السفاري00ضعف عزمه وش السبب00

[almojaly]

الأخوان00 بارك الله فيكــم00
سيارتي سوفر سفاري موديل 99 كانت زي الحلاوة000وأحب فلة الحجاج بعالي الطعوس000 جلست أربع سنوات ماتغير شيء وقبل فترة شهرين شعرت أن العزم ضعيف00قلت أكيد مايبيله 00غير البواجي00غيرت البواجي00وأشوف الآن بعد شهرين00جيت أبغا أرقى طعس 00وقف الموتر وصار يحن محله ( الله يستر لايكون دزق الكلتش) وكأن فيه ريحة شوي00وشوي ولقلق وطفي000مع العلم إني حاطة بالدبل الخفيف0وش السالفه ماني عارف00إذا أحط الدبل الثقيل يمشي لكن طبعاً يحفر000المهم إن عزم السيارة ضعيف000وماني عارف وشو منه000
اللي عنده حل يقول لي00ما نقدت على السياره في أي شي يعني على الخط00عزمها وش حليله00إذا هي منطلقه عزمها زين00بس ضيقت صدري00وسلامتكــم0
___________
من شهرين ( غيرت ) فلتر البنزين - البواجي ( من الوكالة) - فلتر الهواء000
هل أغير أسلاك البواجي000
ــــــــــــــــ
كيف أشيك على دسك الكلتش0000
وتحياتي للجميع000

[مهيلان]

السلام عليكم
لا يضيق صدرك وانا اخوك
مشكلتك حسب تقييمي لها ان هناك شيء افتراضي انتهى عمره ويحتاج لتغيير
لكن ما هو هذا الشيء اتوقع عدة اشياء :
.................................................. .................................................. ...
اولا : افحص الكلتش وذلك بان توقف السياره وتسحب الجلنط لاخر شييء
ثم تعطيه الاول وترفع رجلك من الكلتش وتدوس بنزين
فان كان السياره انطفأت معنى ذلك الكلتش صاحي
وان سمعت له حنه وهو واقف معنى ان الكلتش تعبان ويحتاج الى تغيير .
.................................................. .................................................. ....
ثانيا : من الاحتمالات ان الكنداسه شخالاتها مسدوده ....!!!
لا تستغرب فالكنداسه لها عمر افتراضي تنتهي بانقضائه مثل الكلتش والمكينه ...!!!
وعندما تنسد فتحات الشخال فان العادم ما يطلع الا بصعوبه ويصاحب ذلك
ضعف العزم وارتفاع درجة الحراره .............
كيف تختبر الكنداسه :::
هناك طريقه بسيطه لن تظر ..وكما قال البدوي ( ان لقحت والا ما ضرها )
وهذه الطريق هي ان تفتح فتحة تهويه بين الدبه الكبيره والقزوز وتضع لها سده .
وجربها فان تغير العزم والا فيها حلال ...............
دمتم سالمين

[Y&Y_4X4]

نسيت شي مهم يا مهيلان ( اغديك ترد علي ان شاء الله ) وانا بأعتقادي انه هو السبب لأن الرجال يقول بالخط ما نقد على الموتر شي.

البلوف بهن تنسيم ويحتاجن يا لصنفرة او تغيير.

وبعد عندي نصيحة لمستخدمي النيسان عموما انتبهو لـ امبير الحرارة تراه كذاب شيك عليه الا اخذت مأخذت وتأكد يأخي ان اي امبير حرارة ثابت على الربع ما يطلع ولا ينزل انه خربان ولا يعرف يتعدى الربع واول ما يتأثر من الحرارة العالية نسبيا يعني ماهوب الا فور الموتر هي البلوف .

عاد يا almojaly شف وش يصير معك وعطنا خبر الله يعافيك.

والسلام عليكم,,,,,,,,

[أيمن]

من قدك يا almojaly ..
شارك معك خبراء سيارات مكشات :D
شكلهم يبون منك وصفة طبخة ولا شي ..:)

يعطيكم العافية جميعا ..

تحيتي

[almojaly]

الأخ الغالي00 مهيلان00معلومات قيمة00والله إن قلبي موجعني من الكلتش000( رفيقك يحب الفزعات والمدح00ويشخص00 وكل من غرز ركض له يسحبه وجرجرة في مواتر خلق الله0000والله العالم هذا السبب)
أبجرب كل اللي قلت والشكوى على الله0000
معلوماتك جداً يمة ويعطيك العافية
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــ
الأخوة المشرفين00على منتديات مكشات أيمن وربعة00تحية طيبة وبعد00
شوفو يا الربع أنا طاق الشكوى فيكــم طاقها00لا وعلى وين على مكافحة0000لأني أدمنت منتداكــم يارجال ركضي من أطلع من الدوام أتصفحه ما صار منتدى (هذا اللي يقولون إدمان على المـ0000 الله يحمانا وياكم)-
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــــــــــــــــــــــ

[almojaly]

الغالي Y&Y_4X4
أشكرك على معلوماتك القيمة00لكن البلوف00ما نقدت على السيارة بشي00تطير طيران على الخط00وماهناك زود صرف بنزين000وتشتغل على أول نقرة00يعني كلش تمام ماعدا00إني لاحظت عليها هاك اليوم ضعف العزم000
_____________
بالنسبة 00 للحرارة 00 فعلاً 00يارجال00والله لو تاصلنا طرف النار في الغمارة من زود الحرارة00 مادرينا هي المكينة مرتفعة حرارتها ولا لا 000صكصكة في ها الدرايش 00وتشغيل لها المكيف000
________
ألاحظ 00ماعاد فيه إهتمام بالسيارات00نمشي إلين توقف يعني ما نتوقع الخراب أو نتحسسه قبل ما يعدم علينا السيارة00
شكراً على المعلومات وسأجرب وحده وحدة00000

[الشـ9ــاعر]

اسمع ياراعي السفاري تبي العلم اللي يجمد على الشارب
وبدون زعل بيع السفاري اللي صار من الطلعات والتطعيس سكراب
وخذلك من الوكاله (لاند كروزر VXR) علي الحرام والطلاق
ما عاد تكتب نفس موضوعك اللي كتبته على السفاري.

