احذروا احذروا من ورشة تراي ستــار

[ابوريناد1979]

يا أخوان السالفه اللي بقولها صارت معي شخصيا

وهي ان هناك عصابة نصب واحتيال بزعامة واحد لبناني موجوده في الصناعية
الاوهي ورشة تراي ستار :mad:
وهم يدعون أنهم خبراء الجيربوكس التماتيك وذا رحت لهم بربسوا في القير اذا صلح تمام وذا ماصلح يماطلون فيك الين تطفش وهم ماخذين حقهم 4 أضعاف

مابي اطول عليكم بقول لكم سالفتي
طول الله عماركم كان معي لومينا وصارت معي مشكلة في القير ورحت لهم قالو لي عندك مشكله في الحساسات ومدري ايش (كهرب يعني )وخلو السياره 3 ايام وخذوا 2100 ريال , وخذيتها بعدها ولا امداني اطلع من عندهم الا رجعت لي المشكله وارجع لهم مره ثانيه وقالو خل السياره كم يوم وبرضوا نفس المشكله .......ترددت عليهم سبع مرات بدون مبالغة وبدون اي فايده الين طفشوني ولا زانت(خطة تطفيش) ,,,,وتهاوشت انا وياهم ومشيت حسبي الله عليهم

اذا محتاج مره رح افحصها في الوكاله اضمن لك

[أبـو فـايـز]

الله يعوضك
وكان المفروض تشتكي ولاتجيب لهم الشرطة مو تزعل وتمشي

[abo lafi]

الله يعوضك
مثل ما قال اخوي ابو فايز لا تخلي حقك يروح بسهوله

[الرهدن]

إن كانوا يقصدون غشك00

وهذا هو الظاهر من كلامك



فاالله حسيبهم وكفى 00

وأبشر وأنا أخوك تجده إن شاء الله في يوم لاينفع فيه مال ولابنون



لكن ؟

(00 فإنها لاتعمى الأبصار ولكن تعمى القلوب التي في الصدور)الحج 46

ولي تجارب كثيرة مع أمثال هؤلاء









وجزاك الله خير على تنبيهنا

والله يعوضك خير



.

[د. كيف]

:no2: لا تخليهم ونا خوك ورهم العين الحمرا :no2:

لاتروح عليك 2100 ببلاش

((إن لم تكن ذئب أكلتك الذئاب))

:no: والله انها اكبر خساره وحقران ان خليتهم ونا خوك:no:

[bmw_07450]

بس كان المفروض يوم دخلت الموتر الورشه
تشرط عليهم ان الموتر يضبط واذا ماضبط
ماتعطيهم ولا ريال( الي اوله شرط اخره نور)

الله يعوضك خير

[برنس777]

أخوي ـأبو ريناد مساك بالخير
الحقيقه وضع يدمي القلب تروح 1200 على لاشي وهم لو تاخذ منهم قيمة قوطي ببسي والله ماتسلم منهم
ثانيا : من ناحيتة أو تو ستار طبعا الي في القصيم ( بريده ) أكثر مهاره في السرقه بحكم أنها إداره مصريه والحاصل أنه عندنا يوكن 99 جديد ماعليه يمشي الحال بنسبة 80 بالميه أستعجل الوالد وحط الموتر عندهم بغرض التشيك الكامل وفعلا شيكو الشباب وأكل التشييك علينا 7000 ريال وأكثر وبعد مده صارة تطلع عندنا مشاكل ما كانت موجوده سابقا فلما راجعناهم أحتجوا بأن القطع الي تلفت ماغيرناها ولامرينا عليها ولا شيئ والحاصل أنهم أصبحو يجددون قطع وقطع يركبون بدالها بمستعمل علشان تراجعهم بشكل دوري وأخيرا طلعانا فالصو بحكم سماحة الوالد وطيبه وأخيرا مانفول إلا حسبي الله عليهم

[ابوريناد1979]

