قرر الميكانيكي ويهمني رايكم يا هل الخبره ويا أعضاء مكشات

[ابوخالد_k]

السلام عليكم ورحمة الله وبركاته

أخواني ألاعزاء كتبت موضوع عن مشكلة في سيارتي الكامري 2003 قبل تقريبا ثلاث ايام وقلت بروح للورشه وبردلكم وش قال الميكانيكي للفائده . عاد انا دورت هالموضوع ولا ادري وينه فيه ماشاء الله المواضيع واجد وكل يوم جديد الله يعطيكم الصحه والعافيه . قلت اختصار للوقت اكتب موضوع مستقل فارجو المعذره من الجميع...واللي حصل مع هالسياره الاتي :-

اخواني في ليلة الخميس الماضي وديت السياره للورشه طبعا فوق سطحه . قال المهندس بكره بنفك المكينه ونشوف وش المشكله المهم جيتهم الصباح قال ياشيخ المكينه معدومه ماتنفع ..ول ابك وشتقول . قال ياعمي الراس فيه انحناء والسلندرات هم بعد منحنيه ويبيلها تسطير عند المخرطه كيف تسطير يعني تواسي الراس والسلندرات عالمسطره . والله واكلم كذا معلم في هالمخارط وكل واحد يقول يبيلك تزيل من الراس والسلندرات تقريبا 3 ملم وهذا مانضمنه لك اي مانضمن السياره بعدين يمكن ترجع وترتفع الحراره وأنا مانبي نخسرك على كلامهم . طيب وش الحل ياجماعة الخير قالو اشتر مكينه مستعمله . وهالحين يالربع المكينه في جده مابين 5 الاف و7الاف . وهاذي والله ما اقدرها . وهالحين مالي غنى عن مشورتكم يالربع وش رايكم اشتري الراس لحاله و القاعده حقته اللي هي السلندرات لحالها لاني لقيتها في محل الثنتين بــ1150 ريال وهل هناك ضرر بيلحق بالموتر منها او اشتري متى ما الله يسر من المكاين اللي تجي من الامارات او اللي يسمونها سعوديه والله اني محتار ولا ادري وش اسوي...وفيه قطع غيار طلبها المهندس اذا جبت له الراس والسلندرات لحالها بسردها هالحين وابي رايكم هي ضروريه و لازم اجيبها على حسب كلام المهندس والا فيه منها ماهو ضروري والقطع هي :


1/ طقم وجيه 2/ طقم سبايك متحرك وثابت 3/ طرمبة زيت وطرمبة ماء 4/ طقم شنابر STD
5/ طقم بساتم 6/ جنزير 7/ تكايات جنزير 8/ جنزير طرمبة زيت 9/ فلتر زيت



السؤال هاذي القطع لازم تغير وكيف اعرف الخربان منها فسيارتي واغيره انا قلتله ياخي شف الخربان وبس وهو يقول انا ماضملك السياره الا اذا جبت هالقطع .. تكفون يالنشامى دلوني على الراي والمشوره .

ويا اخوان من يعرف ورشه في جده شغلها مضبوط وعن تجربها يدلني عليها مشكور

[Abo Nader]

الصراحه الله يعينك...
بالرياض عندنا مكاين إستعمال ياباني..عليها ضمان شهر..أنا شريت قير نفس الطريقه إستعمال ياباني..و الحمد لله له سنه الان تمام..

الله ييسر أمرك..بس ممكن تقول سبب الخراب..

[شامخ ألهيلا]

اخوي خذ نصيحتي موترك موديله حديث وباقي فيه عمر
رح يم التشليح وتلقا هالكامريات متقلبه وواجد بعد وخذ لك مكينه وسعرها من 4000 الو 6000 حسب الموديل هذا اذا انت بتستعمل
اما اذا كنت بتبيع دورلك من الي في الصناعيه موضبات او يابانيه وفيه حل هو ان تشتري لك نص مكينه الراس والسلندر والبساتم
ولا مكينتك لاتوضبها لان الراس اذا جاه شي وقالو لك بنوديه المخرطه و ونمسحه ونزيل منه 3 سم فابشر والله باسرع تخبيطه لو تمشي 100 بتشوف الحراره فوق

[اسهيل]

