مشكلة الذبان ( الذباب ) إذا جهز الأكل ...

[شاهد عيان]

أحبي الأعضاء

السلام عليكم ورحمة الله وبركاته

إذا بديت تسوي أكل بالبر يجيك الذباب من مسافة 10 كلم ومايصدق إنه يلقى آدمي علشان يبلشه ..

وتلاحظ بعضها إنتحاري يعني على طول بقدر الطبخ ..
وبعضها يخلي يداك مثل مساحات السيارة من كثر هش الذبان ...
وبعضها مركب سنون يعضك أول مايشوفك ( يمون بالحيل ) ..
وبعضها عنده هوايه ركوب السيارات ( على بالهم شله عرابجه ) ...
وبعضها يحاول فك زرار ثوبك علشان يدخل ...
وبعضها ذكي إذا شافك أخذت طاسه ماء ورحت بعيد نادى جميع الذبان ... يعني الوضع ممتاز ...

وهي عدة أنواع صغير الحجم وبعضها كبير ( شيخ الذبان ) وذو ألوان مسكته ( أخضر زاهي ) يعيني على الألوان دلع ....

وأذكر مره طلعت أنا ورفيقي للبر ... وعند الأكل مر ذباب كبير بيني وبينه والذباب يصدر صوت وزززززززز قال رفيقي الذباب هذا مفوّر وشكل المروحه حقته شابكه على طووول هههههههههه .


لكن السؤال :
نبي حــــــــــــــــــــــــــل للذبان ؟ علشان ما يبلشننا ...





أدري إني حومت كبدكم لكن هذا الحاصل ....

[...الطوقي...]

هلا بك اخوي

انا عندي لك الحل:good: :good:
الله يسلمك استعمل
(((((( بف باااااااااااف))))))
:D :D :D :D :D :D
والله اخوي كلنا متوذين من الذبابين بس وش نسوي ما باليد حيله:D
مير خلهن يوسعن صدورنا بالبر:p :p
واللي عنده حل لايبخل علينا











تحياتي لكم
...الطوقي...

[أيمن]

كل المواضيع متوقعها إلا هالموضوع يا أخوي شاهد عيان ..
الله يقطع شيطانك ..:D :D
وأفضل حل الرضا بالأمر الواقع ..:D

تحيتي

[فرد حمزة]

هههههههههههههههههههههههه

أقووووووووووووووووول

كله كوم وفريق الإستطلاع حق الذبان كوووووووووم (( وبعضها ذكي إذا شافك أخذت طاسه ماء ورحت بعيد نادى جميع الذبان ... يعني الوضع ممتاز ...))

وبزيدك من الشعر بيت يقولك أن ذا الذبان فريق الاستطلاع له علاقة استخباريه مع (( الجعل )) اعزكم الله

نعود لصلب الموضوع وحل المشكلة ...

يوجد علاج في الصيدليات البيطرية وهو سائل تضعه في طاسة أو ماعون وتسكب به قليلاً هذا السائل يخرج من رائحة لا يقوم سحرها الذباب فتجده رواسي سمكه على هذا الماعون أو الطاسة مجرد أنه يسقط بداخلها يموت في غضون أقل من ساعه تجد أن بداخل الماعون الكثير من الذباب قرابة الألاف منه الذباب ((( .... يعني مجزرة ذباب ....))
بس أنتبة لا يدرون فيك جماعة حقوق الإنسان ... عفواً قصدي الحيوان :D


تحياتي لكم

أخوكم

فرد حمزة

[المنصرم]

حيا الله الشباب .
تبون الحل صحيح ازهلوه عندي الحل الذباب او المسمى عندنا بالعامية ذبانه تحب الالوان الزاهية يعني راعية ذوق إذا بغيت تطلع للبر خذ معك فرشة ملونه و يفضل ان تكون زاهية يعني الوانها قويه شوي فاقعة و افرشها جنبك و تشوف الذباب متكوم عندها تقول من علم بس حاول انك ما تلبس شماع و شي فيه الوان متعددة و السلام .

