ابي شوركم وخبرتكم في هذا المجال وش الأفضل فزعتكم الله لايهينكم .... [الأرشيف]

مشاهدة النسخة كاملة : ابي شوركم وخبرتكم في هذا المجال وش الأفضل فزعتكم الله لايهينكم ....

ابواسامه 2007

23/04/2007, 12:17 PM

اول شيئ امسي عليكم جميعاً والسلام عليكم ورحمة الله وبركاته
بصراحة انا محتار ومتردد ودي بسيارة دفع رباعي في حدود الـ50000 الف ومحتار بين السفاري وبين اللاند وودي بفل كامل ونظيف ابستخدم استخدام شخصي ولاني راعي مقانيص ولا مطامر فوق الطعوس ابيها للبرمع العائله والكشتات الخفيفة والسفر والتطعيس على خفيف للمتعه وليس للأستعراض وش تنصحوني به بصراحة الأراء كثيره وتعددت وجهات النظر بس ابي اللي يصلح لي .

ولكم جزيل الشكر وارائكم احترمها وتهمني كثير لاتبخلون علي ياهل الخبره

Abo Nader

23/04/2007, 12:35 PM

السلام عليكم..

أخوي المبلغ الي معك يالله يجيب سوبر سفاري98..وما أتوقع يحيب لك لاند فوق 98...بس لو تصبر إلا الصيف ترا أسعار الجيوب بالأرض..إذا ما كنت مستعجل أصبر...

و على كلامك إذا العائله ماهي كبيره..فكر بالباث تراه حليل..المبلغ الي معك يجيب لك 2003...

و الله يرزقك الموتر الي يعينك على طاعته...

ابواسامه 2007

23/04/2007, 12:52 PM

اخوي ابو نادر مساك الله بالخير وسعيد بمرورك ومثل ما تفضلت المبلغ اللي معي يالله يجيب سفاري 98او 99 او لاند 97 او 96 بس في اعتقادك لو صبرت بعد شهر تتوقع تنزل الجيوب وعلى فكره انا طاري على بالي الباثفندر بس مادري هو بخاخ وفيه دف لوك لأن الفل كامل سفاري او لاند فيها هذي الميزه بالأضافه الى الفتحة والقير التماتيك .

Abo Nader

23/04/2007, 09:33 PM

أخوي الباث ما يجي دف لوك..و تلقا فتحه و تماتيك...

لكن أكرر أصبر لك 3 شهور و إن شاء الله تحصل مرادك...

المميـز

23/04/2007, 09:44 PM

ابو اسامه الله يعينك على كثر الاراء اللي تبي تجيك

لكن انت استخر ربك والمكتوب هو اللي بتاخذه

واانا من وجهت نظري اقولك خذ السفاري وماراح تندم ابد واسئل مجرب <<<

الجمس والتايوت والفرد الاخرق *** كله مع البترول خاقن وخقيا
كنج الصحاري دق دق خشومهم دق *** دق دق خشوم اللي تريد السبقيا

أبو_خالد

23/04/2007, 09:50 PM

لا تغير عن الباترول

وعليك بالسوبر سفاري

تقبل رأيي ..

:)

bmw_07450

23/04/2007, 10:24 PM

السلام عليكم
توكل على الله وخذ لك هايلوكس مستعمل ودباب بانشي وفلها انت والعيال هههههه ترى أمزح معاك
تبي الكلام الي يجمد على الشارب مادام معك 50ألف وتبي جيب فل كامل ودف لوك مالك الا سوبر سفاري
98 أو 99 على قد دراهمك...وانشالله ماتندم اهم شي الموتر يكون نظيف
وبالنسبه لدف لوك انا معاي سوبر سفاري 2003 والله حتى ماأعرف أشغلة لأني ماأحتجت له
والسبب السفاري اذا غرز فيك حطه في الدبل الثقيل وبس يفز والله مثل الغزال مايحتاج دف لوك ولا شي ...
والله يختار لك مافيه الخير...

ابواسامه 2007

24/04/2007, 08:08 AM

احبتي الكرام الف شكر على تواصلكم وتجاوبكم معي والحقيقة انا سعيد بهذه المشاركات ويبو أن الجميع متفق على السفاري والنية ان شاء الله سوبر سفاري واللي يخبر لي نظيف وفل كامل لا يبخل علي الله يعطيكم العافية .
كل الشكر لكم جميعاً واخص بالشكر :

ابو نادر .... الف شكر لك على هذا التواصل وهذه المعلومه والله يوفقك دنيا وآخره .

