المساعد الشخصي الرقمي

مشاهدة النسخة كاملة : ابعررررس ابي حررررمه !!! سويليفات بر



ابوسكسوكه
29/12/2001, 10:15 PM
السلام عليكم كلكم ورحمة من الله وبركاته

هاك السنه اللي نويت ابتزوج فيها ؟ تعرفون مصاريف العرس قلت ياولد مبدهاش ياابوسكسوكه خلك ولد مفتح ولا ينضحك عليك احسبها صح 0
واللي ما يقيس قبل ما يغيص يغرق المهم 000
جبت ورقة وقلم والة حاسبة وقلت خلني اشوف التكاليف كم ابدفع علشان اعرس واكمل نص ديني تعالوا نشوف ؟
اولا : مهر وقدره سبعون الف ريال وكان اهلها حليلين يبخلونه خمسين الف ريال 0
ثانيا : اجار شقه زينه في حاره معقوله ستة عشر الف ريال 0
ثالثا: تاثييث الشقه مكيفات وثلاجة وغساله وفرن ومطبخ وغرفة نوم الخ 00 وتعديلات بالشقه تبيلها حدود ثلاثين الف ريال 0
رابعا : سفرة شهر العسل يبيلها عشرين الف ريال من غير الهدايا0
خامسا : وهو اول شئ قصر افراح اوفندق علشان حفلة العرس مع الطقاقه والقهوجيه وغيرها يبيلهاخمسةوثلاثين الف ريال0
هذا كل اللي جاء على بالي كاني مانسيت شئ تعالوا نشوف النتيجه؟
50000+16000+30000+20000+35000=151000 ريال
هذا لو ماشريت سيارة جديدة وحاجات كثيرة ماقلتها ولا حسبتهاتعرفونها كلكم0
تدرون وش صار عقب هالحسبة ؟؟؟

اكيد ضاق صدري وتكدرت وين اجيب هالمبلغ منه يبيلي يصير عمري 118 سنه علشان اجمعه الراتب 1800ريال من الكبينةحقت التلفونات اللي اشتغل فيها وكله يروح اكل وبنزين للعراوي اللي معي ( العراوي سيارة بيك اب موديل 1982 ) واجار الغرفة اللي ساكن فيها وش اسوي وش اسوي قمت ادور بالشوارع وانا اهوجس وسرحان بالمستقبل المظلم ومع كثر الدوران كل شوي امر من عند ( بندة العزيزية )للي مايعرف بندة العزيزية هي من اكبر البقالات بالرياض على اربعة شوارع وزينة ومكيفة ودايم اروح اتمشى بها اذا خرب المكيف عندي بالشقة المهم ما اطول عليكم السالفه 0
قلت عقب هالتفكير الطويل والسرحان لا زواج بعد اليوم بس مشكلتي احب الاطفال وودي اشوف عيالي يلعبون قدامي ويطامرون عندي بس الله اقوي العين بصيرة واليد قصيرة 0
دخلت بندة وقعدت اتمشى شوي والا انا جتني فكرة جهنمية اخذت لي ثلاثة اطباق بيض ايه بيض دجاج وش فيكم صدق ودفعت حسابهم ورحت للشقه وصكيت الباب علي ولا طلعت لمدة اسبوع ؟؟
تدرون وش صار؟؟
رجنت على البيض اللي شريته لمدة اسبوع وبعد سبعة ايام بالتمام والكمال بدا يفقس البيض ويطلع منها هاك الكتاكيت اللي تهبل وش ملحها وزينها وصاروا يلاحقوني في البيت ويلعبون معي وينادوني بابا 00 بابا
واروح اتمشى انا وياهم بالعراوي اركبهم في الصندوق وما نخلي محل 0
وبهذا حققت امنيتي بارخص الطرق 0


:D :D :D :D :D

السمح
29/12/2001, 11:07 PM
أي سويليفات بر !!!!!!!!!!!!!!!! الله يهديك بس .. البر للرجال مهوب للي يرجنون على البيض ... قلنا راعي سكسوكة ويبي يجيب العلوم والأخبار والمواضيع الزينة .. وعودت على بيض أما بيض .. أفا !!!!

ابوسكسوكه
29/12/2001, 11:21 PM
حبيبي 000 السمح

السلام عليكم ورحمة الله وبركاته

العبرة بالقصة وليست هل هل انا صاحب الشان ام لا ؟؟
كما ان كثير من سمرات البر يتخللها قصص وروايات واشعار وسامري وغيره ولا مانع ان تحكي احد القصص وتجعلها على نفسك خير من ان تنسبها او تتقولها على شخص اخر وتكون اوصلت معلومه اوطرفة او نادرة وبالمقابل كسبت ذنوبا ابعدنا الله واياكم عن الذنوب 0
وهذا باب من ابواب ( العيارة ) بفتح العين والياء 0
وراعي البر مهوب بالضرورة يكون له مواصفات ومقاييس حسب ما رايت انت 0

اشكرك على التعليق وياهلا بك :D :D :D

بدوي متحضري
30/12/2001, 08:26 AM
المعنى عميق جداً ياراعي السكسوكة000 لكن فرج الله قريب ماضاقت إلا وتنحل 00 والفرج ماهو بيد العباد ولكن بيد رب العباد00
وإذا ما أنتبهوا النشاما وقاموا بحل المشاكل فيه اللي بيرقد على بيض وفيه أللي بيرقد على عمود وفيه اللي بيرقد على ملح 00 وانا البدوي المتحضري تدري ليش تحضريت ياراعي السكسوكة
عشان ينظر لي بمنظار مبتسم
:D :D :D

ذيب البر
31/12/2001, 02:52 AM
هلاااااااااااااا اخوي ابو سكسوكه

قصه رائعه ومغزاها اروع وحقيقه امتعتنا



اخوي السمح ربما لم تفهم مغزى القصه وحتى ولو لم يكن لها مغزى

اعتقد ان اخونا ابو سكسوكه لم يخطأ حتى نوجه له النقد بهذه الطريقه :D



تحياتي لكم

السمح
31/12/2001, 03:41 AM
عزيزي ذيب البر .. والله يمكن أنا لم أفهم المغزى اللي تقصدونه .. ولكن أبو سكسوكه نفسه في رده علي لم يقل أن لها مغزى وإنما قال " أنها من باب العيارة " وكلامه مقبول إلى حد كبير وأنا أعتذر له إن كان في خاطره شي .. ولكن أرجو أن توضح لي ومن مثلي ومنهم أبو سكسوكه هذا المغزى الذي رأيته في القصة .. نعم أقبلها كما قال صاحبها أنها من باب العيارة أما أن نحملها من المعاني الرمزية كما تحاول أن تقول فهذا خيال جامح يحتاج إلى توضيح أكثر .. اختلاف الرأي لايفسد للود قضية ...

تقبل تحياتي ..