[القماري]

الغريب أن هالذبان يطلع لك وين ماكنت (يعني ماشي لك بالسيارة ساعتين أو ثلاث بالبر وبعيد عن الناس وعن الأكل ووسط الرمال) مامداك تحط أكلك إلا وجاك الذبان . تقول سحر
بالحقيقة موضوع رهيب وكان ودك يكون بالعامة بدل خيمة الأكل والشرب وسمعت أن الدخان يبعد الذباب بس ماجربت الطريقة.
حلو التعليق ياشاهد عيان ( خصوصا الأنتحاري وإلي تمون :) )

[عاشق الصحراء 2]

بالنسبه للذباب شف اكثر شي الذباب يتجمع عليه وابعده عنك شوي

بعدين لاترمي اي شي على الجلسه مثل بقايا الطعام

او شب عندك عود حطب

اما بلنسبه للسياره لاتخلي الشبابيك مفتوحه

كذالك بالنسبه للنمل خذلك فنجال سكر ونثره حول بيتهم

وتقبلوتحياتي

[fadhelsf]

شكلك تحب الاكل و طبخات البر ................بس ماكو فكه.......الذبب فيك فيك الله يحوشهم عنك قبل يبرد العيش....... سم بسم الله والباقي علي الله .. احترامي لكم اخوكم سعد الفضل من العيون الشرقيه

[نقا هشال]

شاهد عيان


مشكور على طرح الموضوع

ومشكورين الشباب على المعلومات


تحيااااتي...

[شاهد عيان]

شكراً على جميع المشاركات

[الفحل 2003]

الحل عندي يا من يتضايق من الذباب

تأخذ معك ناموسية أو على قولتهم (شيفون) ستارة بس مفصلة مثلا تخيط عدد (6) قطع من شيفون الستاير مع بعضها البعض ثم تجعل لها زوايا وكل زاوية تحتها مسافة مثل الخيمة لها رواق وتربط في الزوايا الاربعة حبال بلاستيك أو قطن المهم ان شكلهل يصير مثل الخيمة بدون عمود في الوسط وتقدر تاخذ عمود أو عمودين من اللي يبيعونها في الغرابي (حقين الخيام ) وتكون اطوالها مترين وبكذا ترتاح وانت تاكل من الذباب وحتى لو دخل الذباب تلقاه يطلع فوق يبغى ينحاش على باله في شبكة وانت حاجرة فيها كذلك تقدر تنام فيها في البر عن النوامس وعن العقارب في النفود بحيث تدفن اطرافها في الرمل ، ولكم تحياتي .
اخوكم
الفحل 2003

[هواوي]

اخواني اعظاء المكشات

وصلتي عبر البريد الاكتروني رساله من مجموعه من الذبان ويقولون في رسالتهم انه اطلع على الموضوع في هذا المنتدى وحب يدلي بدلوه

ويقول في رسالته

والله لو تسوون الي تسوون ما يفككم منا شي
لو تحطون غداكم في المريخ تلقونا قدامكم

يمكن نخف في البرد ولكن كلها شهرين ونرجع لكم ((وفي الليل بعد))اما النهار فحنا معكم على طول


وشكرا مع تحيات مخربة الرحلات والكشتات الذبانه خضرا


عموما يا شباب نصيحه اذا ازعجك ذباب عليك باشوزن في راسه ثقوا تماما انهم ما بيقربون منكم مره ثانيه

واقتراحي هو انك تحط شوي مرق في صحن بلاستك ابيض حولكم على الاقل يتجمعون هناك ولا يتجمعون على صحن الاكل

يبيلنا اذا طلعنا البر ناخذ معنا ضفادع هي والله الي تعرف لها

عاد تخيلوا واحد يروح يقنص

ومعه صقور وسلوقيات وضفادع


والله ياني اكره الذبان
:D :D

[aflaj12]

الحقيقة طرح جيد وردود رائعة ومشكورين

[عاشق النحم]

هههههههههههه الله يرجك ياشاهد عيان
وفيه طريقه مجربه وزينة بالحييييييييييييييل
جبلك يا طويل العمر قطعة سراميكة 10×10 وحط به صمغ فيران واجدع فوقه لحمه
وشف اما صارف البلا طه سودا من الذبان

وفيه حل ثاني قل للبزران(الرظاعين) اللي معك (كل عشرين ذباب بريال )


وتقبل تحياتي ,,,,,,,,,,,,,,,,,

[الفيبر]

بيض الله وجهك ومافي حل الا التعايش مع الوضع

[مكشات]