شف اخوي في الصناعية بتلقا جديده نظيفه 2500 الي 3000 جديده في الصناعية القديمة في الرياض
لكن اذا تبي الظمان الصحيح والي مافيه شك وانا خووك رح التشليح حق الحاير وناظر اذا مافيه فرق بين الاستعمال الياباني والتشليح بدراهم كثير خذ من التشيليح احسن
ولا تاخذ شي الا راكب في سيارته لا تاخذ شي من الارض محطوط نتبه !!!! يعني قله يفكلك من السيارة الي تشوف انها زينه وشكله نظيف
ولا انصحك توظب ترى مايصلح جلخ الراس ماتبطي وتخرب عليك وبتاكل فلوس مثل سعر الياباني منتب مستفيد

[ابومعاذ3]

ابوخالد الله يكون في عونك ولا يخسرك وكل مسلم

الراس إما تغيره من التشليح وفيه محلات متخصصه بالروس
ولا أن كان المكينه رايحه فيها أنصحك لالاتوضب ترى ما عاد فيه من يضبط التوضيب خاصة والسيارات الحديثه مكاينها حساسة
وبعدين موترك توه ما هو قديم ليش طالب طرنبة موية وزيت!!!
التشليح وانا خوك ، زميلي لقاها بحول الأربعة للخمسة ولالالالالالالالاتوضب تراها بتكلفك زي قيمة المكينة من التشليح
ولا نت لاقي من يضبط التوضيب إلا ماندر تراي مجرب
الله ييسر أمرك

[ابوخالد_k]

Abo Nader شاكرللمرورك . بالنسبه للسبب الخراب مشيت عالموتر تقريبا 10 كيلو ولمبة علامة المكينه مولعه شيكت عالموتر اول ماولعت ولا لقيت شي هم بعدها طفت السياره ومشيت عليها شوي هم وقفت ولقيت الاديتر مافيه ماء والموتر مايشتغل مره ..

شاكر للمرورك شامخ الهلا عند سؤال الله يجزاك خير نص المكينه هل الراس هو اللي كنه غطاء للمكينه والسلندر والبساتم هي القاعده اللي يركب عليها الراس او لا ؟ وهل تشوف اذا شريتها مثل مايقولون لك وللزمن ؟

الاخ اسهيل هم شاكر للمرورك وهل 2500 و3000 هي اسعار المكينه كامله يعني بلقاها بالرياض بهالاسعار

عالعموم مشكورين جميعا وشرفني مروركم

[V I P]

أخي العزيز ابوخالد التوضيب مو كل واحد يضبطه وإذا وضبت راح يكلفك قيمة مكينه

عندك حلين

1- إذا بتستخدم _ تروح للتشليح تشتري مكينه ( تكون في سيارتها مابعد فكت ) والله يعينك .

2- إذا بتبيع _ تشتري مكينه إستعمال ياباني والله يوفقك بالبيعه الطيبه.


تحياتي لك

[ابوخالد_k]

شرفني مرورك يابومعاذ3 ياخوك المعذره انا بطي بالكتابه وشكلنا نكتب سوى وانت سبقتني ما شاء الله عليك .وبالنسبه للمكينه رايحه فيها
يا أخوان انا بجده واللي يعرف احد امين يدلني عليه لاني رحت اليوم للتشاليح والله لا يبلانا كلن يمدح في اللي عنده ويسب فغيره ... وهل فيه طريقه تعرف من خلالها المكينه اللي مابعد فكت زينه او لا

الاخ Vip شاكر للمرورك والله وانا اخوك بستخدم وين ابيع واقصادها لهالحين ماخلصت

[الصاحب الغالي]

بعطيكياها من النها يه
بدل وجع الرأس وقطع وتعب ومشاويييييييييييييييييييييييييييييييير ما لها اول ولا تالي
وتصلحها وترجعله بعد شهر وتقول خربت مره ثانيه وتهاوش انت والعامل وتقوله السياره توها على الضمان ويرد عليك ويقول الضمان خلص قبل يوم انت متأخر وكلمه رايحه وكلمه جايه وقرقره على غير سنع
ارجع واقولك بعطيكياها من النهايه (خذلك مكينه من التشليح افضل لك الف مره)
((((((((((قصه واقعيه)))))))))))
وبعدالكلام الطويل يرجع ويأخذ مكينه كا مله
والناتج خسر سعر المكينه في القطع الغيار والتصليح
وتحسف وقال (ياليتني ماخذلي مكينه ومرتاح من وجع الرأس )


وخلصت القصه وبلصت عذرا على الاطاله

[بواسامه]

تشليح فقط لك ولغيرك
تبيع او بتستخدم
لا تحط بذمتك شي
والنصح لكل مسلم
الدراهم تروح وتجي
فان صدقا بورك لهما في بيعهما
وفقك الله للخير

[عبدالله العمرو]

(((( السلام على من أتبع الهدى )))))



أبو خالد : سامحك الله ... هذه تحية الرسول صلى الله عليه وسلم لكفّار قريش ....