المميز .... كل الشكر لك على مداخلتك وصح لسانك على القصيده .

ابو حمود .... بارك الله فيك وفالك التوفيق .

bmw_07450 .... كل التحية والتقدير لك على هذه المداخلة الجميله ورايك على العين والراس .

اشكر كل من شارك ولو بالقراءة .

راعي كيف

24/04/2007, 12:40 PM

السلام عليكم
باترول عطي الله
دراهمك تجيبلك باترول لأن التايوتا غالي بالحيل وقبل اسبوع كنت بالمعارض ادورلي باترول واحد من الشباب يدورله تايوتا تصدق التايوتا ماينزل إلا الخميس والجمعه كذلك السفاري مدري وش السبب المهم مالكم بالطويله الأسعار تتفاوت من 43لالف الى 60الف من مديل 98الى 99 مابين عادي وتماتيك ومابين فل واقل اس جي ال وطحتلي بواحد مدري من وين الله جابه لي 2001 اس جي ال ذهبي وسعرة مناسب وتوكلت على الله واخذته والحين معي ماشاء الله تبارك الله سيم مني على طول 60الف وهو مكانه يعني جابلي مكسب ولقيت بعد 2003 لونه غامق شوي عودي فل كامل مسيوم 63 الف شغلته حسيت ان المكينه فيها بلا واحس ان الموتر جايه كرف وإذا بغيت شيئ جاهزين ونعين ونعاون .
هذا ماحصل لي قبل اسبوع طبعاً نفس معاناتك وكنت ادور على باترول او يوكن او باث وطحت بالزين ولله الحمد .

اخوك المحب راعي كيف
ابو ناصر

مدور ربيع

24/04/2007, 12:48 PM

الله يوفقك اخوووي ..

واقول اذا تقدر تحط المبلغ مقدما لموتر جديد وكالة ,, يكون افضل

الموتر القديم ,نادر جدا تلقى النظيف
وحتى لو لقيت , ماريح تثق فيه ابداااا , حتى لو شيكت عليه باستمرار , لابد من المفأجات

وهذا الامر رايح يقلقك وخصوصا انك تبغاه لعائله

واتوقع اذا حطيت الخمسين الف مقدما" بتايوتا هدد , رايح يحسب لك بقيمة تقسيط هايلكس , بحدود 1500 ريال شهريا

وانت بصرك بنفسك ... وموفق اخي

salehhd

24/04/2007, 01:00 PM

ابواسامه 2007

25/04/2007, 09:33 AM

مرة اخرى اشكر الجميع على مرورهم واخص بالشكر

اخوي راعي كيف
تحياتي لك ومبروك على السياره والله يعطيك من خيرها ويكفيك شرها وترانا مانستغني عن فزعتك كانك خابر لي موتر فل كامل ونظيف علمني والله يرزقنا وياك .

اخوي مدور الربع
اسعد الله مساك وبصراحة انا ماافكر في التقسيط بشتري لي موتر بهذي القيمة وان شاء الله نلقى شيء نظيف والصيانه ان شاء الله مقدور عليها وهي على الأستخدام تقبل تحياتي .

اخوي salehhd
مساك الله بالخير سعيد بمرورك ومثل ماقلت انا ودي ادفع الدراهم مره وحده وبدون تقسيط والسفاري ارى انه انسب شيء صحيح اني بتعب الين القى نظيف لكن الشكوى لله ومن ناحية تغير شكل اللاند والله اليابانيين لاقين هالخليجيين يلعبون علينا يغيرون اشياء بسيطة في الشكل والأكسسوارات ويضاعفون القيمة مع ان تكلفة الأنتاج تزيد بشكل بسيط عن المديل السابق لكن هم ياخذونها دبل .

تقبلوا تحياتي

باترول للأبد

25/04/2007, 12:17 PM

انا أقول توكل على الله وخذلك سوبر سفاري 98 او 99 كامل المواصفات على قد فلوسك وريح نفسك من كثر الكلام

راعي كيف

25/04/2007, 01:27 PM

السلام عليكم
http://www.mekshat.com/vb/showthread.php?t=83770;)

يمكن يفيدك

اخوك المحب راعي كيف
ابو ناصر

راعي كيف

25/04/2007, 01:28 PM

السلام عليكم

http://www.mekshat.com/vb/showthread.php?t=83334

يمكن يفيدك

اخوك المحب راعي كيف
ابو ناصر