أول مشاركة: كيف أجمع حقيبة رحلاتي الجديدة؟؟

[almohandis]

السلام عليكم
يطيب لي المشاركة في منتداكم الجميل.
وأبدأ مشاركاتي على بركة الله بسؤال :
من زمان وأنا أحاول أشتري شنطة عدة الرحلات ومحتار من حيث النوع والحجم حيث أن بعضها قماش فقط .. وبعضها قماش حاطين بداخله صندوق الخ .. فما هو أفضل نوع ؟؟
والشيء الثاني : عند محلات الرحلات والمحطات شنط جاهزة بعدتها .. ولكنها غالية فتجد الشنطة بـ 180 أو 170 ريال وما فيها الا براد ودلة ودافور صغير وفناجيل ؟ ولو جمعت هذي الأشياء ماتكلف 50 ريال فبرأيكم : ماهي الأشياء الأساسية للشنطة وأين أجدها بسعر رخيص ؟

مع العلم أن طلعاتي ليست بالطويلة يعني نص يوم يوم بالكثير وانت راجع


وشكرا على قراءة موضوعي..

[أيمن]

للرفع

[الدبل الثقيل]

السنيدي في بريدة من افضل المحلات... وايضا المحيميد للأواني المنزلية في شارع الصناعة بعد سوق الحريم في الجردة في بريدة اسعاره حلوة ..
وجزاك الله خير..

[almohandis]

شكر الله لمشرفنا رفعه للموضوع الذي علاه الغبار من قدمه حيث كتبت هذا الموضوع منذ مايزيد على 3 أشهر .

وشكرا لأخي الدبل الثقيل ولكن أنا في الرياض يا أخي ولست في بريده :( ..
لا يزال السؤال مطروحاً أمام الإخوة

[المربد]

اخي الكريم المهندس
اذا ما كنت راعي طويله ولا مرات متعددة فما انصحك بشراء شيء ، ولكن اذا نويت تتقهوى مع المعزبة على الطعوس بالثمامة خلها تحط لك من اغراض البيت واستعملوها واذا رجعتوا خلها تغسلهن بالبيت.

واما اغراض البر فان اردت تجميعها فعليك انك تغمض عيونك عن السعر وتتبع قاعدة (ما موجود غالي) واهم ما عليك هو ان تسال نفسك هل احتاجه ام لا؟

والهوايات وانا اخوك تبي واحد كيسه مفتوح ماتبي واحد يصر الكيس. خصوصا اذا كان معك ربع نشامى مثلك.

وعندنا بالرياض شارع المائة (امتداد مخرج 15 شرقا) على يدك اليمين وانت رايح غرب فيه اكثر من محل يعجبونك بالنوع والسعر.

اما عن نفسي انا رحت حق ابو الخيام وخليته يفصلها لي تفصيل حسب حاجاتي, وجمعت الاواني من محلات الاواني. واذا ودك فيه تلقاه على نفس الشارع على تقاطعة مع شارع الامام الشافعي (اللي فيه ابراج
الكهرباء).على يمينك وانت رايح شرق.

وعقبال ما نلقاك تهندس بفياض الصمان.

[داورد]

وانا انصحك تمر على الغرابي ترى كلش فية ورخيص مرة ......


تقبل تحياتي .

.......( داورد) ......................

[المرصاع]

بسم الله

أهلا بأخي المهندس صديقا جديدا...

أخي من الأفضل أن تكونها بنفسك وعلى ذوقك...

تروح لمحلات الخيام وتفصل شنطه (( تحدد المقاس والقماش ))

بعدين تروح لمحلات الأواني المنزلية وشري على كيفك وذوقك حاجياتك وترتاح وتنبسط...

أما الجاهز فأنا أول المعارضين لأن أوانيها أردى الأنواع وسعرها كما قلت مرتفع...

فنصيحتي لك أخي أن تكونها بنفسك وتمخمخ على كيفك:)

تقبل تحياتي...

