ما هي أفضل انواع الكفرات العريضة للهايكس دفرنسين

[المسافر]

اخواني السلام عليكم ورحمة الله وبركاته
ما هي أفضل انواع الكفرات العريضة للهايكس دفرنسين فقد كان عندي
ميشلان لمدة اربع سنوات وتحملها عجيب حتى اني انسى الهواء لمدة تزيد على 6 شهور على هواء 20 وكانت قوية
رحت ادور مثلها ما عاد لقيت
ابغى نوع آخر عريض وقوي ويتحمل علما ان الجنوط مقاس 15 وشكرا

[برنس777]

أخوي المسافر السلام عليكم ورحمة اله وبركاته :
أولا : هل جنوط الهايلكس شد بلد ولا مغيرها لأن هذي نقطه مهمه حيث أن جنط شد البلد حديد وثقيل وأما الباقي مثل الي عند السليماني وغيره يتميز بأن شكله جميل وأيضا أخف عليك لأن إذا أجتمع عليك جنط ثقيل وكفر كبير ( ما نقول إلا الله يعن المكينه )
ثانيا : أقتراحي عليك تركب كفر شاهين عرض 275 على مادري 70 أو 75 لأنه الحقيقه كفر رملي وخط
وأخيرا الختام خير سلام على أخوي المسافر ((الله يرده على أهله سالم غانم ))
برنس777

[المسافر]

اشكرك اخوي برنس
جنوطي سلمك الله مغيرها بجنوط جيب من اربع سنوات ومركب عليها كفرات مشلان
ولله الحمد ما وجدت منها اي مشاكل باللذات في الجبال والحصى

[الدرندس]

سلام يا المسافر

انا عندي 2005 دفرنسين ومركبله فيرستون وزي الحلاوه 275 16 70 بس بغيت انشدك عندك رجه او حذفه يسار مع الفرامل

اما الميشلان شف المركز الرئيسي على طريق خريص


وارجو انا افدناك ولا تنساني بخصوص الرجه لان عندي رجه في الموتر

والسلام عليكم

[ابو ناصر2020]

الدرندس الرجه الي تقول عنه انا اعاتي منه دايم ازن الذرعه ولطلعة للبر والمكان وعر ترجع الرجه والحين خليته
بس انت شيك على المساعد الدركسون .
كفرتك كم لك مركبهن الفايرستون .

المسافر : فيه كفرات يوكوهاما عريضه وحجريه تتحمل الوعر والخط بس انا رحت قبل شهر للوكاله ادورهن وقالو انه انقطعة
وراح تنزل بعد شهرين . ويقولون بتصير قيمة الكفر بعد النزول 460 ريال وخويي شاريهن قبل ينقطعن 380 ريال .

[ألنشمي]

أنا جربت الـدنلوب الي يجي من الوكاله مقاس: 265 جنوط 17 حديد وممتازه بالرمال وألأماكن الوعره بس ثقيله على السياره.
وأنصح بكفرات كوبر مقاس 255 من القحطاني مجربها على برادو وبليزر وماشاء الله عليها.

[المسافر]

اشكركم اخواني
اخوي الدرندس عندي حذفه بسيطة مع الفرامل
لكن مع الكفرات العريضة لا تكاد تذكر يعني بسيطة
اخوي ابو ناصر يبدو ان اليوكوهاما هي اللي في البال وغدا سابحث عنها
اخوي النشمي بعض الاخوان حذرني من مشكلة بالدنلوب هي انه اذا انسلخ لا سمح الله يعدم عليك كل شي وشكرا

[ألنشمي]

صدقت أخوي المسافر بالنسبه لكفرات الدنلوب.
انا جربت بكفرات كوبرووممتازه ولا تنصلخ كل الكفر بس قطع صعيره,
بس مقاس 255 ماعاد يجيبه القحطاني والي متوفر 265 وهو عريض وثقيل على الهايلكس.
وش رايكم بكفرات فير ستون مقاس 255؟