كيف اخفف من مطامر الموتر في البر؟؟؟

[مخاوي الليل]

عندي ونيت قطع 35 توي شاريه علشان البر لكن لاحظت ان السيارة مقارنة مع موتري الثاني (جيب نيسان)
تطامر مع المطبات في البر بزياده مع اني الهواء في الكفرات بين 30-25

بعض الشباب نصحوني بتدبيل المساعدات وانها راح تساعد في ترييح الموتر وتقلل المطامر

وبعضهم نصحني بتغيير الكفرات

وياليت نسمع راي الشباب

وش الحل ؟؟؟؟؟؟؟؟؟؟

[القماري]

أولا مبروك الموتر
ثانيا 30 - 25 ضغط هواء كثير في الرمل والبر ( قلل الهواء 20 - 10 ) وبتلاحظ الفرق.
وإذا كان موترك الجديد سست فلا أظن أنك تقدر تخفف المطامر .

[مخاوي الليل]

أولا: الله يبارك فيك

ثانيا: المشكلهياخوي ماهي بس بالطعوس يعني انا لما اكون ماشي بدبايه او حتى في حزم وفيه مطبات الاحظ مطامر المتر ماهو طبيعي . شيكت على المساعدات لقيتها تمام ما فيها مشكله .

لكن السؤال هل ابستفيد اذا انا دبلت المساعدات ؟؟؟؟

لأنه صار نقاش بين اثنين من الشباب يوم شكيت لهم المشكله واحد يقول ان المساعدات شغلتها تخلي الموتر يتحمل زيادة وزن والثاني يقول انها بعد تخفف المطبات


ياليت نلقى منكم علم وكاد

وسلامتكم

[ولد روضة سدير]

السلام عليكم ....
اولا :شنو نوع السياره ....
ثانيا : شنو المساعدات ..المعاونات اللي انت حاطها ...عادية الهوا وله الغاز وله الكبريت
السياره جديدة ولة قديمة ........؟؟؟؟؟؟جاوب وانشاءالله اقدر اساعدك؟؟

[مخاوي الليل]

اخوي ولد روضة سدير

حياك الله

السيارة ونيت GMC قطع 35 موديل 99

ومساعداتها شد بلد ماغيرت فيها شي

وبعدين السياره فيها مساعدات وسست

[ولد روضة سدير]

السلام عليكم .....
الوانيت اكيد الابيض الطويل .....اللي يسمونه بالكويت وانيت شركات سييرا الله يسلمك جرب اذا رحت للبر حط بالحوض كياس خياش وعبها تراب اثنين وله ثلاث وجرب ......طبعا في نهاية الحوض بالطرف ......وانة اللي اعرفه انه الونيت لازم يطامر بالمطبات ...............وسامحنا على التقصير؟؟؟؟ او انك ترهم مساعدات ......يعني 4 قدام و4 بالخلف بس هذي لأهل البر اللي دايم بالبر ما يرحون للديره يتحمل الثقل وتمشي سرعه بالبر

[مخاوي الليل]

والله ياخوي يا ولد روضة سدير

سالفة اكياس الرمل كنها صعبة شوي وبعدين انا شاري الموتر خصيصاً للبر لاني شبه يومي هناك

ويمكن تدبيل المساعدات يكون حل زين بس ابغى زيادة تفصيل عن احسن نوعية

وشكرا

[قتال]

السلام عليكم ورحمة الله وبركاته ،،،،

أخوي مخاوي الليل .. حياك الله يا أخوي ..

إذا كان موترك هو وانيت الجمس الكبير .. فأنا عندي لك الحل إن شاء الله ..

1 - إذا كان موترك دبل قير ... فلا تلعب بموترك ولا تدوخ راسك لأنه يطب ولا يطامر وهذا عيب فيه ولا لقيت له حل .. وإذا كان يطامر عند أي مطب فهذا معناه أن المساعدات منتهية وتحتاج تغيير .

2 - إذا كان موترك ماهو دبل .. ويطامر إفحص المساعدات وإذا كانت جيدة .. فأنصحك أنك تجحش له ( تدبل المساعدات الخلفية ) أثبت على الخطوط وأركز بالتحميل وأقل تنطيط .

أما بخصوص هواء الكفرات .. أنا أنصحك تخلي الأمامي 30 والخلفي 35 .. في كافة الأحوال .. إلا في التغريز أو التطعيس فأنت وراحتك ..

وأتمنى أن هذه المعلومات تفيدك .. والله يعينك ..

[Abu-Sulaiman]

السلام عليكم ،،،،،

أخوي" مخاوي الليل" ولا يهنون الربع....مبروك عليك السيارة والله يعطيك من خيره ويكفيك شره.

انا معي نفس النوعية بس موديل 96

وبعد تجربة طويلة مع الموتر لاحظت ان هواء الكفرات له دور كبير بتخفيف المطامر ليش ؟
لأنه اذا كان الكفر محجر بالهواء فعند اقل مطب راح السيارة تنقز وعندك كرة القدم مثال اذا كان ضغط الهواء فيها عالي او واطي.

غير هذا كله خلال استخدام سنة ونصف احتجت لتربيط وتضمير الصندوق مرتين وكل الورشتين كانوا يقولون لي ان سبب تخلخل وتفكك الصندوق هو ضغط الهواء العالي اذا دخلت للبر وكلهم نصحوني ان الهواء يكون بمعدل 20 او اقل.

