الباترول والرجة الي بالدركسون------------->افزعولي

[الاجودي]

السلام عليكم ورحمة الله


هلا بالشباب


اقول ياطويلين العمر على عمل صالح


انا معي باترول SGL-E م2000


وقبل فترة طلع فيه هزة بالدركسون تطلع اذا مشيت 80 وسويت ترصيص وغيرت كفرات والمشكلة موجودة


ورحت للوكالة قالوا لي هذا من عمود التوازن وغيرته بحدود1400


والان ملاحظ ان الرجة بدت ترجع


وش الحل؟؟؟؟

[ولد روضة سدير]

السلام عليكم .......
انه طال عمرك اعاني من نفس المشكله .....عندي سفاري 2002 وصلحته قول كيف؟؟؟؟؟
سويت الميزان اللي هو الترصيص وخل الكفرات على 35 الهوا واذا ما نفع معك الشي هذا افحص مايسما بمعاون السكان او مساعد السكان .....واذا كان هذا هو الخراب فابشر بالرخص ما يكلف واجد .........اذا ماكان هذا السبب .....رح للوكالة النيسان يفحصونة .......او تجي الكويت ويضبطونك ...اذا كنت من سكان الحفر وله الخفجي .....ويشرفنا حضورك .......................هذا كل ماعندي وانشاءالله اكون افدتك............................................و لك اجمل تحياتي ....بن دهيم الحربي

[مهيلان]

هلا بك يا الاجودي
هناك حل كان المفروض انه اول ما تفعله ....
لكن لا فات الفوت ما ينفع الصوت ...
انا اشور عليك ان تركب فرارات لكي تفصل الحركه تماما عن الكفرات وان شاء الله
بتلاحظ الفرق ....
هذا الرابط سيدلك على انواع الفرارات واسعارها وجودتها امل ان يفيدك http://www.mekshat.com/vb/showthread.php?s=&threadid=8291

[الاجودي]

اشكركم اخواني

ولد روضة سدير

مهيلان

على الرد وعلى الاجابة

لكن الفرارات اخوي مهيلان ازعاج

كل مابغيت تشبك الدبل انزل شغلهن نزل افصلهن


لكم تحياتي

[القماري]

الرجة في الباترول بسرعة 80 إلى 100 طبيعية وسببها الكفرات في معظم الأحيان ( حصل معي عندما بدلت كفرات الباترول وبعد التركيب والترصيص عادت المشكلة ورجعت للفني وقال هذه عادية مع الكفرات الجدد - خصوصا مع الباترول ، ويحتاج لترصيص من جديد بعدما يأخذ الكفر راحته ) والله أعلم.

[Y&Y_4X4]

مادام انك غيرت الكفرات وأكيد انت وزنت وما خليت شي معناه ان عندك أختلاف في يا عامود الكردان أو الاذرعه حقت دفرنس قدام الحل الأرخص هو فرارات وما عليك من سالفة حول اركب اذا انت بالديرة FREE وأذا انت نويت المكشات LOCK عادي ما فيها شيء والله يوفقك.

[مطلع الشمس]

السلام عليكم
انا صارت معي الرجة وغيرت جلد عمود التوازن والحمدلله الحين مايحتاج.

[وكرى بحر]

من غير اطاله عليك انا اقول بدل عامود التوازن وريح بالك معى احترامى راى الاخوان لانه القطع الالى اذكروهاالاخوان عمرها الافتلراضى قصير وراح ترجع نفس المشكله مره ثانيه ------------- ترانى مجربها 2000 اخوك وكرى بحر

[الاجودي]

مشكورين على الردود


بس انا غيرت عمود التوازن وراحت يمكن 3 شهور والحين رجعت مرة ثانية بس خفيفة


يعني شوركم مافيه الا الفرارات؟

[][مستر% شاص][]

سلام ياراعي السفاري وعساك طيب يقول المثل اسال مجرب ولا تسعل الدختور
الزبده وانا اخوك هي
تعبت زيك ويمكن اكثر منك المشكله ماهي لا بفرار ولا بالمساعد حق الدركسون ولا بالجنط ريح راسك
في شي اسمه رمانات ركب هي اللي تخلي الدفرنس لف اللي قدام تربط الركب بالدفرنس كل ركبه فيها اثنين فوق وتحت ووضع الرمانات يكون افقي >لا يروح بالك على الرمان حق الهوب < الوجهه الاخرى بعد فيها نفس الحكايه ز مع مرور الوقت والطرق الوعره تتاكل هذي الرمانات ويصير فراغ بالركبه زي يوم ما تروح الاربطه بالرجال الله يعافيكم تصير الركبه فيها فراخ حتى لو تدقق بالكفر تلقى فيه ميله بسييطه جدا وتبيني اعطيك التجربه خذها.
ارفع الجيب بالعفريته بدون ما تفك الكفر
هز الكفر يمين ويسار وفوق وتحت
اذا حصلت ان الكفر يتحرك لو مقدار شعره فانها هي السبب
واذا ما تحرك الكفر لا تتعب نفسك
وارجو منك ترد علي باسرع وقت
تراها صارت معي بالشاص وسببت لي فضاوه بالدوده حقت الدركسون لكني لقيتها بمساعدة الوالد
هذا ولكم مني جزيل الشكر واعذروني على الثرثره الزايده

