المساعد الشخصي الرقمي

مشاهدة النسخة كاملة : مدرســــــــة الصقــــــــارة , ادخل واسأل


الصفحات : 1 [2] 3

محتاج 111
04/10/2006, 09:02 AM
س\وشو الملواح؟؟؟؟

امبارك
04/10/2006, 10:14 AM
أخي المري...
السلام عليكم ورحمة الله وبركاته.. ماشاء الله ولاحول ولاقوة إلا بالله.. (17) صفحة يستاهلها هذا الموضوع الجميل.. والغامض بالنسبة ليّ.
اقتراح بسيط ومهم!.. أود لو تكرمت بوضوع قاموس للكلمات والمصطلحات الشائعة لدى أهل الصقور.. حتى يتمكن من هم مثلي من فهم وإدراك المعلومات التي تتحدثون عنها.
بارك الله فيكم وفي جهدكم الطيب.
تحياتي

اشقر مغاتير
14/10/2006, 10:56 PM
السلام عليكم اخواني

اولى هذي اول مشاركة لي معكم وهذا طبعا يشرفني وانا هوايتي القنص بس تنقصني بعض الخبرة
وانشا الله تفيدوني
ثانيا
انا ابغا اسأ اخوي المري منوين انت
وشنوع هذا الصقر

والف الف شكر
اخوكم اشقر مغاتير
http://www.mekshat.com/pix/upload/images21/mk36054_000.jpg

المري
15/10/2006, 01:12 AM
مرحبا اخوي محتاج وعسى الله مايحوجك الا له .. سبحانه وتعالى..

الملواح: هو جنحان الحبارى يربط بخيط ويصبح شلو يدعى عليه الطير ويعلم عليه حتى اذا لوحت له من بعيد يجيك لانك دايما تعطيه علف على الملواح..
***

اخوي أمبارك

ابشر في اقرب فرصة سوف اضع طلبك .. بس انت امر..

**

اخوي أشقر مغاتير

انا من الحساء ((( حساوي ))

وبخصوص الصوره اللي انت حاطها هي لطير الجير ..

وسلامتكم

اخوكم / المري

اشقر مغاتير
15/10/2006, 02:46 AM
يا شباب الله يخليكم إذا في طيور جايه للجنوب يعني ناحية عمق والبرك تكفون يارجال العون

تعلموني لاني لي سنتين ما طرحت طير فا الله الله
لا تنسوني علموني
تحياتيييييييييييييييييييييي

اشقر مغاتير
15/10/2006, 06:14 AM
والنعم فيك اخوي المري والنعم في الأخوان الباقين
والله يعطيك الف عافيه ويجعلك ممن يدخلون الجنة بلا حساب ولا عقاب والله يوفقك ليما يحب ويرضا
واعذرني اذا اتعبتك معاي وجزاك الله الف الف الف خيـــــــــــــــــــــــــــــــــــــــــــــر

اخوك اشقر مغاتير


تحيـــــــــــــــــــــــــــــــــــاتي

2002
17/10/2006, 05:07 PM
اخوي المري س1 : هل الفرخ يجي مقاسة كبير ؟ س2: اذا شريت فرخ كيف اعرف انه اذا قرنس صار مقاسة كبير؟

اشقر مغاتير
17/10/2006, 11:55 PM
ياخوي المري إذا مايكلف عليك ولا هنت

ابي ايميلك
والف شكر




تحياتي

2002
18/10/2006, 01:41 PM
اخوي المري وش معنى صافي العيون بدون مدامع

2002
20/10/2006, 10:56 PM
وين الرد يا اخوان

المري
21/10/2006, 06:11 PM
اخوي اشقر مغاتير هذا ايميلي:


saudiaramco@hotmail.com

**

اخوي 2002 الطيور اللي ماله مدامع هو اللي ماتجي تحت اعيونه خطين اسودين الى تحت ,..

أبو فيصل
22/10/2006, 08:36 PM
السلام عليكم يالربع

مساك الله بالخير يالمري ولا يهونون الربع
عندي طير نفسه شينه وهو فعله طيب يلحق واذا جهز اللي بيروح عليه يمكن ماعاد يرده طير الا واحد في الالف من الطيور المشهوره بفرط اللحوق والمشكله كيف اجهزه واليقه اذا كان الطير مايحب الداعي ولايطرد الحمام (يعني اذا دعيته بالحمامه حيه في الخيط يجيك مره ولاهو بعجل وفيها كم لفه كنه بيجنبك وكم مره مايجيك ولو انه على وجاب والحمام مره بيطرد ويستكتل و100 مره ماهو بطارد
(اذا نزلته الين تضعف نفسه تردى طياره واذا خليته عديد ابطا ماجهز ولا جهز الا متاخر)

لكن اذا هديته على صيده يطرد لين يصيد ولا يطيح مايرجع ابد
مع العلم انه مشنذر وقاط اللي معه

قلنا ندوّر لك حل مادام الوقت ضيّق... شف طال عمرك لك ريش وأربطه في الطير مثل النقل وحط فيه ريشة جهاز طيبه ورح دوّر لك مسيان باقي حوالي 40 دقيقه على الغروب (يعني ماهو وقت حومه) أمّا جول غربان أوعقاب موقّع وهدّه توهم وأنت جاهز تساعده في حالة الطواريء. يمكن يوقّع من الغربان لكن العقاب مهوب مخلّيه يتعلاّه.

جربها و علمنا يمكن تصير طريقه مفيده مع العرّوود من الطيور ولاّ تبيّن مرض فيه

كل عام والجميع بخير

قناص الوكرى
08/11/2006, 09:39 PM
السلام عليكم ورحم الله وبركاتة
اخى المري عندى سؤال
كيف يتم ويكون قياس الصقر
فانا لااعرف الكثير عن الصقور ونريد الاستفادة من علمك الواسع بارك الله فيك
فانا اقراء واسمع الكثير على سبيل المثال يقولون (هذا الطائر 17.5_17) ماذا يعنى هذا
وكيف يتم قياسة
والسلام عليكم ورحمة الله وبركاتة

اس الاحزان ير
17/12/2006, 08:48 AM
السلام عليكم 00كيف حالك اخوي 0المري عندي سؤال عن اماكن تواجد الصقور في منطقة جازان 00ولك جزيل الشكر0000000000000000 اخوك 00اسيرالاحزان

اس الاحزان ير
20/12/2006, 05:58 AM
استفسار \لاخوي المري ويارب احصل على الاجابه السلام عليكم ورحمه الله وبركاته ابــــي لوسمحت اعرف اماكن تواجد الصقـــــــــــورفي منطقه جازان ولو وصف دقيق لانـــــــــــــــــــي والله طالع يوم الخميس والجمعه والسبت انا وجيبي الشراع طال عمرك ماادري فين اوجه انا من جازان ولاكن للاسف مادل مواقعها دورت في الجبال دورت حول السهول ماحصلت شي وباقي والله مصمم المره ذي اذا كان عندك معلومه اوصفلي الله يطول عمرك 0تحياتي لك ولكل اعضاء هالمنتدى الرائع 0

رضوان
23/12/2006, 12:49 PM
السلام عليكم
مشكوراخوي على الموضوع انا رئي انه يستحق الثتبيث 200في100مع تحيات اخوكم رضوان

هاوي مقناص
24/12/2006, 04:51 PM
السلام عليكم ورحمة الله وبركاته .

ماشاء الله عليك يا ابو معيض ،

مدرسه في مدرسه في المواضيع الرائعه والمهمة ،

التي تهم الصقار المبتدئ .

والمتمرس في فنون الصيد .

