شورواعلي ياشباب

[سيد الجو]

السلام عليكم ورحمة الله وبركاته





هذا الوالد الله يحفظه عنده كم راس غنم حاطهن في المزرعه ومن حبه لهن مايشربهن مويه من القليب لانها مالحه

والماء الحلو في ذيك المناطق غاليه يعني تعبي خزان 1500لتر ب60 ريال ومالنا الا نعبي من البيت جيوك وصرنا نعبي كل اسبوع


عاد طرت له فكره انه يشري قلص وايت

بس المشكله معه ددسن ولا ركب هوك ((عاد وش رايكم وشلون يركب له هوك هل فيه احد متخصص بتركيب الهوك مثل المميز والا المواهب وكم ياخذون ولا اي حداد وهل شغلته سهله يعني اقدر اولفله ويضبط ولا عط الخباز خبزه ولو كله كله واذا كنت ابي اصلحه انا عطوني من افكاركم )) طولت عليكم بس ماخاب من استشار

[أبو محمد2010]

طيب ما جربتوا تزيدون عمق القليب يمكن يطلع لكم الماء أحسن..

إن شاء الله الشباب يفتونك في سؤالك..

[سيد الجو]

ماشاء الله عليك يا ابو محمد على سرعة الرد


بس والله تزيد ولا ماتزيد كله واحد



فيه مطق بس نفس المويه او اردى بعد

[تنوم]

طيب مافكرتو تجيبون فلتر ينقي الماء وتسوون برادة ما سبيل وتشرب الغنم وجميع المسلمين المارين ويطرح الله فيه البركة

[سيد الجو]

والله لو نركب فلاتر كان كل 8 ساعات نغير الفلاتر


تراها اخف من مويه البحر بشوي

[سيد الجو]

وين الشباب

[فهد 1426]

مثل ما قال اخوي تنوم
فيه فلاتر حجمها كبير تصلح للمجمعات السكنيه ـ واعتقد انها لدى سمنان ـ
لو مريتهم يمكن لديهم حل للأملاح ـ اكيد التقنيه في مجال تحلية مياه البحار ـ متقدمه ـ بحول الله تجد الحل لديهم مرهم وما تخسر شيء
واذا انت خارج الرياض ـ ابشر انا اكفيك العنوه وأمرهم واستفسر ـ
تقبل تحياتي والله يخلي الوالد لكم ويخليكم له واحرصوا على راحته وسعة صدره ـ

[المميـز]

اشتروا راويه وحطوها بصط الحوض حق الددسن !!

وبالنسبه للهوك

رح لأي حداد وخله يفصل لك حديده طالعه من الشاص ويوصلها الى تحت الصدام بالنص

واشتر الهوك اللي يركبونه راعين الباترول اللي يجي لونه نيكل , شكله حلو ولايق مع الصدام

[سيد الجو]

فهد اشكرك جزيل الشكر والله يعافيك ويجزاك خير ماتقصر يالغالي

بس كم بتكلف الفلاتر وغير القطع ومدري ايش والمبلغ مايقارن مع القلص الله يعافيك



المميزياخوك الراويه متعبه ومتعبه في السواقه وغير ذالك ان حجمها 400 لتر الظاهر يمكن يعني لو اعبي الجيوك مثل العاده يمكن تجي زي الراويه او حوله مع ان عندي وحده ومجربها ومقاسها قد صندوق الددسن


وقولتك الحداد ان كان امرها هين سويتها انا منها اتعلم واوفر والله يجزاك خير ويعافيك وما قصرت

[شبح الصحراء]

المسألة سهلة إن شاء الله ما تأخذ ساعة في الحدادة يركبلك جسر بين الشاصي من يمين ليسار وييركب عليه الهوك ، بس وضح للحداد انك راح تسحب عليه وايت ماء ثقيل علشان يركب حديد سميك وقوي ويشد على المسامير وأعتقد راح تكلفك المسألة بحدود 400 مع القطع والتركيب . ولا تحتاج الذهاب للورش الكبيرة الغالية فهناك كثير من الورش تعمل هوك سحب أبحث في الصناعيات وسوف تجدهم ان شاء الله .

[سيد الجو]

اشكرك جزيل الشكر ياشبح الصحراء وفيت وكفيت بس هل يلحم الجسر في الشاص ازين ولا مسامير


وبعدين وش الجسر اللي يركبه

[abu rana]

أنصحكم أنكم تفكرون بتركيب جهاز تحلية إذا كانت حاجتكم لاتزيد عن 500 لتر يومياً.

على المدى البعيد ستكون أوفر من تكلفة نقل الماء أو شرائه...

أبحث في الجوجل عن"التحلية بالتناضح العكسي" سوف تجد الكثير الشركات المتخصصة والمعدات متعددة الأحجام.

وللمعلومية فإن أسعارها الآن أصبحت معقولة جداً بالمقارنة مع سنوات مضت.

ودمت سالماً...

[ناوي نيه]

بس الوايت بيغلك عب لا تعب مشكله وعوار راس وبعدين ترا الددسن مايتحمل ثقل

[شبح الصحراء]

اشكرك جزيل الشكر ياشبح الصحراء وفيت وكفيت بس هل يلحم الجسر في الشاص ازين ولا مسامير


وبعدين وش الجسر اللي يركبه

في الغالب يكون الشاصي مخرم وجاهز بس عليك تركيب المسامير ولو الشاصي مافيه خروم أحتمال يركب الهوك مكان خروم الصدام الخلفي أو يضطر للتلحيم والمسألة عموماً فيها ترهيم وحرفنة على حسب شطارة الحداد ، بالنسبة للجسر هو عبارة عن قطعة حديد قوية وسميكة توصل بين الجهة اليمنى للشاص والجهة اليسرى وتربط بمسامير قوية ويركب في منتصفها الهوك .
ويجب صبغ أماكن اللحام كي لا تتعرض للصدأ كما عليك تربيط المسامير كل فترة وأخرى .

[بنزرت]

سلام
انا رايي تبيعون الغنم وتشترون بثمنهن وايت

[سيد الجو]

بنزرت وش استفدنا الا بعنا الغنم