عاااااجل .... باجيرو 2005 ولا يوكن 2004 أحسن وبسرعه لو سمحتوا

[قناص الحبارى]

بسم الله الرحمن الرحيم





والسلام عليكم ورحمة الله وبركاته ،،



أعزائي وإخواني أعضاء وزوار منتدى مكشات ..



أحد الأقارب زارني اليوم وطلب مشورتي في شراء سياره للبر ,,

فقلت له لن أجد أفضل من أخواني في مكشات فهم أهل خبره وأهل تجارب .. وما خاب من أستشار ..



أحبابي .. الرجال يبحث عن سياره للبر وهو محتار بين سيارتين .. أما الأولى ,,

فهي جيب باجيروا موديل 2005 أفضل نوع وماشي تقريبا 100000 (( مئه الف كم )) ونظيف حسب كلامه .. والرجال معاه مبلغ ولا ودي أقول لكم كم لأنه طلب من أن أشتري له أحدى السيارتي..



واساره الثانيه هي يوكن 2004 نظيف ...وكلاهما سعره متقارب لبعض ..



المشكله عندما شاور بعض اصدقائه عن الباجيرو عذربوه وقالوا له حرام تحط هالمبلغ فيه وهو مستعمل .. اشتر يوكن وريح بالك وسيع ويشيل بزرانك وعزبتك بالراحه وقوي ويتحمل ومريح بالخط والبر وراح تلقى يوكن نظيف موديل 2003 أو 2004 بالسعر نفسه ..!!!



والمشكله الثانيه عندما وصف لهم اليوكن قالوا له بعض اصدقائه أن اليوكن ما يصلح يصرف بنزين وثقيل ويخرب ودبله أزرار ..و...و....و... أخذ ياباني افضل وأقوى وأقتصادي ويشيل عفشك بالراحه ولا جيت تبيع يجيب سعر ,,,







الرجال بصراااااحه داااااخ من الناس .... وقال مالي بعد الله إلا أبو عبد العزيز النسيب :D وأنا أقول ما لي بعد الله إلا أنتوا يالغالين ... ودي شوركم يالحبايب ... ولكم مني أجمل تحيه وأعذب دعاء

ملاحظه / الرجال اللي عارض الجيب طالب بين 60_70 الف ريال وش رايكم والسعر نفسه ممكن يجيب يوكن ولا لا ؟؟؟

أخوكم/ قناص الحبارى



أبو عبد العزيز .

[قناص الحبارى]

الرفع لأهميه .................

[بدوي جنوبي]

والله يا ابو عبدالعزيز
فعلا شي محير ... لكن المبلغ يستاهل انه يحط في اليوكن ... وانت عارف ان اليوكن سياره ناجحه ولها شعبيه واسعه
حتي عند البيع ... بشرط يرزقه الله بموتر نظيف ومثل ما ذكرت ان اليوكن مريح جدا واوسع واليوكن شي طبيعي يكون ثقيل
لان حجم السياره كبير وتعتبر Truk شاحنه
الباجيرو سيارة ممتازه لكن اغلب المستخدمين تشتكي من غلاء قطع الغيار والخدمه بعد البيع

نصيحتي لقريبك بأن يستخير الله وان شاء الله يتوفق في شراء احدي السيارتين

والله الموفق

[قناص الحبارى]

أخي الغالي / بدوي جنوبي ..

بيض الله وجهك يالحبيب والله ما قصرت وجزاك الله خير ..

وبصراحه كفيت ووفيت .. والمستشار مؤتمن ..
انتظر الأخوان أن يدلون بدلوهم ... والله الموفق ..