يعطيكم العافيه شباب
ابوفايز ,abo lafi,الرهدن,د.كيف
(من قال لكم اني ماشكيتهم .. شكيتهم في وزارة التجاره وفصخت ثيابي عندهم ولاقصر معي واحد في وزارة التجارة اتصل عليهم وخرشهم شوي بس هم طلعو كلاب حجتهم ان القطع الكهربائية ممكن تخرب في اي وقت نظرا لأن السياره موديلها 99 وقديمه ممكن تحرق اي قطع تركب فيها)..باقي طال عمرك تجيب لك زكرت يلعبون حديد وتمسح فيهم الأرض هاللبنانين.... خلوها على ربكم بس
bmw_07450
يطول لي بعمرك .. وش ظنك اي ورشه لازم اشرط عليهم . بس خرابات اللومينا حسبي الله على من وردها (والامريكي بشكل عام ) مايبين معك على طول لازم تمشي شوي ثمن تتفاجئ بلمبة (تشك انجن)تولع ..ثمن تعود عليهم والاهم ماخذين فلوسهم وحاطينها بتجوري في الصندوق ماتطلع لو تنبت في راسك نخله.
برنس777
الله يعوضك ولكن صحح 2100 مهيب 1200 ولكن من شاف مصيبة غيره هانت عليه مصيبته انت 7000 حسبي الله عليهم
7000 تجيب لك موتر ثاني يمشيك

[جمس454]

تراي ستــار نصااااااااااااابين

انا موضب القير عندهم وبعد سنة وشهرين خبط

لا وموضبة بقيمة الله لا يوريك

حسبي الله عليهم

[المهمري]

اخوي ابو ريناد الله يعوضك
صار لي حول اللي صارلك بمحل فيه كمبيوتر ورشه (خالد الهديرس)اللي بالنسيم جيت ابااصفي المكينه جمس 96 قبل 3سنين وعندهم مصري متخصص بالاقناع وشكلهم مبرمجين الكمبيوتر عند ما يطلب الزبون التصفيه للمحرك انه يطلب التالي:
1-البواجي (لو هي زينه وكانت عندي جديده
2_اسلاك البواجي (حتى لو هي بكرتونها)
3_اجزاء بالديلكو
4_اجزاء بالتيربو
المهم ياجماعه دفعت 800ريال قطع غيار و400عمل يد والله ثم والله لم تصفي المكينه وما تغير فيها شي وما ردولي شي وشي دخل الصندوق ماوالله يضهر
كونو يااخوان حذرين من اصحاب الكمبيوتر اللي في الورش واللي يضطر لهم الله يعينه

[ولـد الدوادمي]

وانا بعد اعطيكم معاناتي

بس انت تراي ستار الي بالشرقية ولا بالرياض

انا والله بالشرقية وجبت لهم موتري يبيله توضيب القير هو تماتيك

قالو لي بيكلفك 6 ألف توضيب والله لو انه توضيب مكينة ماجا بهالسعر

ومريتلي محل معروف وزينن بالحيل وقالي بـ3500 ريال التوضيب

شف الفرق وإلى هالحين والله على حطت يدينكم ماسويت شي ؟

[ابوريناد1979]

وانا بعد اعطيكم معاناتي

بس انت تراي ستار الي بالشرقية ولا بالرياض

انا والله بالشرقية وجبت لهم موتري يبيله تويب القير تماتيك هو

قالو لي بيكلفك 6 ألف توضيب والله لو انه توضيب مكينة ماجا بهالسعر

ومريتلي محل نعروف وزينن بالحيل وقالي بـ3500 ريال التوضيب

وش الفرق وإلى هالحين والله على حطت يدينكم ماسويت شي ؟

بالشرقيه ولا بالرياض كلهم ملّتهم وحده
عموما رح للوكاله (مع ان الوكالات فيهم حقهم لكن أفضل السئ) وان قالو لك سعر قريب من سعر الورش صلحها عندهم
وان قالو سعر خيالي قل ابي فحص بس عشان تعرف وش فيها بالضبط ثمن رح لورشة كويسة وعلمهم المشكله بالضبط

وبالله التوفيق

[ملاعب الريح]

رح بالفواتير للشرطه ويتلونه مع علباه


حسبي الله عليه وعلى أشكاله لعبو في الديره




ويليت تعلمنا وش يصير معك....