جربت عدة طرق للتخلص منها وخصوصا في ( منطقة الصمان ) كون الذباب منتشر فيها ويشعر بمجاعة حقيقية :)
ومن الطرق التي جربتها طريقة أخي فرد حمزة ، صحيح أنها مجدية لكني أفضل طريقة أخرى لاتحتاج إلى تجهيز مسبق :) وهي كالتالي :
1 - خذ معك قليلا من الماء وصبه على الأرض على بعد 15 مترا تقريبا من مكان جلوسك ..
2 - ضع قرب الماء المصبوب قشور البصل وبقايا تقطيع الطماطم ، ومخلفات نتف الطيور ( يفضل نتفها في نفس المكان أيضا) ..
وتأكد أنك ستكون بمأمن منها حتى تنتهي من إعداد طعامك وأكله ..
( جربتها كثيرا ونجحت ) ..
مع تمنياتي لكم بالتوفيق
تحياتي

[fhyd]

أهم شي لا يطيح بالقدر وانت تطبخ, والا اذا حط الصحن بكيييييفه

[علي الشهري]

الله يسامحك
توقعت عندك حل سحري
واثر الدعوة...شكاية هموم

[الهبوب]

هلا اخوي .....




عندي حل مامثله .............الى جاك الذبان وبلشك ...قم من مكانك الله لايهينك

وصبلك بيالة بياله ولا بيالتين ....شاهي ويكون تلقيمه ..على بعد 6 متر وما اكثر وكب الشاهي..!!!.!.! شرط ماتقعد خمس دقايق ماتلقى عندك ولا ذبانه كلاها متجمعه عند الشاهي واذا مافيه شاهي قوطي بيبسي يفي بالغرض ...وسلامتك..

[شاهد عيان]

شكراً للجميع على تفاعلهم وتجاربهم مع الموضوع

[مفتش الريضان]

يا جماعة الخير ............ مستكثرين على الذبان شوية مشاركة لكم في الأكل أو الشرب ..... حرام عليكم الظاهر انا بانسوي خيمة لحقوق الذبان ........!!
الحل عندي وا نا مفتش الريضان ...............شوية كاز تصبونه على الأرض بشكل دائري حول الجلسة وما تشوفون رقعة وجهه... وفيه حل ثاني تاخذون معكم كم حبة تمر ...أو علبة ببسي وتصبونها بعيد عن مكان الجلوس يعني 10 امتار لا أكثر وتلقلون جالس مترزز عندها............ بس بشرط ما يكون من ضمن اعضاء الجلسة واحد دمه عسل أو سكر (مثلي) تراه بعدين بيأذيكم:p

[nooh79]

السلام عليكم
يالربع مضارب الحشرات عند مصانع الخليج الدرزن 10 ريال .

[ابو مساعد]

يا شباب

.......الذباب جناح داء وجناح دواء .........

عموما الحل هو قليل من السكر ....

لقد راية سوداني يضع كاز ومعه سكر في صحن شوف الذباب وش يصير فيه الله لا يوريك حالته يطيح على راسه ...

وفعلا الذباب يبي البراد اسكب قليل من الماء وعليه قليل من السكر سوف يتجه الذباب اليه وتفك عمرك ...

تحياتي ..

[الحاتمي]

هلا شباب افضل حل لتتخلص من الذباب وقت الاكل انك تولع بحطب رطب او تخلي النار تدخن وتفل السفره باتجاه الدخان بس الله يعينك على الدخنه....... وترى الدخان اهون من الذباب........والسلام الحااااااااااااااااتمي

[اسير البر]

اخوي شاهد عيان .
السلام عليكم.

من مشاركات الاخوان جزاهم الله خير
تبين ان الطرق عديدة.....

عند طريقه وهي : تجيب كيس نايلون شفاف من البقالة (السوبر ماركت) وتعبيه ماء ثم تعلقة

في مكان الجلوس ويكون عدد الاكياس اكثر من واحد وبعدين ماتشوف ولاواحد يكدر الخاطر .

ملاحظة: هذة الطريقة ماجربتها ولاكن واحد من الربع يقول انها ناجحه 100%.

ماهوالسر :اعتقد انه يشوف صورتة في كيس النايلون الي به الماء كبيرة ثم يروح فيها..

اذا مانجحت لاتقول انا قلت.......:D :D

[راعي شقراء]

السلام عليكم ورحمة الله وبركاتة
كل عام وانتم بخير
يقولون الاولين (( سنة ذباب ولا سنة غراب))
بس منول ماعندهم من يوم يحط الصحن ولا قاضي ما يمدي الذباب يلحق شي
الله يرحم اموات المسلمين

[الهلالي]

السلام عليكم ورحمة الله وبركاته
يوجد طريقة أنا مجربها . فيه مصيده على شكل فيلم الكميرا .تسحب الشريط اللاصق وتعلقها بالخيمة وبعد ماتمتلى تركب غيره . وقيمة الفلم الواحد 5 ريال . والشريط به مادة تجذب الذباب . متوفر عند هوم سنتر وما لقيتها عند غيره .