فيه سبب اخير ذكره اخوي "ولد روضة سدير" وهو ان الصندوق فاضى ومثل ما انت عارف ما شاء الله عليه صندوق الجمس كبير مقارنة بالسيارات الثانية فاذا كان فاضي راح تلاحظ ان موخرة السيارة تطامر واجد وتبي تشوف الفرق عند التحميل.

واذا فيه اى استفسار عن هذي النوعية من الجموس فانشاء الله أحاول أساعدك باللي أقدر عليه

والله يعطيكم العافية يا شباب.

[مخاوي الليل]

ماقصرت اخوي ابو سليمان

بس وش رايك بالمساعدات مالها دور في تخفيف المطامر

[ولد روضة سدير]

السلام عليكم .....
انه اعتقد انه المساعدات لها دور كبير في تخفيف المطامر ...........واذا كنت نواي تغيرها ........واذا انت شاريه بس للبر وانت كل يوم في البر .....اسأل عن المساعدات الغاز او الكبيريت ........او انك ترهم 4قدام واربعه بالخلف ........والاربعه خلهم نوعية اي سي ديلكو السوده الكبيره ............اما اذا الغاز اللي يكون لونة اصفر فيحتاج اثنين قدام واثنين بالخلف .................وتقدر بعد تشدها تخليها جامده..........ولك اجمل تحياتي ....وارجو اني افدتك

[Abu-Sulaiman]

السلام عليكم.....

بالنسبة للمساعدات اللي عندي الامريكية جبريل وموجودة بالسيارة قبل اشتريها.

لكن اللي اعرف ان المساعدات اذا كان ضغطها قوي فان الموتر نا يهز واجد ويكون قاسي عند المطبات (ما يمتص الصدمة بسهولة).
واذا كان ضغطها واطي فان المطب يكون لين والموتر يبدى يراقص.

وهذا اللي اعرفه عن المساعدات.

فاذا بغيت تخفف المطامر عليك بمساعدات قوية ويوجد لها اكثر من نوع.

[ابو الريم]

اخوي مخاوي الليل ............


قبل لا تلعب بموترك ......... ياليتك تعلمنا مواصفاته ومواصفات الكفرات ........ يعني وش نوعها وهل الموتر دبل ولا لا واستعمالك له في الرمال يعني تغاريز دايم ولا طرق صحراويه وان شاء الله نفيدك


تحياتي ابو الريم ,,,,

[الجمس]

اخوي مخاوي الليل
السلام عليكم ورحمة الله وبركاته
اولا مبروك الموتر والله يعطيك خيره ويكفيك شره.

ثانيا, الجمس الحوض بطبيعته (ينطط) بالجلد وخاصة ان كان غير محمل ولكن خدها من مجرب
(الترهيم ) اوتدبيل المساعدات يعني 4 قدام 4 وراء تبي تساعد كثير وترسي الموتر ولكن لاتقضي على المشكله تماما . العيب الوحيد بالترهيم انك تحس بالمطب كنك راكب ( شاص ) مع المعدره لعشاق الشاص والليونه الي انت خابر عند المطب تبي تروح,
ارجو من الله اني افدتك .

[khaled29619]

السلام عليكم

خذها نصيحه من مجرب لا تلعب بالموتر ويصرف فلوسك باشبء مالها داعي

فانا شخص مجرب الوانيت لمده طويله وحاليا معي وانيت طراز 97

واي وانيت لما تشوفه يطامر في البر فهذا شي عادي بس لما تحس بان المطامر شديد مقارنه مع الوانيتات الخري فانصحك بالتالي
فحص الهيئه الاماميه للسياره وهي
1 معاون السكان ( مهم )
2 المعاونات الاماميه والخلفيه ( مهم )
3 راس الماشات ( ليس لها دخل في المطامر ولكن لها دور في نعومه قياده السياره )
4 مجمع سكان يمين وشمال ( نفس دور راس الماشات )
5 راس الشيالات السفليه

6 اهم شي الاطارات انصح بالاطرات الجيده والمعروفه واحرص علي ان تكن جديده الصنع وذات مقاس ( 265 )


ملاحظه لا تقارن في اي حال من الاحوال بين الوانيت والجيبات لان الجيب دائما اكثر نعومه من الوانيت فلذلك لا انصحك بتدبيل المعاونيات لان ذلك سيحل المشكله بنسبه لا تزيد عن 15 الي 20 بالمئه فقط ومن خبرتي مع الوانيت فالافضل له هو معاون الوكاله الحجم العريض الاسود زيت ان كنت ما تحمل اغراض ثقيله جدا علي الموتر

ارجو اني افدك هخوي مخاوي الليل

[مخاوي الليل]

والله ياشباب انكم ماقصرتم يعطيكم العافية

وانشاء الله انا بجرب التدبيل واعلمكم وش صار معي

الله لايهينكم

[الفحل 2003]

الاخ مخاوي الليل
السلام عليكم ورحمه الله وبركاته

جميع ما قاله الاخوان صحيح ويحتاج الى متابعه دقيقة منك ولكن الحل الاكيد وانا اقول هذا الكلام حسب خبرتي ال 15 سنة مع السيارات من نوع (جمس) الدفرنس والدفرنسين والحل انك تشتري مساعدات غازية أو مساعدات زيت ثم تلين السسته حقت الحمل التي يسمونها ( العريضة ) وبذلك يخف عليك المطب واذا كان سويت هذا وما نفع ابغاك تبيع السيارة علي وانا لها مع احترامي وتقديري لك وللجميع .
ودمتم بخير
اخوكم / الفحل 2003