أخوك/ قناص الحبارى

[desert mirage]

كلامك صحيح اليوكن بريح بالك وسيع ويشيل بزرانك وعزبتك بالراحه وقوي ويتحمل ومريح بالخط والبر بصراحة اريح السيارات وامتعها وراح تلقى يوكن نظيف موديل 2003 أو 2004 بأرخص من هذا السعر لكن اليوكن فيه مشكله واحده فقط وهي طرمبة البنزين تحترق بإستمرار كل شهرين تقريبا وهي تبهذل صاحب السيارة في عدم معرفه عطل السيارة من كمبيوتر ونصابين وغيرهم ولكن وجد للطرمبة حل وهو توليف طرمبة الماني مشابهه لها واقوى منها عند ورشه شالنجر بمبلغ 800ريال ضمان شهرين وجربتها قويه وزينه ويقول مسؤول ورشه شالنجر ان الوكاله تجيب له سيارات جديده مابعد مشت موديل 2007علشان يولف لها طرمبات الماني ويقول انها تعيش 5 سنوات اللي يشتري يوكن يحط في باله تغيير الطرمبه عند شالنجر أما قطع الغيار متوفره بكثره في كل مكان والمهندسين كل يعرف اليوكن

[جنوبي صميم]

اللي اقدر افيدك فيه ان اليوكن قطع الغيار متوفره ومتعدده اما المتسوبيشي فلا تجدها بكل مكان وتراني اميل لليوكن راحه ورحابه وصدرة وسيع !

[الدحبول]

اليوكن إفضل له

[قناص الحبارى]

أخوي الغالي/ desert mirage

بيض الله وجهك ورحم الله والديك

أشهد أنك كفييييييييت ووفييييييت والله ..

خجلتني والله ... بارك الله فيك .. ولا يهونون الأخوان


أخوك/ابو عبد العزيز

[قناص الحبارى]

أخوي الغالي/ جنوبي صميم

جزاك الله خير وبيض الله وجهك يالحبيب ..

أخوك/ ابو عبد العزيز

[قناص الحبارى]

أخوي الغالي / الدحبول ...

كفو والله والحبيب ..


أخوك / قناص الحبارى

[الجمرة]

اقوووووووووووووووول خذ اليوكن وانت مغمض عيونك
لاتقارن بين الامريكي بالجاباني
الامريكي هو الافضل

[نجم الوادي]

يوكن 2004 افضل بواجد

[قناص الحبارى]

أخوي الغالي /الجمرة ..

جزاك الله خير يالحبيب .. وما قصرت .. والله ...


أخوك/ ابو عبد العزيز

[قناص الحبارى]

اخوي الغالي / نجم الوادي ..

ما قصرت وبارك الله فيك يالحبيب


ابو عبدالعزيز

قناص الحبارى

[جمس قطعه 10]

كلامك صحيح اليوكن بريح بالك وسيع ويشيل بزرانك وعزبتك بالراحه وقوي ويتحمل ومريح بالخط والبر بصراحة اريح السيارات وامتعها وراح تلقى يوكن نظيف موديل 2003 أو 2004 بأرخص من هذا السعر لكن اليوكن فيه مشكله واحده فقط وهي طرمبة البنزين تحترق بإستمرار كل شهرين تقريبا وهي تبهذل صاحب السيارة في عدم معرفه عطل السيارة من كمبيوتر ونصابين وغيرهم ولكن وجد للطرمبة حل وهو توليف طرمبة الماني مشابهه لها واقوى منها عند ورشه شالنجر بمبلغ 800ريال ضمان شهرين وجربتها قويه وزينه ويقول مسؤول ورشه شالنجر ان الوكاله تجيب له سيارات جديده مابعد مشت موديل 2007علشان يولف لها طرمبات الماني ويقول انها تعيش 5 سنوات اللي يشتري يوكن يحط في باله تغيير الطرمبه عند شالنجر أما قطع الغيار متوفره بكثره في كل مكان والمهندسين كل يعرف اليوكن
--------------------------------------------------------------------------------
أنا مع الاخوان خذ يوكن وريح بالكـ

اما للطرمبه لها حل لا تخلي البنزين ينزل عن النص وان شاء الله أنه ماتخرب


تقبل تحياتي

[منتعش]

لا تعدى اليوكن
قوة ، مريح . سعره فيه . قطع غيارة متوفرة ورخيصة . كلن يعرف يصلحة

[سدا نجد]

حسب السياره والسعر. الباجيرو سياره جباره فاذا كان فل كامل ونظيف سعره بين 60 الى 70 حسب نظافته. يكون اكبر من الداخل مساحه من الباجيرو. يجب ان تقارن السعر والمواصفات والموديل والنظافه.

