ابغي الاحسن الددسن او الهايلكس

[ولد روضة سدير]

السلام عليكم .....
اخواني اعضاء المنتدي ابي استفسر الاحسن التيوتا وله النيسان
انه رحت المعرض وسعر الهايلكس 2700 بــ 4380 دينار
والنيسان الددسن2400جي ال - اي بــ 4590
وانه اللي بعرفه لي فرق السعر وانه التيوتا افضل وارخص
وابي رايكم .....واسأل مجرب ولا تسأل خبير
وانه ابيه للكد والتحميل ....

[بـــدر]

الداتسون افضل من ناحية الشكل واجمل وهدى مطبات والقوه ممتازه لانها 160حصان:good:
التايوتا رفيعه مره يعني سريعة الانقلاب شكلها مرفع فوق اللزوم يعني حقت جبال اكثر من كونها سيارة رمال وطعوس ،
انا شخصية افضل الداتسون واعرف واحد مجربها وهو راعي بر ومشاريع في نفود دايم، ويمدحها حتى من ناحية البنزين ما تصرف كثير مقارنها بالمحركات الي بالموديل الي قبل:

[قتال]

السلام عليكم ورحمة الله وبركاته ،،،

أخوي ولد روضة سدير .. حياك الله ..

أخوي كانك تبي تستعملها بالكويت فلك هذه النصائح ..

أن برأيي أن الددسن أصرف لك .. لأنها أسهل مبيعاً في الكويت ( أشتر تبيع ) وأرغب .. ثانياً .. قطع الغيار أرخص من التويوتا والصيانة كذلك .. وثالثاً .. النيسان أريح مراتب من التويوتا .. ولاحظ أن وكيل النيسان ما يدقق على الكفالة وسهل جداً .. عكس وكيل التويوتا الله يسامحه .. لو تنسى السيرفس أو تبدل زيت في غير كراجه .. مسكك الباب وجحدك ..

وإذا تبي تتأكد رح للحراج وشوف البيع .. وكذلك وقف لك ربع ساعة على خط كبد ( الجواخير ) وشوف اللي يمرك .. وصدقني راح تقتنع :D :D

تصدق ان عندي ددسن موديل 99 ما بدلت سفايفه إلا وهو ماشي 107000 كيلو متر .. موتر ما يبي إلا بانزين وزيت وتواير ( كفرات ) وكل سنة توديه للسيرفس بس :) :)

ملاحظة : التويوتا أقوى مكينة وأجمد للتحميل ..

[ابوقاسم]

اخوي اظنك قالب الاسعار اللي اعرفه عندنا بالسعودية ان التيوتا اغلى ما ادري عندكم بالكويت اشلون الاسعار .
عموما النيسان ازين من التيوتا وحق كد ومد واسئل مجرب ولاتسئل طبيب .
:cool:
:cool:
:cool:
:cool:
:cool:
واسئل الله لك التوفيق في الاختيار.
تحياتي للجميع

[أبوسليمان]

أنا صراحه أختلف مع الأخوان

وأقولك مالك الى هايلوكس

لأنك أنت تبي الموتر للكرف والتحميل
والهايلوكس معروفه بالصبر عموماً التويوتا كله يصبر صبر الويل
والتحميل لو تبي تحمل بيت كامل تشيله ولا تقول لا
وعزم مهب صاحي لذالك لقبوا الهايلوكس بفرخ الشاص

أما أذا كان تحميلك خفيف وتبغى سياره للمدينه ومريحه
هذيك الساعه خذ ددسن

والله يكتب الي فيه الخير
ومبروك مقدماً

تحياتي
أبوسليمان

[ولد روضة سدير]

مشكور اخوي بدرعلى مشاركتك .

ومشكور اخوي قتال وكلامك صحيح مو بس على خط كبد في الكويت عموما الاكثر انتشارا الددسن النيسان
بس بالبيع التويوتا ما يطيح سعره حصلت هايلكس موديل 98 بـ 2600 دينار وددسن موديل 2001 بــ3000دينار .. بس انه ابيه وكاله .....

اخوي الغضى اشكرك على رايك بس الاسعار صحيحه التيوتا ارخص من النيسان عندنا بالكويت والسعر اللي انه كتبتبه سعر الجي ال أي موبسع السوبر جي ال وسعره 4760 وطبعا التيوتيا مواصفات وحده جي ال أي
وسعره 4380 ...

اخوي ابو سليمان بالبداية اشكرك على رأيك .. انه ابي الموتر للجاخور والبر والتحميل طبيعي اعلاف اكياس شعير خشب بس كل يوم رايح راد كبد يعني رايح 60 كليو راجع 60 كليو ...طبعا المسافه قصيره بالنسبه لمناطق السعودية ( مع العلم اني سعودي:D )


وحسب اراء الاخوان ....يعني النيسان افضل ......بس لازم الواحد ينتظر شوي يسمع اراء اكثر لأن هذي اقصاط على راسي لمدة اربع سنوات ....وله كاش حافي على المعاش .....الله والمعاش:D

[أيمن]

مالك إلا هايلوكس:D
لا من ناحية المنظر (وهي وجهات نظر)
ولا من ناحية التحمل (ما فيها طقة عصا :))
ولا من ناحية العزم والمحافظة عليه ولو بعد مدة ..
ولا من ناحية القطع وتوفرها وأسعارها ..
وهو نادر الخرابات بخلاف الددسن الذي يريد تربيط مكينة كل 6 أشهر !!
أما من ناحية الفامة في الداخل فما هنالك مزيد فخامة على الهايلوكس إلا أشياء بسيطة فقط شكلية ..

