سؤال عن الشوزن ام حبه ؟؟؟ مهم جدا

[العليمي]

شباب انشاء الله بأشتري شوزن ام حبه ( ام طلقه ) كامله .
لاكني شايل هم رجفة البندق ، فتكفون الي جرب ام حبه و رميها زين ورجفتها مهب قوية يعلمني اسمها و صناعتها .. ولكم جزيل الشكر
ترى مهم جدا يا شباب ..

[الباهي]

الاخ العزيز العليمي

كيف الحال بالنسبه لام طلقه اوكما نسميها( ام وحده) انا جربتها عند واحد من الربع كسرت كتفي فا الله يعينك عليها بس البندق هذي موديلها قديمه الا ان كان فيه شي من الموديلات الجديده اخف منها رجفه

[نجمة سهيل]

اخي العزيز العليمي:heart:

بالنسبه لام حبه . في الحقيقه هي ممتازه لالي كتوفهم مثل كتوف يكوزونا:D

اما الي كتفه تقل انه صومالي ماتصلح له :D

وام حبه بجميع انواعها يكون رجفها قوي جدا . بعكس ام خمس .

لان ام خمس فيها سست تمتص من قوة الرجفه فلذلك تكون خفيفه الرجفه .

بعكس ام حبه مافيه الا الابره والرجف راح يكون كله على جسمك .

وكان معزم مره فنصيحه خذ لك ام بطنين ايطاليه Over Under الي هي فوق وتحت سعرها اقل من قيمة ام حبه .

او خذلك ام بطنين اسبانيه Side By Side الي هي يمين ويسار. سعرها نفس سعر ام حبه . وافضل من ام حبه.

هذا الي عندي اتمنى اني اكون افدتك.

[العليمي]

الباهي تسلم والله على الرد ..
اخي العزيز نجمة سهيل بارك الله فيك على المعلومات ، لاكن بما انك نصحتني بأم بطنين الايطاليه فيا ليت انك توضح لي شوي عنها من ناحية الرجف (( الظاهر انها اخف من رجف ام حبه والا لا )) .. و ثاني شي الرمي يعني زينه للحمام و الصفاري .... ومشكورين

[نجمة سهيل]

حياك الله اخوي العليمي .


بالنسبه لام بطنين الايطاليه انا جربتها ورميها حلو ماعليه ورجفها خفيف .

لكن الاسبانيه يمدحونها الكثير وللاسف اني ماجربتها .


ومن ناحية السوق الايطاليه طارحن فيها واحد من الربع صفار ((8)) .

وجايني متشقق من الفرحه . بس رامي ب38 جرام . سوبر سبيد (( وين تحصل هالفشق فيه ناااادر))

لكن عندك نوع تركي وانتبه تنغش فيه . مكتوب عليها ايطاليه بس هي تركيه ويجي عليها ختم المصنع على شكل هلال.

انتبه منها تراها ماتسوى ولا نعال الله يكرمكم .

لكن انت خذ الاسبانيه وتوكل على الله . وادعلي انشاءالله.

[العليمي]

الله يعطيك العافيه و ما قصرت يالغالي .
لاكن يا شباب تكفون الي عنده زود إضافات على هالموضوع لا يبخل علينا ....

[قيال]

اخوي : العليمي
السلام عليكم ورحمه الله وبركاته وبعد .

قريت موضوعك وضحكت لانه ذكرني باول رحله رحتها للساحل قبل حوالي سبع سنوات .
( الله يرحم ذيك السنين كان القميري اجوال بالمئات ) وكان معي شوزن ام خمس ,
ومع رفيقي ام حبه .
المهم ان كتفه ومع كثر الرمي صار لونه ازرق, وكحلي , وبنسفجي .
حتى انه يدعي الله في الليل ان بكره مايجي نزل .
المهم انه ابتكر طريقه : وهي انه جاب مخده ولفها بشطرطون على كعب البندق .
وصار شكلها ومع كبر المخده مضحك , صارت مثل المقمع بس على اكبر ( الحاجه ام الاختراع ).

فخذها مني نصيحه لا تشتري ام حبه لو يقولون لك ابلاش . واذا كنت ماتقدر على قيمه ام خمس
فخذ لك نصف شوزن ابرك لك .

.........................مع التمنيات لك بالتوفيق .................................

[العليمي]

بارك الله فيك على هذه النصيحه المدعمه بهذه القصه الطريفه لرفيقك راعي الشوزن ام حبه ..... شكراَ لك

[الفشقه]

أنا يالحبيب عندي أم حبه أمريكيه والله ما أعرف إسمها؟؟ وأجيبه لك إذا مهم. هي معاي من سنوات وأرمي بها جميع الفشق وبعيد وقريب وطيار ومن أحلى شي. وأما الرفس فتعودت عليه وأتحمله ولله الحمد ومع الوقت بتعرف كيف تخفف منه بالضغظ بالبندق على المكان المناسب في نقطة الإرتكاز على كتفك وهكذا. وإذا إنك راعي صيد وتخرج في نزهات أبو يوم ويومين تبي تعبي الثلاجه فما تصلح، لإنك ترمي على جوز حمام مثلا فيطير الباقي في المنطقه كله وإنت ما بعد زهبت بندقك مره ثانيه. وتحياتي.

[سبيد 6]

قايلة الخير
انا جربت (وان شستر)

الصراحة انها مسكته



ويامن الثانكيو يالعليمي على هالموضوع

[العليمي]

اخوي الفشقه : تكفى اذا ما عليك كلافه عطني اسمها لأني زي ما قلت ناوي اشتري . ومشكور على ردك ...

اخوي سبيد 6 : مشكور على ردك أجل تنصحني بــــ ونشستر ، يعطيك العافيه ..