[قناص الحبارى]

أخوي الغالي / جمس قطعه 10

أخوي الفاضل / منتعش ..

أخوي العزيز / سدا نجد ..

اشكركم على التكرم بالمشاركه وإدلاء بآرآئكم السديده ...

بصرااااحه أستفدت منها الكثير الكثير .. واسأل الله أن يجعلها في موازين حسناتكم ..

أخوك/ قناص الحبارى

[desert mirage]

أحب اوضح للأخوة الأعزاء نقطه مهمه عن ورشة شالنجر . الحقيقة الفائده الوحيده اللي حصلت عليها من ورشه شالنجر هي توليف طرمبة بنزين اليوكن اما في بقية الأشياء فهم نصابين وطماعين لا يغرك كبر ورشتهم .

[anas]

احد الزملاء عنده يوكون موديل 2000 يقول من شريت السيارة ما اخلي البنزين يتعدى النص وايضا ما ادوس بقوة على دواسة البزين والى الآن ما خربت صفاية البنزين ولا مرة .

[ابوعبدالهادي]

اليوكن أفضل

[المميـز]

الباجيرو سياره عائليه ويابانيه ولك وللزمن
وتشيل سبع اشخاص لانه ثلاث كراتب والمرتبه الثالثه مكانها حلو تدخل تحت واذا مادخلتها تحت راح يصير مكانها للعفش

اليوكن مافيه هذي الميزه

الباجيروا اكثر رساوه من اليوكن بمليون مره وفيه تقنيه ألمانيه وهي عند السرعات العاليه كفرات ورا تفرش شوي
لتوفر ثبات اكثر للسياره

والباجيرو اصغر حجم واوفر صرفيه للبنزين وعند البيع مايطول وله عشاق كثير خاصه بالمدينه وجده بشكل غير طبيعي

انا اعرف راعي معرض بالمدينه ينزل سيارات باجيرو من الوكاله وينزل مستخدم وماشاء الله تبارك الله كلها تمشي في اقل من اسبوعين

واليوكن سياره محترمه ولكن اكبر من الباجيرو اذا كان عدد العائله 4 انا اشوف الباجيرو يكفي بالراحه

والعالم الحين كلها تسحب عربه على شان العفش وباقي السياره يكون للركاب



والله يكب له اللي فيه الخير

واهم شي الاستخاااره قبل الشور

[ينساب صح]

مرحبا تراحيب المطر يابو عبدالعزيز
طبعاً انت عارف وش معي سيارة وشهادتي في اليوكن مجروحة .
اذا كان ما فية فرق مجدي بخصوص السعر ارى ان اليوكن افضل لسبب واحد شعبيتة لدى الناس اكثر من الباجير .. اضافة ان بغيتة خط برد سبدك في الراحة والممشا .. وان بغيتة داخل المدينة وذف ولاهوب علة .. وان بغيتة في البر مهوب شين بحكم تجربتي .. مع العلم ان الباجير صبور جداً وله عشاقة .
و بخصوص طرمبة البنزين لا ينزل عن الربع وثانياً يحرص على تعبئة في الشركات المعروفة تفادي الغش من قوم بنجالا في البنزين وهذا شي مؤكد جداً جداً من احد الاخوان انهم يمسكون محطات عديدة من الي يغشون في البنزين با اضافة بعض المواد او الماء للربح الوفير وغالباً تكون المحطة مستاجرة للبنقالي .