وبالنسبة لنا في السعودية، وخصوصًا نجد فالهايلوكس مكتسح جميع الونيتات بلا منافسة، واسأل عنها وتعرف :)

(للمعلومية وكيل تويوتا ما يقرب لي :D )

[ولد روضة سدير]

السلام عليكم .....

والله اخوي ايمن الموتر للشايب وبالكويت الأكثر انتشارا الددسن ولكني استغرب انه الهايلكس ارخص من الددسن .........( اكيد ما يقربلك وكيل تيوتا بالكويت ) :)
انت مطيري؟؟؟؟؟

[أبوسليمان]

أخوي ولد سدير

حبيت أضيف على كلام الأخ أيمن نقطه

ترا أستعمال أهل نجد للهلوكس كرف الويل
يجلدونهن جلد بالطعوس ومابقى طعس ماطمروه
وتعال أركب معه بعد سنه وهو على نفس أستعماله الأول
والله أن تقول أنا راكب سياره جديده معننه مابقى شي مازينه بالسياره
وعلشا أأكدلك أنا معي هلوكس 2002 مابقى طعس مارقيته
ومسكي للجادت (طرق ترابيه) أكثر من مسكي للزفلت
وماشاءالله الى هالحين كنه جديده لا تفككت ولا شي

تحياتي
أبوسليمان

[ولد روضة سدير]

السلام عليكم ...

اشكرك اخوي ابو سليمان على الاضافه ....وانه من الناس اللي يفضلون الهايلكس ولكني ماجربت لا الددسن ولا الهايلكس ولكن الشكل افضل والمكينه اقوى والسعر عندنا بالكويت ارخص ..للهايلكس ....ولك اجمل تحياتي ...ولكن ماذا او من تقصد بأهل نجد وماهي مناطقهم .....

ولك اجمل تحياتي .....اخوي ابو سليمان

[أبوسليمان]

أخوي ولد سدير

أنا أقصد بنجد
القصيم
والقصمان الي ساكنين الرياض
وبعض أهل المجمعه وماحولها

تحياتي
أبوسليمان

[ق ح ص 411]

اخوي الغالي ولد روضة سدير
تبغاء النصيحة مالك غير الهايلكس لأنك تبغاه للتحميل والهايلكس تعيش مكينته مده طويله وبأصعب الظروف
اما الددسن فامع كثر التحميل تبدا المكينه ينقص زيته

وعقلك في رأسك تعرف خلاصك

والسلام عليكم ورحمة الله وبركاته

[ابو عـوض]

اخوي /ولد روضة سدير

* ان تكلمت عن عزم .... بأقول : رح للوكالات (( نيسان وتيوتا )) وشف الفرق من ناحية القوه تجد ان الددسن اقوى محرك قوته 160 حصان .. وتجد الهايلكس اقوى محرك قوته 157 حصان
ملاحظه / بالنسبه لقضية 2400 و 2700 هذي ليست معيار لقوة المكينه ورح اسأل وتشوف،هذي ان كان ما خابت ذاكرتي معناها سعة المكينه لان قوة السياره تقاس بالحصان ..... (( يعني بالله بتجيك سياره قوتها 2400 والا 2770 حصان ))


* وان تكلمت من ناحية كد .... فأنا اقول: لاحظ الموديلات القديمه في المجتمع سواء في الكويت او السعوديه تلاحظ ان الدداسن القديمه اكثر من الهايلكسات القديمه وأقصد من كلامي هذا انه دليل قاطع على ان الددسن تصبر وتكد اكثر من الهايلكس

*من ناحية الراحه... لا شك ان الددسن اريح من الهايلكس ولا باقعد امدح وبس بالعكس جرب الددسن والهايلكس واستنتج انت الفرق واحكم، وباقلك انا مجربهم اثنينهم

* ومن ناحية الشكل ........ فكلا وذوقه


* اما اللي يقولك ان الددسن تتفكك ..... فأنا اقول : انا عندي ددسن موديل 97 و والله ثم والله ما عمري في يوم من الايام سويت لها تربيط واني امشي فيها بالبر والمطاعس ما تسمع اي صوت من اصوات الفكفكه وهي معي تقريبا 6 سنوات ما رأيت منها الا كل خير موتر يعطيك في التحميل والكد


* اخيرا .... باقولك ان كان نويت تشتري ددسن سواء (جي ال) او( سوبر جي ال ) فانصحك بالبخاخات لان قوتها ما يحتاج حتى عداده يطق 200 بالراحه ولا يصرف بالبنزين زي الكربريتر


هذا اللي عندي ......... والشور طلبتنا وعطيناك
وتقبل تحياتي

[صالح السليمان]

السلام عليكم
الله يباركلك باللي تشتريه
انا شخصياً أفضل الهايلوكس


بس وانا اخوك استخر قبل ماتشتري والخيره لله واتكل على الله

[algarmeen]

يا ولد روضه سدير انا انصحك باهايلكس ..اقوى عزم لكن في الراحه الدستن
الهايكس كذالك تتحمل اكثر من الددسنلكن الددسن ازين شكل من الهايكس
الهايكس...الهايلكس.....الهايلكس اكثر انتشارفي نجـــــــــــــــــــــــــــــــــــــــــد مار ابا اسالك انت من الروضه؟؟؟

[ولد روضة سدير]

اولا اشكرك اخويalgarmeen على رايك ...وطال عمرك انه سعودي عايش بالكويت بس حنا عايلتنا وجماعتنا كلهم من سدير موطنا ديارنا وعايلتنا الدهيم ....من ولد مرير من بني على من مسروح من حرب...

اخوي ابو عـوض لنه داري انه الرقم 2400 او 2700 مو قوة الحصان هي سعة المكينه مثال السفاري الجديد اقوى من القديم الجديد4800 والقديم 4500 وسعة اللترات كل مازادت زادت قوة الحصان والعزم ..