[الاجودي]

هلا وغلا بالشاص

لا مايرج

وبعدين انا من ناحية البطناج ولمطبات محافظ على الموتر بالحيل

ولا انا راعي بران واجد

وارفق على الموتر بالبر

[الفحل 2003]

الحل مثل ما قال الاخ مستر شاص
لان المشكلة صارت معي لكن بدل ما اغير الرمان حق الركب فكيت غطاء الرمان من فوق ومن تحت ووديته للمخرطة علشان يجلخونه شوي وبعدين ضبط الموتر وصار يضغط على الرمان لكن راح يصير الدركسون ثقيل شوي لكن يزين بعد فترة وشكرا .

[الماونشي]

السلام عليكم انا يااخوان شريت باترول بعد ماشفته مع اربعه من اخوياي وأعجبني
ودايم تصير معنا هذي المشكله وحاولنا بكل الطرق لكن كل مره ماتروح الرجه
الا بعد ماأحط 300 ريال لأن الورش كلها خصوصا اذا جا الباترول وصار عندك رجه يغيرون
كل اللي تحت ...مهوب مره تغيير... لكن كل اللي قالوه الأخوان يكبسون جلب ويوزنون أذرعه
ومقصات ويربطون الرمانات وصراحه أنا ركبت فرارات وصارت الرجه تتأخر
بدل كل4شهور صارت كل 7 شهور وخففت صرفيه واضن من واقع تجربه ماها الا كذا

[صقر]

السلام عليكم جميعا

موضوعكم ممتاز ومهم بنفس الوقت لانه الباترول فيه الرجة ما تفارقه وهذي من سلبيات الموتر

مشكورين كلكم بلا استنثناء وكثر الله امثالكم يا طيور البر

[Khalid AlGhamdi]

السلام عليكم ورحمة الله وبركاته

انا الحين اعاني من نفس المشكلة ( الموتر سفاري 95 )

طبعا رحت للصناعية ودفعت هالثلاثمية ريال :(

ترصيص ارضي + وزن + وكبس اذرعة + تغيير مساعد الدركسون + تغيير جلب عمود الشداد

وخفت الرجة لكنها مازالت موجودة بين الـ 80 الى 110 تقريبا وبعدها تختفي

طبعا رفعوا السيارة وشافوا الرمان حق الكفرات الامامية وطلع مافيها فضاوة .

ورفعوا السيارة وتأكدوا من عمود الكردان انه سليم ومافيه رجه .

طبعا باقي احتمال انه يكون من عمود الدبل والحل اني اركب فرارات

بركبها اليوم ان شاء الله وبعلمكم ان كان المشكلة صلحت او لا وان شاء الله انها تصلح .

[Khalid AlGhamdi]

رحت للسليماني اليوم وركبت فرارات AVM البرازيلي

لانه على كلامه يقول مايركب على سيارات نيسان الا البرازيلي والـ WARN يركب على سيارات تويوتا

طبعا مريت الفرعين حقهم اللي بالغرابي واللي بالمرسلات وكلهم قالوا نفس الشي .

الخلاصه ان الرجه الحمدلله رااااااحت :good: .

[عباث]

السلام عليكم ورحمة الله وبركاته
كل اللي قالوه الشباب طيب لكن الحل محصور بشيين بالنسبه للباترول بالذات
الاول تاكد من مكينه الترصيص انها تكون جديده ولاا ترا ماترصص صح اذا كانت المكينه مضبوطه
باقي النقطه الثانيه الا وهي 0 اذا انت بالرياض رح لم ميزان المجد بالصناعيه وقله اكبس الركب
وباذن الله تروح الرجه 0
انا مصلح يمكن خمس بواترل بنفس الطريقه

[المساجدي]

