هل تويوتا يضمن البازعي؟؟؟

[كاتم2]

السلام عليكم
عندي سؤال
هل تويوتا عبداللطيف تضمن سيارات البازعي؟
لأني قررت أشتري كامري من غير عبداللطيف وش تنصحوني أشتري0

[ملاعب الريح]

اللي سمعته إنه يضمن تجيب له الموتر قبل ما يمشي 1000 كم وتفتح عنده ملف للصيانه والضمان بمبلغ 1500 وأتمنى إنك تتأكد من المعلومه لأني ما تأكدت...........


(ملاعب الريح)

[القويعي]

على معتقد ايه

لكن عند البازعي صيانه ازين واخلاق بعد

[خيال الغلبا]

انا اشهد ان البازعي افضل بكثير ....................

[هولوكس2005]

اخوي لازم يفتح ملف لسيارك وفتح الملف على حسب قيمة سيارك
ويصير موترك يضمنه ابو لطيف


زي الجيب الجي اكس أر يوم اروح لمهم كان قيمته 137ألف قالو عطنى ثلاثة آلاف قلت وراه ماتلفقونا

[ذيب الغداري 1]

اخوي لازم يفتح ملف لسيارك وفتح الملف على حسب قيمة سيارك
ويصير موترك يضمنه ابو لطيف


زي الجيب الجي اكس أر يوم اروح لمهم كان قيمته 137ألف قالو عطنى ثلاثة آلاف قلت وراه ماتلفقونا


ايه والله يلفقونها ازين

[ابوطاقية]

مواصفات البازعي افضل وصيانتهم افضل وجميع قطع سيارات البازعي يابانيه اصليه لاكن وارد ابولطيف الله يصلحه تلفيق نص ياباني ونص صيني
حسب القوانين لمنتوجات تايوتا ان الوكيل يضمن جميع منتوجات تايوتا وفتح الملف لايتعدي 150 ريال واذا رفض تاخذ خطاب رفض موقع من ابولطيف وترسله لمندوب تايوتا بالشرق الاوسط بالامارات .
واحد من الزملاء عنده سياره تايوتا ويبي يبدل بسيارة تايوتا من الوكاله
راح للوكاله عشان يعطونه سومة لسيارته المستعمله لاكن للاسف الاخوان المصريين بالوكاله ما اعطو السياره سعرها ونزلوها باسعار بخسه بقوه وطلب منهم ورقه رسميه بتسعيرتهم بعدها
اخونا راح للمعارض وقيم السياره عند شيخ المعارض واخذ ورقه مختومه من شيخ المعارض وكان الفرق شاسع بين تسعيرة المعارض وابولطيف
ارسل جميع التسعيرات بالفاكس لشركة تايوتا بالامارات وجاه الرد بعد اسبوع باخذ سيارته بتسعيرة شيخ المعارض وخصم على السياره الجديده وتوبيخ ونقل لموظفين السيارات المستعمله بشركة ابو لطيف
والسلام ختام

[خيال الغلبا]

اخوي ابوطاقية مع احترامي لك ... تضل هذه امنية لي ولغيري

عندنا بها الديرة والله ماتلقى الا اغش والكذب والخيانة والجشع ...هذي هي صفات وكلاء السيارات عندنا

[كاتم2]

مشكورين على الردود جميعاً والله يوفقكم

[جي اكس أر 3]

