الجيكسار في الربع الخالي

[الفارس3]

يا شباب انا موتري جكسار قير توماتيك 2007 ودي اروح فيه الربع الخالي مقناص مع بعض الصقارة ... هل الاتوماتيك يجمل في المقناص وبالذات بالربع الخالي او ما ينفع ... وياليت الاجوبة تكون من تجربة مو معلومه سامعها من الناس ... لان اللي سمعته كثير عن الاتوماتيك بس ابي اللي جربة يفيدني ..... وانا شاكر للجميع ,,... :cool:

[هاوي الله]

السلام عليكم

حياالله اخي الفارس .... الربع الخالي !؟ >>>> لاحد يستهلك من الضُمى هههه .... الجو في الربع الخالي حااار جداً !.

بالنسبه لي ماعندي تجربه في الأوتوماتيك .... لكن لاتنسى الهواء حطه على 15 >>> في المناطق الرمليه فقط .

الله يوفقك ,,,

[الاشعل 316]

اخوي

انا انصحك انك ما تروح يه

لان الاوتوماتيك ماهو مثل العادي

انا اقولك يتعب وبذات في الربع الخالي
نصيحتي لك لا تروح فيه

وتقبل تحيات

اخوك ابو سطام

[ابوفيصل-gx]

هلا واللة-القير الاتماتك ممتاز في النفود باستخدامك التغيير من الديٍٍ إلي 2 او 1----مع ضرورة ان يكون الهواء بالكفرات 15 بالنفود (ولا تستخدم الدي في النفود تحمل علي القير )واكيد الدبل الخفيف كافي --والله يردكم سالمين

[مداوي]

اخوي الفارس السلام عليكم ورحمة الله
توكل على الله وحط الكفرات 15 أو 20 حسب نوع الكفر وأسأل مجرب ماشاء الله عليه زي الحلاوه معي 2001 توماتيك ولا فيه ولله الحمد أي مشكله وأحيانا ربعي معهم فكس آر واتحداهم
:good: :good: :good:

[جي اكس أر 3]

[QUOTE=ابوفيصل-gx]
هلا واللة-القير الاتماتك ممتاز في النفود باستخدامك التغيير من الديٍٍ إلي 2 او 1----مع ضرورة ان يكون الهواء بالكفرات 15 بالنفود (ولا تستخدم الدي في النفود تحمل علي القير )واكيد الدبل الخفيف كافي --والله يردكم سالمين



ماذكره اخي العزيز ابو فيصل gx صحيح 100/100:good:
تقبل تحياتي

[nashad]

انا اظن ان القير التماتيك ما يصلح على الجي اكس ار لان قوته 6 سلندر ما يصلح عليه الا قير عادي
اما الفي اكس ار ما عندك مشكله

[طيرالفلاة]

نصيحة لاتروح للربع الخالي في الصيف 000!!

http://www.mekshat.com/vb/showthread.php?p=956474#post956474

[كاشخ 24 ساعه]

الربع الخالي وفي الصيف


الله يثبتنا بعقولنا


(( ولا تلقوا بايديكم الى التهلكه))

[حطاااااب]

السلام عليكم ورحمة الله وبركاته
الفارس3
اكيد يقصد وقت البراد ؟
ماهو الحين لان الحين هلاك لك ولمواتركم والاخطر لانفسكم
على العموم الموضوع مهو هذا
انا ماعندي الا تعليق المـــــوتر
تماتيك او عادي
على
السواق وعلى الخبره يعرف مفاصل الارض يعرف لرباظه والحقن من وين يدخل لها ويطلع
المسأله على السواق في الاول والاخير
تحاتي لك

[فتى شنه]

افضل شي هالايام لا دوريات ولا هم يحزنون

اعرف واحد مايروح لها الى هالوقات

[العليمي]

نصيحه لا تروح في الصيف (( مع اني اتوقعك بتروح في الشتاء لاكن من باب الأخوه نصحتك ))

فيه نقطه بخصوص موترك و الرمل تذكر انك في الربع الخالي بتمشي ايام بلياليها في رمال و عروق ، وهذا الي اتمنى الشباب الي جربو التماتيك يفيدونك فيه ، لأنه نسبه كبيره تطعس ساعتين ثلاث و تمدح لاكن الربع الخالي من يوم تدخله الين تطلع منه انشاء الله سالم و أنت تمشي في رمال و تغاريز مهيب سهله ..

[عبدالله العمرو]

أخوي الفاضل / الله يحفظك بحفظه ...



إن كنتوا ناوين في هالصيف تعوذوا من ابليس أنت واخوياك واربحوا العافية ....


لأن الرمل في الصيف أصعب من الشتاء من ناحية التماسك ومرهق جداً للسيارات ..


فوق هذا شدة الحرارة هناك يبي لكم وايت يركض وراكم ...


أما في الشتاء / ركب كفرات رملية ونقّص الهواء وتوكل على ربك عسى المولى يحفظكم ويردكم لأهلكم سالمين غانمين ...


والمشكلة وانا أخوك ماهي في الأوتوماتيك أو العادي

(( العملية مدروسة من مصانع ماهو هرج واجتهاد ))


المهم والأهم :



هل أنت سوّاق أوتوماتيك في الرمال والا لا ؟؟؟



فلكل منها قيادة وتعامل وهنا دور السواق ...