الاخوه الاعزاء اعضاء وخبراء المنتدى السلام عليكم000-00

شريت باترول 2002 مستخدم وفيه رجه تبدا من سرعه 80 ولاتتوقف عند سرعه110 مثل ماقالوا الاخوان

بل تستمر مع زياده السرعه واحسها بالسياره كلها وليس بالدرقسون فقط0

طبعا رصصت الكفرات ولاتغير اي شي ولما شيكت عند الورش قالوا ان الاذرعه وعامود التوازن ومساعد

الدرقسون والركب كلها سليمه

بس ماادري عن رمانات الركب شيكوها ولالا

المهم قالوا اكيد المشكله عندك داخل الدفرنش الامامي يمكن جته ضربه او شي بنفكه ونشيكلك على العكوس

والبيرنقات0000

ارجو من الاخوه خبراء الباترول افادتي بالحل قبل ان اقع فريسه لجشع ونصب وجهل اصحاب الورش والوكاله

معلومات يمكن تفيد الخبراء:
نوع السياره SGL.V
الجنوط تجاريه حقت سوبر سفاري
الكفرات فايرستون275.70.16

[Khalid AlGhamdi]

الرمانات تقدر انت تشيكها بسهوله

ارفع الكفر الامامي وحركة بيدك على الداخل وشف فيه حركه ولا لا
وارفع الكفر بليور وشف حركته اذا مالقيت فضاوه معناته الرمانات مافيها شي

لكن انت تقول ان الجنوط تجاريه واحتمال كبير جدا انها تكون السبب لان الجنوط التجارية غالبا ماتسوي رجه بعد فترة من الاستخدام
طبعا ما انصحك تروح مباشرة وتغير الجنوط لكن بعد التأكد من الترصيص انصحك تستعير جنوط احد مايشتكي من الرجه تجربها او انك تركب جنوطك القديمه اذا مازالت عندك وتجرب ذا ماكان فيها رجه واعتقد ان مافيها اذا كانت جنوط اصليه

والترصيص اللي انصحك تسويه وانصح كل اصحاب سيارات الدفع الرباعي فيه هو الترصيص الارضي لانه يرصص على سرعات عالية وممكن يحل مشكلتك


===========================

من كثر مارج بي السفاري اقول لك امور كلها تسبب رجه في السيارة


1- الكفرات أوالجنوط .وهي غالبا ماتكون المشكلة الاساسية والحل بسيط هو الترصيص ولكن الترصيص الارضي مو الترصيص اللي عند اللي يغيرون الكفرات .

2- الاذرعة .وطبعا اول شي بيقولون لك اكبس الاذرعة وانتبه لاتسويها ( راجع هذا الرابط (http://www.mekshat.com/vb/showthread.php?s=&threadid=21124) ) لكن غير الذراع الخربان .

3- المساعدات الامامية .
اذا كانت المساعدات الامامية خربانه تسوي رجه في السيارة خصوصا في الطرق اللي يكون فيها مطبات ولو بسيطة وماتحس فيها وطبعا ماعندنا شارع مافيه حفر او مطبات .
وفيه مساعدات يابانية في السوق قيمتها 85 ريال ممتازة وقريبه من الاصلي واذا تبي الاصلي قيمته 130 ريال في الوكالة على ما اذكر .


4- كراسي المكينة والقير . وتقدر تلاحظ اذا كانت كراسي المكينة خربانة مع التشغيل تنتفظ المكينة وهي تسوي رجه في السيارة وطبعا اذا غيرت كرسي المكينة لازم تغير كرسي القير حتى تكون على مستوى واحد
لان اذا كان واحد جديد مرتفع والثاني قديم منخفظ القديم بينعدم نهائيا والجديد بيخرب .

وقيمة كراسي المكينة والقير بحدود 350 ريال على ما اذكر وماني متاكد من السعر

5- جلد البودي
ورجتها تكون مع المطبات فقط وعادة مايكون صوتها ظاهر اذا كانت تعبانة .

6- جلد المقصات
رجتها نفس الشيء مع المطبات لكنها اخطر لانك اذا واجهت مطب قوي ماتقدر تتحكم بالموتر .

7- رمان الركب
وطبعا مالك الا انك تغيره وتشحمه .

8- عمود الدبل .
والحل انك تركب فرار وقيمته البرازيلي 450 مع التركيب وطبعا غير انه بيريحك من الرجه بيخف الموتر وبتخف صرفيه البنزين .

9- عمود الكرنك .
والحل انك تسوي له ترصيص وهو عطل نادر .


