قيمة فرت حمر موديل 67

[دسم الشوارب]

السلام عليكم
مساكم الله بالخير
يالربع انا لقيت عند واحد فرت (فورد) حوض احمر موديله 67
الموتر في حالة ممتازة وبديه سليم ومكينته وكل شي على ضمان صاحبه
لكن المشكلة الرجال يقول مسيوم بعشرين الف .. ودي ازوده لكن ما أدري كم قيمته الفعلية علشان اسوم سومة لاتغبنّي ولا تبخسه
ماخاب من استخار ولا ندم من استشار
لذا ارجو الافادة من اهل الخبره .. فكم يسوى ؟ وهل تنصحوني فيه ؟
وجزاكم الله خير

[دسم الشوارب]

وينكم .............

[راع الابل]

والله ياخوي فيه واحد يجي يعرض سيارته في مزايين ام رقيبة وعرضها بعد في مزاين الحروب وهو حربي من اهل بريدة يعنى قد سيماً سيارته وهي نفس موترك حاول تحصل احد يعرفه واسئله

والشي التراثي ترا ماله ثمن باين ساعات فوق وساعات تحت

تحياتي

[بواسامه]

هلا بدسم الشوارب
هالمواتر مابها غبن
مالها الا رغابها فقط اذا انتي منهم ولك مصلحة فيه فزاود
وابو مرضي اللي هو السوق محد يناظره الا شرواك راغب
ولا كقيمة فصعب التحديد بخصوص الاثار:D والمقتنايات لانها له حكمها الخاص
ورأيي الشخصي:good:
اربح العافية وترى الددسن ابرك منه وانفعلك 000بس لاتزعل
ألا اذا انت لك نية تشارك بالجنادرية:D فتوكل على اللي خلقك واشتر
وفقك الله

[cruise]

25 الف ولا ازيد عليها قرش ..............هذا اذا حالته ممتازة ................لاكن اذا كنت هاوي السيارة راح تشوف انها تسوى اكثر وراح تدفع .........هذا رايي المتواضع ........................

[دسم الشوارب]

حياك الله ياراع الابل . ماتدري كم ساموها منه راعي ام رقيبه ولا كم حده ؟ علشان اخمن واقيس ؟ جزاك الله خير .انتظر ردك
حياك الله يا بو اسامه .. والله انك صادق ان ابو مرضي قواني هالمره :) حياك الله وسرني نصيحتك
حياك الله ياcruise .. الله يجزاك خير على دخولك وتعليقك .. لكن هل سبق وشريت مثله؟ .. ووش رايك فيه

[راع الابل]

والله ما عندي علم ولكن اذا انت نواوي افرق السومة بمائة ريال وشف يبيعلك واشرط انك تفحص الموتر واذا فحصت الموتر وطلح حسب كلامة اشتره

تحياتي

[طناف]

السيارة أذا على كلامك ترى تسوى أكثر

بعدين تقول السيارة مسيومة بـ20000 وتسئل كم أسومها .
يأما أنك تفرق السومة أولاتسوم بأقل وتبخس السلعة

والرزق على الله

واللي يرغب ياطى الحارررررررررررر

وسلامتك

[نمر بن حثلين]

مالها الا عاشق الفروت مهراس
اصبر يجاوبك


وانا رأيي من رأي ابو اسامه
كانك تبي تستخدم ماظن الموتر ينفع لك وتبي تبلش به
مثل ذي المواتر الاثريه للزينه فقط يعني تطلع به مشوار خفيف وتوقفه
اما كل يوم تبي تستعمل ما ينفع والدتسن ابرك لك

[دسم الشوارب]

الله يعافيك اخوي راع الابل : الظاهر هذا اللي بسويه وعساها تجوز لهم الميه . جزاك الله خير وما قصرت في النصح والتوجيه

حياك الله يا طناف :: أسأل بلاني والله رجال احب العجله ولا لي بالطويله وابي افرق السومة فرق لايغبني ولا يبخسهم ..وهي السومه
حياك الله يا نمر بن حثلين : أي والله الحقنا بمهراس وينه تكفى . والموتر مابي استخدمه ابي اشخص به . وبعدين حتى لو استخدمه مهوب مقصر
القديمات قويه وحبيبه وتصبر ولا عليها قصور . واشكرك على النصيحه

[دسم الشوارب]

وين هو مهراس يلحقنا بالخبر اليقين

[طناف]

دسم الشوارب

والله ودنا بااللي يزودك


فية موديلات أقدم منة تستعمل وتكرف أيضاً .
النظيف نظيف
والخردة خردة

أفحص الموتر جيد!!!