السلام عليكم
اخي العزيز : كاتم 2
بخصوص سؤالك عن ايهم احسن عبد اللطيف او البازعي نعم اقول لك البازعي افظل بكثير من سعر وصيانه وتوفر قطع غيار
ويكفيك ان السياره خليجيه وتحمل مواصفات لا يوردها عبد اللطيف مهما كان فنصيحتي تختار البازعي افظل بكثير ،،
اما بخصوص فتح ملف عند عبد اللطيف جميل اذا كانت السياره مورده من الخليج انا اخي الكريم اشتريت سياره من عمان
جيب V X R جديد بريمي 2006 وتم شحنه الي الرياض وعند استخدامي لسياره وجدت الرادو لا يعمل بشكل الصحيح
وذهب الي ابو جميل وطلب مني فتح ملف لسياره بحجه انها ليست منه وطلب مبلغ 5000 ريال هل هذا من المعقول ؟
فيه واحد شرواكم اعرفه يعمل عندهم كمهندس بلورشه ذهبت له وادخل سيارتي وتم عمل الرادو بمبلغ 100 ريال
شامله فتح الملف والي يومك هذا وانا اعمل الصيانه عندهم ،،
فلا تتردد اخي العزيز بشراء من البازعي وجميع سياراته من وكاله الفطيم بلامارات ،،،
ارجو انني افدتك بما طلبته شاكر لك اخي الكريم واسف علي الاطاله

[عمار السفينه]

السلام عليكم

يااخوي خذ مني الخبر الوكاد

أنا شاري كامري 2005 خليجي من البازعي

وصيانة 1000 ماسويتها لاعند البازعي ولا عبداللطيف

ولله الحمد من 5000 كيلو وباقي الصيانات الاخرى كله اسويها عند عبداللطيف جميل

بدون فتح ملف ولا شيء ونفس قيمة صيانة سياراتهم

واما الضمان فيضمنها عبدالطيف جميل حتى لو شريتها من البازعي

وهذا انا جربته قد صار في الباب مشكله وصلحها عبداللطيف جميل بدون مايسال

وهذا الي عندي

وانصحك تأخذها من البازعي

[مـدحـدر]

الـــبـــازعــــي وبــس >>>>داخل يشجع

[راجح]

السلام عليكم ...

حسب أنظمة شركة تويوتا الأم أن الوكيل يضمن أي سيارة عليها شعار تويوتا لو جايبها من ( المريخ ) ..
لكن بطبيعة الأمر ان عبداللطيف ما يعجبه هالكلام .. فإذا جاه واحد ( الله بالخير ) قال له ما عندي لك سنع
أو قال له نفتح لك ملف بالمبلغ الفلاني أو غيرها ...
لكن إذا جاه واحد ذيب شرواكم وقال له السيارة دخلتها ورشتكم ما أطلعها إلا أنتم فاحصينه ورجليكم فوق روسكم ..
وإذا بدا يلف ويدور على خذ اسمه وشك لك خطاب إلى فرع جدة ,,, ترى جدة تسوي رعب لفروع الرياض ,, أو قل لهم أرفع شكوى للمندوب التجاري في السفارة اليابانية ...
واحد من الشباب معه هايلوكس 2005 من اليحيى خرب عليه المكيف راح لعبداللطيف قال له ب 3000 أصلحه لك ..
ويوم راح لهم ورفع صوته صلحوه له مجاااااناً ....

وأنا الحقيقة أنصحك بوارد اليحيى لأنه ضارب السوق بالأسعِِِِار ...


أرجو إني أفدتك والسلام ..............

[مكلبش]

http://www.al-wed.com/pic/7515.gif
الأحبة الكرام

أنا شريت جي إكس آر 2006 بريمي ، والصيانة الاولى عند (1000) سويتها عند عبداللطيف وقد رفضوا في البداية أن تكون الصيانة مجانية ، لكني أخرجت لهم دفتر الضمان ، ولكني لم أقوم بصيانة السيارة مرة أخرى عندهم .
يعني يضمن البريمي ويضمن البازعي .
لكن ما أدري عن القطري والبحريني اللي نزلت السنة هذي .
مع بالغ مودتي ،،،

مكلبش

[الكونترولCONTROL]

هناك ورشة اسمها (( العضيب - تويوتا )) في الصناعية
مكتوب عليها : وكيل صيانة ضمان البريمي في المملكة
==============================
و لا أدري ماذا يقصدون

[هاوي خلا]

