هكذا الكشتات تكون طفش × طفش ...!!!!

[سماوي]

بسم الله الرحمن الرحيم
السلام عليكم ورحمة الله وبركاته
أخواني الأعزاء : أعضاء مكشات الأعزاء....
سأعرض عليكم موضوع مهم وأنا خائف من المشرفين يحذفونه لأنه قد يدخل في غير مواضيع مكشات الأساسية ...
ألا وهو لماذا تكون بعض كشتاتنا طفش × طفش ..؟؟؟؟
فقلت لعلي أذكر سبباً مهماً لهذا الطفش ، وعليكم الباقي ( واحد سوداني ) :D :D
السبب هو أن بعض الكشاتة يذهبون للبر وعندهم قصد واحد فقط فإن وجدوه فهم في قمّة السعادة ، وإن لم يجدوه فكشتتهم طفش ونكد .... كالذين يذهبون للصيد ( مثلاً ) فإن لم يجدوا الصيد ضاقت صدورهم من الوقت الممل ، فتراهم يقضونه بالتمشي لو إنه شمس رنانية ، أو أحياناً كثيرة يرجعون لديرتهم حتى لو كانت بعيدة ، أو يروحون ويتلزقون باللي جنبهم من الكشاتة الثانين ، أو ............ .
وبعدها تسمع كلمات التأفف ( أف – والله طفش – وش اللي مشقينا نجي هنا - ..... ) ;) ;)
والحل في نظري أنه يجب عليهم أن يضعوا أشياء يقضوا بها الوقت بما ينفع ، كأن يقوم أحدهم والذي يعرف ( ميكانيكا ) ويعطيهم دورة في الميكانيكا بالأشياء الخفيفة .... لا يقعد يتوهق ويوضب المكينة وبعدها يجي هو وأخوياه على ناقلة .:D :D

هذا إقتراح وأنتظر منكم المشاركات الرائعة المعهودة ......

والله يرعاكم

[أيمن]

يعطيك العافية أخوي سماوي ..
وموضوعك في صلب المنتدى ويلامس قضية حساسة في الطلعات والكشتات ..
ومن رأيي أن الأشخاص الذين يتذمرون وكثيري الشكوى أنهم غثا على القلب ولا يحرص الواحد على مخاواتهم ..
وإذا بحثت عن هؤلاء لا تجد أنهم من هواة البر أصلا ..
حتى لا تكون طلعتك إلا فرفشة في فرفشة .. لا تخاوي إلا هواة البر ..

تحيتي

[ابومنقاش]

السلام عليكم حميعا يا اعزائي ......
كلامك صحيح يا اخي سماوي اذا كان الي معك في الرحله ضعيف نفس ودويني وانبطاحي فعزالله من يوم
تطلع من الديره وهو بادي با التكشيره لاتفه سبب ويحط من الحبه قبه لانه ضعيف نفس ولاهوب راعي
بر تذمره كثير ومن اي شي ويدور الملاحظات ولوها بسيطه ولاعنده الا الانتقادات الي تسد النفس
وتخليك تطفش وودك بالرجعه على طول علشان تفتك منه ومن حنينه وما يصلح له الا الاستراحات
الي فيها خدم يجيبون له الشاهي ويصبونه له وهو منبطح عند الدش والمكيف ينفخ >........< حتى
لا يعرق,,,, هذه النوع داجن يعني ماهو راعي بر حق الديره فقط فخله رفيق المدينه .
ولي تجربه مع احد الاصدقا العزيزين على نفسي لكن في رحله الصيد ما يصلح ابدا وصرت مااطلع معه
لانه من يوم نطلع لاول شعيب ونمر كم شجره ولا نلقى صيد يسدح البندق ويطق اللطمه ويبدا التذمر
مره يقول حر ومره غبار وهلم جر ...
الصيد ياجماعه يبي صبر وركاده وسعه بال وتفائل لان لوكل شجره بتلقاها مليانه صيد ما صار للصيدطعم
لذه الصيد في التعب وبالبحث عنه وحتى لو مالقيت صيد خل الرحله متعه ووناسه وسعه صدر وحلل
العنوه بشبه النار وتلقيمه القهوه وحكره البراد تحت شجره مظله ولو مسحت عرقك بشماغك
ما احلاها من جلسه بشرط ان الي معك نشمي وشقردي ومتفائل ولاهو مليلي وضعيف نفس ونويعم
مثل الزبده يموع في الحر .
فيجب على الكشات ان يكون جاهز لاءي احتمال اوظرف ويتكيف معه حتى يستمتع بطلعته ويستفيد منها
لاءن الهدف منها المتعه وتغيير الجو وكسر الروتين والتعود على الصبر وتغيير نمط الحياه ولو ليوم
واحد اوحتى ساعات حتى تعود الى اهلك وبيتك مبصوط فال الحجاج وناسي هم الديره ومشاكلها
وتكون ريحت بالك وجددت نشاطك ... والله الموفق وآسف على الاطاله... يااخوتي