[الخضاري]

السلام عليكم ورحمة الله وبركاته


صبحكم الله بالخير

ودي اشارك معاكم بحل هل المشكله يالربع انا عندي حل بس الحل هذا ينفع أذا كنت بخيمه , خذلك قطعه من جريدة وصب عليها دهن الطبخ وأذا كان سمن أحسن بعد وعلقها بالخيمه ولي صرت باليل علقها جنب النور وبعدين عاد شد حيلك بتنظيف الذبان من الجريده :)

[* رمش العين *]

والله انكم امصرقعين على هالموضوع لكن حقيقه الذبان عند الاكل اكبر مشكله خصوصاً اذا كانت اللقمه الي متوجهه الي فم الواحد في عين احد الذبابين ولحقها .... لاتعليق

المهم عندي طريقه قد تكون مناسبه واهم ما فيها السرعه والسهوله (( اذا كان معكم جيب واسع لاندكروزر او سفاري سدحو مراتبه وخلو الشبابيك مسكره وقلطوا فيه وبالعافيه لكم .... وشوفو الذبابين الانتحاريه عاد كم واحد منها بيجيك طاير ويشخص بالقزازة ... زيادة نذاله عليهم خل الكزاز حق الموتر نظيف ويلق ))

وخاتمتها (( ياحبنالنا )) هالكلمه كتابتها صعبه ياجماعه تاخذ مني اكثر من وقت كتابة الرد

[مسوي راعي بر]

انا عندي الحل اذا حطيت الغدا حط جمبك اسطوانة غاز ام 25رطل وافتحها على آخر ابن امه يقرب الذبان
سم بالله ولاتنسى تتشهد :mad::mad::mad::mad::mad: تنكتون انتم الحين اوريكم الضحك
على الذبان وش يسوي فيكم طبعن معكم عضو في هيئة حقوق الذبان سوف نقوم آآآآآآآسفين بأغلاق المنتدى
وذلك بسبب الطرق الوحشيه ضد الذبان ولن يتم فتح الموقع الا بتعويض للذبان بمبلغ وقدره200مليون دولار


جمعية حقوق الذبان الدولية

[مطخطخ]

السلام عليكم جميعا .
والله اني مستحي ان تكون اول مشاركه لي عن الذبان بس صراحة الموضوع شدني , لاني منغث منه.

المهم الحل السليم والسهل انك تاخذ لك خيمه بلاستيك ام 50 ريال اللي يجي على بابها شبك بسحاب وتخليها للاكل بس وانا عندي وحدة ممتازة حقت جوائز سفن آب , كانكم خابرينها الصراحه عمليه جدا للاكل ووذفه تسفطها بدقيقه ولايبيلها ربط ولا شد . كنها شماسه السياره ام دوائر اللي تنفك من نفسها .
او كانك مالقيت هالنوع تقدر تفصل لك القماش الشبك على قد باب الخيمه وتخليه قطعتين بحيث يتثبت من الاطراف الاربعه ومن النص يكون طرف على الآخر وفيها مغاط ( سير ) بحيث اللي يبي يدخل لازم يدفع الجهتين بيديه الثنتين باتجاهيين مختلفين وانسا ان فيه ذبانه تبي تدخل لا ونت تاكل ولا ونت نايم. وميزتها انها ماترد الهوا عن الخيمه .

صارت فيزياء مهيب ذبان :D :D
واقبلوني معاكم .

في امان الله

[ابو ماجد]

هلا اخوي شاهد صحيح ان الذباب مؤذي بس

يقولون سنة الذباب ولا سنة الغراب

ولكم مني الف تحية

[شاهد عيان]

نسيتوا هذا :

http://www.ponddoc.com/WhatsUpDoc/Frogs/frog_catching_fly.gif

يصلح بس ما يعيش بالبر !!

[قصيمي دب سريع]

انا عندي الحل بس استحي اقول له هنا
وهو بسيط جدا تخلي الذباب يتكي عنده ويجيب اهله وجماعته بعد

[...الطوقي...]

^
^
^
^
^
^
^
الله يغربلك انت وحلك ذا:D ..

فيه حل ازين خذ معك جوال باندا يقولوووون فيه طارد للذبان والناموس :p :D ..










تحياتي لك
...الطوقي...

[ابو ايمن]

حياك الله

أنا جربت مرة .

