كم تعيش الفرامل اذا كانت تماتيك او قير عادي ؟

[رقبة حاشي]

السلام عليكم ورحمة الله

كم تعيش الفرامل اذا كانت تماتيك او قير عادي ؟
لان واحد من الاصدقاء والله متذمر يقول اني اغيرها باقل من 4 اشهر وهو مغير لها هوبات اصلي !!!!!!!!!! وسيارته تماتيك GXR
لدرجة انه يفكر يبيعها \ تصدقون والا لا ....

[بدوي جنوبي]

عليكم السلام ورحمة الله وبركاته


تدري ليه اخي رقبة حاشي يغيرها كل 4 شهور

لان ما شاء الله رجل خويك ثقيلة علي الفرامل

والظاهر انه راعي مشاوير كثير ،،، والله انا استغرب من بعض اللي اركب معاهم لا قرّب من الاشارة

تقول بيصدم ويمسك فرامل باقوي ما عنده ،،، حتي انا من الخوف امسك معاه فرامل احس رجلي بتخرق الصاجه ونا راكب

وما تفرق توماتيك او عادي ،، ممكن العادي يساعد في تخفيف السرعه مع التدبيل في النمر

انا موتري اتوماتيك استخدم زر الاوفر درايف في تخفيف السرعه عشان ما يكون حمل ثقيل علي الفرامل


بالتوفيق

[الخمساوي]

حتي انا من الخوف امسك معاه فرامل احس رجلي بتخرق الصاجه ونا راكب
هههههههههههههههههههههههههههههههههههههههههههههههه
ضحتكني الله يجزاك خيرا

[ناوي نيه]

وانا الاحظ واحد معه جي اكس ار اشوفه يغير قماشاته واجد بس ذاك عارفه رجله قشرا

[ابوعبدالله9999]

زر الاوفر درايف .......... ماهو ؟؟

[عبدالله العمرو]

أخوي /رقبة حاشي ...

عادة الاوتوماتيك يعتمد سواقينه على الفرامل بشكل دائم ,,,,

التهدئة بالفرامل تاكل من عمر الفحمات أكثر من اللي يمسك الفرامل مرة وحدة ... بتقول ليه ؟؟

أقول لك : التهدئة يعني دوران الهوب مع مسكة خفيفة وهنا احتكاك دائم يعني (( إشبع يا هوب من الفحمات )) :)

بينما الفرامل القوية أو بالتحديد اللي تمسك وما تخلي الهوب يدور تعني تثبيت للحركة ... هنا : من وين ياكل الهوب الفحمة ؟؟؟

علم خويك يغير طريقة قيادته وتهدأته بالفرامل ... وبعد سنة خله يعلمنا كم عاشت معه الفحمات ...

تحياتي /

[بدوي جنوبي]

زر الاوفر درايف .......... ماهو ؟؟

هذا الزر يجي في عصا القير الاوتماتيك

يستخدم لحالتين

1: عند التجاوز والرغبه في زيادة السرعه مثلا تضغط الزر يرجع القير نمره وتسمع صوت المحرك يزيد

للانطلاق السريع

2: ممكن يستخدم للتهدئة مثلا اذا انت مسرع وتفاجأت بوقوف اضطراري تضغط الزر مع الفرامل

ويساعد علي تهدئة السيارة

[turkiq]

سجل عندك ملاحظاتي التالية من خبرتي المتواضعة:

1- قماشات فرامل السيارة الاتوماتيك اقل عمرا من العادي بحكم كثرة استخدام الفرامل (والفرق ماهو كبير جدا).

2- جودة خراطة الهوب عامل مهم جدا في عمر القماشات (حتى لو كانت السيارة جديدة من الوكالة تأكد من سطح الهوب ... كثير من السيارات الجديدة تكون هوباتها بجودة سطح دون المستوى).

3- طريقة استخدام السائق للفرامل ايضا لها دور.

4- واخيرا القطع الاستهلاكية لدى سيارات تويوتا قصيرة العمر وبفارق واضح عن السيارات اليابانية الاخرى
مثال ذلك وبتجربة شخصية مني : باثفايندر 2002 اتوماتيك قطعت به 140 الف دون تغيير القماشات.
ايضا مازدا 626 موديل 1998 قطعت بها 120 الف دون تغيير , في المقابل اخواني يمتلكون كامري يغير عادتا
كل 30 الي 40 الف وايضا كورولا يغير بعد نفس المسافات تقريبا.

بالمناسبة اذكر انا واخوي اشترينا سياراتنا في نفس الوقت انا اخذت باثفايندر وهو رفض بحجة ان الكامري اكثر
اقتصادية واصر على الكامري وبعنا سياراتنا في نفس الوقت تقريبا انا ما حطيت شي في السيارة الا بنزين وزيت
وهو غير قماشات 4 مرات وغير وجه صدر المكينة (سرب زيت) وطلعت له مشاكل بالسلف و كيلون باب السائق

بعدها ذكرته بكلامي وما اقتنع انا الان معي سوناتا ماشية 90 الف وهو ما تاب اشترى كامري 2006
وقعد يضحك علي يقول لي هذي اخرتها كوري.....
الان ياسادة مغير قماشات مرتين وانا لحد الان ولله الحمد السيارة كاني مطلعها امس من الوكالة.


نصيحة يا اخوان الجيد يفرض نفسة والاسم خلوكم منه



تركي

وتقبلوا تحياتي


تركي

[رقبة حاشي]

بيض الله وجهك اخوي turkiq (http://www.mekshat.com/vb/member.php?u=21927) وكلامك صحيح مئه بالمئه من وجهة نظري ، ولكن عقدتنا حنا الاسم فقط كمن يقول(عطني اسم فقط ولا تسال عن اي شي اخر ) وبعدين الجودة ماهي محتكره باسم معين بل بالعكس ممكن اسماء غيره غير متداوله بين الناس ولكن فيها جودة صنع عاليه جدا جدا

[بن سعيّد]

الآن انا اشوف ان الكوري فرض نفسه بقوه

تتوقعون اليابان توقف هجومها او ينحسر بفعل ذلك

ام تعيد حساباتها وترفض افكار عبداللطيف !؟!

[سندباد الخليج]

العمر الافتراضي لفحمات السياره الاوتماتك تقريباً من 6 الى 8 شهور اما القير العادي من 10 شهور الى سنه تقريباً

هذي المدة للمستخدم العادي الغير ( مطفوق ) رجه يعني