[ابومعاذ3]

أخوي ابو خالد
ممكن تعرف المكينة اللي ما بعد فكت من حواف الوجيه ( وجه الكرتير + وجه الراس + وجه غطا اراس أو غطا المكينة )
تلقاه ما عليه زيوت ولا تلمع حوافه لأن لمعانها يدل على أنها قد فكت المكينة
ولا تأخذ المكينة المفكوكة من السيارة على الأرض
لأنهم بيقولون لك أنها لها وهي ماهي لها ، السيارة أقدم والمكينة وحدة تأكد من الموديل يكون أقل لممشا المكينة ، وناظر ممشها في الطبلون .

لو تطلع لك ميكانيكي وتعطيه قاسمة الله يفيدك
ولعل الشباب يميزون أكثر مني ويوصفون لك الفرق أكثر
تحياتي

[شامخ ألهيلا]

ااخوي الراس هو الي يدخل فيه البساتم والسلندر هو الي فيه البساتم ان كان ماخاب ضني
يعني وانا اخوك قلب المكينه تشتريه والبودي حق المكينه عندك وبعدبن وانا اخوك خذ الراس والسلندرانت وامش على مهندسين وقلهم وش رايكم في السلندر لان اكثر مايتاثر في التخبيط هو الراس وليس السلندر واتوقع ان السلندر عندك سليم

[هاوي الله]

قالها الصاحب الغالي ( مكينه من التشليح أفضل لك بألف مليون مره , بإرادة الله ) وزود عليها هاوي هدد , واللي بيزود يذكر الله

تبي العلم : إرفع نظرك = إطلب ربك = يُسهل أمرك

[الدحبول]

غير مكينة كامري 2000 أو 2002
واحد من الربع إشترى كامري موديل 2000 وجلست معه 6 إشهر إلا ولمكينة طاحة بغ يوضبة بس طلعت المكينة يابنية بعدين
شارى مكينة كامري 2002 ب 3500 قبل سنة وإلى الان شغاله معة

إنصحك باتغير المكينة حق موديل 2002 يمكن تركب

[عاشق الموج]

السلام عليكم


شوف اخوي المكاين والقيور الاستخدام ياباني الي تجينا السعودية احظوظ مره تصيب ومره تخيب

انا مركب قير حق كامري 2001 من قبل سنه ونص والحمدلله ماشي معى مثل الساعة

طبعا السيارة مريت فيها اكثر من ورشه عشان توضيب القير لكن شفت انه بكلفني كثير التوضيب هذا غير انه يمكن يضبط ويمكن لا

عاد انت شوف وضعك كيف والاهم من كذا اهتم واحرص على الورشه الزينه

[اسهيل]

ابو خالد ايه في الرياض اسعار المكاين الاستعمال الياباني 2500الي 3000 بس خذ معك القديمه حتى لو مكسر بس تكون مركبه يعني مهب مفككه
واذا تبي شي ثاني انا حاضر .

[اسهيل]

ابو خالد ايه اسعار الاستعمال الياباني 2500 الي 3000 بس خذ معك المكينه السابقة يعني بيفرق السعر بدون الرجيع

[بدوي جنوبي]

أبو خالد : سامحك الله ... هذه تحية الرسول صلى الله عليه وسلم لكفّار قريش .... [/center]


تم التعديل اخي العمرود جزاك الله خير

[ابوخالد_k]