ودمت .


اخوك:

هاوي مقناص .

مشعل الخير
24/12/2006, 10:32 PM
السلام عليكم
عندي سوال الله لايهنك
طيري ينقل لا هديته علا حمام وصادها واذا قربت منه يبعد
وجيه بهدو لاكن مافيه فايده ينقل مادري وش الحل معه مع العلم العام قرناس وحش
وجزاك الله الف خير يامري

المري
28/12/2006, 06:33 AM
اخوي مشعل الخير .. حياك الله يالغالي.. اكثر القرانيس الوحوش تطير بصيدتها وذلك لكثر اعلفانها في الخلا من قبل..

ولكثر ماصدت وعلفت ولا ينزل عليها احد ويربط اسبوقه في الوكر.. وتجي ايضا من سبب اخر وهو من الصقار السابق انه دائما مايشبع

الطير على صيدته يعطيه اشوي ويبرقعه قبل ان يشبع فلذلك يهرب بها الطير علشان يشبع وعلشان مايأخذ باقي الصيده صقاره..

اخوك - المري

***

شكرا اخوي هاوي مقناص وماقصرت على هالكلام الطيب..

***

شكرا اخي رضوان وماقصرت يالغالي..

***

مرحبا اسير الاحزان واسف على التاخير بس جازان بكبره ماوصلته كيف اوصفلك , لان ماعندي خبر في اماكن تواجد الصقور هناك.

اخوك - المري

***

المري
28/12/2006, 07:32 AM
مرحبا اخوي عاشق الوكري ..


بخصوص سوالك عن كيفية قياس الطير فأنا حطيت موضوع عنوانه : كيف تقيس الطير ؟؟

وهذا اللنك حقه : ياليت تشوفه وفيه الاجابة عن سوالك..

http://mekshat.com/vb/showthread.php?t=30799



اخوك / المري

مشعل الخير
03/01/2007, 10:02 AM
بيض الله وجهك وجزاك الله كل خير
علا العموم هذا الموضوع مدرسه الصقاره له فايده كبيره
ومن البوادر الطيبه جعلها الله في موزين حسناتك
واكثر الله من امثالك

راعي الشيهانه
11/01/2007, 01:01 AM
يا المري عندي سوال وماعليك امر

الشيهانه ابي اعرف كيف اتعرف انه تركيه

او مصريه او ايراني؟؟

((ورجو الرد))

المري
16/01/2007, 06:47 AM
تسلم يامشعل الخير.. وتسلم على المرور

**

هلا وغلا براعي الشيهانه

طال عمرك الشيهانه التركية تنعرف من مقاسها ومن لون ريشتها لانريشتها تجيك داكنه اشوي ومقاسها دائما من 14 الى 15

ويجيك راسها اسود بالحيل .. وهي تصفي مع الحرار.. لانها من فصيلة الجبليات.

اما المصرية تجيك بحرية ووافيه من 15 الى 16 ولونها يرجع الى الأحمر الفاتح..

اما الأيرانيه فهي فصيلة ايضا من الشواهين بس ماكرها يختلف اشوي تحصل بوزها وافي واكبر مافيه صوايدها عكس طرح السعودية يجيك بوزها اقطم وارضيتها عادية..

وسلامتك

اخوك - المري

ربقان
20/01/2007, 07:31 AM
السلام عليكم ورحمة الله وبركاته,,


مشكور وماقصرت على الموضوع الاكثر من رائع ,,


سؤالي ياطويل العمر:
1/وين اماكن تواجد الصقور بالمملكه بالذات حول الجنوب وحول الشرقيه؟؟يعني صيدها؟

2/بخصوص اني مبتدئ ((او توني باقي مابديت ولكني ببدا ان شاء الله)) وش تنصحني بوشو ابتدي وكم سعر اللي ببتدي به ؟؟


واكون من الشاكرين لك ...


تحياتي /حدي نظر((الجنوبي))

بوثامر
21/01/2007, 01:22 AM
السلام عليكم ورحمة الله وبركاته
الشحالك يا المري وشحال الشباب ؟؟
والله يا المري اني اشهد لك ان هذي مش مدرسه صقاره بل اكادمية صقاره والله يوفقك ويرفع من شانك دوم
وانا اطلب المشرفين الكرام بأنهم يثبتون هذا الموضوع الانه موضوع غير محدود ومفيد وفكرته جميله
ويعطيك العافيه

اخوك ابو ثامر

المري
22/01/2007, 06:34 PM
مرحبا حدي نظر وحياك الله

بخصوص تواجد الصقور في مكان معين معندي خبر فيه.. بس اكثر عبورها في مجيرمه .. والحنو وينبع..

وذا انت مبتدي انصحك بالوكري..

وسلامتك

اخوك - المري

ربقان
23/01/2007, 05:30 AM
مرحبا بك .

بس ماقلتلي عن اسعارها

واحصلها بالدماام ولا لا؟

وشكراً

المري
24/01/2007, 02:50 AM
الوكري قيمته من 1000 الى 1900 ريال سعودي

وسلامتك

اخوك - المري

عجمي
24/01/2007, 02:09 PM
اخوي المري اشكرك كل الشكر على جهودك بخدمة اخوانك وتوجية النصح لهم والرد على اسئلتهم

وعندي سؤالين لاهنت




*عندي طيرحر فرخ وحش ابعلمة على دجاج بأنواعة (حبش وبلدي ) ياليت الطريقة الصحيحة لأنك تعرف الفرخ اذا كان تعلومة فية اي نسبة خطأ ماعاد يهد ابد وانت ابخص .



* نفس الطير طلعبة حبة صغيرة مرة ابوزة بجنب المنخر هل تعرف لة علاج مناسب .




ويعطيك العافية

اخوك عجمي

حزام سبيع
24/01/2007, 03:38 PM
السلام عليكم

هل هناك علاج للطير الصياح؟؟؟

المري
24/01/2007, 09:09 PM
مرحبا اخوي عجمي وحياك الله .. حاول انك تعلمه على الدجاجه وذلك ان تعطيه عليها نسير (( علف قليل)) ثم تحاول تهدها له

وحاول انك ماتخليه تراوغ منه اول مره علشان ماتممله وذلك بربط حبل في رجلها واذا جاءها الطير تسحب الحبل علشان تشل حركتها.

بخصوص الحبة اللي اطلعت في بوز الطير حاول انك تأخذ عود ارطه يابس وتخليه لين يصير جمره وتحرق الحبه بصورة سريعة

يعنى ماتكويه وتطول عليه بس تضعه حوالي ثانيتين..

وسلامتك

اخوك - المري

الف
24/01/2007, 11:26 PM
مجرد استفسار وارجوا الرد عليه
انا اشتريت طير حر ونا جديد على المجال القنص والطير صار غالي على وماودي ابيعه وماني عارف كيف اربطه انشاء الله بصيف
وكيف تحديد الغرفه والمقاس والمواصفات ارجوا اعطاى التفصيل بدقه
وجزاكم الله خير

المري
26/01/2007, 12:06 AM
طال عمرك الدعوى سهالات والامور بسيطة ..

الغرفه اهم شي تكون 3 في 3 واكبر يعنى ماتصير صغير بالحيل .. وتجيب رمل في وجه العدو وترملها حتى انك تقدر تركز الوكر فيها..