صبيت شاهي ( حالـــي ) يبعد عن المكان اللي أتغدى فيه حوالي 3 أمتار أو أقل

وتجمعت عليه ( الذبان )

وإذا صبيته في عدة اتجاهات يكون أفضل .

صحيح ماانقطعت عن السفرة .

لكن خفت كثيييييييييييير بسبب تجمهرها وتجمعها على الوليمة المسكوبة على الأرض .
( حلوة الوليمة المسكوبة !!!!!

خاصة في المحلات اللي تكون ( ذارية ) يعني الهوا فيها قليل .

تحياتــي

[شاهد عيان]

فيه مثل يقول : ( يالله سنة ذباب ولا سنة قراد )

[ولد وايل]

عندي حل قوي جدا لجميع الحشرات حتى العقارب....


خمسه لتر ديزل و رشها حول الجلسه بس راح تشم الديزل شوي وبعدها تتأقلم

صدقوني انسو شي اسمه حشرات بعد الرش او تكب على شكل دائرة اكبر من الجلسه بعشر مرات وتكون

الجلسه بالوسط


ولك تحياتي



ولــــــــــــــــــــــــــــ وايل ـــــــــــــــد

[نيتروجين xp]

الحل موجووووووووووووووووووود

شب ناااااااااااااار بس خلها بدخااااااااااان مررررررررررررررره

وارتاح من الذباب المزعج ...













وتقبلوا تحيات أخوكم
:::::المجتهد:::::

[راعي الكيف]

طريقة مجربة 100% .......... جب لك طشت أو تبسي أو أي وعاء وحط به ماء بحكم أن الذباب يلاحق الماء وحط بها الماء تايد حق الغسيل واخلطهم الين يصير الما قريب من لون الحليب وحطه بالمكان اللي ابلشك به الذبان وابن أمه يغثك عقبها !!!!!!!!!!!!!!


طريقة مجربة بالصدفة في أحد الرحلات كان معنا وايت صغير ((قلص)) وحاطين على أحد الحدايد اللي به تايد وما دري إلا وانكب ويوم جينا إلا وشفنا الذباب تقول مرشوش من كثره وعاد جربناها مرة أخرى ونجحت التجربة لأن التايد به ريحه تجذب الذباب وان جا غطس بالماء وهكذا ......... !!!!!!



جربوها تراي جاد والله .....!!!

[أبويزن]

بسم الله
ودنا ندلي بدلونا في هذا الموضوع الشيق بعد ان سبب لي الذباب قلق اليوم في البر
هالحين مزعجينا كلكم بأجهزة اتصال ورصد وتحديد مواقع وغيرها كثير وما طرى على بالكم شيء واحد ألا وهو أن هناك أجهزة تصدر ذبذبات(ليس ذبان)فوق الصوتية تقوم بطرد الحشرات واعتقد أ شركات الجوال بدأت بإضافتها إلى أجهزة الجوال
جربوها وإنشاء الله تنجح
أنا كنت في الهند قبل سنة وشفتهم يعلقون في بيوتهم ورق A4 بعد غمسه في الزيت وهات صيد نامس بس ما اعرف ان كانت تصلح للذبان عموما هذه التجربة مع تجربة اكياس الماء منتشرة في بومبي

تحياتي

[المطلق]

أخوي شاهد عيان

الحل عندي وانا ابو هندي

بس بشرط تكون داخل خيمة

تاخذلك عود حطب مشتعل يدخن وتحطه بالخيمة ليما تمتلي دخان

وفي طريقه ثانية ولع بقطعة لستك ونفس الحركة

تحياتي

[محتار]

انا عندي حل مناسب جدا

رح لمحلات البيطرة وقلهم ابي بودرة مبيد الذبان هذي البودرة او الحبيبات فيها رائحة الهرمون الذكري لدى الذبان
يعني تجي طايرة حطها على سفرة جنبك وحط عليها من اكلك وبعدين جدع عليها العظام نسبة كبيرة من الذبان بتوقع على السفرة وعلى طول تموت

[اسيزو 4x4]

مالك حل أبد الا الناموسية :good:

ولكن أذا تسلح الذباب بأسلحة فتاكة :hot: (يعني من الذباب المدرع الكبير) الله يعينك :D :D :D

والله مايهمة الناموسية ولا الى بداخلها :D

[قرص الجمر]

الحل عندي وانا ابو هندي ..
جب طوفريه اوصينيه الي هي .. صب عليها شويت عسل او سمن وتشوف الذباب يجيها على اطول ويلزق فيها
بامكانك تحط اي شي يودي غرض الصينيه
حطها قريب منك وانتهينا من المشكله جربوها وادعولي