وتحياتي لك

[سفاري نجد]

اختصار مني ... خذ يوكن

[salehhd]

السلام عليكم

اذا العايلة صغير يحب المطامر في البر ياخذ الباجيرو سيارة قوية وحركها جبار ومايصرف بنزين وغير كذا ياباني يعني كد ومد
والباجيرو اكذ فاز في رالي دكار 7 سنوات متتالية

واذا العايلة كبيرة ويبي سيارة مريحة فاليوكن رغب عدم حبي للامريكي لانه ماعاد مثل اول ومايتحمل

ولا تنسى تذكر صاحبك بالاستخارة فما خاب من استخار

بالتوفيق

[قناص الحبارى]

أخي الغالي/ desert mirage



حياك الله اخوي وبارك الله فيك على الرد .. وأشكرك على المعلومه المفيده ,,







أخوي الغالي/ anas



بارك الله فيك وأشكرك على المشاركه القيمه ,,







أخوي الغالي / ابوعبدالهادي



لك مني أجمل تحيه ...







أخوي الغالي/ المميـز ..



جزاك الله خير على المبادر والمعلومات الجيده والمفيده ,,

ومقارنه منصفه من شخص (( ممــــــــيز )) وتستاهل التقدير ..









أخوي العزيز والغالي / ينساب صح ،،



يابونايف والله أنك صادق .. البنقال أستولوا على الأولي والتالي ...



وبالنسبه للبنزين فعلا أنا بنفسي صارت لي مشكله مع محطه .. كاتبين 95 بلزقه على المكينه وهو 91 لأن شقته أخضر ,, وبعد ما صبيت منه بغرشه صحه وقلت له وش ذا صفقته على وجهه وقالي أنه جديد ولا يعرف شي عن البنزين (( طبعا كذااااب ))

والمقارنه بين اليوكن والباجيرو أتصور أنها أصبحت وااااضحه جداااا وحقيقه معلومه من الجميع او الأغلب .. أن اليوكن افضل والرجال علمته بشوركم والله أعلم أنه أستخار امس وشاور عياله وأرتاحوا لليوكن أكثر لأن عنده فورد يستعمله للعمل ويبغى اليوكن للبر فقط ,,

اشكرك أخوي ابو نايف من كل قلبي والله وأشكرك على ِأتصالك علي بالجوال وشرحك لي عن وضع السله خلف اليوكن والصور وصلت ووريتها النسيب وأعجب فيها كثــــــــــــــــــــــير وأول ما يشتري اليوكن بفصل مثلها بإذن الله ..



أخوي ابو نايف .... بصراااحه أنا عاجز عن الشكر واتمنى منك زياره قريبه للشرقيه ترى في ناس انت عزيز عليهم ...







أخوي الفاضل/سفاري نجد



جبت المفيد وباختصار ... تشكر يالحبيب







أخوي الغالي / salehhd



نعم فعلا الباجيرو از برالي دكار بس خويي ما هو راعي راليات ,, راعي الصمان وحواليها ,,وعائلته تقدر تقول متوسطه .. بس والله أعلم أنه ارتاح لشور أغلب الشباب ....((( اليوكن )))







وأشكركم جميعا من كل قلبي وأتمنى أن تقبلوا مني الأسف والأعتذار على ما سببته لكم من أشغال وقت وأذيه لكن أنا أحب أشاور أخواني اللي أحبهم ويحبوني .. وشوركم بالنسبه لي شي مهم والله وجزاكم الله خير على حسن المتابعه وأبداء رأيكم وذكر تجاربكم المفيده ..





أخوكم/ ابو عبد العزيز







قناص الحبارى

[ينساب صح]

الاخ / قناص الحباري
ابو عبدالعزيز
بارك الله فيك ورحم الله والديك ..
ولا شكر على واجب وناخوك
على العموم الله يوفق نسيبك في السيارة وجعلها اقل ما يركب والله يحفظة ..
وبخصوص السلة اذا نواء نسيبك .. تامر اخوك الصغير يابو عبدالعزيز
ابشر والله بالي يفصلها عند معلم ممتاز هنا بالرياض ويرسلها لك في الشرقية.
تراها هينه يابو عبدالعزيز.
ارسل لي المقاس الي يحتاجه وبشر بسعدك.
تحياتي لك يابو عبدالعزيز

[بدون لوحات]

ياشباب طرمبة اليوكن ماتخرب ون خربت غير معها الوجه تنسيم الهواء وهو سبب خربها يخليها تصخن

[ابومالك1426]

اهم شي يوكون مقتنع بالسيارة