ٍهل يعقل 150000 ريال؟؟؟

[New hunter]

السلام عليكم ورحمة الله وبركاته
الحكايه اني كنت راجع من الخرج للرياض ولقيت مربط مكتوب عليه بيع تأجير خيول ما لكم في الطويله

وقفت انا واخوي ابو سعد المشهور بعفراوي وشفنا لنا ذيك الفرس العربيه عمرها سنتين

المهم خقييييييييت معها وذكرت الاحاديث اللي عن الخيل عموماً وعن العربية خصوصاً

وتلقفت وسألت الزول هل الخيل مسجله قال و هو مستعجل آآآآي قلت طيب بكم؟؟؟
ناظرني بنص عين وقال بـــ 150 الف ريال فقط لا غير انا طبعاً حطيت الموضوع في راسي بس بعد السعر

هوووووونت
سؤالي بعد هالمأساة
ما هي اسعار الخيول العربية الاصيلة؟؟؟
يعني مهره لقحه؟؟؟
المسجل كم و غير المسجل كم؟؟؟؟
لأن والله شكله مشروع استثماري ناجح وهوايه توسع الصدر ارجو من اللي عنده علم لا يبخل علينا وله من الدعاء و ان بغى بخشيش ما نقصر ههههههه( امزح: اما بخشيش يا قدمي)


و دمتم وجزاكم الله الف خير

[كلرز]

الخيول الاصيلة تصل إلى مليون ريال سعودي حسب ماسمعت من اصحاب الخيول
اللي تقول 150 الف هي مجرد اما شكلة زين جذاب يعني جمال يمكن بالنسبة لك مايكون جمال عندك عند اصحاب الخيول عندهم هذي زينة

[New hunter]

معك حق بس انا سؤالي كان عن سعر الخيول العريبه للـ اكنومي كلاس

[عقـــــــــاب]

معك حق بس انا سؤالي كان عن سعر الخيول العريبه للـ اكنومي كلاس
اكونمي كلاس ....وليس اكنومي ..

[الغوااااص]

صباح الخير ............ ترى دخلت بالغلط بس وشهو ذا ( اكونمي كلاس ) وش السالفة ..... لا يكون قاعدين تتكلمون بالسياسة .......:j ..... ابعد عنهم .....يافكيك ... سلام

[borsh]

حياك الله اخوي
اسعار الخيل فيه بمليون واكثر هذا للسباق
اما بالنسبه للي مسجل ( العربي الاصيل ) الي عمره تقريبآ 7_8_9 شهور من 15000 الى 40000 اما بالنسبه للفرس الي عمرها تقريبآ سنتين ثلاث ... تكون القيمه تقريبآ من 60000 الى 150000 وفيه طبعآ اسعار اكثر .
اما بالنسبه للخيل الي بدون اوراق الي عمره 7_8_9 شهور من 1500 الى 3000 اما بالنسبه للفرس من 5000 الى 15000
واسمحولي على الاطاله _______ تقبل مروري ........

[عنـاد]

الخيول العربية تقتنى حسب ثلاث صفات تختلف في ترتيبها من هاوي الي هاوي :
1- نسبها
2- جمالها
3- ادائها

في النسب نتكلم عن اصناف للخيول :
1- الاصيل اللي معه ورق
2- الهجين الي معه ورق
3- الهجين اللي ما معه ورق
4- الاصيل اللي بدون ورق
بالنسبة للحصان العربي الاصيل حسب تعريف بعض المنظمات المهتمة بالتسجيل :
اي حصان يرجع في كامل اصوله واجداده الي صحراء الجزيرة العربية .

الخيول المسجلة فيها كثير حولها شكوك وكثير منها اعترفوا مربينها بتهجينها مثل ما قرينا في مقالات الواهو عن المربين البولنديين يفتخرون بتحسين سلالاتهم المحلية بفحول عربية وتسجيلها في المنظمة طبعا في الزمان السابق .

اشرف الانساب :
1- المصري والجزيري البحت وبابسون ودافنبورت والكرابيت البحت
2- البولندي والفرنسي والكرابيت والخليط (هذي حولها شكوك في اصالتها لكنها مسجلة )

هذي نبذة عن الانساب بسيطة جدا

لكن الخيول العربية اسعارها تختلف من حصان الي حصان ومن فرس الي فرس
وصعب الواحد يحكم عليها من المنتدى لازم يشوفها ويشوف اوراقها وادائها وتركيبها على الطبيعة .
لكن اذا انت مهتم بالخيول تقدر تراسلني وابشر باجابة كل تساؤلاتك.
وعلى فكرة الخيول العربية عندنا فيها مبالغة رهيبة لندرتها عندنا .