((حنا ونا أخوك مجربين المواتر وقانصين عليها وضاربين عليها خطوط شرقا وغربا وعارفين طيبها من رداها)) ......

أتمنى ان تأخذ بنصيحتي والله يوفقنا وياك........

[almojaly]

الأخ الغالي0000 الشـ9ــاعر
مساك الله بالخير00وطابت علومك000
ذكرتني بأغنية قديمة0000يالومي00يالومي00حامض 00حلو000
الله يجعل ربي يخليك000يعني رواتبنا تبي تروح لها السيارات ( أنا شارية تقسيط بـ 140 ألف جلست أربع سنوات أسدد ) كم يسوى الآن وكم يبي لي أزوده علشان أشري اللي أنت تقول00صح كلامك وعلى عيني وعلى رأسي00
لكن نصيحة للجميع ( وأنا أولكم طبعاً) 00 السيارة إذا تقعد عندك أقل من عشر سنوات00وتبيعها00إعرف إنك خسران00خذ حقك منها00لكن عليك بالصيانه لها000
يا رجال خمس سنوات إستعمال تعتبر جديدة000صدقني0000
شكراً على النصيحة000000

[Y&Y_4X4]

والله يأخوان ان التايوتا والنيسان بعد ستر الله سبحانه لو تناظره بربع عين من الاهتمام والصيانة يمشي بأذن الله عشر سنين مايكلف على راعية من لوازم الصيانة وقطع الغيار مثل مايكلف غيره من السيارات والكلام هذا كلنا نعرفه وعايشناه .

[الأشهـــــب]

الأخوة الكرام : السلام عليكم ورحمة الله وبركاتة.
الحقيقة أنا بعد أعاني من نفس المشكلة الي يعاني منها الأخ : almojaly بل وأكثر لأني انا أعاني من ضعف العزم حتى على الطريق السريع وغير السريع؟! وموديل سيارتي 98 ، وقد قمت بتغيير البواجي لكن ماش ماتغير شيء؟!
والحقيقة إذا كان إمبير الحرارة يجي منه (خمبقة)!!! زي ماذكر أخوناY&Y_4X4 هذي والله مشكلة.!
أرجو من مرة به هذه المشكلة ووجد حلها إنه لايبخل علينا يالأجواد.
والله يحفظكم ويرعاكم.

[Y&Y_4X4]

اعمل ماذكر اعلاه من الفحوصات .

همن يبي يهديك الله سبحانه للحل ولا تهتم وانا أخوك.....

[عاشق الجبال]

انا مثلك يالموجلي عانيت من ضعف عزم سيارتي باترول 98 بدلت البواجي الى نوع بخاخ من الوكاله وغيرت فلتر البانزين اخيرا فتحت الدبه الخلفيه للقزوز وجدت قطعه من الشخال تغلق فتحة القزوز
والحين ماشاء الله المكينه مرتاحه من العمليه الجراحية اللي تمت للقزوز بس مازال عندي شك بفحمة
الكلتش . ودي اعرف كيف يتم فحصها علما بان احد الاخوه اشار بان يسحب الجلنط الى الاخر ثم الدعس
على البنزين فان طفا فذلك يدل على ان الكلتش مضبوط . انا جربت الفكرة ولكن وجدت السياره ىكانها
بالفاضي .
تقبل تحاتي لك ولجميع الاخوه المشاركين بالموضوع

[Y&Y_4X4]

اذا الكلام هذا صحيح يعني الموتر مافيه اصلا دزق وكلتش

يبيلك تركب وبأسرع وقت ؟؟؟؟؟

[بـــدر]

يجي في بعض السيارات زي الدبه بس صغيره بعد القزوز مباشرة قبل الدبه الكبيره واعتقدر انها مسئوله عن الرصاص لاكن يجي فيها قطعة زي المنخل اذ طولت مع كثرة الاستخدام تمتلي رصاص وتسكر مجرى الهواء يعني تبطئ عمليه اخراج الكربون وبتالي تضعف عزم السياره ، شيكها وانشالله تزين الامور او قصها مره وحده وافتك منها بس بيطلع صوت بعد سرعة 140كلم .

[عاشق الجبال]

شكرا للأخ y&y4x4 والأخ بدر على الردود الله يعطيكم العافيه
الأخ بدر انا فعلا طلع صوت بعد سرعة 140وذلك بعد ان شلت نصف الشخال الموجود داخلها
اما الدبه الصغيره راح اتاكد منها .
y&y4x4 حاولت اليوم بس سحبت الجلنط للأخر ورفعت رجلي خفيف حصل رجه شي بسيط
ولكني مارفعت رجلي نهائيا .
اكرر شكري ولكم فائق التحية