[العنكبوت]

هلا اخوي almohandis
ان من ناحييتي زي ماقالو الاخوان هج عن الجاهزه
ويحكم عزبتك حاجياتك فهل تبيها شاهي وقهوه والا طبخ والا كلهم
مع اني افضل فصل الطبخ عن عدة التقهوي لحفظ النكهات
عموما انا اقول لو تروح للغرابي وتشري لك شنطه فاضيه وتكون من جوا
بلاستيك الاخضر اخف وعملي اكثر من الحدي دومن برا طربال ان حصل ياباني
صحيح انه غويلي بس والله سعر فيه وتختار الحجم الي تحس انه بيكفي عفشك

ومن ناحيه ادوات التقهوي:
1-ابريق كبير لغلي الماء 2-دله لغلي القهوه
3-دله لتبهير القهوه 4-ابريق للشاهي
5-ابريق للنعناع 6دله لغلي الحليب
7-ان حبيت شغل مزبوط محماس ونجر
8-علب مختلفه الاحجام(للقهوه شاهي هيل زعفران سكر مسمار حبق )
9-صحن بغطى للتمر وان حبيت صحن اصغر منه وسطه للطحينيه
10-غضاره والا طاسه تحط فيها مويه وتحط وسطه الفناجيل والبيالات
11-شنطه قماش به جيوب صغيره للبيلات ومكان بالنص للفناجيل 6-6
12-بالجيوب الي بالشنطه واحد مكعبات بيض وانتبه لايقرب هالجيب اي
اكل لانه بيصير به غاز المكعبات
13-والجيب الثاني حط به القهوه النيه والا اي شي ودك تحطه
14-الجيب الي بالوجه حط به كم ملعقه وسكين وصفايه وبيزه وخلب
الجيب الي فوق حط به المركاب والمحماس والذرايه والملقاط(عدة الجمر)


هذا الي براسي الحين وان نسيت شي
سامحون وان كنت تبي عدة الطبخ قل لي

تحياتي

[ابو خلود]

أنصحك تحدد إحتياجاتك قبل لا تشري شنطة العزبة وعدتها .
حدد وش تبي والكمية بعدين اشتري الشنطة على حسب معاميلك همن على رواق جهز معاميلك

الشي الثاني دام طلعاتك قصيرة
أنصحك بالسنيدي في بريدة أخذت منه شنطة عزبة بـ 80 ريال
فيها إبريق ودلة ودافور ودستة بيالات وفناجيل قهوه في شنطتها
وذراية وبيز وملقط وعلب للشاهي والقهوة والسكر . والشنطة صغيرة .

الغنام ببريدة عنده طريقة بعد جيدة
عنده لسته بالمعاميل .. حدد وش تبي من المعاميل وهو يعطيك الشنطة المناسبة بالمعاميل اللي اخترتها والسعر حسب طلباتك.

[راعي العليا]

بالنسبه للشنطه حقت العزبه

فمحلات الرحلات مليانه الى الدفن اشكال والوان وانواع واحجام
فيه شي صندوقه بلاستيك وفيه شي سلة حديد أنا أقول سلة الحديد الملبسة من الداخل والخارج هي الأفضل..... عاد انت والمقاس اللي يجوزلك

وبالنسبة للأغراض فالدله أحرص ان تكون مستعمله واذا نويت تشري جديده لازم تربها عند أهل الدلال.......... عاد لو أنك من بريده وصفتلك .......

أهم مابالعزبه الدله أن ماضبطتها لاتطلع أبد والأغراض احرص لايشريهن ويزينهن الا أنت انتبه لابريق الشاهي مالك الا نوعين الهندي الأبيض والا الأصفر ياحلو الشاهي بهن حلو

ومثل ماقال المربد تسأل نفسك هل تحتاجه والا ماتحتاجه؟؟؟؟

وآسفين على الإطاله

[الدبل الثقيل]

اخويه راعي العليا السلام عليكم ورحمة الله وبركاته..
وين اهل الدلال في بريدة .. اللي في الجردة ولى في غيرهم .. ووين احسن محل .... ابغى دله ملقمه كبيرة بالحيل وسعرها معقول ماتعدى 100 ريال .. عندي بغدادية كبيرة لكن ماتلقم الا لتر ونص....
وارجو توضيح عبارتك ( اذا نويت تشري جديدة لازم تربها عند اهل الدلال ) ما معنى تربها...
وغير كذا وش رايك في براد الشاهي التشيكي اللي يجي منه الوان .. احمر وازرق واخضر... غالي هل يستاهل سعره....
وجزاك الله خير...

