كيف تجهز الشاص حتى يكون جاهز للبر؟

[ابو حمزه2]

مرحبا مرحبتين ثلاث مرحبات.... (امزح)
ياهلا بالنشاما
صراحة مدري وشلون طبيت بهاالمنتدى الله مير يوفق المؤسس (اطال الله عمره) صقر الجزيرة............ اقصد صقرالمنتدى صراحة ليل نهار صبح ومسا وانا قدام ذا الجهاز نسيتوني السياسة وقرفها
وقلبناها وناسة x وناسة
المهم ماعلينا خويكم قرر يشتري شاص كرت بكرتونة..اقصد بغبارة .. وش القيمة + وش نصح العارفين واللي مو عارفين.. كلش يمشي.
انا طولت وخثردت انا ودي اعرف تقسيم الصندوق (الحوض) من الداخل يعني نوع الشراع الخارجي
واحد يقلك ركب شنكار ذبيحة والثاني يقلك سوي توانك ماء ستيل والثالث يقول لاتنسى الخيمة..الخ
ودي اعرف كيف اخلية جيب علية العلم + التسعيرة لكل شغلة ترى مهمة (اللي يبي يسوي جيب جاهز بس يطبع هالموضوع ياخذ الوريقة ويطامر بالجيب وعلى الصناعية) .يعني الفائدة لكل عليمي.

ولكم تحياتي ,,,

ابو حمزه2

[أيمن]

وينكم ياراعين الشيصان ؟

[ابو حمزه2]

يعني ماشا الله كل هاللي بالمنتدى معهم لكازس


محد معة شاص
وين اهل القصيم
وين اهلها
ترى الموتر قدام الباب
واذا محد تكلم عادي اروح واهبطة واغبرة واغير الوجهة سوبربان والبوية نمر وعلى شارع التحلية
(والله من القهر)

[هلكس]

السلام عليكم ..

والله انا ما عندي شاص بس اعرف ناس معهم

وابي اقول لك بعض الاشياء الي اعرفها (( مع انها قلة ))
1- توانك ستيل مع مجرى للطبق(( وتشبك التانكين بلي واحد وتقسم الي الى بزوزين ))
2- شنطه عزبه جنب الاستبنه .
3- هنقلين واكيد شراع .

واهم شي لو يحصل شاص ( ونش . دف لوك )

وانشاء الله اني قدرت افيدك ولو بشي قليل

[ابو حمزه2]

والله ما قصرت اخوي ==هلكس==

والله يعطيك الف عافية

[ابو حمزه2]

المواصفات تبغى مجرى الطبق مخفي أو خارجي
مخبى سلاح
توانك تخفي العكفه حقت الكفر أو لا
شنطه أو طبق
أي شي من أي نوع من السيارات شاص صالون جيب دادسن أو هايلوكس جمس
سله
معلاق حق الذبائح
تحط صاجه تحت بدال البلاستك
قاعدة ونش
هنقلين مفرغ أو مواصير
شراع انواع الشرع ومبطن بسدو

+++ منقول من مشاركة الاخ+++++++++++++++( راعي كيف) +++++++في احدى المواضيع

اتمنى مشاركتة ليفيدنا بالتفصيل

[عاشق الصحراء 2]

اخوي ابو حمزه2 مبروك مقدما والله يطعمك من خيره ويكفيك شره
بالنسبه للشاص ضبطه على كيفك واحتياجك ولاتستعجل كل فتره حط لك شي
لان الدعوى تفنن وكل ما شفت شي حلو حطه
اهم شي الاساسيات
مثل التوانك وانا انصح بالاستانلس ستيل ممتاز مره بس غالي شوي
وايضا الووكي توكي الي هو الاايكم 8000 لاتدورغيره
والعزبه والفراش ا ونت و ذوقك
هذي الاشياء الاساسيه
واذا قررت تسوي شي عطنى خبر في المنتدى والشباب مايقصرون بس وحده وحده
لان الدعوى فن وفلوس
وتقبل تحياتي

[ابو حمزه2]

الله يبارك بعمرك اخوي عاشق الصحراء2
واشكرك على مشاركتك
والفلوس انشالله عندي وعندك الخير
اهم شيء الواحد لا طلع البر لا يصك جبهته ويقول أأخخخخ نسيت كذا ولا كذا ولا يقعد يحك راسه وقتها ماينفع حك الروس.