وتحاول تركب فيها مكيف بس ماتشغله الا اذا زاد الحر .. وتسوي للطير ربطة بالارض مثل مربط البعير.. وتجيب له حصاه او الوكر الشوكي


وتحط عنده ماء بس ماتخليه يصله برجوله علشان مايتحفى.. وبس

الف
31/01/2007, 07:55 PM
الله يعطيك العافيه يالمري على الجهود الجباره لخدمه المنتدى

الف
01/02/2007, 01:35 PM
سؤال لوسمحت يالمري كيف اعرف ان الطير بدا يقرنس
لان عندي الطير حذف الريشه العاشره وهو على الوكر والريش الصغير الذي علي الجسم يتصاقط عندما ينتفظ الطير
والبيطري يقول نقص فتامين والخبره لها دور عندك والله يعطيك العافيه

صقار أبوظبي
02/02/2007, 09:14 PM
بيض الله وجهك
طيري وهو يروغ فلحمامه سدل جناحه ثم طاح ظنك الطير مصروع ؟؟؟
وعلى الملواح يوصل 80 ومافيه اي بلا

خيال الصبحا
04/02/2007, 03:33 PM
الاخ المرى شكرا على الموضوع المميز والمعلومات القيمه التى ادرجتها التى تهم

الصقارين

وعندى سؤال

س - هل الشقلبه ضروريه للطيرعند اول دعوه وهو وحش اوماعاد لها لزوم
مع وجود السيارات وانها كانت مهمه وقت المقناص على الابل.

يهمنى رايك

السلام عليكم

أبو معيض
أشكر لك الموضوع
الرائع .
و عندي أستفسار يالغالي
الشقلبه الي يسألك عنها الأخ ميراج
كيف ؟ أنا أول مرة أسمع بها.

يليت تشرحها لي الله لا يهينك
ومقدماً مشكور

خيال الصبحا
04/02/2007, 04:44 PM
أبو معيض

أن شاء الله كلها كم
يوم وأقابلك واخذ العلم
من دون كيبورد ولا شاشة

ولكن عندي سؤالين
-هل الجبليات يتاخرن مثل
البحريات أو لا ؟
-هل الجبلية أطيب للمبتدأ أو المثلوث؟
(أدري أنك تبي تقول الوكري ، ولكن الي
ماله رغبة بالوكري وش تنصحه)
وشكراً

المري
05/02/2007, 05:55 AM
مرحبا اخوي صادق الهرجة ..

بخصوص طيرك بعض الطيور اذا طرد وأجهد نفسه بالطرد يصيبه مثل هذا الحل وقد حصلت مع طيري اكثر من مره , والحمد لله

ماشاف شر..

اخوك - المري

المري
05/02/2007, 05:59 AM
مرحبا اخوي خيال الصبحا وحياك الله يالغالي .. بخصوص الشقلاب هو انك تدعي الطير واذا جاك على الشلو تسحب منه الشلو حتى يأخذ دوره كاملة ومن ثم تكرر العملية حتى الطير يكسب لياقة اكثر..

وسلامتك

اخوك - بو معيض

خيال الصبحا
05/02/2007, 10:35 AM
أبو معيض


أن شاء الله كلها كم
يوم وأقابلك واخذ العلم
من دون كيبورد ولا شاشة

ولكن عندي سؤالين
-هل الجبليات يتاخرن بتصفية الريش مثل
البحريات أو لا ؟
-هل الجبلية أطيب للمبتدأ أوالحر المثلوث؟
(أدري أنك تبي تقول الوكري ، ولكن الي
ماله رغبة بالوكري وش تنصحه)
وشكراً



للتذكير.وشكراً

المري
05/02/2007, 10:49 AM
مرحبا اخوي خيال الصبحا

الجبلية اسرع قرناس من البحريات لان الغالب منها تصفي ولا ترقع بشي..


والجبلية ايضا زينه للمبتدئين .. وان شاء الله نشوف على يدك اجبلية

اخوك - المري

1234556
02/04/2007, 03:22 AM
السلام عليكم ومساكم الله بالخير

مرحبا اخوي المري عساك طيب وجمل الله حالك وماقصرت لكن عندي كم استفساار0
عندي فرخ شيهانه جبليه ودربته ومشاالله عليه لكن جاء وقت الربطه وديته لواحد عنده مربط هل اذا انتها وقت الربط على خير ادعيه مثل ماكان عندي قبل وهل يذكرني وهل يذكر لملوااح والا نبدا من جديد الله لا يهينك اخوي المري وعلى فكره انا جديد على الصقاره ولا تهون ارجوا التوضيح بدقه اذا ماعليك امر وشرح 0

a7a7
02/04/2007, 09:08 PM
السلام عليكم ورحمة الله وبركاته
كيف الحال اخوي المري سؤالي
انا شريت صقر(فرخ) كيف ادربه بشكل عام وباختصار
ولا عليك كلافه
ملاحظه: انا جديد جدا في عالم الصقور

(خوي المقناص)
02/04/2007, 09:43 PM
السلام عليكم أخوي المري أنا من المبتدأين في عالم الطيور ولا أعرف إلا أشياء خفيفه
ووش تنصحني وأنا ملزم أب شهانه مع صغر سني
وأنكان واحد من الربع عنده طير شهانه للبيع ويكون سعره مهب غالي ويكون في سوق المعيقليه فأنا شراي وشكرا

عاشق الصحرء
03/04/2007, 01:06 AM
مشكور الخوى المرى على موضيعك مميز نتمان المزيد منك معلوم قيم منك وسلام

شيخ الخوالد
03/04/2007, 08:09 AM
ما قصرت اخوي المري على الموضوع

(خوي المقناص)
03/04/2007, 02:10 PM
منتظر ردك لي

وحيشان
04/04/2007, 01:11 AM
بسم الله الرحمن الرحيم
السلام عليكم ورحمة الله وبركاته
شحالكم اخواني الكرام كلن بسمه والله العظيم اني من مبطي وانا ابغي اسجل عندكم والحمدلله سجلنا وانا اتشرف اني بمنتداكم الطيب والناس الطيبه الي فيه واسلم على كل الاخوان الموجودين الصقاره كلهم وبالاخص الصقار الكبير المري

واسمحولي اني عندي سؤال للأخ الصقار الكبير المري

ابي انشدك طال عمرك او اي صقار له خبره في سؤالي انا طول الله عماركم


وشهي الطريقه اني اربب الطير مع السلوقي يعني ابي اهده مع سلقه هل هناك خطوات معينه لي الطرفين سواء كان السلوقي او الطير؟؟؟؟؟

السرحال
04/04/2007, 05:56 PM
اخوي المري


وش لون تدعوو الطير


وانت لحالك

المري
10/04/2007, 10:09 AM
مرحبا خوي 1234556

بخصوص الجبلية بعد المربط لازم انك تنقلها وتنزل عدتها (( لانها تكون صنيع )) اذا شلتها من الربطة , المهم تبدا في تنزيل عدتها

حتى تشوفها تنقز على يدك ثم ادعها بملواح فيه حمامه حيه ويكون الطير مربوط بسبب (( حبل طويل)) وانت تعرف نفس الطير

اذا شفتها جاتك على الدعو ماعندها اخلاف من بكره شيل منها السبب (( الحبل)) وادعها بدونه..


*****

مرحبا اخوي a7a7

بخصوص تدريب الطير الوحش تحاول انك تنقله على كفه على طول حتى يستأنس عليك ومن ثم تعوده على انه يأكل على يدك

وبعد ذلك تخليه على الوكري وتخلي اللحمه في الدس وتحاول انه ينقز على الدس واذا شفته نفسه خفيفه على ان يطمر على الدس

اربط له الحمامه وخلها بعيدة منك بحوالي 10 متر والطير يكون على يدك مربوط بحبل السبب علشان مايجنب ايمين او يسار

كرر العملية لمده ثلاث ايام واذا شفت ماعنده خلاف خل واحد يدعيه بالحمامه وانت هده عليه المهم انت شف نفس الطير اذا

نفس جيده ولا يطول في الطيار من يدك . خلاص طيرك جاهز..


