تهريب زيت القير وخرابه اتعبني من عنده حل؟؟

[صقر بليا قيود]

السلام عليكم ورحمة الله

اسعد الله اوقاتكم بكل خير..........

ابعرض مشكلتي عليكم يمكن احد عنده حل

انا ياجماعة موتري صالون 98 دفرنسين (شيفرولية)

قيره كل خمس شهور يخبط وضبته اربع مرات

الان بعد ما وضبته اكتشف المهندس كسر صغير في الجرم اللي يوصل بين القير والدبل (طبعا المنيوم)
وصار هو سبب التهريب والتخبيط...

المهم دورته في الوكالات كلها وقطع الغيار والتشاليح ماحصلته نهائيا قالو لازم يطلب طلبية من الشركة
لانهم مايجيبون نفس نوعيته الفاشلة والمشكله ان الطلبية تجي خلال 3 شهور من كندا

الان انا كل ما اللحم الكسر يستمر اسبوعين ثم يرجع الكسر ويهرب وارجع للتلحيم ثاني وعلى هالحال تقريبا 9 مرات

عموما يا جماعة اللي عنده طريقة تحافظ على الجرم من الحركة اللي تكسره يفيدني فيها
اواللي يعرف ورشة جيدة ومعروفة في تلحيم الالمنيوم او صب جرم جديد يدلني عليها ويفكني من هالمشكلة ...
(لازم تكون ورشة خبيرة ومجربة لأني جربت ورش كثيرة وكلها اي كلام)

تحياتي لكم....

[المميـز]

الله يعينك ويصبرك

عز الله انك ماقصرت كل شي جربته انت

لكن اانا ابعطيك اقتراح

انك تفك الجرم وتروح للتشليح وتشوف له شي مشابه يركب عليه القير

والله يكون بعونك

وانتظر الاخوان لعلهم يفيدونك اكثر

[محتري السيل]

أترك منك الورش وغير جديد أبرك لك حتى لو تصبر ثلاث شهور

ودائما اغلب الناس يدورون الرخيص وتاليتها يرجعون للحل السليم

وهو القطعه الجديدة أفضل وأضمن وأوفر من اللف بين الورش والخساير اللي مالها داعي

وبالتوفيق

[ك ه ك 777]

السلام عليكم ورحمة الله وبركاته

الله يعينك ويصبرك ويحل مشكلتك ان شاء الله
انا كان عندي جيب رانجلر قيره فيه انواع التلحيم لدرجة اني مذكر وين ملحم كل واحد ولا عمره هرب زيت بس بنسبه لسيارتك انا مستغرب بس يمكن يكون كرسي القير تعبان وعشان كذا القير يتحرك وينكسر جرمه ... والله اعلم

[لبرتي]

أولاً كم سعر الجديد منه

احد الزملاء كان عنده باثفندر موديل 2004
أنقطعت عنده الربلة قزازة المثلث للباب الخلفي

و3 اشهر وهو ينتظر الوكالة
كل يوم يقولون ننتظرها تجي من الطائف ولا ننتظرها تجي من الشرقية

وعلى هذا المنوال

ولعلنا كنت انا وياه في البحرين وقلت له خلنا نمر الوكاله هناك
دخلنا عليهم وطلبنا القطعه وقالنا كم تبون من حبه
قلنا وحده حقت الباب الخلفي يمين
قال موجوده
قلت كم سعرها قال 8 دينار (( 80 ريال ))

وهنا عند أبو حمراني سعرها بحدود 180 ريال ولا هي موجودة بعد

إذا فيك شده أخوي دور القطعه في الخارج
والله يوفقك ويعينك على مصيبتك

[ابوقاسم]

الصراحة انك تدور ورشة معتمدة للحام الالمنيوم شي صعب هالايام
ولكن عندنا في الاحساء ورشة متخصصة في لحام جرم المكاين والقيرات الالمنيوم على طريق الجفر
ولكن اذا انت في الرياض ما تحير تلاقي من يدلك على ورشة ممتازة

[فتى الوادي]

السلام عليكم
بالنسبة لجرم القير غذا فيه شرخ فاللحام ما يجدي معه أبدأ وراح يسبب لك مشاكل كثيرة في القير ...

أحسن حل تدور له جرم ولو مستعمل وتغيره

أما اللحام فلا أنصحك به .

[بنزرت]

سلام يا اخوان
الاخ صقر خذها مني حل اساسي ورخيص ولامشاكل بعدها
روح للتشليح واشتري قير سياره جيمي نفس الموديل حق سيارتك لانه يركب عليه وهو رخيص لان ماعليه طلب واغلب الناس مايدري انه نفس قير الجمس او الشفر ليت الدفرنسين. واحد من الشباب مركبه على جمس قبل عده سنوات

[صقر بليا قيود]

هلا بالجميع

انا دورت بالتشاليح لكن كل اللي احصل مكسور واستغربت قالو اللي في التشاليح
إن النوعية هذي وخاصة الصوالين قطع عشرة اول صدمة تضربه لاقدر الله اول ماينكسر جرم القير
والله مشكله من جد

لكن نصيحة لاتقرب الشفروليه الامريكي ابدا

[sameer_1798]

هي جات على هذه بس عمود الكردان بكبرة ألمنيوم , أجل وش ترجي منه !

[بواسامه]

ياخي ماعندك مشكله
موترك كثر التراب في التشاليح0000(( والتراب في وجه العدو))
غير القير كامل بجرمه وشحادك تغربل عمرك بهاللحامات
وان بغيت اريح وارخص فرح لتشاليح الدمام ارخص من الرياض في الامركي لكثرة سيارات ارامكو
وركب من التشليح واطلب عليه ضمان
وفقك الله

[mu7esn]

الصراحة انك تدور ورشة معتمدة للحام الالمنيوم شي صعب هالايام
ولكن عندنا في الاحساء ورشة متخصصة في لحام جرم المكاين والقيرات الالمنيوم على طريق الجفر
ولكن اذا انت في الرياض ما تحير تلاقي من يدلك على ورشة ممتازة
شنو اسم الورشه لو سمحت

[owwn]

اخوي انا عندي تهريب من شرخ في جرم القير قريب من الصره
موتري باثفندر لحمه لي صاحب ورشه بمعجون خاص بالتسربات والحمد لله وقف التهريب لي الان 8 شهور

[الصقرmom]

صارت لي المشكلة بجمس 2003 ..القطعة اللي انكسرت تسمى (التحويلة) تصير بين القير و الدبل ..شريته ب300 و ركبته ب300 ببريدة .و انتهت المشكلة

[بدوي جنوبي]

ينقل للقسم المناسب
قسم الاعطال