[Bader-M]

اولا
الله يعطيك خير ويكفيك شره
ثانيا
عزبه البر لو يقضي عمرك ودراهمك وعزبه البر ما تقضي
ولكن
كل ما صر الشي خفيف و مختصر افضل لك
مناحيه
سهل النقل و يعني عشان ما تصير طلعك كلها ما غير جالس تنزل عفش وتحمل عفش
ما فيه زي الخف
واهم شي الاشياء الاساسيه
يعني
1- فراشك و عزبه الطبخ ( خلها مختصر ) تشمل عدة الشاهي وقهوه
2- جراكل مويه
تبي نصحتي خلك من التوانكي لاسباب
1- التكلفه المرتفع يعني راح يكلفك اقل حاجه 1000 ريال( الحديد هذا مو الستيل )
2- اخذ مساحه من السياره
يمكن يجيك ايام منت محتاج لها (ماهو وقت طلعات بر) وودك تحمل او تنقل عليه
تصير التوانك تاخذ منك مساحه
3- قلت الحجم التي تاخذه من المياه لا تتعدي 200 لتر لكلهما
.........................
انصحك
خذاك بدل منها جراكل كبيره ( اغلب الاحيان ياتي لونها ازرق )
1- السعر رخيص جدا ( تقريبا 60 -80 ريال )
2- اخذ كميه كبيره من المياه ما يعادل (250لتر للواحد) يعني اكثر من تانكيين
3- عملي
يعني تقدر تشله بالحالك اذا كان فاضي
اقول
خذها نصيخ وانا اخوك
والله لو تجميع العز ينفع كانت نفعت ابوي
تصدق ان عندنا ثلاث غرف كلها عزب
غرفه لجراكل و العزب
وغرف للتلاجات و العدد
وغرف للصيد و عدته
حتى الكراج ما سلم
والله اني اخاف يوم افتح غرفتي القاء فيها عده للبر:D
المثل يقول
خير اكلام ما قل ودل
وانا اقول
غير العز ما قل و دل :D (مافيه زي الخفافي )
فيه شي مهم نسناه
اهم شي على الاطلاق
الكميرة التصوير
عشان تبقى ذكرى حلوه لك :good:

[ابو حمزه2]

تسلم يالسنافي = طاير بالعجة=
والله انك صادق لكن مافي زي الكمال (والكمال لله رب العالمين سبحانه)
بالنسبه للبراميل الزرقاء احنى نستخدمها الحين بالونيتات لا طلعنا لكن مشكلتها انك ماتقدر تمشي بالسياره على كيفك يعني ماغير بالهون بالهون حتى لاتنطل يمين ويسار
لكن عندي سؤال
الحين تقسيم الصندوق الى قسمين وش فايدتة؟

[البوصلة]

اولاً مبروك عليك الشاص والله يعطيك من خيره ويكفيك شره.. قُل امين
اهم شيء التوانك عاد ان بغيك ستيل او حديد وخذ مني نصيحه ركب توانك حديد بس بشرط لايخلص الماء فيها وتتركها لفتره طويله وهذا هو سبب تأكلها من الصدى واحرص على الصاج اليباني ابو نجمه سماكة ملي ونص او مليين.
ولاتنسى تركب لنبه غاز داخل الكبوت وانت عارف والاخوان فوائدها وخذ مقاس متوسط حتى لاتشفط عليك البطاريه الا اذا ركبت بطاريح احتياطيه اخرى .واذا ركبت هنقلين ركب لنبه على الهنقلين على احد جوانب السيارة . والاهم من ذلك استبنه ثانيه .
واذا جزمت على تركيب توانك وانت راعي اسلحه اسئل ثم اسئل
:confused: اصحاب الخبرة في هذا الموضوع من اهل القصيم مخاصة الرس وبريدة.
وتقبل تحياتي

[ابو حمزه2]

جزاك الله الف خير يالبوصلة
ماقصرت بس ودي اسأل عن اللمبة الغاز اش فايدتها وكيف طريقتها وعند مين اركبها؟
مع الشكر

[البوصلة]

اسعد الله اوقاتك ابو حمزة2والجميع
اللنبه(او الشمعة) صغيرة الحجم بحجم غطاء القلم العادي وهى من نوع الغاز قويه في ضوئها وبقوت 12فولت ومتعددة الشمعة منها 100على 100 - و 80 على 100- و60 على 100 شمعة الى الخ.
وتركب داخل غطاء المكينه(الكبوت) مثل السيارات الامريكيه من اجل الاضاءة على المكينه في حاله حدوث اي عطل مثل انقطاع احد سيور المكينه في الليل . او الجلوس في الليل المضلم فماعليك الا ان تفتح الكبوت وتشعلها. وافضلها من حيث الضوء مقاس 80 على 100 شمعة صناعة المانية .