****

هلا اخوي راعي الطير اذا انت ملزم بشيهانة اخذ لك شيهان جبل فهو انسب للقيمة وانسب للتعلوم..

***

مرحبا اخوي وحيشان..

بخصوص تعلوم الطير على السلقة بسيطة جدا..

حاول ان الطير يستأنس على السلقة يعنى اذا قدك تعشيه على حمامه او تلواح خل السلقة عندك قريب واذا قدك ناقلة على كفك

خل السلقة قريب من الطير حتى ان الطير ماعاد يخاف من الكلب وعقبها خلاص اذا هديت الطير مع الكلب ماعاد يخاف منها..

وسلامتكم جميعا..

***

واسف على التأخير بالردود

اخوكم - المري

شيخ الخوالد
10/04/2007, 11:45 AM
مشطور والف شكر اخوي المري

على الموضوع

الصراحه استفدنا منه الكثير

(خوي المقناص)
10/04/2007, 01:49 PM
مشكورررررررررررررررر

المري
13/04/2007, 05:21 PM
حااااضرين ولنا الشرف في الرد على اخوانا في مكشااااااااااات.

السرحال
13/04/2007, 11:56 PM
اخوي



الظاهر انك شقحتني بالسرااا ههههههههههههههههههههههه


مسامح اخوي

وانت قدمت مجهوج تشكر عليه

المقصود
14/04/2007, 10:56 AM
السلام عليكم ورحمة الله وبركاته
اخوي المري كيف حالك وعساك بخير
ابغى اسال عن الطير الحر من نحيت المواري وصفات اللي عليها الكلام
من نحيت انواعها: نداوي وحصاوي
من نحيت الجنس الطير الذكر والانثى
من نحيت انواعها: نادر ولزيز ومحقورة وتبع
وشكراااااااااااا ّّّّّّّّّّّّّّّّّّّّّّّّّ_________________________ ______

ابن ضعيان
16/04/2007, 03:17 PM
أريد مواعيد هجرة الصقور
وأي مكان يعتبر أفضل مواقع صيد الصقور

المري
17/04/2007, 01:41 AM
مرحبا اخوي السرحااال وحياك الله يالغالي

والعذر والسموحة ماادري وش لون سقط اسمك بس ابشر بالعوض..

بخصوص دعو الطير اذا كان الصقار لحاله..

اولا: يأخذ الطير ويبلج عن برقع ويخليه يطير واذا ابعد يصيح للطير بالملواح واذا جاء الطير يخش الملواح ويخليه يبعد

ومن ثم يكرر العلمية واذا شاف الطير ماعاد ابعد يحاول يشقلب الطير حتى يعطيه الدعو المناسب..


الطريقة الثانية: يأتي في راس ضلع ويركز الوكر ويخلي الطير على الوكري مفرع واسبوقه مفكوكه يبعد بالسيارة ثم ينزل ويدعي

الطير واذا خلص يرجع ويشيل الوكر اللي في راس الضلع..


ثالثا: يعلم الطير على السيارة يهد الطير ويخلي الطير يطرد السيارة كيلو كيلوين حتى يشوف الطير تعب..

وسلامتك

واسف مرة اخرى..

اخوك - المري

المري
17/04/2007, 01:45 AM
اخوي المقصود

بخصوص مواري الطير الزين :يجيك وافي الحجم وكبير الراس واسع المنخر طويل الجناح جليل الساق جليل الاصبع

عين لها قحف .. الخ.

اما باقي الاسئلة تبغالها شرح مطول ويمكن اني ماعرفها كاملة..

***

اخوي ابو ضعيان

ماعندي خبر في مواعيد هجرة الطيور..

**

ودمتم سالمين غاانمين

اخوكم - المري

شوباش
26/06/2007, 04:38 PM
السلام عليكم ورحمة الله وبركاته
أخوي المري الله يخليك ويرضى عليك
اش يعني صنيع ؟
واش يعني شنذر الطير ؟
واش يعني ينقل ثاني وثالث ورابع ؟
والله يعطيك العافية

شوباش
26/06/2007, 04:51 PM
اش هي المادة التي تعطى للطير من أجل غرض الشنذرة
اذا كانت من الصيدلية اش اسمها ولونها وشكلها
اذا كانت باليد تتسوا علمني الطريقة الله لا يهينك

شوباش
26/06/2007, 11:22 PM
أخوي المري أنا في انتظارك

المري
02/07/2007, 05:31 PM
مرحبا اخوي شوباش. (( وهي كلمة أيرانية))

صنيع : يعنى سمين ماهو هزيل..

شنذر الطير: مادة كيمياية تعطى للطير علشان ينزل كل مافي قانصته من شحن وغيره..

وهي مادة الشناذر وتحصلها عند اكثر محلات الصقور..

a7a7
02/07/2007, 05:41 PM
السلام عليكم ورحمة الله وبركاته
اخوي المري انا صقارمبتدى وش تنصحني فيه وهل اشتريه وانا ماعندي خبره كبيره
مع خالص تحياتي اخوك
a7A7

وقاااااد
03/07/2007, 01:44 AM
كيف حالك يالمري

عندي طير قرناس عاشر وفي كفه سدة تجي في المربعانية وتزود مع الهدد والدعو إلى ان تورم كف الطير
وبعدها اربطه على رمل واريحه ويخف الورم وتروح السده ومايجي الصفري إلى الطير مافيه إلى العافيه واقنصبه شهرين وبعدها تجيه الحالة ولها معه ثلاث سنوات والطير غالي عندي بالحيل وعلومه طيبه
وش الحل معه جزاكم الله خير0:confused:

الوسام111
03/07/2007, 03:17 AM
اخوي المري

الله يعطيك العافية

الموضع جميل واتمنى لك التوفيق

رفيع
03/07/2007, 05:55 AM
السلام عليكم ورحمة الله وبركاته ..

كيف حالك يالمري ..
ومجهود تشكر عليه والله يجزاك بالاجر
عندي سؤالين ياطويل العمر ..

اولا: انا توي بادي اعرف الطيور وما يلزمها (( مبتدي )) و صراحة اني دايم افكر واهوجس (( وحلم )) ان معي طير ووش رايك هل تنصحني اني اقتني لي طير والا لا.. مع العلم اني ما اعرف الا الشي القليل عن لطيور وهل يبيله اهتمام وعنايه بالغه ؟ ومصاريف كثيرة ..؟

انا اعرف ان الجابه طويلة بس تحملني وانا اخوك ..

ثانيا : اذا كان لجواب نعم .. وش ازين اشتري طير والا اشبك ..؟ ووش الطير الي اشتريه..؟

تعرف انا ما لي عرف بطيور .. وان رحت اشتري .. ما ني شاري على عماها ..

طولت عليك وانا اخوك لكن والله ان ودي بطير وما ني داخل هالمجال الين استشير ..!

رفيع
03/07/2007, 01:09 PM
انتظر اجابة...

:hot:

:alarm:

المري
03/07/2007, 02:25 PM
مرحبا ومسهلا بأخوي رفيع .. وحياك الله يالغالي..

طال عمرك الصقارة ممتعه ومسلية وتونس الواحد بس على ماقلت تبغى لها سيارة وتبغى لها طير وجهاز اطيور وحمام ودربيل وووو

فاذا كنت مقتدر هذه الامور انحلت نص المشكلة ..

