عندي هذي المشكلة في الباترول وش السوات يالربع ....؟؟؟؟

[ابواسامه 2007]

احبتي الكرام اسعد الله ايامكم بصراحة انا سعيد لأني احد اعضاء هذا المنتدى الرائع واللي استفدت منه الكثير جداً فوق ما تتصورون .
المهم عندي مشكلة وابي شوركم
قبل يومين وانا امشي تعطلت عندي الفرامل فجأه (سياره باترول ) وصارت الدعسة ثقيله مره ويالله تمسك فرامل رحت للمكانيكي وفحص الفرامل وقال عندك الباكم خربان الزبده سألت عن التصليح قال غّيره احسن لك ويوم سألت عن سعره فوق 3000ريال ونصحني بالتشليح خذت واحد من التشليح وضبطت الفرامل بس فيه صوت زي تنسيم الهوا اسمعة داخل السياره عند الدّعسات اذا دعست فرامل يروح الصوت ...

ادري طولت عليكم لكن ودي اعرف وش الحل مع هذا الصوت ، وهل له ضرر بعدين ؟ مع العلم ان راعي التشليح معطيني ضمان شهر على القطعة .

ابي فزعتكم يالنشاما .

[عاشق السيل]

تبي الفزعة ؟ أجل خذ العلم ،،

أنا صارتلي نفس المشكلة لكني ماسألت عن الجديد لأنهم يقولون إنه غالي ورحت للصناعية وركبت مستعمل أصلي بـ 400 ريال وضمانه شهر بس ،، تصدق بعد شهر وثلاثة أيام رجعت المشكلة ؟؟ بس علخفيف والكلام هذا من 3 شهور تقريبا ولازالت لأن الفرامل يبي له تدبيل وبعدين يضبط ( مؤقتا ) ،،

آسف كثرت عليك القرقر ،، عموما أنت عندك الباكم لازال فيه مشكلة والمفروض إنه مايطلع أي صوت بس لاتستعجل على تغييره حتى يقولك خلاااااااااص !!!

رغم إني متأكد إن سعر الجديد الأصلي مايتجاوز 1800 ريال ...


أتمنى أكون أفدتك وتقبل مروري ....



عاشـقhttp://www.mekshat.com/pix/upload/sign/images/mk49539.gifالسيل

[ابواسامه 2007]

اولاً الف شكر لك اخوي عاشق السيل مشاركتك وتعليقك تعتبر لي فزعة لأن اكثر من 60 واحد قراء الموضوع ولا احد علق .

ثانياً الباكم اللي انا ركبت اصلي بس من التشليح لأني سألت عنه في محل الحمراني اللي في الصناعية القديمة وقالي سعره ( 3200 بالضبط ) ربما يكون هذا سعره كامل مع قطع اضافيه او شي مادري المهم هذا سعره عشان كذا خذت واحد من التشليح وامس رحت للمكانيكي اللي ركبه وقال رح يومين وشف اذا ماراح الصوت نرجعه وناخذ غيره على الضمان وانا انتظر هاليومين وبشوف وش بيصير .
مره اخرى اقدم لك جزيل الشكر اخوي عاشق السيل

[م.أبوإبراهيم]

السلام عليكم : المشكلة إن الباكم فيه زي البلونه ربل جوه ومع الوقت تيبس ولا فيه فايده إنك تأخذها من التشليح قبل أربعة شهور أخذت موتر خويي عنده الباكم خربان باترول 93 وحصلت له تجاري بأقل من مائتين ريال وحتى الآن سالك وأنا أقول التجاري أفضل من التشليح بالنسبة للباكم وترى يمكن تحصل عند محلات قطع غيار نيسان باكم ياباني وسعره معقول
ملاحظة : بالنسبه إذا كان ينسم يعني بداية خرابه

[ابواسامه 2007]

اخوي م.أبوإبراهيم تحياتي لك ومشكور على مرورك ومشاركتك الحقيقة سعيد بهذه الإضافة للموضوع .

اخوي ابوابراهيم الغريب ان الباكم الأول شد البلد بدون مقدمات وفجأة تعطل لكن اللي انا ركبت من التشليح مافيه مشكلة الا الصوت .
بما ان الباكم عباره عن بالون او ربله مع مرور الوقت تيبس وتتعطل معنى هذا ان جميع السيارات فيها هذي المشكلة!! او تختلف حسب الأستخدام ؟؟؟؟
هو فعلاً الباكم عباره عن نظام ظغط هواء مثل البالون لكن هل جميع السيارات بنفس النظام والا الجيوب فقط ؟؟.
الف شكر مرة اخرى لك اخوي م. ابوإبراهيم

[عاشق السيل]

أبو إبراهيم : أنا كنت متردد أركب تجاري خايف يخرب معي بسرعة ،،

رغم إني عارف وظيفة الباكم والظاهر إني جزمت أركب وماهي حسافة 200 ريال لو للتجربة
( والجديد أفضل من المستعمل مهما كان ) ،،

بيض الله وجهك ولايهون أبوأسامة ...