تحياتي اخوك عناد

[New hunter]

مشكورين يا شباب و مشكور يا اخوي عناد على هالتوضيح و عقاب شكرا و آســـف economy class, happy now ?? lol عناد ممكن اعطيك رقم جوالي و نتواصل اذا انت في الرياض؟

[الشامخ997]

الله العالم

اتوقع يوم من الايام بنقول كانت الخيل رخيصة
بس اصبرو شوي بتصير مثل الابل بمليون ومليونين و15 مليون

[عنـاد]

هلا والله اخوي نيو هنتر

بالنسبة للـــ economy class هذا ضرب من الخيال
لان الخيول مثل ما انت عارف Noble hobby وبشكل اوضح Royal physical exercis
يعني انت مقدم على شي كبير ورائع جدا اسالني مستقبلي مربوط بالخيول :)

ممكن جدا ترسل لي رقمك ونتشاوف ونتقابل وناخذ ونعطي افرح بشوف الرجال الطيبين ومعرفتهم

تحياتي اخوك عنــاد

[القناص]

ما شاء الله اخواننا السودانيين تعمقوا في الابل والخيل

والله ان بعضهم هوامير بس ما يبين عليهم

تلقى الدينا له ويبيع ويشتري وبمئات الالوف

الله يرزقنا وياهم هم اطيب من بعض الجنسيات الا ما جابت لنا الا المشاكل مثل البنغال الله لا يردهم.

[سلطان العوني]

االخيول العربيه
تتميز بالقوة والتحمل في جميع الاحوال المناخيه
حراره بروده كل شي تتحمله
اما بالنسبه للسعر
تختلف من خيل الا خيل حسب ابوه وامه
وتاصل اسعارها مليون ومليونين وثلاثه ملايين
مثل اسعار الابل بالضبط على حسب الزين

[عقـــــــــاب]

:D am ahappy when u correct u r error

[New hunter]

عناد شيك بريدك عقـــــاب آآآآآي ههههههه سلطان والله انك مجتهد و انا بأسميك شمعة المنتدى القناص.... ترى الزول بس يلاحظها ما هيب له

[عقـــــــــاب]

مافهمتك !!!!

[New hunter]

آآآآآي: تعني نعم باللهجه السودانيه وقد استنخدمت في هذا الموضع من الكلام رداً على كلامك اللذي كان بلفة الفرنجه بمعنى طيب او طاه او خير انشاء الله وهلم جراً.....
الزبده تميلحت وتحسفت يا عقـــــاب ههههه

[بالرمله قناص]

أقسم بها الله سبحانة في كتابه ... (وَالْعَادِيَاتِ ضَبْحًا * فَالْمُورِيَاتِ قَدْحًا )
خلقها الله سبحانة من ريح الجنوب وسميت ببنات الريح ...
خلقها سبحانة عز لأوليائه وذل لأعدائة وجمال لأهل طاعتة ...
أوصى الرسول صلى الله علية وسلم بأقتنائها وتعليم أولادنا على ركوبها وحبس الأناث منها...
ولها مكانة عالية حلت بها بين قبائل الجزيرة العربية ..

وعندي كم قصيدة كلها تبين غلاء الخيل عند أهلها ..