النص الاخر : تعلم الصقارة وهو شي بسيط على الرجال المهتوي الفطن!!!

يلزمك لتعلم الصقارة اولا: انك تعرف احد من الصقاقير اللي خاطرهم وسيع واسنافي.. يعنى اللي خاطره ضيق ابعد عنه وغني له!!

عليك بكحيلان اللي يعلمك بنفس زينه وراضية وان اشاء الله ماتأخذ 5 ايام الا انت مبتدى جيد,,

اما الطير عليك بالوكري ولاهو الابيض لان الابيض يجيك عفن وحوام عليك بالسوداني الاسود تراه مبرووك ..

وتراني حاااضر باللي اقدر عليه اعين واعاون واذا انت حولي في الحسا تراه انحلت المشكلة !!!

وسلاااامتك

اخوك - المري

رضوان
03/07/2007, 07:18 PM
السلام عليكم
بصراحه انتظر وبدون مجامله ان يرفع الموضوع لثثبيث والله يستاهل خوش مدرسه الصقاره
كل سؤال تساهله باذن الله يجاوبك عليه اخونا المري

رفيع
04/07/2007, 01:54 AM
وتراني حاااضر باللي اقدر عليه اعين واعاون واذا انت حولي في الحسا تراه انحلت المشكلة !!!

وسلاااامتك

اخوك - المري



جعلك تسلم .. وما تقصر وانا اخوك رجال سنافي

وقاااااد
04/07/2007, 10:23 AM
ابو معيض انا في انتضار ردك 0000:hot: :bounce: :alarm:

المري
04/07/2007, 11:17 AM
مرحبا اخوي وقااااد واسف على التأخير لاني ماشفت مشاركاتك.. والعتب على النظر..

اذا شلت الطير في الصفري عليك بالحناء !! لطخ كفه بالحناء علشان تجبر اشوي لان اكثر الطيور اللي يجيها اكفوفها رقاق

حمد الدوسري
04/07/2007, 11:28 AM
السلام عليكم اخوي المري بارك الله فيك انا عندي طير ريش الذيل مكسورات ثنتين شلحل ياخوك

وقاااااد
04/07/2007, 11:31 AM
بيض الله وجهك يالمري عسا عمرك طويل

بس الحنا احطه دايم ولا مره وحده وش فوايدها
لاهنت

المري
04/07/2007, 12:41 PM
مغدور . وسرها عند الدكتور علاء وخلاص..

**
اخوي وقاد فائدة الحناء يقوي كف الطير مايخليها رقيقه مثل أول..

حط الحناء من فترة الى فترة.. مثل كل ثلاث اسابيع حط وترى مايضره الحناء..

**

اخوكم - المري

عبدالرحمن الخالدي
05/07/2007, 12:16 AM
الأخ الأستاذ المري السلام عيكم ورحمة اللله وبركاته ...
بإختصار طير كنت قاصر علية أول الوقت قبل البرد الشديد وكنت في مقناص قبل رجوعي فكيت له حمامة وصادها وعلف منها كمية كبيرة حتى انتفخت مفرسته بشكل كبير الغلط إني ماعزلتها بحكم إني راجع من المقناص بعد ماوصلت للبيت حطيت الطير في مربطة ولا عليه أي ملاحظات من بكرى بعد صلاة الفجر مريت علية لقيت الطير مقذف(مرجع)بعد تنظيفة لاحظت عليه أنة تعبان وأنة مايصرف (مايمرش)جالس على صدره جنب وكرة اتصلت على أحد الصقاقير قال لي أكله سكر نبات عشان يصرف قلت الطير مفرسته مليانة لايمكن يتحمل أي شي ، بعدها بقليل أخذت الطير إلى أحد المختصين ولكن الطير مات في طريقي له.
للمعلومية أن هذا الحدث أقل من نصف يوم .
وبخصوص الحمامة أعتقد والله أعلم أنها سليمة.
آسف على الإطالة وأشكرك على هذا الطرح وعلى هذه المبادرة المباركة وجزاك الله خير.

حمد الدوسري
05/07/2007, 12:20 AM
الله لايعينك يابو معيض وماقصرت على ردك لاكن باتعبك معاي اشوي واسحملي ودي اسالك عندي طير ياخوب ذابحني يكفاخ على الدس على الشبه والوكر من يش
وف بني ادم يقرب له يكافخ ويربش عمره وش الحل يالغالي معا انه تمر عليه فترات هادي واذا كان عن الطير فهو خلوي قرناس هوا

المري
06/07/2007, 08:07 AM
مرحبا اخوي مذكور..

بالنسبة لترجيع العلف هذا امر طبيعي ان الطير ضعيف وانت عشيت الطير فوق مايستطيعه..


وبخصوص الطير يجلس بعد مايرجع العلف 4 ايام اما يطيب او تزداد حالته سو..

بس طيرك مات في نفس اليوم!! سبحان الله

ماعندي خبر عن كذا حاله..


***

مرحبا مغدور..

الله لايــعــيــنـــك يابو معيض !!!!!! وش سويت عليك يوم انك تدعي علي !!!!!!


امزح معك ادري انها غلطة مطبعية...

عليك انك تنقل الطير دائما وخله في وسط الصالة وفي وسط المجلس خلهم يدعسون الطير بس انتبه عليه من الملوع الحفا

وبأذن الله ان يصير راكد

وحاول ان تكون عدته وسط..

حمد الدوسري
06/07/2007, 10:51 AM
الله يبارك فيك ماقصرت واعذرني على الغلط المطبعي والله يعطيك العافيه

عبدالرحمن الخالدي
07/07/2007, 03:27 PM
جزاك الله خير.

أبو جسار
07/07/2007, 03:38 PM
السلام عليكم ورحمة الله وبركاتة

أخوي أنا صقار مبتدئ وعندي سؤال

هل فيه نوع من الطيور يسمى وكرية فرخ

صدى الهوجاس
08/07/2007, 12:54 AM
ما املك الا ان اقول سلمت يمناك وجزاك الله كل خير يابومعيض

الوعيلي 711
11/07/2007, 05:07 PM
موضوع يستحق التثبيت يسلم المري

المري
11/07/2007, 10:13 PM
مرحبا اخوي ..

صحيح فيه وكرية فرخ..!!!

**

مباري الساس - الوعيلي.

تسلمون وماقصرتو ومروركم شرف لي..

**ا

اخوكم - المري

الفوار2008
11/07/2007, 10:55 PM
اخوي المري حياك الله

انا رجال غشيم وهاوي بنفس الوقت وعندي سؤال ""
1/الأن اللي يبي يتعلم الصقاره ويش يقتني من الطيور ويش عمر الطير اللي يبي يقتنيه؟؟
2/انا ونا اخوك عاشق شياهين وقد اهداني زميل لي فرخ وحش جبلي وقال لي تعلم بنفسك واجدع وجهك بمجالس الصقاقير ونصحني واحد من الصقاقير اني اتخذ لي طير معلم يعلمني وش رايك انت ويش نصيحتك لي الله يخليك ؟؟
3/ودي ونا اخوك اتعلم الصقاره مباشره هل فيه مدرسه تعطيك دروس عمليه في بعض علوم الطيور ؟؟
الله يحفظك ويخليك ومشكور عالمساعده والمرور مسبقا

المري
11/07/2007, 10:59 PM
مرحبا وحياك الله بين ربعك واخوانك

اللي يتعلم يحاول يأخذ له وكري من الوكارى الهادية ويحاول يشيله على يده حتى يتقن النقلة..