[الممتع]

اسمع ان الذباب يكره اللون الازرق

[جارمن الصمان]

هههههههههههههههههههههههههههههه يعـني تبيننا نطـقم اززرق والخيـمه زرقـا

[اشهب]

يقول اسمع الاخ مو متاكد
يعني احتمال نطقم ازرق ويجي ذباب
عاد المشكله معنا واحد مستحيل نحصل بدله قده
اي لون مو ازرق

عموما فكره حلوه

[ولد سليمان]

مع اني كنت اتمنى ان يكون الموضوع في العامه مهوب هنا ..... بس المشرفين ابخص

الحقيقه موضوع يستاهل كل هذي المشاركات واكثر لان جميع من يطلع للبر يعاني من الذباب وخاصه ايام الربيع
اعتقد رأي ابوايمن مهوب بس اشوف انه حسافه اخلي الذباب يضرب له بياله شاهي خادر على حسابي
والاخ أبويزن من حيث اكياس الماء
واخاف اقول ان فكره مكشات زينه تقولون وش معنا مكشات ..........
لانها فيها توفير ومبنيه على فضلات الطبخ والاكل وليست مواد تجلب خصيصا للذباب مثل القاز والديزل وتوضع في
الاواني فكيف لو ينكب الديزل مع المطبات والمطامر داخل السياره

بس والحل على قول خوينا شاهد عيان وخاصه في هالحالات وخاصه :
- اذا علقت الذبيحه جاك ولزق فيها
- اذا قلطت غداك قام يسابق عليه
- واذا جيت تغسل صحونك تكرها من كثر ماهو طايح فيها
وكله كوم واذا جاء الواحد ياخذله غطه او تعسيله كوم...ان غطيت وجهك لزق عند رجليك وان غطيت رجليك
جاء عند ايديك ودور النوم بهالحاله .
الا فيه اختراع وهو انك تروح للمصلخ وتاخذ لك ذيل بقره وتطبقه على مكينه مساحات القزاز وتولف له قاعده وتحطه بجنب الجلسه وشف وشلون تهش الذباب عنك -تراي امزح -

حسبي الله على ابليسك يا قصيمي دب سريع
ترى مهوب ازين لك لو اشوفك كاشت بجنبنا وتطبق الفكره ترا مافيها....... بالشوزن ورقم واحد بعد

[المموه]

السلام عليكم ورحمة الله وبركاته
اخواني الاعزاء . سوف اعطيكم افضل حلين لهذا الذباب بناء على تجربه وهما :ـ
1ـ جهاز مبيد وهو جهاز قيمته (450) ريال يباع بشارع سلام بمحلات الادوات الزراعيه وشكله كأنه ابريق تفويح يعمل على خط220 وطريقته ( يفتح ويوضع بداخله ثلاث غطيان حوالي ربع لتر مبيد يتم شراءه منهم ويكون خاص للحشرات الطائره وباقي الجهاز يعبأ ديزل ) بعد ذلك يتم ايصاله بالكهرباء وستلاحظ بعد ضغط الزر دخان كثيف جدا يغطي منطقة كبيره اي شي يطير يسقط مباشره والكهرباء يتم تدبيرها بالبر من جهاز يباع بالغرابي ياباني يشبك عن طريق البطاريه ويعطي قوه (1500واط ) تشغل الجهاز بسهوله. وقت (البق) نستخدمه ايضا بالاستراحه ماتشوف بقه ويستخدم ايضا اذا وضعته على الثقيل للحشرات الزاحفه .
الحقيقه جهاز يشفي غليلك ويبرد كبدك وانت تشوف الذبان تتساقط وتهرب من المكان .
2ـ شراء ناموسيه كبيره تباع في محلات السدحان بطريق الامير عبدالله تحصلها في اخر المحل معلقه قيمتها حدود 100ريال . وهي عند الغداء تتسع الى حوالي (5) اشخاص وهي مهمه جدا للبران وفصلها جراب للمحافظه عليها .
مع تمنياتي لكم بالتوفيق ( اخوكم المموه )

[البارق النجدي]

انا ودي اعقد اتفاقية مع الذبان اعطيهن اللي يبغن
اكل وشرب وكلش بس يبعدن عني

[القنيص]

يعطيكم تاعافية على النصايح وبصراحة مابعد ريد مبيد الحشرات الطائرة والزاحفة
( ريد جربوة أنه فتاك )

[nooh79]