واذا فيه سبب ماذكرناه ممكن يسبب رجه ياليت يفيدوننا الاخوان :good:

[لهاب]

السلام عليكم ورحمة الله وبركاته

حياك الله أخوي الأجودي والله صارت معي وماخليت شي من اللي قالوه الأخوان الأعضاء والمشرفين


لكن جاني واحد ونصحني بأن انزل عامود الدبل ( طبعا هالكلام قبل لا نعرف الفرارات ) وبعد مانزلت عامود


الدبل تدرون شنو صار ( ردت السياره وتقول توك مطلعها من الوكاله ) والحين انصحك بالفرارات وانشاءالله

تشوف اللي يرضيك وانت جربت كل شي عاد جرب هالطريقه وماتندم بإذن الله.


وتقبل تحياتي ،،،،،،،،

[المساجدي]

الاخ MaxPower

اشهد بالله انك ذيب واشهد انك كفيت ووفيت ولا يهونون الربع

والحقيقه انك اثرت نقطه مهمه في الفقره الرابعه وهي كرسي المكينه

لانه بلفعل خربان عندي وقالي الميكانيكي عنه ولالقيتله بال لاني ماتوقعت ان له دخل

في رجه السياره وهي تمشي0

وللمعلوميه يطلع عندي مع الرجه عند سرعه 100 بالضبط صوت جرشه متقطع هكذا

دششش000دششش وينقطع قبل وبعد الميه مع بقاء الرجه

تهقا اغير الكرسي وهل للمكينه كرسي واحد او اكثر 0

انا بكره بفحص الرمانات وسوف اوافيكم بالنتائج لاثراء الموضوع وعموم الفائده

وانتظر ردك بخصوص الكرسي

اكرر شكري وامتناني0000

[Khalid AlGhamdi]

جزاك الله خير يالمساجدي

والله ياخي الصوت هذا غريب لكن انصحك تتأكد من عمود الدوران .

وبالنسبة لكراسي المكينة فلازم تغيرها في كلا الحالتين لو ان الرجه ماطلعت منها حتى ماتسبب لك مشاكل ثانية

وبتلاحظ بعد التغيير ان صوت المكينة خف ولاتسمعه بوضوح زي اول

المكينة يجي لها كرسيين قيمة الواحد 106 ريال قبل الخصم من الوكاله .
والقير له كرسي واحد قيمته 133 ريال قبل الخصم من الوكاله

قل يعني يمكن تطلع عليك كلها بحدود 350 ريال بعد الخصم .

وتقدر تتأكد من الاسعار لو اتصلت على الوكالة قسم قطع الغيار
4747777 تحويله / 185 او 184

والتربيط هذا عاد كان تبي تصبر شوي علمتك لاني بدخل موتري لورشة مشهورة بالتربيط في الرياض

واعلمك وش النتيجه شغلهم زين ولا لا .

[Khalid AlGhamdi]

اخوي المساجدي

اذا الرجه مثل ماوصفتها لقيت الحل وانا اخوك اذا انك في الرياض

فيه ورشة في الصناعية القديمة يزينونها لك ولاكبس اذرعة ولا ترصيص ولامايحزنون .

راسلني على الخاص واعطيك الوصف ورقم تلفونهم .

[المساجدي]

اخوي القرم MaxPower والاخوه الاعزاء

الله يجزاك خير على هذا التعاون بس للاسف انا بالشرقة على العموم اليكم تقرير زيارتي للورش هذا

الصباح:

مريت ورشة مدحوها لي عندنا متخصص بالتربيط والرجة

اولا:رفعنا السياره من قدام وحركنا الكفرات ولا هي تلعب فوق وتحت قال قالي المكانيكي المس الهوب

وهز الكفر وصار الهوب يتحرك معه قال هذي عندك بيرنقات الهوب يبيلها شد بس انها ما تسبب رجه

اما الرمنات سليمة 000قلتله شدها وخلنا نجرب وفعلا شدها ماخذت معه ربع ساعه وطلعت اجرب السياره وما زالت الرجه :mad:

ثانيا: فكينا عامود الدبل وطلعت بالسياره اجربها بدون عامود ومازالت الرجه :no: :confused::no:

ثالثا: قال الميكانكي خلاص مليون بلميه الحين انها من العامود الخلفي خل السياره بفك العامود ونشيكه بلمخرطه ونشوف 0

الله المستعان بمره بعد شوي المغرب ونشوف اخرتها مع الورش0

وسوف اوافيكم بالنتائج لاثراء الموضوع وعموم الفائده



الاخMaxPower
لك رسالة في الخاص

[Khalid AlGhamdi]

اخوي المساجدي بالنسبة لسالفة الورشة ان فيه واحد اعرفه عنده نفس مشكلتك

وماخلا شي ماسواه

لكن طلع سبب الرجه على ماذكر لي انه الفريولات

طبعا وداها للورشه اللي ارسلت لك على الخاص وصلحوها له

علما بانه سوى نفس ماذكرت ورفع السيارة وحرك الكفرات ولاهي تلعب ولا شي

لكن وش السر في الفريول مادري !!!