[almohandis]

الإخوة الكرام :
المربد
داورد
المرصاع
العنكبوت
أبو خلود
راعي العليا
الدبل الثقيل

أشكركم شكرا جزيلا على حسن الرد وعلى الإفادة ولا عدمناكم جميعا في هذا المنتدى الرائع

[راعي العليا]

اخويه راعي العليا السلام عليكم ورحمة الله وبركاته..
وين اهل الدلال في بريدة .. اللي في الجردة ولى في غيرهم .. ووين احسن محل .... ابغى دله ملقمه كبيرة بالحيل وسعرها معقول ماتعدى 100 ريال .. عندي بغدادية كبيرة لكن ماتلقم الا لتر ونص....
وارجو توضيح عبارتك ( اذا نويت تشري جديدة لازم تربها عند اهل الدلال ) ما معنى تربها...
وغير كذا وش رايك في براد الشاهي التشيكي اللي يجي منه الوان .. احمر وازرق واخضر... غالي هل يستاهل سعره....
وجزاك الله خير

أخوي الدبل الثقيل
معاليش تراي توي مشيك على ردودي القديمه ولاتوقعت بأن أحد هذه الردود تكون معنيه لي... لذلك اذا كنت متأخر بالرد فأرجو المعذره..

وللإجابه على استفساراتك عزيزي:
الدلال اللي للبيع في كل مكان بالجرده وبمحلات كثيره واللي بشارع الصناعه المرتبط بشارع الأربعين ببريده.. وكذلك بحلات عروق الشمال بشارع التخصصي ببريده ... وبجميع الأحجام..... هذا بالنسبة للمبهره اللي هي الدله اللي تهيل به.. وهي اما نوعين.. بغدادية - رسلانيه وكل واحد أحلى من الثاني الا أن البغداديه هي المتميزه عن بقية الدلال الأخرى بشكله الجميل وخصوصا انها تحمل اسم عربي.. اما الدلال الأخرى الستيل فهي دلال السيف وطقته وهي لاطعم ولاريحه وقلة حيا بيني وبينك أسأل راعين القهوه يعلمونك.

أما بالنسبة (للرب)... فأي واحد من بريده يعرف اشارة القبة حقت البهارات اللي بالسوق... وأنت واقف بالإشاره ووجهك جنوب طبعا الدوله ماتخليك تروح جنوب مالك الايمين (غرب) أو يسار (شرق)... أنت رح يسار أول ملف صغير حق مواقف سيارات على يدك اليمين أدخل معه ترى قريب للإشاره بالحيل بالحيل.. اذا دخلت مع المواقف التفت يمين تلقى محلين متهريات اذا تشوفهن تقول والله ما آقف من شينهن وخراباتهن... مير اللي تبيه بتصليحات الدلال تلقاه عند هالإثنين وهم اللي ماسكين سوق القصيم مهب بريده فقط... والرب هو طلاء الدله بالفضه من الداخل فقط للحفاظ عليها من الهجار والهجار هي الدله الهاجره اللي ماينتقهوى منه.. أو تصليح عروه أو رقع دله أو تعديل أو أي شي..

بالنسبه لبراد الشاهي عافاك الله.. أنت ومزاجك الخرمان ياكثر من جلست معهم وقالوا يازين براد الشاهي الأصفر وبعضهم وأنا منهم مايستخدم الا براد المعدن الصيني أو الهندي ولكن الأفضل الصيني.. ولولا إختلاف الآراء لبارت السلعه.
أما التشيكي اللي تقول فقسم بالله لو تعطين منه اثنين ما أخذته الشاهي فيه يبرد ويثلج بدقيقه وانت توك مطلعه من النار هذا براده ماهب براد...

وآآآآآآآآآآآآآآسف على الإطاله
وهذين النوعين