تحياتي (ملاعب الريح)

[ابوريناد1979]

يارجال السالفه صار لها اكثر من شهرونص والسياره بعتها بتراب تكرم . بس ابي اطرح الموضوع عشان مايصيدون احد ثاني
ومن قال لك ان الشرطه يعطونك وجه في هالأمور.. جعلك ماتروح لهم ولاتجيهم :(
اللي مايخاف الله يجيب شلة عمال كديش ويفتح ورشة ويحط له لوحة حلوه بيدخل ذهب

[ابو حزم]

يذكرلي واحد من الشباب معه كامري جديده يقول انه دخل عند عبداللطيف وطلبت قطعه قالو مهب عندناالمهم ان الولد لطعوه الين ما قال بس يوم يقولون نبي نطلبه من جده يوم يقولون من الشرقيه وعلى هالحاله الين ما استفزع بأخوه دارس برا وعارف الكفت من احتيال الشركات وهددهم انه يبي يشتكي للشركة الام مالكم بالطويله المهم انهم خافو ويبون يدارون الموضوع يقول ويحلف انه فاكين القطعه من كامري داخله صيانه عندهم وش ذنب هالمسيكين اللي مدخل سيارته صيانه بالله مب قهر؟؟



تقبل مروري


صوره مع التحيه لحمايه المستهلك

صوره مع التحيه لأبو جميل

صوره مع التحيه لوزارة التجارة

[ولد السبعان]

ترى معروفين الي مسويله ورشه حلوه وبلاط وحركات واسم أجنبي
وجايبله فليبنيين والله مدري عنهم هم خبرا والا حقين شوارع
أن كان عندك كهرب رح لصناعية الخرج عند الجابري أحسن واحد للكهرب

[ولد الدواسر]

ترى معروفين الي مسويله ورشه حلوه وبلاط وحركات واسم أجنبي
وجايبله فليبنيين والله مدري عنهم هم خبرا والا حقين شوارع
أن كان عندك كهرب رح لصناعية الخرج عند الجابري أحسن واحد للكهرب



والله انك صادق

[desert mirage]

يا إخوان

يا اخوان اللي عنده مشكلة في القير الأمريكي خاصه وبقيه القيرات عامه يمر على المهندس السعودي المحترف ابن شعلان في صناعية الشفاء مكانه غير واضح وبإمكانك تسأل محلات قطع غيار الأمريكي في صناعية الشفا عن مكانه ويدلونك عليه ( ورشة الشعلان )
وهو رجل متوسط العمر متخصص في القيرات الأمريكي رجل محترف وصادق ولا ياخذ فلوس ( فيه حيا زايد عن حده ) ولا جيته يمكن يعزمك بعد ويذبح لك ذبيحه طيب ونادر ويبذل كل مافي جهده من الشغل الزين والنصايح المفيده وهو متواجد بإستمرار في الورشه وعنده مستودع كبير في مكان خفي في الورشه أتحداك تكتشفه لو جلست تدور عليه شهر كامل ما تعرف وين المستودع .
أقول زيارة لذلك المهندس تعتبر رحلة ممتعه بحد ذاتها .
ونصيحة هامة :ـ
لا تغير زيت وفلتر القير إلا في محطات شركة الجميح لأن شغلهم مضمون بفاتورة
إنتبة تغير زيت القير والفلتر عند محلات غيار الزيت المنتشرين في كل مكان أو عند ورش السيارات مهما كانت ثقتك فيهم فهم يقومون بسد فتحه في الفلتر او في القير أثناء تغيير الفلتر يسدونها بقطعه منديل فاين او قرطاسة علشان يخرب القير وبعد كم شهر يخرب قيرك وتروح للمراكز وترايستار وشالنجر وغيرها ويكتشفون ان سبب خراب القير مسدود بورقه او منديل ولكنهم لا يخبرونك بالحقيقة بل يقولون لك خراب القير من شيء ثاني وإذا كانت سيارتك امريكي إسأل الفني في محطة الجميح ويدلك على الخراب لأنهم اعرف

[ابن صقيه]

بارك الله فيكم اخواني على هالنقاش الثري والمفيد .
بس حبيت استفسر عن موقع صناعية الخرج ولكم مني جزيل الشكر .

