وش أفضل طريقة لإخراج السيارة إذا غرزت؟

[tigernight]

السلام عليكم//
وش أفضل طريقة لإخراج السيارة إذا غرزت؟خاصة إذا كان دفع أمامي ؟؟؟
وشكراً:D

[mohamad1121]

حسب تجربه لي في الثمامه وعلى سياره دايو كان هو الى اللجو الى الرجوع بالسياره حتى وصلت الى الازفلت بالريوس وكانت المسافه حوالي 500م واثناء هذه المسافه كلما حاولت التقدم لم استطع فاكملت بهذه الطريقه .

ابوكاسر

[أيمن]

وعليكم السلام ورحمة الله وبركاته ..
موضوع جدا رائع، يتطلب من الجميع المشاركة، ولا بد أخذ في الاعتبار إن كل وضعية في التغريزات لها طريقة أو بالأصح عدة طرق للخروج منها ..

ياليت الجميع يتطرقون لها ..
وشدوا حيلكم معنا يا جماعة، مع الشكر للأخ tigernight على هذه المشاركة..

تحيتي

[مهيلان]

اخوي تايقر السلام عليكم
اذا غرزت بالسياره دفع امامي
فعندي لك بعض الخطوات :
اولا : نسم الكفرات حتى ضغط 10
ثانيا : قل للي معك ينزلون الله لا يهينهم ويدفون السياره .
ثالثا : حاول تسوي لك خط يعني تروح وتجي ين يشتد خطك اللي انت عليه ثم تله مره وحده وتوكل على الله.
رابعا : اذا ما طلعت اتصل بــ: 998 يمكن تلقى واحد شقردي يساعدك

[عربسات]

السلا م عليكم

اولا : اعتقد انه ماله داعي
تنزل وتتعب روحك مالك الا تنقز
لا قرب زفلت وتلوح بيديك
عسى ولعل احد يوقفلك :D

ثانيا : اذا كان ولابد وماحولك احد نسم الكفرات على ضغط 10
وحاول تهز السيارة انت واللي معك
عشان تهضمون احم قصدي عشان ترتفع السياره عن الرمل
وخر الرمل اللي قدام الكفرات وشوي شوي لا تشد على الموتر
قدام ورى اللين يطلع من الحفره وبعدين حط رجلك ولا تا قف
الا على الزفلت

[laith]

طول الله عمرك...........

ماعندك الاتنس--------------م الكفرات ال عشره...... وابد برح التراب." في وجه العدو ".

وان كان عندك جركل ماء انثره تحت الكفرات الاماميه

وشوي قدام ....وشوي للخلف..... شوي تلقى نفسك طلعت وتله وحده ---------وللشارع..وفي حفظ الله..

[قتيل الرمش]

tigernight اخي الكريم .

فيه واحد يقول إذا غرزت ونزلت السيارة وتساوت مع الأرض في هذي الحاله وش تسوي ؟

يقول بعد ما تنسم أرفع السيارة بعفريته الخاصة بالسيارة ثم ضع التراب ( أكرمك الله ) تحت السيارة حتى ترتفع من الأرض . وحاول بقدر الأمكان انك تمشي خلف ( بشويش ) إذا كان دفع أمامي ثم ترجع أمام حتى تساوي طريقك . وتوكل على الله قبل كل شيء .

ولا تنسى ذكر الله .

أخوك قتيل الرمش .

[القناص]

بتصير خبير بعد هالردود

:D :D :D




............

[فرد حمزة]

يهههههههههههههههههههون هذا كله إذا تشازر( يعني على جمب الطعس ودق لبطنه) الموتر

في الحالة هذي ما لك إلا تحفر وتبرح في جهة وحدة أما مقدمة السيارة أو مؤخرتها وتحاولون تدوفون السيارة مع الجهة اللي برحتولها ومن جهة زاوية السيارة علشان تكزون أما عاد خشتها أو مؤخرتها


أما عاد إذا تشازر الموتر وصار قدامك صعس وراك شجرة فهي مالها طب ولا في راعيها طب اللي طببها في الورررررررررطه :p

[عاشق الخلاء]

نفس ماقالوا الشباب ماقصروا ماشاء الله ...... بس فيه اضافه بسيطه إذا جيت الزفلت لاتعودها مره ثانية .

[v..x..r]

اسمع يالطيب ......
اول شي تحاول تطلعها بالدبل الثقيل بس من دون ما تضغط بنزين
ثاني شي اذا ما طلعت بالدبل احفر من قدام ومن الخلف لين تستوي الأرض
ثالث شي طلعها بالدبل الثقيل {بعد الحفر} وإذا معك احد خلهم يدفون السياره
واذا طلعت لا توقفالا في ارض مافيها تغارز ................وسلامتك

اخوك v..x..r

[معلومات]

بسم الله الرحمن الرحيم السلام عليكم ورحمة الله وبركاته
1- بمجرد توقف السيارة عن السير بسبب الغراز لازم يقتنع سائق السيارة فوراً في هذه المشكلة ( يعني يقول في نفسه سيارتي غرزت ، ولا يخجل من الإعتراف لنفسه بهذه المشكلة سواءاً كان وحده أو معه أهله أو اصدقائه أو حوله ناس يشاهدونه 0
2- يجب التوقف فوراً عن الحركات الغير عقلانية (الصبيانية ) مثل الضغط على دواسة البنزين بقوة ، و محاولة الرجوع الى الخلف أوالى الأمام بقوة والسيارة متوقفة عن السيربسبب الغراز 0
3- لابد ان يعطي السائق نفسه بعض الوقت للخروج من الغراز : قل لنفسك اشوي ان شاءالله واطلِّع السيارة من الغراز 0(يعني بعض الناس بمجرد تغرز سيارته ما يسمح ولا بدقيقة تكون سيارته مغرزه ، ماعنده صبر ، زعلان وغضبان ، وقاعد يتصرف بسرعة وبدون عقل يبي السيارة تطلع بسرعة من الغراز وهو مايدري ان السيارة تغرز أكثر ) 0
4- بإمكانك إخراج السيارة ان شاءالله من الغراز بدون تنسيم الكفرات او حتى نزُولك من السيارة ( بشرط انك اتبعت التعليمات السابقة من1إلى 3 ) والطريقة هي اذا كان غراز السيارة بسبب كثافة الرمل : اضغط على دواسة البنزين قليلا وارفع رجلك عن دواسة الكلتش ببطيء وقبل ان يحاول الكفر يفحط دس الكلتش وكررهذه العملية عدة مرات ( يعني حاول ان ترقص السيارة في مكانها عن طريق تكرار دعس وافلات الكلتش بهدوء وبتدرج )وسوف تلاحظ ان السيارة بدأت تتحرك قليل ، استمر في التدرج من اجل زيادة المسافة قليلا مرة الى الامام ومرة الى الخلف (يعني السياره هي اللي تساوي الرمل وتدك الرمل ليصبح قوي ) استمر على هذا الوضع والتدرج في زيادة المسافة الى ان تصل في النهاية الى عدة امتار بعد ذلك استعد وإنطلق بسيارتك من الغراز0
(هذه تجربتي مع الغراز 00000طولت عليكم )

[الدبل الثقيل]

من البداية قبل لاتدخل نسم الكفرات الى 20 او 15 وريح بالك ولا تخش محل صعب على السيارة...

اخوي فكسار يقولك السيارة دفع امامي...
وجزاكم الله خير..