^^ عطني اذنك لحظه وخذ راي طاير في العجه ^^

[Bader-M]

السلام عليكم ورحمة الله وبركاته
كيفكم شباب مرتاحين إن شاء الله
................................
جنني فكره بعد ما قريت موضوع الذيب / استبنه
عن السيارات المستعمله
ومن الاسئله التي اسأل عنها من الأصدقاء والأقارب
وهو ( وش رأيك وش اشتري سيارة )؟
فمن منطلق معرفتي البسيطه ببعض الامور المتعلقه بالسيارات وبنوعيتها .. احب اني اقول لاحبتي بعض النصائح التي احس انها ستفيدكم ..
اقول وبالله التوفيق :..
عند شراء سيارة جديدة يجب مراعاة أمور عده
أولا:
اقتصادية
يعني الواحد يجلس يجمع له أبوه (إذا كان طالب ) أو موظف اقل حاجه سنه عشان يشتري له سيارة
والبعض يحط إلي دونه و قدامه في السيارة أو يأخذها بالتقصيد ويحمل روحه ديون ماهو قدها ..
يعني لا تحمل نفسك فوق طاقتها
او كما قيل الامثال العاميه وتناقله اجدادانا الاوائل ..
(مد رجلك على قد الحافك)
وصدقوا بمقولتهم ذي ..
.................................................. ........
ثانيا
طبيعتك ( مزاجك )
وفي المثال يتضح المقال
يعني أنت راعي بر وكشتات ووناسه ما تروح تشتري لك كآمري مثلا
إلا اشر لك سيارة تصلح لمثل هالأمور وهي الجيب وإذا كان ما عندك فلوس وش فيها هايلكس أو ددسن
عشان نسلم من
قولت عبيد
اللي يقول : طلعتوا للبر
قال: ايه ، قال غرزتوا
قال: لا
قال: اجل ما طلعتوا
ههههههههه
.............................................
ثالثا
توفر قطع الغيار
وهذه مهم جدا
واذكر على سبيل المثال
سياره فولفو سياره جميله قويه و ايضا عمليه ولكن قطع غيارها غير متوفره
........................................
رابعا
سعر قطع الغيار
وهذي مرتبطه بالنقطه الاوله ..
بعض السيارات سعر قطع الغيار مكلف جدا
خذ مثلا
فحمات الكامري 70 ريال
بينما المكسيما 200 ريال
في العلمة السعوديه ..
يعني الفرق ثلاث اضغاف تقريبا
ملحوظه مهمة ..
قبل إن تشتري سيارة اذهب لمحلات القطع الغيار وأسال عن سعر هذه القطع وهي التي دائما يتم تغيرها في السيارة يعني
(قطع استهلاكية )
1- فلتر الزيت
2- فلتر الهواء
3- فلتر بالنزين
4- بواجي
5- اسلاك البواجي
6- المسحات
7- السيور
8- الفحمات

.................................................. ..........
خامسا
استهلاك الوقود ( واضحه ما يحتاج تفصيل )
.................................................. .......
سادسا
الصيانه
يجب إن تكون السيارة سهلة الصيانة
يعني خذ على سبيل المثال
طرنبة المويه ( مضخة الماء )
في الكزس
يتم تغيرها 1000 – 1300 ريال
اما المرسيدس
يتم تغيرها 400 – 600 ريال
..............................................
سادسا والاخير
سعر عند البيع
يعني فيه سيارات تشتريها وبعد سنه يكون طاح منها ثلث السعر وفي بعض الاحيان النصف
خذ مثلا
الجاكور والاودي كلها ينقص منها 30 % على الاقل بعد ذهاب عام واحد فقط
إما
الكامري
يعني انا معي 2000 شريها من 58 الف
وبعد استخداما 3 سنوات تسام الان مني 35 الف
يعني بمعدل 23 الف يعني تقريبا نقص من راس مالها %40 بعد استعمال ثلاث سنوات
السيارات المرغوبه تحافظ على قيمتها
من الالماني والاروبي عمومنا
المرسيدس ( ماعدا 12 سلندر )
التويوتا ( بجميع انواعه )
النيسان فقط ( الباترول و الدادسن )
ملاحظه
هذا طبقا للاسواق السيارات في الرياض والمنطقه الوسطى عموما

ان شاء الله يكون الموضوع مفيد لكم
من لديه أضافه لا ببخل علينا بها
ولكم مني أجمل تحيه:D

[Najd^Prince]

بسم الله الرحمن الرحيم

موضوع ممتع وشيق و مهم و هذا الاهم في نظر الكثير :D (( الله من الفلسفه يا أمير ^ نجد :rolleyes: )) .