تكلفة التصليح 350 ريال مع الوزن والضمان

وانا سقت سيارته بعد ماصلحها والله فرق كبيييييييير جدا عن اول تحس السيارة قطعه وحده ، بس لاحظت ثقل بسيط في الدركسون بعد ماصلح المشكلة هذي .

[Khalid AlGhamdi]

نسبت اقول لك

بالنسبة لرجة العمود مريت لك اليوم مخرطة متخصصين بعمود الدوران

وسالتهم عن رجة عمود الدوران

وقال لي رجة عمود الدوران ماتصير في الدركسون بس ، تحسها بالسيارة كلها وعلى وصفه ( كنه جوال على الهزاز ) وله صوت وعلى وصفه ( وووووووووو ) :D وش رايك بالوصف

وقال اذا ماهي زي ماذكرت لك رح للورشة اللي ارسلت لك على الخاص واللي دليت خويي عليهم وراح وصلح مشكلة موتره ولله الحمد .

ولامزيد من الرجه بعد اليوم ان شاء الله
:D

[عنبري تمير]

انا قد صارت لي قبل شهر او اقل
وقالي راعي الورشه جبلي جلب للمقصات الاماميه والدفرنس
وقد حصلتلي قبل سنة تقريبا ونفس الجلب وزان وصار زي الحلاوة

[المساجدي]

اخوي MaxPower والشله الحلوة مساكم الله بلخير

اما بعد0000

شيكنا على العمود الخلفي الي كنا شاكين فيه وطلع سليم0

الان يقول الميكانيكي مابقا الا عكوس الدفرنشات يمكن فيه واحد معفوط اوفيه مشكله0

بنرفع السيارة بكرة على جيكات ونعشق القير والدبل الين تمشي ميه ونشوف000

هذا ماتم اليوم بلورشة00 اما بخصوص الصوت الي وصفه اخوي MaxPower

ووووووووووووو000ووووووووووووووووو000وووووووووووووو ووو0000

فهو يابو معاذ فعلا يطلع عندي بعد الميه وعشرين مع هزه خفيفة بالسيارة كاملة كما اوضحت

في اول مداخلة لي0مع ان العامودين سليمين!!!!!!

==========اخويMaxPower==========

بخصوص خويك الي صلح الرجه بلورشه الي ذكرت هل كان يعاني من نفس الرجه الي عندي او اخف اواكثر

ووش نوع سيارته وكم موديلها لان ممكن مشاكل الباترول الشكل القديم تختلف عن الجديد؟؟

وماهي الفريولات واين تقع؟ (احلى ياعربي)

[Khalid AlGhamdi]

الله يمسيك بالنور والسرور

الله يعينك على هالرجه الله يرج راس العدو

الرجه اللي كان يعاني منها خويي ، قصدي موتر خويي :D

زيك بالضبط ، قصدي زي موترك :D

تبدأ معاه من 80 تقريبا وانت طالع

والمشكلة زي ماذكر لي الفريولات وشي مادري لاتسالني

لكن ارقام الورشه اللي ارسلت لك اتصل على اللي اسمه ابوامجد وقل له مشكلتك وعسى انه يدلكم على حلها

وبالنسبة لخويي اظن موديل جيبه 96 او 95

وكان الله في عونك :good:

[الاجودي]

السلام عليكم ورحمة الله


انا كانت في موتري هالرجة تبداء من 80 الى تقربا 100

وكل مالها تزيد حتى انها صارت مزعجة والسيارة كلها تنتفض

وغيرت عمود التواون

وضبطت الامور يمكن لي الحين اكثر من 6 شهور والسيارة من احسن مايمكن

[العارض]

السلام عليكم ورحمة الله وبركاته 0حياك الله يا راعي البترول 0
والله يمسيكم بالخير جميعا والله يفكك من هالرجه ولا تنسى الكفرات على دربك لا يكون فيها شي محبل
حتى ولو كانت جديده وانتبه من بعض المهندسين اللي بيوسوسون بك يقول راعي المثل
احزم يدك واعرضها على الاطباء0000 تحياتي للجميع0

[rayes3]

السلام عليكم ورحمة الله وبركاته


طنش الرجه ولا تدقق وتصير سيارتك سليمه