وش رأيكم بكفرات برللي ( أم عقرب )

[برنو]

عندي وانيت هيلكس دفرنسين و ودي أغير كفراته بكفرات ما ترج واجد و تكون معقوله في النفود و الوعر

تسلمون

[مخاوي الذيب]

حياك الله
كفرات برلي ممتازة وانا مجربها لي 3 سنوات
ولها عيب واحد وهو صوتها على الخط
بحيث ان لها ونه وانت مسرع على الزفلت
تقبل تحياتي

[الفحل 2003]

الاخ برنو
السلام عليكم ورحمه الله وبركاته

يا زين ما اخترت من كفرات ( برلي أم عقرب ) تراها كفرات ممتازة في النفود والجبال والضلعان وفي البطاحي وفي كل مكان وتراها تدوم اكثر من سنتين وانصحك اذا شريتها تتاكد من تاريخها وصناعتها لان الموجود في السوق الان نوع جيد لكن صناعتة ( برازيلي ) والاصلي تلقاه ( امريكي ) لكن الظاهر انه انقطع عن السوق بعد تغيير الوكيل حق الكفرات في المملكة ، مع ان البرازيلي زين لكن مل يدوم أكثر من سنه ونصف إلى سنتين وانا مجرب الكفرات وشريت منها أكثر من ستة طقوم على سيارة واحدة وايضا هناك ملاحظة عليها وهي أن الطبقة الجانبية للكفر غير سميكة واي شوكة من شجرة الطلح تدخل فيها تدمر الكفر ولا تقدر ترقعة من الجنب ولكن خذ احتياطك من الشوك والمسامير واتمنى لك التوفيق .

[كاتم اللهب]

الاخ برنو ..
السلام عليكم
بالنسبه للكفرات فهي ممتازه وعملية الى ابعد حد وبالنسبه للاصوات فما اعلم عنها لان سيارتي مزعجة في الخط (يبيلها تربيط) وتتميز هالكفرات بانها خفيفة يعني ما تأثر على السيارة في الرمل وخصوصا ان معاك هايلوكس وانصحك بشرائها

[الأشهـــــب]

حقيقةً ياأخوان يكفي أن كفرات برللي تعد من أفضل أنواع الكفرات بالعالم ، ونالت عدة جوائز في الجودة.
وهذي بحد ذاتها ميزة ليست سهله.
وتقبلوا أطيب تحياتي ،،،،،،،،،،،،،،،،،،،،،،،،،،،،،،،،،،،،،،،،،