من هو الأمير الناجح في الرحلات ...؟؟؟؟

[سماوي]

بسم الله الرحمن الرحيم
السلام عليكم ورحمة الله وبركاته
والله يا أخواني إننا نبلش بالأمير اللي نستانس معه ونرتاح له ونحس أنه يسنّع الأمور
مرة يختارون العيال الأمير
اللي يصير قرم منا وبعده كل الشغل عليه
ومرة يختارون الونيس اللي ما ودك يسكت من خفة الدم ولو إن تنظيم الرحلة لك عليه إشوي
ومرّة يختارون الكريم علشان القطة تصير راهية
ومرّة يصير أمير مضبوط فيسنّع الأمور مع أنه يصير بعض الهرج والـزعل والـ.... ولكن ( رضا الناس غاية لا تدرك )

فأرجوكم يا أخواني ساعدونا في هالمشكلة العويصة ،وعلمونا كيف نقسّم الأعمال بين الشباب

الله ايخليكم لنا ذخر
وإن كان ماعندكم حل خلونا نبيع الجيب ، والبنادق نحرج عليهن ونطلع للبر مرّة بالسنة كل واحد إلحاله وياخذ عامل علشان يخدمه بكل شيء ويشغله على ريموت كنترول :D :D

سماوي

[الشيخ]

السلام عليكم ورحمة الله وبركاته
والله ما غيرك امير يا سماوي
يا خوي عليك افكار غريبة بس ناجحة :D
مواصفات الامير اولا سعة الصدر وذلك لانك مثل ما ذكرت غاية الناس رضا لا تدرك
:D :D
رضا الناس غاية لا تدرك
لكن من المفروض انه ما يكون كل الترتيبات على راسه عشان ما ينسى او يخربط والمشاور زين ويقلل من المشاكل

[laith]

يامرحب يااخ سماوي..

اعلم رحمك الله ان للاماره شروط ومقاييس وقيم لابد من اخذها بعين الاعتبار..وتوافر معظمها في الشخص المؤمر..نذكر منها ماهو ات :

1- ان يكون من اهل الصلاح وممن يخافون الله.

2- ان يمتلك الصفات الاتيه مع مرتبة الشرف الرفيع العالي الدرجه:
قوة الشخصيه -الركاده ـ الحلم ـ الشجاعه ـ الصبر ـ معرفة الدروب والاتجاهات ـ سرعة البديهه
والفراسه ـ الاعتماديه الذاتيه المطلقه والقدره على الابتكار ـ التضحيه والايثار.

3- الالمام ببعض الامور الطبيعيه والتوقعات الصائبه..

4- ان يكون على درجه عاليه من الالمام ب فن التاثير النفسي .

5- القدره على استيعاب جميع المواقف وطرائق حلها.

6- امتلاك القوه المطلقه اللازمه لمقارعة الخطوب..عندما ترتعد فرائص الرجال الاشداء حينها.

7- حبذا ان يكون من اؤلئك اللذين صقلتهم سموم لواهيب القوايل على نفوذ الصحاري المقفره.. او زمهرير
الليالي البارده.

واذا توفرت الامورهذي باميركم ..كبر وسادتك....وحط رجلك..

[مهيلان]

اخوي ليث

هذي مواصفات ما تصلح لامير رحله

هذي مواصفات قائد الجيش اللي بيحرر فلسطين والعراق .

عموما ريِح نفسك يا سماوي ما اضنك تلقى المواصفات اللي ذكرها ليث

يمكن تشوف هالمواصفات اذا طلعت انا معكم ( هذا اذا طلعت )

شكرا سماوي !!!!