[Avalanche]

:no2: لا تخليهم ونا خوك ورهم العين الحمرا :no2:




لاتروح عليك 2100 ببلاش

((إن لم تكن ذئب أكلتك الذئاب))

:no: والله انها اكبر خساره وحقران ان خليتهم ونا خوك:no:









لاتسكت على حقك

[stranger]

السلام عليكم
معوض يا خوي او ريناد
انا صارت معي مشكله مع ترايستار اللي في الصناعية القديمة تشبه مشكلة خوينا الله يعوضه وهي : عندي كابرس SS موديل 96 وانا على الدايري الشرقي رقام يرد نمرة إلين ما صار يغير إلا الأول بس اخذت مخرج 17 على ترايستار دخلت السياره جاني اللبناني الكلب ( الله يكرمكم ) وقال لازم نفحص القير كمبيوتر بكم ( 100) ريال وبعد الحص أخذ السياره يجربها قالي عندك مشكله في بعض الحساسات ومشكله في القير لازم ننزله وبيكلفك في حدود (1800) وممكن نغير القير طبعاً المبلغ كبير 0 اتصلت على واحد تركي أعرفه وشرحتله المشكله قالي لا تسوي شي شغل السياره وتعال على الورشة وكانت الورشة قريبة طلعت السياره ورحت الورشة 0 شاف السياره قال خلها عندي ومر العصر عندة واحد سوداني ممتاز في القيرات المهم مريت عليه العصر بقيت السياره جاهزه جربتها ما شاء الله ممتازة جداً سألته ويش كانت المشكله ويش تتوقعون ( الجلبة الموجودة بآخر القير من جهة العمود كانت طالعة برى وخربة الصوفة وطلع الزيت ) وقيمتها (25) ريال بس والمخرطة 30 ريال وشغل يد (100) ريال وبالمناسبة هذي مشكلة قير الكابرس SS موديل 96 أو ممكن 99%

[PocketPc]

ولا زال النصب مستمر من هذه الورشة ولابد من ايقافهم عند حدهم

[حبل الوريد]

من الاااااااااخر !!
ما فيه جهه تحفظ حقوقك في هذي البلد
خذها يبمناك ولا ادع الله بالخلف

[حبل الوريد]

يبدو انه موضوع قديم ،، راح حماسي على الفاضي يالي رفعته :)

[speed62]

الله يجزاك خير

[N3NA3 JEDDAH]

يااخوان انا تعرضت للنصب من ورشة ريتاج بجدة موقعها اخر شارع المكرونة (( شمالا )) شبك المطار

رحت عندهم وسيارتي ماركيز 2009
قالو توضيب قلنا يلااا

المهم وضبو القير بوكس
سافرت ابها بحكم عملي هناك
وبعد شهر رجعت المشاكل نفسها بل زادت

طبعا نزلت جدة الا والورشه مقفله
سالت اللي حواليهم قالو تقفلت الورشه

حسبي الله عليهن خسرت 4000

اسال الله ان يجعلها طعام حرام في اجسادهم وفي صحتهم وفي اخرتهم

اللهم انتصر لي منهم ياحي ياقيوم

[الوحش2]

بسبب طيبتك هذي تخليهم يتمادوا معك ومع غيرك ياخي مازبط الموتر من اول مره رجع كل شي مكانه وعطني فلوسي بس وانت مرتاح جدا

[منصور ع]

موضوع قديم يوم ان وزارة التجارة داجة ...الحين الربيعة عسا الله يوفقه وقفهم عند حدهم

[رسمال]

ولا زانت(خطة تطفيش) ,,,,وتهاوشت انا وياهم ومشيت حسبي الله عليهم

[قناص الوعول]

فيه الي ادهى وامر منهم ونصاب ولا تطلع بنتيجه وهو العضيب لاندكلوزر الي في الصناعيه القديمه اذا ما عرف يصلح السياره وطالبته برد المبلغ لان المشكله موجودة يبدى يتحجج ويخليك تشتري قطع مستعمله من محل لهم ويحاول يخليك تغير اشياء كثيره من قطع السيارة وهي كويسه لين تزهق من الموتر ومن الورشه الي اسعارها فلكيه