ومن عقبها يعلم باقي امور الصقارة..

للأسف مافيه مدرسة تعلم الصقارة,, المدرسة الحقيقة خوة الصقاقير والأندماج في عالمهم .

وسلامتك

اخوك - المري

الفوار2008
12/07/2007, 03:52 AM
شكرا اخوي وما قصرت طيب انا بسأل هل من الأفضل أن اقتني طير واتعلم عليه الصقاره علما بأنني نقلت لي شيهانه وحش لمدة شهر تقريبا وتعلمت كيف اعلفها وبعض الامور اللي تخص نقل الطيرفهل علي اني اتعلم انواع وأفضل الطيور وكيف تعليفها والأمراض اللي تصيبها والاعلى السريع اشتري لي طير واتعلم وهل صحيح اني اخذلي طير له فعول طيبه وعلوم ويعلمني على كلام واحد من الصقاقير

المري
12/07/2007, 04:40 AM
مرحبا اخوي ابو العبدي..

لازم انك تتقتني طير وتتعلم عليه الصقارة.. ومن مخالطة الصقاقير سوف تعرف امراض الطيور وانواعها وافضلها..

والدعوى سهالاااااااااااااااات

اخوك - المري

الفوار2008
12/07/2007, 01:40 PM
شكرا اخوي وما قصرت طيب متى اقتني لي طير وكيف اختار لي طير ويش السن الأفضل لي اقتنائه

الفوار2008
12/07/2007, 09:57 PM
اخوي اعذرني على الأطاله ايهم الأفضل الطير المعلم تتعلم عليه والاتتعلم على فرخ وحش

الفوار2008
12/07/2007, 10:07 PM
اخواني الكرام
لاهنتوا ابي اتعلم تسلسل تعلم الصقاره يعني من وين ابدا وكيف وأوقات الربطه المقيض وانتهائها ومتى يجب علي اني ما اطلع بالطير للملواح وماهي افضل طريقه لتدفة مكان الطير في الشتاء وهل البرد مضر جدا للطير يعني ما أطلع به مكاشيت لمناطق شديدة البروده

قرناس خلوي
13/07/2007, 03:55 AM
السلام عليكم ورحمة الله وبركاته
الصراحه موضوع جيد ومفيد للجميع وأنا عندي استفسار بالنسبه لي عند طيرين واحد تفريخ وواحد أصيل وكلها حرار بس الأصيل يقول المستشفى إن فيه إلتهاب رئوي مزمن ومايئثر على طياره ولا يزيد فما أدري أبيعه أو أقنص به وأبيع التفريخ محتار وإنصحوني ؟
وإستفسار ثاني كيف أفرق بين أثر الحبارى والكروان لاني دايم أتلخفط فيها خاصه إذا كانت الحبارى صغيره أو كروان كبير ؟
وأعتذر عن الإطاله عليكم

المري
13/07/2007, 04:46 AM
مرحبا اخوي قرناس خلوي وحياك الله يالغالي..

انت دكتور نفسك والأجابة عندك.. شف ايهم احب الى قلبك من ناحية الطيار الصيد والصيد.. بع الأقل كفاءة وخل صاحب الخبرة عندك..

**

بخصوص اثر الكراوين الكبار يغاالط في بعض الحباري الصغر وثاني شي ماهوب من كثر الكراوين في ارض المقناس الا اذا كنت

من أهل الشرقية؟

وسلااامتك

اخوك - المري

الفوار2008
13/07/2007, 03:13 PM
لاهنت اخوي المري وشكرا عالعموم وانتظر جوابك

أبو جسار
14/07/2007, 06:07 AM
مشكور أخوي المري

مدام فيه وكريه فرخ ؟ ؟ ؟

ياليت أعرف الفرق بينها وبين الوكري الفرخ وأذا أمكن (صورة)

ويعطيك الصحة والعافية

المري
14/07/2007, 08:40 AM
حاضر طال عمرك

سوف انزل موضوع خاااص عن هذا النوع (( الوكري)) فرخ وقرناس..

وسلامتك

اخوك - المري

حمد الدوسري
15/07/2007, 12:39 AM
ياريت يتثبت هلموضوع المميز

صقار كويتي
17/07/2007, 04:24 AM
بسم الله الرحمن الرحيم
أشكركم بقبولي بالمنتدى الرائع والجميل الذي يتمنى كل صقار المشاركه فيه وبينكم
أنا عندي سؤال: ما هي مواري الشيهانه الطيبه الذي يتراوح طولها من 14 وتحت وماهي المواصفات التي أميز بها أن الشيهانه سبوق؟؟

الفوار2008
17/07/2007, 06:45 AM
استاذي المري ونا اخوك ابطيت علينا وشوقتنا لمدرستك الله يخليك وماتشوف شر

الف999
17/07/2007, 12:34 PM
عندي سؤال في طير باقي له الامواس وحذف الغواطى بس اذناب محذف شي وش المشكله

والف شكر

الف999
19/07/2007, 12:30 AM
مافي رد يا المري

قرناس خلوي
19/07/2007, 03:50 AM
السلام عليكم ورحمة الله وبركاته ياأعضاء المنتدى المتميزين

أخوي المري كيف أقدر أدرب طير على الإرتفاع وإنه يتعلى فوق صيدته ،،،، والسؤال الثاني هل الطير إذا كان الموسم الماضي راكد على تكية السيارة ويطلع بيكون السنه هذي بنفس الطبع ولا لازم يتعلم من جديد .؟ وآسف على الإطالة .

الفوار2008
19/07/2007, 04:39 AM
اخوي الغالي المري عسى المانع أنشألله خير
اخوي ودنا وناخوك نتعلم شي قبل لاتجي النقله واتوهق واشتري لي ديك ولا اعرفله بعد
هههههههههههههههههههههههههههههههههههههههههههههههههه هه
ماتشوف شر يالغالي ومقدما قبل كل الاعضاء الحمد لله على السلامه
وتقبــــــــــــــــــــــــــــــــــــــــــــــ ــل مرووووووووووووووووووووووري

ابو جلعود
19/07/2007, 08:27 AM
السلام عليكم اخوي المري

عندي سوال الله لا يهينك

س/ وش معنى كاشفن راسة .؟

وشكرا

منور
20/07/2007, 12:59 AM
السلام عليك اخي والله يعطيك العافيه
عندي سوال
وش حل مع المدهنه سويت كل شي اللي اعرفه والاكان الافايده
دققتها وحطيت النيله والملح وبرضه معيه
ولك خالص الشكر

ابو جلعود
21/07/2007, 02:33 AM
المري وينك الله يرحم والديك عن النار


قل امين.

المري
21/07/2007, 09:14 AM
مرحبا بالأخوان جميعا

ومرحبا بضيفنا الجديد صقار كويتي وحياه الله بين ربعه واخوانه..

بخصوص مواري الشاهين السبوق:

1- يكون عرضه اكثر من طوله..

2- الجناح الطويل.

3- الجناح الدقيق . اي النحيف.

4- الرأس الصغير .

5- قصر الذيل.

6-جل المنكب..

والكثير من المواري..

ملاحظة: كل هذه المواري مساعدة على التوقع بأن الطير سبوق وليس شرط !!!


وسلاااامتك

اخوك - المري

رآعي آلبآترول
21/07/2007, 10:08 AM
سلام عليكم ورحمة الله وبركاته
مساكم الله بالخير
علمكم غانم يالربع
يالربع عندي طير كفاااخ وراسه يابس ونزر وصلف ولاهوب راكد ابد
عجزت عنه والله
والطير صامل على الصيد وجناحة زين وهذا الي مصبرني عليه
هل عند احد منكم طريقة تركيد للطير

المري
21/07/2007, 10:13 AM
مرحبا اخوي الف 99

بخصوص الطير اذا حذف الطويلة لازم انه يحذف من الذيل.. بس طيرك وش هو؟؟

وسلامتك

اخوك - المري

**********

مرحبا اخوي قرناس اخلوي..

