[{ تدوووووووووووووووور }]

[باثفاندر 2005]

السلام عليكم ..

يا جماعة الخير ضاعت صاموله من صواميل واحدن من الكفرا وركبت وحده بدالها بس نوع ثاني المهم الحين رحت وشريت صاموله من الوكاله يوم جيت افك المؤقته اللي مركبه بدت تدور وما تطلع عجزت وأنا أحاول به مريت كم ورشه قالو مالك الا تقصه بأكسجين لكن صراحه ما اقتنعت بكلامهم لأن الجنط بيخرب صبغه !

وش رايكم يا جماعه وإن شاء الله نلقا عندكم حل لأن كل خوفي اني ابنشر وانا بهالحاله !

:(

[الدحبول]

ركب مفك الصواميل جيدا وتاكد إنه مركب جيدا
بعدين قم بوضع المفك على الصامولة وطلع عليه وبأذن الله تفك وإذا مانفكت إضربه كم ضربه بالمفك وطلع عليه مرة ثانية ونقز علية (طمر عليه) و إنشاء الله تفك

(شكلك زار علية بقوة )

[باثفاندر 2005]

الدحبول ..
جزاك الله خير على الرد السريع ..
المشكله انه الصاموله تدور مكانه يعني سنون المسمار خربانه وصارت الصاموله تدور مكانه ولا تطلع !!
حاولت اكسر المسمار كله وعجزت !

[بدوي جنوبي]

عليكم السلام

طبعا حل سريع بس اهم شي الجنط يسلم

ركب الصليب علي الصامولة وحاول تقطم المسمار ،، يعني تميل الصليب لين تنكسر الصامولة

عاد اذا انكسرت الصاموله لازم تركب مسمار سنه جديد

اذا كان الهوب الامامي بسيط ،،، اما اذا كان الخلفي الله يعين بيتعبك شوي

وهذي مشكلة الصواميل التجارية

بالتوفيق

[بدوي جنوبي]

طيب رح لورشة وقلهم فكوا المسمار باي طريقة بس بدون اكسجين

والله فكة المسمار ما يبلها فلسفه زايدة

[ابو مرعي]

اذا تحب تشتغل بيدك
اشتر جلخ وهو الذي يقص الحديد ويسمى صاروخ حجم صغير ب 50 ريال فقط
وانشر الصامولة الملعونة ثم اذهب للورشة يفكون لك المسمار اذا سيارتك دبل اما اذا كانت غير دبل ففك بنفسك
وتعلم بسيارتك ولاتخلي احد يتعلم بها واذا عجزت اذهب للورشة

[غضنفر]

طيب
جرب تفكه بالمسدس

[هاوي3]

روح بالسيارة للمخرطة وهم يفكونها

[صبي غلباء]

منشار حديد بعشرين ريال وكاس شاهي وقص الصاموله وارتح

[الباثفايندر3]

يااااااااااااااااااااااااجماعه خوينا شغلته شغله اذا ان سيارته من اسمه باث ليس بالسهوله قص الصاموله لانها داخل الجنط يبغالك يا اخي مخرطه

[winchester]

ركب مفتاح العجل بالصاموله وأرفع المفتاح (فوق ثم تحت ثم فوق ثم ....الخ) حتى ترتفع درجة حرارة المسمار وبعدهـا ينكسر.

فك الكفر وطق المسمار الى الداخل وبعدهـا ركب المسمار المسنن الجديد من الخلف من داخل الهوب وبعدها ركب

صاموله كبيره من الخارج (غير مسننه) وبعدهـا ركب الصاموله الخارجيه وبعدها شد بمفتاح العجل علشان يسحب المسمار للخارج وبعدهـا ركب الكفر

ودمت بود

[alkongrs]

جرب البخاخ حق الصواميل بخ عليه وانشالله ينفك معك

[.أبوعبدالرحمن]

كلا بكاتشو جميييييييييييييييييييييييل جدا


واهم شيء كاس الشاهي

[a.الخثلان]

أسمع

حاول تلحم قطعة حديد سيخ بالصامولة إذا كانت الصامورة مغلقة بدون ما تأثر على الجنط يعني تلذيع بالحام ثم حاول عند فكها شدها للخارج بسحب السيخ يمكن تلقم سنة الصامولة بالمسمار وتطلع معك

[باثفاندر 2005]

هلا بالجميع ..

المسمار حاولت أقطمه لكن النجس عيا ينقطم مع انه بالعاده ما يبيله شي ..

اليوم الصبح ان شاء الله بفك كل الصواميل الين يبقى هو وبسحب الكفر بيطلع معي شوي ( الجزء اللي خربت سنونه من المسمار ) وان شاء الله يطلع لي جزء من المسمار وبنشره على طول بمنشار حديد والله يعين ..

جزاكم الله خير جمعت أفكاركم وكان نتاجها هالفكره خل نجربها ونشوف إن شاء الله ..

جزاكم الله كل خير يا قروم مكشات ..

:)

[بنزرت]

جيب دريل واحفر منطقه التقاء المسمار بالصاموله وبتطيع معك الصاموله على طول ثم اضرب المسار على ورا لين يطلع وركب بداله واحد جديد اصلي