أخوك /

[الدحبول]

ماجربة بس إتبع الرابط إنشاء الله يفيدك

http://www.mekshat.com/vb/showthread.php?p=240929

لاتنسى جموس إرمكو فية عادي وفية إوتومتيك
وأرمكو دخلو الجيكسار جير إوتومتيك

[sameer_1798]

ياخي اسمع مني الربع الخالي الآن وش فيه من الصيد الظبي وانقرض وان كان على الارانب والحبارى فهي بصراحة ماتجي بتعبها والحمدلله مامتنى من الجوع عشان نطرد الصيد وفين بالربع الخالي ( ياخي مش حالك في اللحم الجاهز أصرف لك )

وبعدين ان كان على الهواية أفضل لو تروح تصيد في الدول الخارجية بتلقى عندهم كل الصيد و تقنص وانت مرتاح من غير مخاطرة و الأهم انه نظامي .

والسيارة ان شاء الله الاخوان اللي قبلي ماقصروا كفو و وفو .

[ابوبدران]

السلام عليكم ورحمة الله وبركاته
واخوي احرص على التمر المكنوز خذو منها شي ما يكفي لانه غذاء يحتوي على سكريات واملاح ومعادن كثيره ونسبه بسيطه من الرطوبه
ولا يخرب ولا يحتاج الى طبخ ويؤكل حار بارد وبالتوفيق ان شاء الله

[جفيل]

أقبض أرضك وانا خووك وش الله حادك في هالسموم :) عالعموم تسانه صيد وقنص وعلومن غانمه..فدربك خضر.. وترجع بالسلامه انشالله

اقول عاد لاتنسانا نبي تقرير عن الرحله عقب ماترجع..

[الفارس3]

شكرا لجميع الاخوان كفيتو وفيتو .... اما عن وقت الرحلة اكييييييييييد انها بالبرررراد مو الحين ... عاد والله لو اني مكفوخ على راسي ما رحت الحين بذالموووووووت الحمر .... بس حبيت اخذ رائي الشباب اللي عندهم خبرة بالربع الخالي والقير الاتوماتيك ... لان كثير من الناس يقولون الاتوماتيك ما يصلح بالربع الخالي يتعب وما يتحمل والبعض يقول العكس ... علشان كذا قلت اشوف رائى اللي جربو الاتوماتيك بالربع الخالي ايش ينصحوني فيه ...... اخوكم الفارس

[دحيم العبود]

ايه ولو لاتروح للربع الخالي الا على سفاري

[لاندكروزر]

توكل على الله


http://www.mekshat.com/pix/upload/images39/mk16904_saun.jpg

[ابونايف الروقي]

انا اظن ان القير التماتيك ما يصلح على الجي اكس ار لان قوته 6 سلندر ما يصلح عليه الا قير عادي
اما الفي اكس ار ما عندك مشكله



كلام سليم 6 سلندر ثقيل شوي على القير اتماتيك .

[الوافي عزام]

الاخ الغالي

انا قبل سنتين كان معي جي اكس ار 99 اتوماتيك ولا خليت به مكان الا وجيته وصلت لام قرون وتعديتها جنوب
ويمكن ماتتوقع لو اقولك !!!! معنا شاص وخرب علينا الدفرنس وسحبته قرابة 300 كيلوا
اهم شي اعرف كيف تتعامل مع السياره وماعندك اي مشكله

( وبعدين الموتر خفيف مايحمل مثل اللي يحمله راعي الشاص )
( مهوب في كل وقت يشغل فيه الدبل )
70( % من وقتك تمشي بدون دبل )

واذا بغيت اي استفسار والا معلومات ابشر بسعدك

رح وتوكل على الله ولا عندك اي مشكله ان شاء الله

[مقلب]

ههههههههههههههههههههه قال ايش ابي اروح الربع الخالي
ومع فكسار 2007 ههههههههههههه خخخخخخخخخخخ يابطنيه

[عبدالله الضويان]

اخوي انا اقنص الربع الخالي كل شتاء وبنيسان قير تماتيك ممتاز جدا بصراحه احسن من العايدي مايجيك احد مايعرف يسوق والي غرز يحرق عليك الكلتش وتشم ريحته من بعد كيلو صدقني احسن من العايدي واسال مجرب واي استفسار انا حاضر

[سعد الدين]

أخي الكريم

دائما مقناص النفود والصحاري يكون في الشتاء

وهذا أريح لك ولسيارتك وأنفع لك بعد الله

واله يوفقكم

[alblsam0409]

يا أخي أنصحك بعدم الذهاب لأن فصل الصيف حار جد ا ولذة البر والتمشى في الشتاء او على الأقل في اول البرد . والصيف مشاكله كثيرة من عطش وارتفاع حرارة السيارة واعطالات مفاجئة حتى ولو كانت السيارة جيدة ومتعة البر معدومة ولا تمتع الناظر لها فقط تعب وارهاق

[ععععههه]

السلام عليكم

اخوي توكل على الله انا معي جكسار تماتيك 2006 ولااحلى منه ماشاء الله نشيط ومعليه بس اذا غرزت الله يستر شغل الثقيل على طول لاتحاول بالخفيف عشان ماتتعب القير وبعدين الربع الخالي هيار والله بالتنسيم طبعا جنط موترك 17 فنسم 10 عشان اريح للموتر وخل القير بـ2 واذا مكان هيار بـ1 احسن عشان 2 يوصل سرعة 125 يعني نمره بارده فخله بواحد افضل والمسايس زين اما الجفاسه والعباطه واخذ كل شي بالقوه ماينفع

واهم شي في الرمل السواقه لو معك اقوى سياره ومهنا سواقه بتبلش

واسئل مجرب ولاتسئل خبير

والله يردكم بالسلامه