بخصوص تعلوم الطير على الأرتفاع بواسطة الطياره.. اللي ترفع للطير .. كل يوم 100 متر حتى يستطيع انه يجيب كليو ونص في السماء.

بخصوص ركادة الطير العام ,, السنة هذه ان شاء الله مايحتاج تعلوم لان الطير الراكد سوف يكون كل سنه راكد..

**********

المري
21/07/2007, 10:19 AM
مرحبا اخوي ابو جلعود وحياك الله يالغالي..

بخصوص كاشف الرأس ,, هو اللي يجي رأسه اكشف من لونه يعنى راسه أبيض. ولونه أحمر - مغتر..

****

مرحبا اخوي منور وحياك الله يالغالي..

والله دائما اسوي نفس طريقتك وتنجح معي.. بس ماادري وش المشكلة لديك؟؟

اذا انك حول الرياض ود الطير للعويدي.. وان شاء الله مايقصر..

وسلااااااااامتكم

اخوكم - المري

قرناس خلوي
21/07/2007, 03:43 PM
السلام عليكم يالمري الظاهر اني بغير اسمي للـ((نشبه ))
بس نبيك تتحملنا شوي ... بالنسبه للطيارة وش كلها ...؟ ووين أحصلها ..؟
وآآآآآآآآسف على الإزعاج ..

المري
21/07/2007, 04:21 PM
مرحبا اخوي قرناس خلوي..

وحاااضرين في اي وقت طال عمرك.

الطيارة مثل طيارة البزان الورقية .. بس انها اكبر اشوي . اما وين تحصلها ؟ في الأمارات بكثرة ..

وقيمتها حوالي 1600 ريال..

وتجي ايضا على شكل بالون ويكون الملواح مربوط فيها وترفعها بالقدر المطلوب واذا طلع لها الطير واخذ الملواح ينفك الملواح ويجيك

الطير على راسه حتى يصل الى الارض

نبذة عن الطائرة الورقية:


تعريفها: هي طائره ورقية عملت من أجل جعل الصقر

الذي مايرتفع يحاول الارتفاع, وقد صنعت هذه الطائرات خصيصا

للصقور التي ماترتفع ارتفاعا عاليا وخاصة الطير التفريخ فهي مشكلته الأولى

والأخيرة هي الارتفاع.

طريقة استعمالها :

تجهز الطائرة ويربط فيها الملواح أوالحمام ومن ثم تطلق وبشكل طبيعي تنطلق

إلى السماء ويكون مربوط فيها حبل مبروم على شكل مكرة فإذا ارتفعت تنفل

المكرة بشكل طبيعي فإذا وصلت الارتفاع الذي تريده تضغط على زر في المكرة

حتى يتوقف ارتفاع الطائرة ومن ثم تطلق الصقر فأذا أخذ الملواح أو الحمامة

ينفك حبل الحمامة من الطائرة بسهولة حتى يسهل عليه أن ينزل بالعلف.

ويكون التدريب عليها تدريجيا , فمثلا يكون الارتفاع 5 أقدام ومن ثم 10 أقدام

وهكذا حتى يصل الى 2000 قدم .

وإليكم بعض الصور لهذه الطائرة الورقية وبعض ملحقاتها من حبال وادريل لطي الحبل:

http://www.mekshat.com/pix/upload/images2/KB-007.jpg


http://www.mekshat.com/pix/upload/images2/KB-015.jpg



http://www.mekshat.com/pix/upload/images2/KB-025LG.jpg


http://www.mekshat.com/pix/upload/images2/KB-018LG.jpg



وتوجد طائرات أخرى وهي غير الشكل السابق وغير الوظيفه فشكلها

انظر الى الاسفل , اما وظيفتها فهي توضع بداخلها الحمامة أو البطة

أو غيرها من الصيد فترفع هذا الطائره بواسطة ريموت فأذا وصلت

إلى المستوى الأعلي تضعط على الزر فينفتح الباب الذي بأسفل الصندوق

فتسقط الحمامة أو البطة فتطلق الطير فيضطر إلى أن يصعد إلى الصيدة

العالية الارتفاع .


اليكم بعض صورها:


http://www.mekshat.com/pix/upload/images2/BL-058-061.jpg




وسلااااااااااااااامتك

الفوار2008
21/07/2007, 08:31 PM
اخوي المري حياك ابوي وشرفتنى يالغالي ومن طول الغيبات ؟؟؟؟؟؟؟؟؟؟؟؟؟؟؟؟؟؟
لا هنت اخوي ابي اعرف وش معنى ( عدت الطير )ونص السؤال " رفع عدة الطير الى أرفع وزن , وتخفيضها عند ربطه تدريجيا , حيث يؤدي ذلك الى قيام الطير برمي ريش الخناجروالمغاطي وهي اول ريش يرميه الطير 000
اخوي ابو معيض ممكن تشرح لي الكلام اللي تحته حط هذا ومشكور

رآعي آلبآترول
22/07/2007, 09:15 AM
سلام عليكم ورحمة الله وبركاته
مساكم الله بالخير
علمكم غانم يالربع
يالمري عندي طير كفاااخ وراسه يابس ونزر وصلف ولاهوب راكد ابد
عجزت عنه والله
والطير صامل على الصيد وجناحة زين وهذا الي مصبرني عليه
هل عندك يالمري طريقة تركيد للطير وتكون فعالة
الطير مااهوب راكد لا على اليد ولا على التكية في الموتر
وحتى بالبرقع مرررات يكفخ

قناص ام وشاح
22/07/2007, 10:44 AM
الطير الحر تجدالفرخ كفوفه زرقاء اما القرناس فلون كفوفه صفراء.
الطيرالشاهين تجد الفرخ والقرناس كفوفهن صفراءلاكن الفرق في اللون الفرخ لونه يرجع للبني اما القرناس لونه اسود او ازرق مثل ما يقولون

قرناس خلوي
22/07/2007, 04:43 PM
يبيض وجهك يالمري وهذا سؤؤؤؤؤؤؤااااال للجميع
وين أحصل هالطيارات او البالون في السعودية (( الرياض )) اللي عنده علم أتمنى يفيدني .. مع الشكر .

ابو جلعود
25/07/2007, 03:58 AM
اخوي المري
الله لا يهينك ابغثك شوي

س/ الشنذرة معناها

واشكرك بعنف .

الحر01
25/07/2007, 04:38 PM
السلام عليكم اخوي المري انا والله ودي اخذ رايك انا انشاء الله ابشتري وكريه ولاكن اول ما اشتري الطير يجيني صنيع هل اني اعطي الطير الثنادي او وش الطريقه والله يجزاك خير

خيال الصبحا
25/07/2007, 07:33 PM
السلام عليكم

كفو يابو معيض
قدها وقدود

المري
27/07/2007, 08:58 AM
مرحبا اخوي ابو العبدي
رفع عدة الطير الى ارفع وزن يعنى تخليه عديد بالحيل ماهو هزيل . تخلي عضم الزور ماتلمسه من الصنعة, واذا جيت تقيضه تنزل اي تضعف الطير ماتعطيه الا علف قليل حتى يصير هزيل ومن ثم يبدأ يحذف..


هذا معناه..

وماتشوف شر..