يالربع اما عندنا ذبان بينبع شكل غيييييييييييييييييييييييييير
صغيير ولزقهههههههههههههههههههه
يوم تهش عن وجهك بايدك ولسه ما انزلت يدك الا هو قد رجع
المهم كيف نتخلص منهم
1-) كرتون ورق وحط عليه غراء فيران ( تعرف شلون انه ادي ايه ملقوففففففففففففففففففففففف)
2-) هناك دواء سام على شكل حبيبات السكر اللون ( سكري واحمر) ضعها في صحن بلاستيك
3-) جمع مخلفات الطبخ و بعد فترة وقبل الاكل رشها برشاش به قاز وكذالك دلخل وحول مكان الاكل
ودمتم

[صاروخ]

الحقيقه انك منسم يا شاهد عيان (ونظيف قوه )
صحيح ان الموضوع يحوم الكبد لكنه مهم جداً لانه هذا الواقع اللى نعيشه بالبر
اما طريقة قصيمي دب سريع تراها ناجحه 100%
وانا عندي طريقه قراتها فى كتاب لكن ما بعد جربتها وهي احراق ورق الشاي ( التول ) بالنار يطرد الذباب والناموس

[حبتين]

لا أنا عندي الحلي أول ما يحط الذباب على القدر أرميه بالشوزن

[أبو ثا بـت]

بصراحه أفضل حل هو الجهاز اللي يباع بالصيدليه اللي تشبكه في الكهرب ويصدر ذبذبات تبعد جميع انواع الحشرات وانت ماتسمعها . . والكهرب سهل جدا محول صغير وافتك من الذبان وغيره ..

[شاهد عيان]

أدري إن الموضوع قديم لكن عندي تساؤل :

هالسنة وبعد نزول الخيرات ولله الحمد على القصيم وتحديدا بريدة ظهرت الذبان بشكل كبير !

هل المناطق الثانية فيها ذبان ؟ هل تعانون من نفس المشكلة ؟

[سطام vip]

والله يا عليكم حلول خطيره هههههههه

يا يا قصيمي دب الله يأخذ شيطانك انت وطريقتك

اخواني الحل سهل جداً وان شاء الله يفيد الجميع

وسعره زهيد جداً (القرنفل) (المسمار) (العويدي)

لازم يكون مطحون جديد ورشه على السفره حول الصحون

واذا تطبخ حطه في صحن جنبك

وهالطريقه بعد تنفع لحفظ الاغذيه خصوصا اللحوم اذا ما معك ثلاجه

شرح اللحم ورشه عليه ويطرد الحشرات والنمل بعد

والقرنفل استخدمه الفراعنه في التحنيط وهو مفيد جداُ

جربوا ما راح تخسرون ولا تنسونا من دعائكم وخلو عنكم القصيمي دب سريع ههههههه

دمتم بخير

[بن شمروخ]

شف ياخوي حنى ابتلشنا بالذبان من يوم عرفنى البر...

لكن تبي الصراحة هو له فايدة ....

1/ انه رياضية لليد (( من كثر التهويش ))

2/ تحريك للدورة الدموية

3/ يشغل اوقات الفراغ

4/ يعمل على تشغيل العقل والتفكير باختراع لقتلهم وابداتهم

5/ انه يصحيك من النوم عند بزوغ الشمس...(( اول ما تشرق الشمس)) لان الذباب يهجد وقت غياب الشمس وتشوفه بالليل متعلق فوق الخيمة ياكثرهم واول ما تشوف النووور تسمع صوووت ززززززززززززززززززز

هههههههه

طبعا الحل الي انا سويته ....

جبلك طووول الله عمرك طيحينة سايلة او سمنة او دبس وحطها في طاسة كبيرة ....

[المغرز]

هههههههههههههههههههههههههههههههههههههه
ان كب لهن على شنق ويخرن عنك
ما هي مشكله
تحيا تي

[no fear 78]

في طريقة عجيبه مجربه في ماليزيا كنا في محل في الشارع حق الأكلات الشعبية في الهواء الطلق على الطاولات في برتقاله مقطوعه للنصف او مركوز فيها حبوب القرنفل (المسمار) شكله غريب اسئل راعي المطعم ليش هذي قال هذي تبعد الذباب او الملاحض انه ولا ذبانه موجوده في الطاوله و كأن راشينها بف باف

جربها يمكن تنفع

لا كن اخاف انه ذبانه من النوع الي ما ينفع معاه البرتقال و لا الليمون ما خذ دورت صاعقه الكلب

