ماهو علاج بدي السياره والقزاز اذا حبب من الرمل

[ابوفهد639]

اخواني اعضاء منتدى مكشات

السلام عليكم

صابتنا عجه قويه قبل ايام تسبب في كسر الزجاج الخلفي للسياره والمرايه الجانبيه للسائق وتسبب في تحبيب البدي وتحبيب القزاز بشكل واضح

فهل هناك حل لازالة اثر التحبيب من البدي والقزاز

فزعتكم يالنشاما واذا فيه ارجو ان يكون العنوان واضح هنا او برسالة خاصة

علما ان السياره جي اكس ار 2004 ذهبي

والسلام عليكم

[فاقد تبوك]

ياأخوي يوم كنت بتبوك" الله المستعان"
كان هناك محل زينة اخبر إني شفت عنده جهاز ب50 ريال نشدت راعي المحل عن هالجهاز قالي هذا يوخر الغبش والرمل المحبب على الصطبات

وهذا العلم اللي عندي واعذرني على هالفلسفة لكن حبيت أشارك باللي أعرفه

تقبل تحياتي

[راعي كيف]

السلام عليكم
اخوي الله يحفظك عندك حقين التلميع شغلهم عجيب خطير إذا دخلت السيارة عندهم وتجي تبي تستلمها ماتعرفها :) هذا ماعندي الله يرعاك ويحفظ الجميع

اخوك المحب راعي كيف
ابو ناصر

[slmuni]

بالنسبة للترميل اللي في الانوار الامامية و الاستطبات قبل فترة شفت محل بدوار الخرج بالرياض حاط لوحة لمعالجة هذا الترميل ...

ومحله بالضبط وانت رايح مع شارع الامير سلمان (مخرج 17) متجه غرب وبعد ان تتعدى الصناعية و يجيك كوبر طريق الخرج اتجه للجنوب يسار ثم اول اشارة (اللي فيها السالم للزجاج على اليسار ) بعد ما تتعداها مباشرة على يدك اليسار محل فتحتين ... تاصل الاشارة الثانية حقت غبيرا وترجع لهم او تخش يسار كأنك تبي الصناعية وتخش بالحارة يمين و تطلع مره ثانية على الشارع العام طريق الخرج شمال و تلقاه على اليمين ...

صراحة لقيت عندهم 3 لاندكروزرات موقفين سرا و اثنين داخلين جوا وعرفت سر بعض المواتر اللي مع الشريطية بالمعارض تحس الموتر وجهيته معفولة و انواره ممتازة :):)

[ابوفهد639]

ماشاء الله تبارك الله والله مكشات واعضائه شي ماصدق

جاهزين لاي استفسار واي طلب

الله يوفقكم والله اني معجب بالمنتدى لكن الان زاد اعجابي 200%

الله يجزاكم خير هذولا الرجال والا بلاش

فاقد تبوك ياعساك ماتفقد غالي الله يجزاك خير على ردك الطيب وتبوك والله بعيد علي الله برضى عليك

راعي كيف الله يجزاك خير مريت حقين التلميع بالرياض ولقيت عندهم فعلا شي عجيب لكن قالو انا نحط على البدي لمعه تحفظه ....خفت انها تضر البدي.. وبعضهم قالو لي مانشيل الترميل الي على البدي.

القرم... slmuni عزالله كفيت وفيت وباذن الله اني ابروح لمهم واذا بغيت وصف اضافي سوف اراسلك الله يجزاك خير وعزالله على مثلك وشرواك يقوم منتدى مكشات

حزاك الله كل خير