[الشيخ]

السلام عليكم يا الربع
انا مع اخوي ابو منقاش باللي يقوله ميه ميه
المفروض اختيار الصحبة قبل المشية للبر حتى لو كان معك واحد من هالنوع لازم يخرب عليك الكشتة ويقلبها نكد
اما بالنسبة لسالفة الصيد واذا ما لقى صيد يتنكد الواحد فهذا شي طبيعي لكن بعض الناس ما يخلي هالموضوع يخرب عليه الطلعة ويحاول يستمتع باي شي
وافضل شي السوالف والعلوم الزينة وشبة الضو هذا اذا ما كان ناوي يمرح في البر
اما اذا ناوي يمرح عنده شغلات واجد يتسلى فيها ويوسع صدره
مرات استغرب من بعض الشباب تقعد معه ساعتين تسولف على راسه ولا ينطق بكلمة
يعني لاهو يعرف يسولف ولا يحطب ولا يتمشى ولا يبي يسوي شي ليش طالع البر من الاصل
افضل شي واريح للواحد انه يحسن اختيار ربعه قبل الطلعة
واحد من الشباب دايم يطلع مع ابوه واعمامه وشلة الشياب ربعهم يقول مرات يقضون الوقت بالمطارح ولا يتسابقون هذا وهم شياب

بمختصر العبارة ما على المشتهي خسارة
اذا ناوي يوسع صدره بيلقى له الف طريقة وطريقة اما اذا هو غاوي نكد فأعرف انه مخربها من الاول ولا تحاول معاه ولا عاد تكشت معاه
وسلامتكم

[نقا هشال]

سماوي

ياهلا ويامسهلا

واصلاً اللي يطفش في البر مهوب صاحي

اذا جا في الكشته رجال وعلوم وسلوم وسوالف زينه وترتيب ونظافه

خلاص هذا يكفي

باالعكس الجلسه في البر لحالها توسع الصدر


وانصح اي يواحد يبي يكشت يعرف من يخاوي.

تحياتي....

[صايد الطرايد]

الله يعطيك العافيه اخوي سماوي........ وصدقني نحتاج مثل هذي المواضيع؟؟؟؟

[هواوي]

الاخ سماوي صراحه موضوعك من اهم المواضيع وخاصه اننا نعاني منه في البر

كثير ما نتعرض لمواقف زي كذا والادهى منكذا انك لما تكونون مستانسين وجيك واحد يقول عندي موعد لازم نرجع ((وحلهاانه قبل الطلعه تكتبه تعهد ان ما وراه شي ))

كثير من الناسانسان مزاجي يعني تلقاه مستانس وفجئه تعكر مزاجه ولاهو من النوع الي يجامل يعني يقعد يتافف ويتنهم الين يطفش الي معه كلهم ويبدا التشاحن بين الشله الوحده ويمكن توصل الى مشاكل كبيره

وانا عن نفسي ما صارت لي ولا مره لاني اطكلع البر يا لوحدي يا مع ناسما يطلعون البر الا وهم فاضين او يتقبلون اي شي او همهم يطلعون من المدينه سواء صادو او مالقوا صيد او لقوا مكان اومالقوا مكان المهم انهم بعيد عن المدينه لو فوق طعس الذاري يلعب فيه وما يطفش

ونصيحه اثنين لا تاخذهم معك في البر نهائيا

1- الي يشربون الله يبعدنا عنه وعنهم

2- والملاقيف الي يتحرشون بالناس يعني المراجيج

من جد كل شي يهون الا ذا الاثنين ما ينطاقون في البر وفي المدينه

وختاما يازين البر بدون ما يكون معك ناس يطفشونك