[سنجااار]

جرب الليمون قم وقطع الليمونه اربع قطع ونغز فيها مسمار ( عويدي ) في كل قطعه خمس وحطه على الاكل
انا قرأت باحد المنتديات انه مفيد وطرد الذبان عنه وانا ماجربت جرب وعلمن وش يصير عليك

[a2020]

جرب اللي قالوه الاخوان no fear 78 و سنجااار
وأعتقد إنها تنفع

[حبيبتي شقراء]

عندي لكم طريقه فتاكه ومجربه وبالصور

وهي انك تاخذ معك ليمونه وتقسمها ارباع وبعدين تجيب قرنفل احنا نسميه مسمار

وتغزة في شرائح الليمون وبعدها ماتشوف الذبان وراح تدعي لي والطريقه اجربها اذا رحت للثمامه وهاذي الصورة للتوضيح

http://img.el-ahly4ever.com/images/8668771274.jpg

[عاشق الفكسار]

عندي لكم طريقه فتاكه ومجربه وبالصور

وهي انك تاخذ معك ليمونه وتقسمها ارباع وبعدين تجيب قرنفل احنا نسميه مسمار

وتغزة في شرائح الليمون وبعدها ماتشوف الذبان
فعلا طريقة مجربه وناجحه

[البضيع]

السلام عليكم ورحمة الله وبركاته
يوجد طريقة أنا مجربها . فيه مصيده على شكل فيلم الكميرا .تسحب الشريط اللاصق وتعلقها بالخيمة وبعد ماتمتلى تركب غيره . وقيمة الفلم الواحد 5 ريال . والشريط به مادة تجذب الذباب . متوفر عند هوم سنتر وما لقيتها عند غيره .


اشوف كثير من الاماكن وخاصة المصالخ يحطون هذا الشريط ولونه اصفر لكن من كثر الذباب يقلب اسود

تحياتي لكم

[ابن مسعوده]

اشتر لك ضفادع ووزعه حولك

[مدردب شاهي]

الحل عندي
غريبه عليكم يااصحاب البراري الححححححححححححححححححححححل
واتحداكم تلقون غييييييييييييييييره
شب ضو بالرمث وخله تدخن كل اذباب يعض ثوبه ويمشييييي واللي تلقاه اخذن زنوباه ولاقط وليده واللي شايلن اعياله على ظهره واللي اخذن عدته معه كلا يلقط عمره ويمشيييييي

[ml7_najd]

http://tbn3.google.com/images?q=tbn:tuyDykvJz-awCM:http://www4.0zz0.com/2007/03/06/18/73328958.jpg وبعضهم إلا شاف السطارة بيدك وقف على وجهك من خباثته

على شان تسطر وجهك:looney:

[fah0d]

ياخوي الطريقه سهله جداً

الطريقه انك تأخذ لك كيس صغير حق اللحم تحصلها عند الملحمه وتعبيها ماء وتربط الكيس وتعلق الكيس عند الاكل وماعد تشوفهم وهذه الطريقه تستخدم عن اللحامين وعند البدو اول

[بلاتين]

هههههههههه عليك وصف خياااااال :)

الحل فيه كيس يباع عند الصيدليات البيطريه خاص بالذباب وانت طالع خذ معاك كيس وفكه وعلقه يكون مرتفع عن الارض اهم شي المهم يصير كل الذبان يدخل بالكيس يشيل بالالوف الذباب هل كيس .
عاد عقب مايطيح بالكيس لك الحريه تاذيهن شوي تطلع حرتك .

موفق خير

[المؤمن كالغيث]

السلام عليكم

مع

هالخلطه لاذبان بعد اليوم كل ماعليك انك تصب او

تكب كاستين منها فيه مكان بعيد عن مكشاتكم راح يجتمع

عليها الذبان ولاعاد يلتفت يمكم ولاحتى يوايق عليكم

http://www.mekshat.com/pix/upload02/images89/mk40897_202911241971.jpg


مكوناتها ثلاث قشور موز وبطاطا مسلوقه مهروسه

مع قرشها كوب حليب ونص ليمونه مع قشرها تخلط


في الخلاط لين مايصير لونها بني غامق صبها في

زجاجه واحفظها لو في الثلاجه واستخدما عن الحاجه

[عوكاس]

ياجمعه هدو انفسكم فيه مثل قديم يقول سنة الذباب ولاسنة القراد سنة القراد تكون دهروسنة الذباب تكون سنة خير اضاهران الولين ماخلو لتالين شي ههههههههههههه