يوكن xl شوركم وهداية الله

[ربيع الكشته]

السلام عليكم
يااخوان افكر في يوكن xl 2007

عائليه ودبل , هي وش هي من لحيه ,مااعرف احد جربها
وش رايكم قبل مااتوهق
المستشار مؤتمن انصحوني ,اقسطها والا وش الراي لاعدمتكم

وهل هي تنفع للبران والصمان والا حدها خشم العان :)

تكفون اللي يعرف شيء لايبخل عليه .

[ابوعزوز]

ابعد عن الامريكي وخلك مع الياباني

[ربيع الكشته]

أخي ابو عزوز

اشكرك على التعليق والمرور لكن الامريكي اريح وقطع الغيار ارخص
وماراح اطعس واجد يعني حول الطعوس ايام الربيع ,,

هل تعرف احد يمدحه والا احد يسبه
قولت ابعد ماتكفي .

[جنوبي صميم]

بصراحه الفخامه والراحه للامريكي وخاصه ال جي ام والشفر اما غيرها فلا أقصد الامريكي مثل فورد وأخواتها
انا عندي تاهو 97 ماشاء الله تبارك الله صح اني اصلح فيه بس راحه وسعه ما اضن تلاقيها بالياباني وقطع غيار من كل شكل ولون وانت تخير ودك بالغالي والا الرخيص ( على قد بساطك ) وبما انه جديد يعني بأذن الله اذا استخدامك جيد 5 سنوات ماعندك الا مستهلكات على اقل تقدير مع اني لا افضل ال xl لانه طويل وهي هي عدد المقاعد 3 واذا عندك تحميل حمل فوق الشبك وبصراحه اكبر انا اعجبتني مقدمة التاهو من شفروليت اكثر من اليوكن صحيح الياباني يخدم اكثر بس مو مريح زي الامريكي واستخر ربك وتوكل على الله والله يقدم اللي فيه الخير

[ربيع الكشته]

أخي جنوبي صميم
مشكور على النصيحه وكلامك يشجع
واحترت بالنسبه xl طويل فعلا ً والمقاعد ثلاثه يعني مايحمل زيادة اشخاص عن القطع الصغير
مشكور على النصيحه والتذكير بالاستخاره وتقبل الله دعاءك ولك بالمثل .

[المميـز]

خذ 2006 احسن واقوى بدي وارفع عن الارض وصدامه القدامي والخلفي حديد
ولايتمخش ولا شي

ااما الجديد حابن الارض وصدامه القدامي والخلفي بلاستك ولو تنزل نزله قويه حك وتمخش وتقعد اتحسف عليه

انا هذي وجهة نظري وانت براحتك

واحد من الاقارب كان محتار ياخذ اليوكن والا الباجيرو الجديد وبعد الاستخاره اخذ الباجيرو الجديد وعسى الله يبارك له ويعطيه خيره ويكفيه شره

[عاشق السيل]

إذا كنت مضطر لسيارة وسيعة ،، عز الله إنه أحلى موتر ( وسيع ومريح وقوي وخفيفة نفسه وفخم ويلبي رغباتك البرية )

أما إذا كنت ماتحتاج هالمساحة ( من كل قلبي ) أنصحك بالياباني : باترول لاندكروزر باجيرو وإنتبه تتعدى هالمواتر ...

وألف مبروك مقدما وتقبل مروري ،،،،



عاشـقhttp://www.mekshat.com/pix/upload/sign/images/mk49539.gifالسيل

[مخرب طلعات]

اليوكن إكس إل

أسئلة كثيرة ومواقف مخيفة وأشكال جديدة <<< مسوي نفسه مقدم برنامج :)

أخوي السؤال الأول

ماكينه الجسم موديل 2006 كان لديك الإمكانية بإختيار المحرك الإختياري 8100
ولكن مع الأسف الشديد فقد ألغوا هذه الماكينه على 2007 وأصبحت 6200 :( للأسف الشديد ماكينه القديم أقوى من الجديد :(

السؤال الثاني

اليوكن 2007 أفضل وعزمه قوي جدا ً أكثر من القديم فهذا يحل السؤال الأول :)

السؤال الثالث

تتمخش ومتخشش أصرف لك تروح عند محلات اليايات الأستراليه وتاخذ من ياي 400 فما فوق للأربع كفرات لأنه موتر عز الله إنه موتر
ال 200 و 400 مايتحملون الموتر هذا ماشاء الله

السؤال الرابع

تفتح السيارة بالريموت وتفتح وتسكر الشنطة بالريموت وهذه ميزة

السؤال الخامس :)

أقول لك جميع الميزات المتوافرة في الياباني موجودة باليوكن الـ xl

وأكيد مافيه شي كامل مكمل إلا وجه الله الكريم فأعطيك يا أخوي (السلبيات) حقت الموتر

الواحده والوحيده وأنا متأكد إنها ( الثلاجه ) :) نعم يا أخي الثلاجه هي مشكلة السيارات الأمريكية ولكن إذهب إلى الطمرة وتجد هناك ثلاجه يحبها قلبك وتلزقها بالموتر

بس يا أخوي لا تنسى هذي الكلمة أرجوك إنك ماتنساها أثناء الشراء

ان تكون السيارة فل أوبشن <<< نعم فالسيارة خاصة اليوكن يصير بايخ جدا ً جدا ً إذا كان إناف أوبشن :)
ان تكون السيارة دبل (دفرنسين) فالجمس الدفرنس لايتحمل الوزن الثقيل الذي يحمله إلا بالدبل
أن تكون السيارة مجهزة بنظام منع الإنزلاق (إي بي إس) على ما أعتقد كذا إسمه

وأرجوا إنك إستفدت

[ابوحماد]

خذ اليوكن القصير الفل كامل من عند الجميع

عليه تخفيض من 161 الف الى 156الف

واذا جبت لهم أستمارة سيارة بأسم ابوك او أخوك او عمك

يسون لك أتخفيض الى 147 الف

[غالي]

انا منيب ناصحك بالموتر او اذمه
لكن ابنصحك في شيء ثاني الا وهو
دامك تبيه في الربيع استنى موديل 2008
او اول ماينزل 2008 سوف يطيح سعر 2007 والقط لك وحيد
ولا اظن انه بيتأخر نزول السيارات 2008 من شهر او شهرين تقريبا بتبداء تنزل
والله اعلم :)

[بدوي جنوبي]

كلامك اخوي غالي صحيح

بس المشكله الالوان الزينه تروح واغلب اللي باقي يكون الوان مهي مرغوبه

وامكن ما تلقي المواصفات الكامله

الله يعينك اخوي شتتنا افكارك

الله الله بالاستخاره

[Eng.3beed]

يقول المثل (اسال مجرب ولا تسال طبيب) شف ياطويل العمر والسلامه عندنا يوكن الفين سبعه شارينها اول مانزل بدون دبل ومهيب فل اوبشن الصراحه مركب مريح ومكينته مشا الله لا اله الا الله على كبر حجمه بس طياره ومن تحط رجلك يفز معك ولاكن فيه وزن بس مشكلته الوحيده ان وجهه كبير ماتشوف زويااه من كبر وطامن بالحيل يعني مايصلح للمطامر والطعوس بس سياره جمليه وعائليه رائعه جدا جدا جدا بس انا افضل الصراحه انك تشتري لك جيب لاند ولا باترول اوجهه واشخص لان الجموس صارت هاليومين حقت سواويق الا الجمس الحوض طبعا ولكم من اطيب التحيات عارف اني طولت عليكم وضيعت الشالفه بس تحملوني محدثكم عبيد

[ابوراكان1425]

يوكون2005حلو