الأخوه الافاضل شاكر لمروركم وتعليقاتكم الطيبه واسف عالتاخير بالرد ...
بالنسبه للاخ / العمرود : كان بودي ان يكون ردك في صلب الموضوع وبما انك اختصرت ردك بالتعليق على تحية الاسلام . فانت تقول ان هذه التحية خاصة بالرسول صلى الله عليه وسلم قالها لكفار قريش . وانا معك نعم قالها لكفار قريش ولكن ليست خاصه بالرسول صلى الله عليه وسلم. عزيزي اذا كانت خاصه بالرسول فنحن اتباع لسنة الرسول صلى الله عليه وسلم فهل كل قول او فعل وصلنا عن رسولنا خاااص فاذا كان لديك دليل لخصوصية الرسول بهذه التحيه فقله لنا . اما انك تفتي على هواك فهذا لا يقبله شخص عاقل . كان الاجدر ان تسالني لماذا ؟ والجواب واضح انا لا اضمن ان من يدخل المنتدى كلهم مسلمون فأما ان تزكي جميع من يدخل الموقع وتكون التحية في ذمتك انت او تحيي بالسلام والرحمة على من اتبع الهدى ....
وكذلك لا يليق بمشرفنا العزيز ان يغير في الموضوع مادام لا يخل بالاداب والاعراف وقبل هذا بالشريعه الاسلاميه . فكيف يامشرفنا تغير بموضوعي دون اذن وانما لاجل شخص نحسن النية فيه ونقول التبس عليه الامر . فهل ستتنازل وترجع التحيه السابقه ام سوف تاخذك العزة بالاثم .. واخيرا ثق تمام الثقه ان ما اكتبه عتاب اخوي قابل للاخذ والرد
ودمتم باااااف خير

[عبدالله العمرو]

الأخوه الافاضل شاكر لمروركم وتعليقاتكم الطيبه واسف عالتاخير بالرد ...
بالنسبه للاخ / العمرود : كان بودي ان يكون ردك في صلب الموضوع وبما انك اختصرت ردك بالتعليق على تحية الاسلام . فانت تقول ان هذه التحية خاصة بالرسول صلى الله عليه وسلم قالها لكفار قريش . وانا معك نعم قالها لكفار قريش ولكن ليست خاصه بالرسول صلى الله عليه وسلم. عزيزي اذا كانت خاصه بالرسول فنحن اتباع لسنة الرسول صلى الله عليه وسلم فهل كل قول او فعل وصلنا عن رسولنا خاااص فاذا كان لديك دليل لخصوصية الرسول بهذه التحيه فقله لنا . اما انك تفتي على هواك فهذا لا يقبله شخص عاقل . كان الاجدر ان تسالني لماذا ؟ والجواب واضح انا لا اضمن ان من يدخل المنتدى كلهم مسلمون فأما ان تزكي جميع من يدخل الموقع وتكون التحية في ذمتك انت او تحيي بالسلام والرحمة على من اتبع الهدى ....
وكذلك لا يليق بمشرفنا العزيز ان يغير في الموضوع مادام لا يخل بالاداب والاعراف وقبل هذا بالشريعه الاسلاميه . فكيف يامشرفنا تغير بموضوعي دون اذن وانما لاجل شخص نحسن النية فيه ونقول التبس عليه الامر . فهل ستتنازل وترجع التحيه السابقه ام سوف تاخذك العزة بالاثم .. واخيرا ثق تمام الثقه ان ما اكتبه عتاب اخوي قابل للاخذ والرد
ودمتم باااااف خير


السلام عليكم ورحمة الله وبركاته

هداك الله يا ابو خالد وأصلح شانك ...
.................................................. ................
.................................................. ...............

اللهم أرنا الحق حقّاً وارزقنا اتباعه .. وأرنا الباطل باطلاً وارزقنا اجتنابه ...
والسلام عليك ...
أخوك /

[ابوخالد_k]

السلام على من اتبع الهدى
الله يجزاك خير ياخوي العمرود / والله الموضوع كله للفايده دين ودنيا اذا والله فيه احد بيعطينا دليل كانا بها . وبالنسبه لي وفانا والله سامع مشايخ في العمل اذا سلمو واللي عندنا فيهم مسلم وغير مسلم قالو السلام على من اتبع الهدى . ولا قد قريت او سمعت ان هذه التحيه خاصة بالرسول صلى الله عليه وسلم ... واكرر اسفي لشخصك الكريم فالموضوع للفائده العامه
ودمتم بالف خير

[عبدالله العمرو]

السلام عليكم ورحمة الله ...