بصراحه كفيت و وفيت وانا اخوك , بس انا حابب أعلق على :

سعر قطع الغيار :

يعني ممكن كثير منا يقولك مو مشكله عندي القطع لاني ماراح أغيرهم إلا بعد فتره (( زي الفحمات و القماشات و فلتر القير ,,, الخ )) في سبيل إني أحصل على السياره الي أبيها .

نجي الحين لسعر البيع :( :

وكلامك هنا 100 * 100 صحيح بعض المواتر ماتكمل معك اربع شهور ويطيح فيها القيمه الفلانيه
وخذ هذا المثال : ^^ واحد شراء لكزس 2002 أول ماطلعت وإستعملها 3 شهور بس :(
يوم جى يبيع طاح في قيمتها 30 الف ريال سعودي ^^

على العموم الله يعطيك العافيه على هالموضوع وننظر منك المزيد :good: .

تقبل أفضل التحيه

[...الطوقي...]

الله يعطيك الف عافيه اخوي على النصيحه
ماتقصر يابعدي












تحياتي لك
...الطوقي...

[Bader-M]

Najd^Prince
الله يعافيك
وشكرا على الاظافه الجميله

................
...الطوقي...
الله يحيك
يابعدي

[أيمن]

( لقد تم إضافة هذا الموضوع إلى المواضيع المميزة والشيقة في هذه الخيمة (http://www.mekshat.com/vb/showthread.php?s=&threadid=8666) )
مع الشكر للجميع ،،
http://www.mekshat.com/pix/upload/images/flow12.gif

مشرف الخيمة

[عبارتين]

موضوعك جيد ولكن اذا كان عندك هذا الكم من المعلومات الرجاء طرح موضوع عن السيارات الاقتصاديه ذات الدفع الرباعي

[تواق]

شباب عندي استفسار بسيط ياليت توظحونه لي

السياره عمومن اي سياره ليه نظر له من ناحيه السعر عند البيع وخصوص على موديلات متقاربه
نوعن ما مثل لاند كروزر يجي موديل يقعد عشر سنين هو بس ضحك على الدقون تغيير
لون الزيق او اضافه زنون او بيض بدل احمر اغير الجيب لتغير كلين
هنا اكون حللت قيمته واسفدت منه بل الكامل اما واحد شاري 2002يروح يبيعه يشري 2003 لييييه
طيب شكل البدي هوهو والمكينه هي هي والقوه نفسه والوسع والشكل من داخل زيه لا الوان المسجل
الحين ازرق تغير ها وش رايكم شباب


اخوكم /تواق

[أبـ [مطلق] ـو]

سلام عليكم . .

هلا والله اخوي طاير بالعجه . .

تسلم والله يالغالي

على الموضوع الي من جد حلو وكلامك جميل ومنطقي

<- - - والله يالغالي انا معي ددسن 91 ..

شريتها قريب بس يبي لها تعديل

لاني شريتها لو تشوفها الحين مهب حقت بر كفراتها صغاااار والموتر طايح على وجهه وحالته حاله

لكن اصبر لي . .

ويعطيك الف عافيه يالغالي على المشاركه الاكثر من رائعه

تحياااااتي للجميع . . :)

[* ضب *]

لا تعليق
لا زيادة
كفيت ووفيت
تسلم على الموضوع الرائع
وتستاهل تميز الموضوع

[العنكبوت]

مشكور طاير على هالموضوع الخفيف على القلب
واوافقك على كل ماتقول

ولي تعقيب صغير على اخوي Najd^Prince
هو انه يالغالي كلل السيارات اول ماتشريهن يطيح بهن مبلغ
كبير بس بعد هالطيحه تبدا ترخص بانسيابيه

يعني الربع اول ماتشريه لو تستعمله 3شهور
يبي يطيح به فوق ال5الاف بس تلاحظ انه السنه الجايه
5+2 والي بعده 5+2+2

يعني طيحه اللكزس اعتقد انها طبيعيه

تحياتي

[غزال الريم]

تم حذف هذه المشاركة لسوء الأدب

[د.الكاشت]

موضوع ممتاز ورائع

[اسيزو 4x4]

نصائح من ذهب جزاك الله كل خير أخوي طاير بالعجة



.