عاشـقhttp://www.mekshat.com/pix/upload/sign/images/mk49539.gifالسيل

[صالح المريعي]

آسف كثرت عليك القرقر ،، عموما أنت عندك الباكم لازال فيه مشكلة والمفروض إنه مايطلع أي صوت بس لاتستعجل على تغييره حتى يقولك خلاااااااااص !!!

رغم إني متأكد إن سعر الجديد الأصلي مايتجاوز 1800 ريال ...

والباكم المستخدم (( التشليح )) ما يتجاوز سعروه 150 ريال مع الضمان والتركيب عند راعي المحل

وتقبل مروري أكون شاكراً لك

[م.أبوإبراهيم]

الباكم نظامه واحد في جميع السيارات والي يشغل الباكم تلاحظ لي هواء جاي من المكينة لاحظ إذا طفيت الموتر وأنت تمشي واظغط على الفرامل يسير زي حركة الباكم إذا خرب وشكرا لاحظ الباترول حتى الكلتش فيه باكم ناظره بجنبه يجي صغير

[ابواسامه 2007]

شكراً اخوي ابو ابراهيم على هذا التواصل وهذه المعلومات ....... لكن ما تعتقد ان التجاري حتى ولو كان جديد ليس بجودة الاصلي لأن الأصلي مهما تقدم به العمر يبقى اصلي خاصة اذا كان استخدامة امثل (استخدام حشمه ) .



اخوي صالح المريعي تحياتي لك على هذه المداخلة ....... و احب اوضح شي انا درت التشليح كله واقل واحد لقيته بـ250 وياخذ الرجيع وضمانه اسبوع فقط بينما اللي شريته طلع علي مع الرجيع بـ400 وضمانة شهر ، وان كانك تخبر لي واحد بـ150 مثل ماتقول عطني رقم المحل او عنوانه ولو بدون تركيب اوديه للورشه ويركبه المكانيكي مع شكري وتقدير لك .


اخوي عاشق السيل اجمل تحياتي لك ..... بالنسبة للباكم التجاري بيكون اقل جوده وما تظمنه حتى اذا كان جديد واتوقع ان سعره اللي تقول (200ريال ) مقارنه بالأصلي (3200) يغني عن الكلام ( يدل على السلع اثمانها ) .ه1ا سعر الجديد الأصلي وانا بنفسي مسعر عند قطع الغيار ولا تلقاه عند كل واحد .

[ذيب صعافيق]

:redcar: الباكم هو القطعه المكونه من قطعتين متقا بلتن بطريقه تشبه طريقة قدر الظغط الألماني وفي الوسط قطعه من المطاط تشبه الصحن وهذه القطعه هي التي تخرب ويمكن استبداله ولكن نادر من يقوم بهذه العمليه والباكم لتقوية الفرامل وحتى تكون الدعسه خفيفه وما دام انه فيه ظمان فعليك الصبر -----ونصيحتي للأخوه اللي يأخذون قطع من التشاليح 0التركيب عند صاحب التشليح نفسه وهذ يوفر لك التردد والسعر لأ بعض اهل الورش يزيد بالقيمه

[ابوطاقية]

اخي العزيز
يوجد ورش لتوضيب الباكم لجميع انواع السيارات
نفس المشكله معي بسيارة جمس صالون كل الي سويته وضبت الباكم ب 260 ريال قبل ثلاث سنوات والى الان ماشي الحمدلله

[ابواسامه 2007]

اخوي ذيب صعافيق ... معك حق مشوار التشليح يقطع القلب واذا خذت القطعة وجبتها للورشة وما صلحت مشكلة لكن المشكلة ان اغلب اللي في التشليح عمال فك وتركيب ولا يفقهون شيئ في المكانيكا يعني ماتظمن شغلهم .

اخوي ابو طاقية مشكور على حضورك ..... وشكراً لكل من شارك في هذا الموضوع وياليت اللي يعرف مكان توظيب وتصليح الباكم يدلنا عليه ربما نحتاجهاو يحتاجه احد الأخوان في المنتدى .

[ابواسامه 2007]

شكراً لكل من شاركني الموضوع

وابشركم المشكلة انتهت خذت لي من التشليح باكم استعمال حشمة بدل الأول اللي طلع فيه صوت وكلفني 400 مع الرجيع وضمان شهر والحمد لله ضبطت الفرامل ورجع الى حالتة الطبيعيه .