[الخبير]

السلام عليكم
يا حيا الله الشباب
انا ابي اعطيك فكرة لو بسيطة عن إلي تقدر تحطه بالشاص، لكن ترى تبي تهلك الميزانية.
عموماً خلنا نبدأ بالصندوق:
1- لا بد للشاص من توانك موية ، و أنصحك انك تبعد عن الجوالين الزرق - شفت واحد من الشباب ينصح بها - لانها عفطت الحدايد عندي و ما ردها إلا القزاز ( يمكن تقول اني ما شديتها، لكني شادها بشكل ورم معه جسم الجركل ).
أنصحك يكون التانكي بالعرض ومهوب إثنين بالطول، السبب لأن إلي بالعرض أكثر توازن لأن الموية متوزعة يمين و يسار السيارة ، أما إلي بالطول فيبغالك تصرف من التانكي اليمين مثل ما تصرف من التانكي اليسار.
لا يصير التانكي كبير بالحيل يعني كقياس 50 العرض × 50 إرتفاع بس هذي المساحة تقريباً 300 لتر موية.
نوع الحديد ستيل عشان ما يصدي، وخل ( بزبوزين يمين و يسار ) الأول حط في راسة القطعة الذهبية إلي تجي في المكيف الصحراوي ( ما أذكر أسمها ) عشان ما يصرف موية و يكون للوضوء مثلاً ، و الثاني خل الفتحة كبيرة و خله لتبية الأباريق.
2- الطربال فكرة طيبة : وتقدر تسوي البلاوي عن طريقة، لكن لازم تكون مركب حنايا عددها 5 ، لأن الـ 4 تخليه مثل الموج و غالباً ما يتقطع الشرع بسببها.
القماش تنزاني ميزته مقاوم للمطر ، فإذا أمطرت يشد و يكون مثل الطار و إذا نشف ارتخى، بعكس الباكستاني إذا تبلل شد وما فك. طبعاً بكيفك إذا كنت تبي تحط سدو من داخل و يصير مثل بيت الشعر.
3- حط بلكاش في الصندوق و يصير الصندوق دورين، يحط البلاكاش بين بودي السيارة و الحنايا. طبعاً لازم تعرف القياس بين البلاكاش و سقف الطربال إذا كان يمديك تقعد فيه ولا لا؟
سماكة البلاكاش 3 بوصة لكي تستحمل عدة أشخاص في نفس الوقت.
4- لمبة ما يحتاج إنها تكون قوة عشان ما تعميك و أنت في الصندوق لكن حط لها فصالين و احد داخل السيارة و الثاني في الصندوق.

الغمارة:
1- تقدر تحط فيها كشاف يدوي عند الباب.
2- تحط مخباة تحت المكيف بحيث تحط فيها أمورك.
3- جهاز لاسلكي و أيضاً مقوي ( إذا بغيت ).
4- جاهز قارمن أو مشابه له.
5- شفاط للدعسة.

الكبوت:
1- ركب لمبة داخل الكبوت ( قوية ).
2- كمبرسر لنفخ الهواء للكفرات. وهذا الموضوع تكلمنا فيه كثير.
3- غير البطارية و ركب 95 امبير إذا كنت تبي تركب مقوي للاسلكي.

السيارة عموماً:
1- الكفرات: الصراحة انا ما ارتاح على كفراتها الشد بلد، السبب أنه مرتفعه و إذا حملت عليها تلقى السيارة تنطل يمين و يسار، وأيضا تصلح للرمل ولا تصلح للحصى.
2- حط لك رمانه في الخلف عشان لو تبي تسحب لك قلص مثلاً.
3- الصدام ركب له دعامة تلقاها عند المواهب ولا المميز ولا غيرهم يجي معها مسحاة و مطرقة صغيرة و معلاق ذبائح و منشار .
4- ركب ونش ( وهذا الموضوع ابي افرد له موضوع خاص فيه ).
5- الأنوار الأمامية غيرها، وركب نوع هيلا سعرها تقريباً ب 180

عذراً للإطالة و لكن لا بد تلقى عند الشباب معلومات أكثر .
لكن أي سؤال ( إذا كنت أعرف إجابته ) ابشر به

[ابو حمزه2]

انتقل الى الصفحة الثانية

[ابو حمزه2]

البوصلة بيض الله وجهك وتصدق اني شايفها قبل اسبوعين مع واحد واقول ياربي وش اللمبة اللى مركبه ذا في الكبوت (ماشاء الله قوية بالحيل *)

