( معذرة غيرت اسمك من شبح الصحراء إلى شيخ الصحراء من التقدير والاحترام لك )

أخي العزيز احنا تركنا الناقة والحصان وصرنا نركب سيارات ، هذا ما هو تقليد للغرب ؟

القصد ليس الاعجاب بكل شيء يجي من الغرب بس هو شي يعجب الانسان أنهم يتمكنون من الترحال بأقل القليل وهذا في رأيي أقرب إلى البساطة منا نحن الذين لا نستغني عن أي شيء من وسائل الراحة . وساعات أتساءل أننا نقول عنهم ماديين بينما هم بسيطين في أغلب أمورهم . وعلى كل حال هي مجرد فكرة خطرت ببالي وعجبتني وقلت أشارك الإخوان فيها . تعرف النفس قشرا وكل يوم الإنسان يشتهي شي غير، ويتمنى التغيير .

ويا جماعة اللي يشوف شي في التلفزيون أو الانترنت ملفت للنظر لا يقصر يشاركنا معه .
أنا صراحة عجبني برنامج عندهم اسمه ( البقاء ) يرمون أربعة أو خمسة أشخاص في وادي أو غابة أو صحراء ويخلونهم أسبوع أو أسبوعين يدبرون روحهم بأية طريقة ، وقامت قنوات عربية تحاول تقلد هذا البرنامج لكن أين الثرى من الثريا . بصراحة الغربيين مبدعين أما احنا فمحطاتنا فاشلة وما عندها إلا الخرطي . أرجو أنا ما نزعل من الحق .

[أيمن]

السلام عليكم ورحمة الله وبركاته

والشكر موصول لصاحب الموضوع عن وسائل النقل الأخرى ..
وإضافتي بخصوص الإشارة إلى أنه يوجد لدينا وفي بلدنا ما هو أفضل من عمل الغرب ودباباتهم ..

في محافظة الأحساء وجدت أصحاب الخيول يجتمعون ويقومون برحلة برية بالخيول ..
يجتمع في مكان معين ما يقارب 30 فارسًا، ويدخلون في الصحراء ما يقارب 30 كم ويمضون وقتًا ممتعًا رائعًا لمدة يومين إلى أربعة أيام ..

وقد تكرر مثل هذه الرحلة أكثر من مرة ولأكثر من مكان ..
لعلي أقوم بتصوير رحلتهم مستقبلا وإطلاعكم عليها وعلى بساطتها وجمالها ..

تحيتي

[سبيع الغلباء]

أخوي كتاب......
هاذولا من الطفره موب من حوب الاستكشاف او التجارب
انا هاذا رايي ولا وشرايك
وبنسبه للقش
هذولا كانهم بهايم
يعني ماعندهم نظافه ولا طهاره يعني مايحتاجون مياهه


والااكل اكلهم خربيط موب مثلن لحمه ورز وتفرنك

انا هاذا رايي ولا وشرايك

[هاوي الله]

أنا صراحة عجبني برنامج عندهم اسمه ( البقاء ) يرمون أربعة أو خمسة أشخاص في وادي أو غابة أو صحراء ويخلونهم أسبوع أو أسبوعين يدبرون روحهم بأية طريقة ، وقامت قنوات عربية تحاول تقلد هذا البرنامج لكن أين الثرى من الثريا . بصراحة الغربيين مبدعين أما احنا فمحطاتنا فاشلة وما عندها إلا الخرطي . أرجو أنا ما نزعل من الحق .

حياالله كتاب

طيب وش رايك ياكتاب أوديك للربع الخالي مامعك إلا ثوبك وأتركك وأرجع لك بعد 5 أيام , بتصير رحله مُمتعه صح ؟

هههههههههههههه إسم البرنامج ( الإنتحار ) ههههههه

تحياتي ,,

[كتاب]

هههههه

جزاكم الله خير على المرور والتعليقات الطيبة

أخوي أيمن أنا مثل ما قلت قبل القضية ليست انبهار بالغربيين . أنا أعجب بأي ناس يحاولون يسوون شيء جديد ومتميز عن المعتاد ولذلك عجبتني السالفة اللي ذكرتها عن الفرسان اللي يرحلون على الخيل . الله يعطيك العافية وعسى والديك في الجنة إذا قدرت تجيب لنا صور وتقارير عن هالجماعة وشي بسيط عن رحلاتهم وين يروحون وكيف يدبرون حالهم وما هي أغراضهم اللي يشيلوها معاهم ( باختصار طبعا ) فلا تقصر .

بارك الله فيكم .