رجججججججججججججه !! رصصها !

[باثفاندر 2005]

السلام عليكم .. :cool:

يالله حيهم ..

الموضوع باختصار معي باث وكنت مركب جنوط حديد وكاله وفكيتها وركبت جنوط المنيوم وكاله لكن من يوم ركبتها والسياره فيها رجه قويه خاصه عند السرعه 100 وفوق المهم أنا يوم أركبها مرصصها ترصيص عادي عند بنشري لكن ما فيه فايده قالو لي جنوط الالمنيوم ما ينفع لها الا الترصيص الأرضي لكن عيبه انه غالي وكل ما فكيت الكفر أو صواميل الكفر لازم ترجع ترصص من جديد .. :confused: وش رايكم وش الحل يا جماعه والله إني ضايقن صدري بالحيل .. :( خسرت على هالجنوط كثير ويالله لقيتها مقاس 16 وما ادري وش الحل يا جماعه .. :(

[بواسامه]

رصصهن وهن راكبات على الموتر عند اللي في الصناعيه القديمة الدرع واليرموك والمجد وغيرهم ويعطونك ضمان اذا الكفرات صح

[باثفاندر 2005]

بواسامه

الظاهر انك تقصد الترصيص الارضي ؟

لكنه غالي وغثيث كل ما فكيت الكفر لازم ترصصه ..

ماهنا حل ثاني ؟

[rooco]

شف ياخوي وكلامي من خلال تجربة بالباترول يمكن تفيدك

شريت سيارتي الباترول المهم مابه خلاف وقدر الله وشريت جنوط 2005 المكحلات

المهم يوم ركبت الجنوط جتني رجه مهيب معقوله اذا مشيت من 75 الى 85 يعني بالـ80

المهم رصصت ورصصت كم مره مانفع قلت مالي الا كفراتي الاولات وركبتهن ومازالت الرجه موجودة

علما إني اول ماشريت الموتر مافيه رجه

رحت لم واحد عندنا إيقاله ابو عبدالله الصمعاني وهو معروف ببريده

قلت هذي السالفه.... قال: بس علاجه عندي

الظاهر انه ربط الركب عاد انا ماكثرت التنشيد زينها الرجال ولها اسبوعين وهي يالله لك الحمد أزين من أول علما أني الحين مركب الجنوط المكحلات اللي قلتلك أنهن أساس الرجه

هذا اللي عندي ويمكن تكون الجنوط اللي عندك خربت وزنية بالسيارة أو الصواميل انحلت سواء للركب أو لغيرها

وطع شوري لاتبيع الجنوط الا أنت متأكد ان العيب فيهن...أخاف يطيحن من عينك وتبيعهن بخسارة وأنا أخوك ويصير البلا من غيرهن

هذا اللي عندي والله من وراء القصد

[باثفاندر 2005]

جزاك الله خير يا اخوي على ردك ..

لكن من وين أشد الركب ؟

هل اقدر اشدها انا والا اوديها لورشه ؟ وكم سعرها تقريبا ؟ وهل اجرب الترصيص العادي بجهاز سريع ؟

[باثفاندر 2005]

ونسيت اقولكم هل الصواميل لها علاقه بالرجه ؟

لأن الصواميل مهب حقت بلدها مركبها من برى لأنها ضايعه صواميلها !

بس ماسكه الكفر مضبوط وراكبه عليه ..

[ولد وايل]

شباااااااااااااااب غالبا الرجه تكون من العامود ويحتاج ترصيص

والسبب بدايتها رجة الكفرات

اتمنى ان تفحص وزن العامود

[خلفهم]

اخوي انا مثلك كان الموتر عليه جنوط حديد وركبت جنوط المنيوم

ولها يومين او اكثر إذا مشيت حول الميه تجي رجه مهب لم قلم

صارت المشكله من الصواميل

وحقيقه ناوي أرجع جنوط الحديد الالمنيوم جابلي انواع الخرابات من اولها هذي

[باثفاندر 2005]

خلفهم ..

وش الصواميل اللي مركب ؟

نفس الوكاله ؟

[باثفاندر 2005]

ننتظر آراء باقي الشباب ..

[هويدي]

مايبيلها كلام مدامك تقول من غيرت الجنوط طلعت الرجه فمعناه تحتاج ترصيص ارضي

واحتمال يكون الرمان الامامي مرتخي


على العموم رح للصناعيه القديمه وسو ترصيص ارضي عند العظيب وبيعطونك ضمان لمده شهر

وسعره كانهو على خبري قبل 6 شهور بثمانين ريال

[باثفاندر 2005]

هويدي أنا بالدمام ..

ودورت أحد يسوي ترصيص ارضي ما فيه الا واحد وسعره 160 !!

أحس انه مبالغ فيه ؟

[ابوعبدالهادي]

روح على طريق أبو حدرية ب100 ريال

[باثفاندر 2005]

أبو عبدالهادي ما تذكر وصف المحل والا اسمه ؟

[غالي]

عندنا بالرياض الترصيص الارضي ب70 ريال

وسمعت
سمعت
سمعت
ان كان في الموتر رجه ولاراحت
أقلب الكفرات علامة اكس
X
ويمكن تقابلك رجه لكن استن اسبوع او اسبوع ونص وتظهر النتيجه
والله اعلم
رغم اني عاني من نفس المشكله اخوي
ورصصت ارضي
وكشفت على العمود
ولا راحت وكل شيء سليم :(
بس ناقص اقلب الكفرات على كلامهم وبشوف ان شاء الله هالاسبوع

[ابوعبدالهادي]

أبو عبدالهادي ما تذكر وصف المحل والا اسمه ؟



المحطة اللي بعد مقهى الجنادرية يوجد بنشري مع المفاوضة تقدر ترصص ب 80

[خلفهم]

هلا أخوي

أسف تاخرت

أنا شاري صواميل أصليه من الوكيل

أنت جرب تقلب الكفرات وعطنا خبر

أما الرجه عندي

فهو مسامير الصوايل إلي تمسك الكفر الامامي يسار فيه إثنين متحللات ابغيرهن وإن شاء الله تروح

اما الترصيص فأنا مرصص ترصيص عادي ولا فيهن إخلاف

ولو تبي ترتاح سو لها كشف عند العضيب أو اليرموك أو المجد

[باثفاندر 2005]

أبوعبدالهادي ..
جزاك الله خير وبمره اليوم باذن الله ..

خلفهم ..
جزاك الله خير ..
ونصيحتي خذ لك مسمارين زياده احتياط لأن تغييرها مهب سهل خاصه اللي قدام شغلته طويله شوي واذا شفت مسمار وده يخرب غيره دامك فاك الهوب والمسامير رخيصه بالوكاله بخمسه ريال ..