إستفسار عن الخرازه يا أهل القنص

[بـــدر]

بسم الله الرحمن الرحيم
السلام عليكم ورحمة الله وبركاته،،،
يا الربع ودي اشتري خـرازة جديده ، وش تنصحوني به، اسمع عن ام خده وعن التشيكية بس محتار وش الاطيب.
كذالك عن سعرها
والطلب الثاني هل يركب عليها منظار ( دربيل) كم سعره وين القاه :what:

[العليمي]

اخوي بدر الخرازه الله يسلمك عدة انواع لاكن اشهرها البرنو الالمانيه و هي الافضل لاكن سعرها مرتفع
شوي .


ايضا الخرازه (( صناعه تشيكية )) انا مجربها ممتازه لها معي تقريبا اربع سنوات ماشاء الله تبارك الله و لا احلى و سعرها مناسب جدا .

[بـــدر]

الله يجزاك خير أخوي العليمي. وترى اخوك بعد عليمي :D
بس انا ودي اعرف عن دقه الاصابه وش الافضل . ( ودي اعرف الي تصيب عين الضب وتطلع من العين الثانيه قبل لا يتحرك):D

[العليمي]

صراحه تصويبها ما شاء الله عليه دقيق و اذا كان الفشق من النوع الزين ابشر بالضب و غيره .
الخرازه التشيكيه يركب عليها دربيل بعد .......

الفشق المفضل :
1_ نوع اسمه ليزر
2_ سنجر .
3_ ابو ارنب مخروم الراس .

[بـــدر]

مشـــــــــكور

[دغيم]

القديم الماني وأمريكي وصيني
الالمانيه هي أزين الخرازات ومديلاته من الف وتسع ميه وخمسه وستين ميلادي الى ثلاثوسبعين
وهي غاليه الثمن لاكن دقه أصابه وقل خراب مع أي نوع من الرصاص ولاكن التشيكيه البرنو فهي موديلات حديثه وهي أسهل في الرمايه من الالمانيه ولاكن ليست بتحمل ألالمانيه وأما الامريكيه فأنا أعرف أم سطعش الاتماتيكيه والصينيه قليله وهي خشابها فيبر قلاس هذا ماأعرفه عن الخرازه وهذا رأيى وهو يحتمل الصواب والخطاء

[الخبير]

السلام عليكم
سبق و أن كتب أكثر من موضوع عن الخرازات و أنواعها ، لكن ما يضر أننا نعيد لو شوي من المعلومات إلي ذكرت.

أم خده: من أشهر الأنواع و أفضلها ولكن سعرها غالي مرة و نادراً ما تلقى جديدة، و دقة الإصابة تعتمد على الرامي .

الكوجر: نوع من أنواع البرو التشيكية يتميز بطول السبطانه و بركادة البندق ، وللأسف سعرها غالي لكن أقل من أم خدة وهذي أيضاً نادرة تعرفها بالزناد المذهب و أيضاً رسمة النمر .

خرازة البرنو التشيكية: هذي لها شهرة محلية واسعه لكثرة تواجد هذا النوع من السلاح، و رخص سعره وسهولة إيجاد قطع غيار له. الموديلات كثير ولا شفت بينها إختلاف جوهري ولكن غالباً يكون الإختلاف في لون الخشب ، فبعد موديل 98 بدأ يتغير لون الخشب وصار الصراحة ما يواجه!

الخرازة الألمانية: مثل التشيكية.

الخرازة الصينية: هذي مصادفات، يعني مهوب كلها مثل بعض! بعضها راكد بالحيل و يكون أفضل من البرنو. و للأسف تلقى بعضها الهدف يمين وهي تروح يسار.

إذا كنت تبي معلومات أكثر أضغط على أيقونه البحث و تبي تلقى مقالات كثير كلها تتكلم عن الخرازة بأنواعها.

شئ أخير دقة الإصابة تعتمد على الصياد إذا كان بواردي فأبشر بعزك، ولكن إذا كان خايب مهوب صايد لو ثبت البندق على راس الضب

[عليان الليل]

الصراحة تضايقنا المشاركات المتكرره
فانا ارجو من جميع الاخوان ان يبحث
عن الموضوع قبل ان يكتب

اغلى تحية..