[الدبل الثقيل]

شاص وارد عمان وبس لايطيح سعره ولاشي وسيارة رجال وبر وكشخة...

[-الماجد-]

جزاك الله كل خير على هالموضوع الرائع .......

[محب النياق]

معلومات قيمه

شكرا لك

[مخرب طلعات]

معلومات من ذهب أنا قررت أبيع الهايلوكس وأشتري سييرا <<<<واحد مضيع :)


معلومات مفيده يالطاير بالعجه

[cherokee-LS-7]

صراحه يا خوي طاير في العجه.........شكلك نسيت أهم وأحسن موتر وأرخص موتر ألا وهو .
سيارة جيب شيروكي..
مميزاتها.
1-سعرها رخيص.
2-قطع غيارها أرخص من التويوتا والنيسان.
3-أقوى وأحسن عزم.
4-أقل صرفية بنزين.
5-أكثر راحه من غيرها .
6-أرسى في الخطوط.
7-أقوى من ناحية البدي والشاص.
8-أكثر أمان وراحه .,.,..,.,..إلخخخخخخخخخخخخخخخخخخخخخخخخخخخخخخخخخخخخخ

[..ابوغلا..]

جزاك الله خير على هالموضوع الرائع

[مساير الليل]

فحمات الكامري 70 ريال
بينما المكسيما 200 ريال


ليس شرط إذا كانت قطع الغيار رخيصه معناااه بوفر

فمثلا أنت ضربت مثال على فحمااات الكااامري بـ70 ريال لكن يالله بالمحافظ تجلس 3 شهور إلى 5 شهور ""عن تجربه""

يعني خلال سنه ونص تغيرها 3 مراات = 210 ريال

بخلاف المكسيما بـ200 ريال لكن تجلس معك حول السنه ونص أو أكثر

فيه شي أسمه العمر الأفتراااضي

والله يعطيك العاافيه

[عاشق الكشتة]

قبلك يا طاير متألق ( ابتسامة )
عافاك الله ومشكور على ها النصايح

[رواق]

فيه نقطة مهمة وهي ان تكون عارف متى آخر مرة تغير شكل السيارة وكل كم سنة يتغير شكلها بالعادة

اضرب لكم مثال :

عام 2000 وفقني الله و اشتريت فورد كراون فكتوريا موديل 99 وكالة ... لكن ما اشتريته الا بعد مانزل موديل 2000

الفائدة :

1- نزل في قيمة الموتر 10 الاف ريال بدون أي تغيير في شكله ولا أي مميزات اللهم الا فرق سنة في الموديل ( موديل 2000 سعره كان في الوكالة بـ 82 الف ريال وانا اخذت 99 بـ 72 الف )

2- حصلت على موتر موديل جديد يعتبر .. لأن الشكل القديم انتهى في 98

3 - بما ان الفورد يتغير كل عشر سنوات ... موتري معي إلى الآن وشكله يعتبر جديد ( لولا الدكشات والمخوش وتغير لون البويه اللي فيه :d ) يعني 99 أو 2008 كلها نفس الشكل ماتغير الا الجنوط وهذي بسيطه للي تهمه الشكليات

طبعا بالإضافة إلى ان الفورد سيارة اقتصادية ومطابقة للمواصفات اللي في الموضوع من حيث قلة الخرابات ورخص قطع الغيار ..

[بـلـيـهـان 1]

موضوع رائع و مهم ، و أهم نقطه قطع الغيار لأن فيه سيارات أسعارها حول بعض ولكن قطعها تفرق واجد ، و كلن على حسب الحاله الماديه إلي يعيشها .

بالتوفيق و أشكرك

( أتمنى التثبيت )

[الوحش79]

رأي سديد

ونصائح 100%
سليمه

وجزاك الله الف خير

[بو الجموس]

بما انكم فتحتوا سالفه وش اشتري
فودي اشواركم وش اشتري مع ان ابوي محتاج شئ له حوض
فقلت اخذ ددسن ولا هايلوكس ولا جمس حوض قدييم
وش رايكم ابي شوركم
وياليت تحددون الموديل للسيارات واذا تعرفون اسعارها ياليت تكتبونه للمعلوميه لي ولغيري

[الاشهب 507]

شاص شاص شاص