======================================

الاخ الخبير(ماشاء الله عليك ) عزالله انك خبير اسم على مسمى

والله يعطيك العافية انت وكل الشباب اللي شاركوا بالموضوع

وزي ماتعرفون اللى يطب بذا المنتدى لو موصاحب هواية ولامقناص يوم يشوف هالعلوم اللى تشرح الخاطر وتنسية (زاد البنزين =زاد الغاز =زاد الكهرب = زاد وزاد لا وبعد دخلت امريكا العراق هااا ترى قربت من السعودية انتبهوا ولاتنتبهون ) يسير غصب هاوي كشتات وخرجات يبي يفك عن نفسة شوي
لكن لواشترى سيارة مايعرف يقسمها على اصولها ويجهزها التجهيز اللى مايضيع علية الوسع والفراغات
وهالكلام مايفيدة فية الا هالوجية الطيبة اللى تفيد وتستفيد
والله يجمل احوالكم جميع


والى المزيد....

ودي اسألك يالخبير عن الدعامة كم سعرها واذا بالامكان نبي صورة صراحة مواصفات زينة؟

[قيال]

الاخ : ابو حمزه 2
السلام عليكم ورحمة الله وبركاته وبعد .
بما انك ارسلت لي رساله خاصه فأبشر بكل ماعندي من معلومات بخصوص الشاص
واعتذر عن التأخر في الرد عليك , وذلك بسبب عطل في المنتدى , راجع ( خيمة الشكاوي ,
حاله طارئه جداً يالمشرفين ) .
وسأتقيد بالاجابه على السؤال الذي طرحته : ( ودي اعرف تقسيم الصندوق ( الحوض ) )

...... ( شراء الشاص ) .......
المهم ان يكون الموديل 2000 او احدث , لانه بخاخ وبالتالي فيه فرق في القوه بينه وبين
الموديلات التي قبله + ان كبينة القياده اوسع .
بالنسبه للمواصفات : اهمها ان يكون له عدد 2 تانكي بنزيم , حتى تمكنك من السير لمسافة
اكثر من الف كيلوبدون توقف .

....... ( تجهيز الشاص ) ........
الونش : اعتقد ان الونش لهذه السياره الجباره يعتبر كمالي , الا اذا كان الهدف منه مساعدة
الاخرين .
توانك الماء : الكثير من الاخوه يعتقد ان التانكي المصنوع من معدن الستال ستيل هو الافضل ,
ولكن انا انصح ومن خلال تجربه بتوانك من معدن الالمنيوم وبالطبع هي اغلى في السعر .
شنطة حديد : وضع شنطه من الحديد تكون بجوار الاستبنه , لتملاء هذا الفراغ وتكون بارتفاع
مجرى الطبق , وتكون خاصه لشنطة العده + قطع الغيار .
المجرى : يصنع مجرى على شكل حرف ( U ) فوق توانك الماء على الجهتين اليمنى واليسرى ,
لتدخل فيه الواح الخشب على ان تكون الالواح مصنعه من خشب المقنو لقوته , وقد تستعمل
عند الحاجه للغراز .
الحنايا او الشد : ويصنع من المواسير , واعتقد ان ارتفاع 90 سم عن خشب الطبق مناسب
لانه لو قل عن هذه المسافه سيضايق الجالس لانه سيضطر ان يحني رقبته , ولو زادت عن
هذا الارتفاع سيشوه السياره .
الشراع : واعتقد ان افضلها هو الشراع ( التنزاني ) على ان يكون سميك .
معلاق الذبيحه : اعتقد انه غير ضروري , حيث من الممكن تعليقها على باب الشد .

وبخصوص الاسعار , وان كنت قد ركبت في سيارتي جميع ما ذكرت اعلاه , الا اني نسيت
اسعارها لطول المده .

هناك نصيحه مهمه جداً جداً :
وهي ان تذهب الى حداد مختص بهذه الشغله , اعني لا تذهب الى حداد ابوب وشبابيك .

............................. دعواتي لك بالتوفيق ...................................
اخوك : قيال

[أيمن]

( لقد تم إضافة هذا الموضوع إلى المواضيع المميزة والشيقة في هذه الخيمة (http://www.mekshat.com/vb/showthread.php?s=&threadid=8691) )
مع الشكر للجميع ،،
http://www.mekshat.com/pix/upload/images/flow12.gif

مشرف الخيمة

[ابو حمزه2]

متشكر ياستاذ ايمن اوي اوي

[ابو حمزه2]

تسلم تسلم اخوي قيال صراحة مشاركة قيمة جدا ومفيدة

وياليت تقرأ الخاص

[الواضح]

اخي العزيز ابو حمزه 2
السلام عليكم ورحمة الله وبركاته وبعد :
أشكرك على الرسالة . . .
واعتذر عن التأخر في الرد عليك وحقيقة الأعضاء ما قصروا في الردود
لم يتركوا شيئاً نضيفه
فهنيئاً لنا هذا المنتدى الرائع.