أخوي أبو خالد / لاعدمتك



أضع بين يديك الدليل كما طلبت ... ويتبقى قناعتك بحكمه :





من فتاوى الشيخ ابن عثيمين :



‏(‏393‏)‏ وسئل - رحمه الله - ‏:‏ عن حكم السلام على المسلم بهذه الصيغة ‏(‏السلام على من اتبع الهدى‏)‏ ‏؟‏ وكيف يسلم الإنسان على أهل محل فيهم المسلم والكافر‏؟‏

فأجاب قائلًا‏:‏ لا يجوز أن يسلم الإنسان على المسلم بقوله‏:‏ ‏(‏السلام على من اتبع الهدى‏)‏ لأن هذه الصيغة إنما قالها الرسول، صلى الله عليه وسلم، حين كتب إلى غير المسلمين، وأخوك المسلم قل له ‏:‏ السلام عليكم، أما أن تقول‏:‏ ‏(‏السلام على من اتبع الهدى‏)‏ فمقتضى هذا أن أخاك هذا ليس ممن اتبع الهدى‏.‏



وإذا كانوا مسلمين ونصارى فإنه يسلم عليهم بالسلام المعتاد يقول ‏:‏ السلام عليكم يقصد بذلك المسلمين‏.‏





http://al-eman.com/Islamlib/viewchp.asp?BID=353&CID=29 (http://al-eman.com/Islamlib/viewchp.asp?BID=353&CID=29)





اللهم بلّغت فاشهد



تحياتي لقلبك ..

أخوك /

[بدوي جنوبي]

الاخ ابو خالد k

الاخ العمرود
السلام عليكم

ارجوا عدم الرد في هذا الامر مره اخرى
او اي عضو اخر
بالتوفيق للجميع

[ابـــوزيــاد]

الاخ/ ابو خالد الكامري من موديل 2003 ومافوق ماتحصل مكينتها بتشليح اليباني ون حصلتها بتلقاها من 7000 الى 9000
وبنسبه لتشليح الحاير انا مدور فيه من شهر تقريبا وماحصلت اقل من 8000 بس ماقول الى الله يعينك وما بنسبه لكامري من 2002
وماتحت فهي متوفره في التشليح اليباني ورخيصه جدا لاتزيد عن 2500 وكذالك تشليح الحاير

[م.أبوإبراهيم]

السلام عليكم :
1- مكينة 2002 تختلف اختلا جذري عن 2003
2- مكاين الإستعمال الياباني قليل جدا في 2003 وما فوق والكثير الموجود القديمات فقتط
3- مكاين الاستعمال الياباني ممتازه جدا بس فيه ظاهره انتشرت عند التشاليح توظيب مكاين رجيع بقطع تجاريه وتجميع من مكاين ثانية ويطلعون لك مكينه شغالة بس عمرها قصير
4-وتغيير المكينة عندك أفضل وأوفر وأنصح إذا جزمت تغير المكينة ود السياره للتشليح الي عندهم المكينة الجديده خلهم هم يركبونها لك أحسن لك حتى تضمن حقك حتى إذا حصل بالمكينة مشكله يفكونها على حسابهم ولا يلقون التهمة على الي ركب المكينة

[ابوخالد_k]

الاخ / ابوزياد .. فعلا اسعارها مثل ماتكرمت لي هالحين حوالي سبوعين جده لفيت على تشاليحها كلها واسعارها مابين 6500-10000 ماعدا واحد غريب في بيعه جيته قال هات عربونك هالحين وبجيب المكينه من المستودع قلت انت جبها وخلني اشوفها هم ان جازتلي بعطيك العربون قال لا تدفع 500 واذا جبتها وما جازتلك تروح عليك ال500 كل هذا عشان سعرها ارخص مكينه حصلتها بـ4500 قلت ياولد فلوسي في جيبي ومكينتك عندك والف دكان على باب الرحمن ...على العموم شاكر للمرورك يابو زياد

الاخ/م.أبوابراهيم .. والله في جده مالقيت اللي عليه الكلام غير وحده حادها بـ10000 على موديل2005 . وبكره بروح لطايف يمكن احصل مكينه نظيفه لي ولزمن على ما قالو وليا جيت ابيعها مابي يدخل في ذمتي شي .. والله يعطيك العافيه يا م.ابوابراهيم وشرفني مرورك ومرور جميع الاخوه...
عاد اللي من هل الطايف ويعرف تشاليح طيبه مالنا غنى عن مشورته ... والله يوفق الجميع لما يحبه ويرضاه
ودمتم بالف خير

[ابـــوزيــاد]

العفو والله يوفق في المكينه الطيبه الرخيصه وشكرا