قصيدة حزام بن مشوط المصارير الدوسري


شـبــنان بـــر الـغــوج لا تـنـسـاه - احـلــب لـــه الـمـلـحـا الــــردوم

يـا زيـن غوجـي والرمـك تـتـلاه - لا عرضوهن صحصحاً وحزوم

لا صــاح صـيــاح وكـــل جـــاه - وقت المزاحم ننصـف المضيـوم

الـعـايـل الـلــي زارنـــا جـيـنــاه - جـيـنــاه فــــي وقــــت الــلــزوم

لا زارنــــا بـالـرمــح شـكـيـنــاه - رمـح علـى خيـل العـدا مسـمـوم

شـكــه وفـــارق بـاقــي الـحـيـاه - طيـر وراه و بالـفـرس مـرسـوم

اسـمـع جـوابـي وافـتـهـم مـعـنـاه - اسمـع جـواب جعـلـك الله الــدوم

اسـمـع نصـيـحـة والـــد مـهــداه - نصيـحـة ٍ والـلــي بـهــا مـعـلـوم

مـــن لا يـبـيــن فـعـلــه بـيـمـنـاه - مــن العـلـوم الطـايـلـة مـحــروم

لا حـســك الـعـايـل فـعـطـه دواه - تـرى دوى العـيـال عـيـال تـقـوم

والـجـار بـالـك لا حـــد ٍ يـجـفـاه - الـجـار حـقــه حـشـمـة ٍ بـسـلـوم

والضيف حقـه واجـب الـي جـاهرلامــن لـفـى تـذبـح لــه اللقـحـوم

ولا فـقــدم لـــه سـريــع اقــــراه - وزيـن لـه الجانـب مـع المقسـوم




يقول الشيخ عبد الكريم الجربا عندما طلبت فرسه الكحيله من العثمانيين

ارسلت لي يابيه خـط يروعـي تطلب عذاب ملاويات الصروعي
ابغى الى يامن حضبن الجموعي اثني عليها مع جموع الطنايـا
يا بيه ماهي قيمر بالصحونـي هذي كحيله مثل عنز البدونـي
ابغي الى جوا لابتـي ينتخونـي في ساعه حامت طيور المنايـا
البيـع والله مانبيـع الكحيلـه الا ولا نصخي بها ربـع لليلـه
ابى الى ما سندوا مـع طويلـه اثني عليها عنـد تـال الردايـا
ما همني البيه هو والشريفـي حنا منزحـه العـدا والحفيفـي
بالغصب ما نعطي عدال الرغيفي وعند الرضى نعطي كبار العطايا

قصيدة لأحد شعراء الجزيرة


الخيل عز وترهب الناس بالناس – لاجا نهارٍ فيه عدلٍ ومايل

ياماحلا الفرسان بظهور الأفراس – تكسر على روس الأبطال روس الثلايل

وياماحلا الكردوس في كل مرواس – في ساحة الميدان صايل وجايل

من خلقت الدنيا مهية قوة الباس – خيل الصحابة معتقات السلايل

اللي عليهن جندلو لابس الطاس – يوم التقى الجمعان والجند هايل



وقال الشيخ ابن حشر من قحطان

يـا سابقي حبك مقيمٍ على ساس - مـولّعٍ فـي حبـك القلب توليع
حلفت لو ساموك بفلوس عباس - إني شفيعٍ فيك لا اصخي ولا ابيـع
ولا دخل قلبي من البيع هوجاس - وان زودوا لي بالثمن قلت ما اطيـع
يا ما حلا لا شلّت الذيل والراس - مثل المهاة التي تـهاب المتابيـع
ريـميةٍ شمّت من الريح نسناس - حلّت على زول المبندق مع الريِـع
بـاغي إلى جانا من القفر عسّاس - وسميةٍ فيهـا الزبيدي مصاليـع
وانا عليها قدم الاسلاف نطّاس - لا جات حزات الفزع والزعازيع
لا صوّت الصيّاح بادٍ بالارواس - يفرح بي الذود المطرّف إلى ريـع
وإلى لـحقناهم والارياق يبّاس - مركاضنا ما هو بـهوز وتمانيع

عبيد ابن رشيد

يا بيه أنا لكروش ما اعطي ولا ابيع - قبلك طلبها فيصلٍ وابن هادي
يا بيـه لو كثّرت بالقول ما اطيع - يـا حيف تبغيـني أسلّم جوادي
مـا جمّع أصله بالقراطيس تجميع - بـيته يـعرفونه جميع البـوادي
بـاغٍ إلـى ما لقمّوها المصاريع - وصاح الصياح وثار عج الطرادي
يلحـق وانا فوقـه ترثّع تراثيع - مثل الفحل لا صال وقت الهـدادي
هـذاك بيعـه والصبايا مفاريع - بين الـقنا ومـخفّرات الـهنادي
يا بيه أنا مسمع كلامك ولا اطيع - هـرجك بمقلة ناظري والفـوادي
يـا سابقي ما نرخصك بالمطاميع - حتـى ولـو قيل ارفعوا بالحدادي
أبغـى إلى ثـار الدخن بالزعازيع - وحطـّوا على عجلاتهـم العدادي
أنطـح ورا ربعي وجيه المداريع - وأقضـي عليها دينهـم والعيادي
حلفـت ما يطري علينا بها البيع - إلى الحشر ما يفخت سواده سوادي
مـا دام راسي للرياح الذعاذيع - حـيٍ فطلابه من الناس غـادي




فكيف تستكثر عليها 150000 ؟؟؟

[New hunter]

يـا زيـن غوجـي والرمـك تـتـلاه - لا عرضوهن صحصحاً وحزوم


صح لسانك و انا اخوك .... انا ما استكثرتها على الخيل انا ادري ان فيها شي بملايين انا استكثرتها على المكان اللي شفتها فيه و شكرا على مرورك و إثراء الموضوع

[عاشقة الخيول]

السلام عليكم
بصراحه الخيل يستاهل اكثر
وابي منكم خدمه لان من ردودكم شكلكم خبره
انا ابي اشتري خيل لاني اعشقهم من يومي صغيره
وياليت احد يساعدني اول شي افضل الاماكن وش المواصفات الي اخذها بس ابي توها صغيره وياليت تخدموني لاني ما عرف لهشغلات
واكون شاكره لكم وبانتظاركم