تحياتي

[هلكس]

ازين شي لشاص اذا ركبت توانك على اليمين وعلى اليسار
يعني فوق الرفارف
تحط كل التانكين في لي واحد ومن هذا الي تحط 2 بزبوز
على شان اذا فتحت البزبوز الي على اليمين يصير يسحب الماء من كل التانكين
على شان يكون الموتر متساوي من الخلف

وشكرا لكم

[صقر]

السلام عليكم

ا بو حمزة2

أنا رأيي من رأي الخبير .... والله يوفقك وشكلك بعد هذا الموضوع تبي تطب على رجولك..

[عاشق الفرعه]

أفادوك الأخوان

[كريزي نت]

هههههههههههههههههههههههههههههه
افادوه قبل 5 سنوات الله يحييك .. ههههههههههههه

[تيتشر]

السلام عليكم

بالنسبه للشد سبق وسألت عنه لأني كنت ناوي اركب وبعطيك وش طلعت فيه :
السنيدي عندهم شد خرافي وجميل ولكن عيبه انه مرتفع فوق التنده مع العلم انهم مخلينه انسيابي بعد بداية الغماره مباشره وميزته انه ينفتح مع الجوانب بحيث تكبر الجلسه وبجيب لك صوره له سبق وشفتها هنا بالمنتدى ومركبينه أيضا على شاص

http://images.upload2world.com/get-7-2009-upload2world_com_xdjjk.jpg

فصـّـل لك دعاميه اللي يجي فيها فاس ومسحاة ومعلاق ذبيحه وشاكوش عند المواهب او المميز

فصل لك تانكي ماء ستيل اصلي انا عندي واحد 200 لتر تكلفتة الاجمالية تقريبا 2200 ريال من راعية اللي زينه قبلي وشريته منه

طبعا بيكون الطبق على حد الصندوق .. وحط لك شنطه خلف الغماره للعده الخاصه فيك وبعدها تقسم الصندوق نصفين وحاول ما يكون الطبق قطع كبيره حاول يكون قطع صغيره طول كل وحده منهم 20 سم او 30 سم ركب لك استبنه اضافيه ثانيه

ضبط لك عزبتين وحده للطبخ ووحده للشاهي والعزبتين هذولي اغراضهم تعتمد على حسب شغلك ان كنت رجالن تطبخ تقدر تجيب لعزبة الطبخ دافور مرهم راسه تلقاه عند محلات البريه وتجيب ايضا قدر ضغط سب الاصلي 8 لتر بالاضافه الى باقي العزبه

ركب لك كينوود 2100 ان لقيته جديد يمدحونه

ركب لك قارمن واشتر لك كشاف كبير سترونق لايت او شي زي كذا

اشتر لك ماطور كهرباء 1000 واط يجي نوع هوندا كاتم صوت قيمته تقريبا 2300 ريال وجهز اسلاك كهرب وافياش ولمبات ومددها صح

ركب لك بطاريه اضافيه وفيش ثلاجه

اشتر لك ثلاجه وجهز مكانها

ركب بوري قطار خخخخ امزح

نصيحه لا تركب مظله على الشد ترى تخربه وهذي نصيحة ناس مجربين من قبل

يعني اشتر لك خيمه منفصله ويمدحون خيمة التوافق

اشتر لك فرشات



نصيحه اخيره لا تركب اي شي الا لين تجمع اكبر قدر من المعلومات ولا تستعجل ابد لكي تظفر بأفضل السلع وأفضل الأسعار وأفضل الأفكار

[إلياس المطلق]

واحد يقلك ركب شنكار ذبيحة

عزيزي
احــــذر و أحــــذر مــــن اكــل اللحم بـــدون فـــــحص من طبــــيـــــب مخـــتص ,,
تراى أكل اللحوم بدون فحص طبي مصيبة كبرى ,,
يــعني
لو جلست في البر -أسبوع - منتب صابر عن أكل اللحوم ,,
أصبر تراى أكل اللحم يسبب مشاكل في الكلى وغيرها ,,

[طير الهدادي]

خلك على كلام عاشق الصحراء عز الله انه صدق في المشوره تفنن وعلى فلوسك