أخوي العزيز كاتم 2 :
السلام عليكم ورحمة الله وبركاته ، مثل ما قالوا الشباب الوكيل يضمن جميع سيارات تايوتا غصبً عنه وعبداللطيف جميل وكيل معتمد في الشرق الأوسط و أنا والعياذ بالله من كلمة أنا شريت سيارة من اليحيى قبل شهر وقلت لهم عن الضمان قالوا اذا حدث شيء بالسيارة دخلها عند عبداللطيف جميل يقبلها غصبً عنه واذا رفض تعال لنا ونحن نتصرف معه لأنه وكيل أول في الشرق الأوسط ومصنع تايوتا يلزمه بصيانة أي سيارة تايوتا حتى لو أستوردتها من أي دولة في العالم ما دام ماسك الوكالة .
أشتر السيارة اللي تحب من أي مكان تريد ولا تخاف على الضمان ، يصلحها عبداللطيف جميل بموجب العقد مع شركة تايوتا ، والله أنا كان معي جيب تايوتا شارية من معرض يعني سعودي ووكيلة عبداللطيف جميل وقعد معي الموتر أكثر من عشر سنين ما عمري وديته لهم لأنهم يعطلونك ويأخذون سعر قطع الغيار دبل وشغل اليد دبلين يعني يرفعون السعر عليك بزيادة تبي والا رحل لغيرنا .
بس فيه ورشة بالصناعية اللي بالنسيم في الرياض تبع الضحيان صحيح غالين بس تابعة للضحيان لقطع غيار تايوتا الأصلية وهو وكيل معتمد من عبداللطيف جميل أرخص من عبداللطيف جميل وأزين شغل وأسرع وقت وعمالتهم من ذوي الخشوم المفطوسه ((فلبينو)) وعندهم مهندس باكستاني فنان ((مهندس )) مو حي الله والمشرف عليهم سوداني حبيب يراعيك بالسعر ، وقطع الغيار بجنبهم ويسوون تخفيض غير معقول للورشة تصل إلى 30% من سعرها الأصلي .
لك تحياتي وهذا ما عندي ، اشتر السيارة اللي تعجبك ولا تردد وأستخر الله ولا تفكر بالضمان والتصلين وتحط العصابة قبل الفلقة .
أخوك / هاوي خلا .

[الصمصام]

السلام عليكم موتري جيب 2004 وجميع الصيانات الي 60000 سويتها عندهم ولا اعترض احد على شي بلعكس
فيه مرة غيرو الطبلون كامل بسب عطل في عداد الحرارة ولا دفعت علية ولا هلله الموتر بريمي والصيانة عند عبدالطيف
واي سوال انا حاظر

[بدوي جنوبي]

يا شباب هل صحيح عبداللطيف يركب قطع صناعه صينيه

حسب ما سمعت ان المصنع يرفض ان يركب قطع تجاريه او مقلده

عموما ترا الصين عندهم خطوط للانتاج ويصنعوا اشياء اصليه ومنتازه

لكن عندنا التجار لما يستورد اجهزة او قطع يستورد اردئ الانواع

[الصقلاوي]

اخوي كاتم 2
السلام عليكم ورحمة الله وبركاته
فيما يخص سؤالك عن عبد اللطيف او البازعي
و ما يخص السلع وغيرها التوفيق من الله سبحانة .
انا اخذت سيارة من البازعي ويعلم الله اني عانيت معانات لما جيت اشتري
اروح لاخواننا المصريين في عبداللطيف ويقولون البازعي نصاب وو.....
واروح للبازعي ويقولون لي كلام !!!!؟؟؟؟
لكن اقنعني مدير المبيعات عند البازعي وقال خذ السيارة الي معه وكانت نفس السيارة
الي ابغاها وجربها واطلع مطابات واطلع رصيف ولا يهمك اهم شي تقتنع من الي بتشتريه
لاني قلت له يااخوي انا ابشتري سيارة فوق 100الف فلازم احرص على الزين
ولله الحمد والمنه انا معاهم للسنة الثالثة ولا واجهت اي مشاكل اومنغصات والحمد لله...