وفالك طيب

[مهراس]

السلام عليكم ورحمة الله وبركاته


الأخ دسم الشوارب، اشكرك واشكر الأخوان اللي يبغون رأيي في هذه السياره، الكلام يطول عن تسعيرالسيارات القديمه لوجود كذا عامل يؤثر في السعر ولكن أحاول أختصر:

السياره سعرها طيب لك في هذه الحدود اذا كان 1- البودي نظيف ,اعني نظيف، 2- المكينه نظيفه صوت ومنظر وعزم (لازم تسوق السياره) وما عليها زيوت تهريب، وفرش السياره ايضا نظيف وماهو تلفيق.

شي ثاني هذه السيارات تحتاج مشاوير على الأقل في الأسبوع مرتين وأحسن مشوار على الخط السريع بعيد عن الزحمه 20 كم أو أكثر.
الفرت موديل 67 قليل ونادر وهو ليس شعبي مثل الموديلات اللي قبله ولكن يظل سياره قديمه كلاسيكيه.

لازم يكون بالك طويل، يمكن يخرب عليك أحيان أو تتوهق في الحصول على قطعه فاذا تبغي الدح لا تقول أح، وثق تماما ان ليس هناك ما يضاهي قيادة سياره قديمه بعد تغسيلها والتنزه بها على الخط السريع، سوف ترى الكثير من المعجبين اكثر مما لوكنت تقود فيراري.

اتمنى لك التوفيق والأستخاره واجبه بارك الله فيك، ووافينا بما يستجد لديك.

وهذه صوره لنفس موديل السياره من الأنترنت


http://www.mekshat.com/pix/upload/images30/mk6074_67r80.jpg





مهراس

[دسم الشوارب]

اخوي طناف اشكرك امرورك ونصحك
اخوي مهراس ما قصرت وجزاك الله خير
عز الله انك عطيتني كتالوج والصدق انك رغبتني فيه (من بغى الدح ما فال أح)
ادع لي انت والشباب بالتوفيق والخيره
وان شاءالله اخبرك المستجدات

[دسم الشوارب]

عندي سؤال يامهراس
كم موديله اللي في الصوره

[دسم الشوارب]

ما قلت لي كم موديله

[دسم الشوارب]

الظاهر منتب حولي
الله ياقاك

[SilverSniper]

عند عمي فرت أحمر مديل 66 ... مسيوم منه الحين 60 ألف.. ولا يبغى يبيع .. يقول هذا مثل العقار.. كلما يقدم يزيد سعره.. :)

[مهراس]

دسم الشوارب:

الفورد اللي في الصوره موديله 1967 (Styleside) أي مصفح ومقاس (F100)

وانا آسف اني ما كنت متواجد يوم سألت، وعلى فكره معظم معلوماتي عن الفروت من اللأنترنت وبعض الكتب عن الونيتات الفورد. تقبل تحياتي.

مهراس

[دسم الشوارب]

هلا بك يا SilverSniper واشكرك للافاده والمعلومه المثريه يارجل ياطيب
أشكرك اخوي مهراس وأرجو اني ما غثيتك لكن انت مرجع دلوني عليك وشورك له محل عندي
وأشكرك ثانيه وثالثه ورابعه وجعلك ذخر

[مهراس]

يامال الغناة يادسم الشوارب

[شرشبيل]

هذا النوع 66 حجم 350 وسعر غالي جداً وانا شاريه توني بسعر عالي وعليه ماكينة 454
وهذي صورته http://www.mekshat.com/pix/upload/images32/mk50472_1966.jpg (http://www.mekshat.com/pix/upload/images32/mk50472_1966.jpg)

[دسم الشوارب]

ماشاء الله .موتر مسكت .تهريه بالعافيه.. كم كلفك ياشرشبيل ؟
جاوبني صدق :) ؟

[فكسه]

دسم الشوارب عساك بخير انت وكل من يقراها وبعد اسمحلي بتلقف بالنسبه لسعر يعني حليو موعالي حسب ماعرف انه فيه واحد فى تشاليح الحاير يبيع قطعها ويبخسها وانا اروح عنده ويجون ناس ويشترون منه قطع ويسلونه عنها طبعا انا اروحله عشان قطع القلابات لان عنده صغير وكبير اذا تحب اسله حاضر ومن عيوني وتامرني امر والله يوفقك؟ بس تبي ريي كسرة هلكس 79م احسن امن منه واذا ان الشي يحققلك شي فى نفس فتوكل والله يسرامرك محبك ميلر؟؟؟شكرا.

[دسم الشوارب]

اشكرك لإفادتك يا فكسه او ميلر ..قدها وكفو ..جابك الله .. لكن لاتشط على عمرك الله لايهينك .. عطني اسمه لأني شريت واحد مكسر ومنطول وابي ارممه الله يعينني .