اخوك - المري

****

مرحبا اخوي راعي البترول..

بخصوص الطير الكفاخ هذ سلمك الله بلاء من زود الوحوشية من العرب , فأنت حاول تخليه على

طريقة الناس اللي رايحه وجايه عندك في البيت, اما انك تحطه في الصالة وتخلي البزران يعلفونه

حتى يطيح مافيه راسه.. بس انتبه عليه من الحفا, لان اكثر فرش البيت يسبب حفا للطير الكفاخ..

وحاول تنزل عدته علشان يرب بسرعة

*****

مرحبا قرناس خلوي ..

بخصوص الطيارات ماادري وين تحصل في الرياض..

بس شف الربع اللي بيروحون لمهرجان ابو ظبي.. خله يجيبها لك..

*****

مرحبا اخوي ابو جلعود

وحياك الله

الشنذرة هي مادة كيمايئة لونها ابيض تعطى بحجم معين الطير مع بداية النقلة علشان ينظف قانصتة

من الشحوم..

***

مرحبا اخوي الحر 01

وحياك الله يالغالى..

لاتعطيه الثنادي كلها لان الوكري كل شي يشبعه.. عطه نص الثندوه وبعض الليالي عطه الفخوذ الين

تخلي عدته وسط..

****

مرحبا اخوي خيال الصبحا..

ماعليك زود وابشر بالخير..

****

اخوكم - المري

وفي انتظار اي استفسار

حااااااااااااضرين

الفوار2008
30/07/2007, 05:42 AM
السلام عليكم ورحمة الله وبركاته
اخوي واستاذي ابومعيض
الأن مابقي الا يمكن شهر ونص شهرين ويبدا الصقاقير بنقل طيورهم والله يقرب البعيد عندي سؤال
بالنسبه للصقار المبتدئ اذا كان يملك طير بمربط من المرابط او اشترا طير وهو بالمربط لا هنت اخوي علمني كيف اتعامل مع الطير اول ما أطلعه من المربط وهل على اني اعطيه شناذر والمور المطلوبه مني اشرحلي وش على اني اسوي؟؟ ومشكور مقدما على الأجابه

المري
02/08/2007, 12:49 AM
مرحبا اخوي أبو العبدي..

اذا نقلت الطير من المربط حاول في تنزيل وزنه علشان تخف نفس الطير ويجيك على ماتريده ..

واذا نزلت الطير انقل الطير على يدك لان الطير يتوحش في اثناء الربطة, بعد ماتنزل عدته الطير الى النص او فوق النص اشوي..

عش الطير عشى طيب مثل الليله هذه بدون ريش وبدون عظام علشان الليله الثانية تشنذر الطير وينزل مافي قانصة من شحم..

المهم بعد ذلك حاول انك تدعي الطير بالسبب يومين , اذا شفت نفسه زينه خلاص ادعه بدون سبب..

علما أن بعض الطيور مايحتاج سبب من الربطة يهدونها بدون سبب وذلك لزين نفس الطير..


وسلامتك

اخوكم - المري

خيال الصبحا
02/08/2007, 03:53 AM
مرحبا اخوي أبو العبدي..

اذا نقلت الطير من المربط حاول في تنزيل وزنه علشان تخف نفس الطير ويجيك على ماتريده ..

واذا نزلت الطير انقل الطير على يدك لان الطير يتوحش في اثناء الربطة, بعد ماتنزل عدته الطير الى النص او فوق النص اشوي..

عش الطير عشى طيب مثل الليله هذه بدون ريش وبدون عظام علشان الليله الثانية تشنذر الطير وينزل مافي قانصة من شحم..

المهم بعد ذلك حاول انك تدعي الطير بالسبب يومين , اذا شفت نفسه زينه خلاص ادعه بدون سبب..

علما أن بعض الطيور مايحتاج سبب من الربطة يهدونها بدون سبب وذلك لزين نفس الطير..


وسلامتك

اخوكم - المري
الأخ
ابو معيض
بيض الله وجهك
والحين نحتاج المعلومات
هذي أكثر من قبل ، الله لايهينك
وشكرًا

الفوار2008
04/08/2007, 01:57 AM
مشكور اخوي ابومعيض على الشرح الوافي والكافي
ومدري شقولك لكن انت ابخص
ههههههههههههههههههههههههه
ولك مني خالص التحيه والتقدير
اخوك ابوالعبدي

Hunter66
04/08/2007, 10:05 AM
مشكوووووور اخوي بس عندي سؤال متى موسم الصقور لعام 1428

المري
04/08/2007, 11:32 PM
مرحبا اخوي هنتر ..

بخصوص موسم الصقور ماادري وش تقصدك..؟؟؟

اذا المقناص والطيور شهر اكتوبر _ اخر رمضااان

Hunter66
06/08/2007, 12:20 PM
حياك يالمري و مشكووور و ما تقصر على المرور دائما مبدع ايه اقصد المقناص.بس معليش تراني مبتدئ وين احسن بر حق المقناص.

الاحساء
06/08/2007, 01:34 PM
موضوع مميز وجهد كبير منك اخي الفاضل

والله يوفقك في كل دروبك

تقبل تحياتي

ابو جلعود
07/08/2007, 06:52 PM
اخوي المري الله لا يهينك ولا يسفهك .

عاد ما تخبر لي طير حليو سعره .

هههههههههههه م انعطى وجهه صح .

اقديد
10/08/2007, 01:19 PM
السلام عليكم
اخوي وش معنى تبع وبعد وش معنى تنسير وسلامتكم

اقديد
11/08/2007, 10:08 PM
وبعد الله لا يهينك ابغى اسئل عن علاقه الطير بالبرقع لو تشرحها بتفصيل يكون احسن يعني مثلا متى الاوقات اللي يبرقع فيها الطير ولمده كم ومن ناحيه ارتباط البرقع بالعلف وبشكل عام ومتى الاوقات اللي لازم يبرقع فيها الطير وش السبب .
والفرخ الشاهين الجبلي تقريبا كم يستغرق ويكون مدرب وجاهز للهدد ومن ناحيه علفه هو هو كل يوم والى كيف ويا ليت تشرح لنا علف الطيور بشكل عام مقدارها انا عارف انها تختلف باختلاف الحجم لكن حاول انك تفصلها مثلا الاحرار الوكارى الشواهين وش اللي منها يحتاج علف يومي وش اللي منها يحتاج يوم بعد يوم او كل ثالث يوم ومقداره مثلا سمنه كامله او حمامه او نص او فخوذ دجاجه انت ابخص
ومتى احسن الاوقات لعلف الطير
ومشكور مقدما والله لا يهينك

فارس المنذري
12/08/2007, 05:40 PM
شوف الموضوع الجديد والمفيد أمراض الصقور

Hunter66
13/08/2007, 02:20 PM
اخوي المري الله لا يهينك عندي سؤال كيف تعرف عمر الطير وهو انثى ولا ذكر و كيف تفرق اذا حر ولا لا وايش احسن نوع صقور

المري
13/08/2007, 02:25 PM
مرحبا بالأخوان جميعا واسف على التأخير..

اخوي قديد:

معنى التبع . هو اصغر الشياهين ويجي مقاس من 12 ونص الى 14

..

ومعنى التنسير ..

انك تعطي الطير كم قطعة صغيره من العلف, يعنى ماتخليه يشبع..

اقديد
13/08/2007, 10:42 PM
الله لا يهينك وعذر على جميل
باقي التفريع لا قالك يفرع وش معناها وبعدين وش اسم الثوب اللي يلبسونه الطير الوحش بعد طرحه ووين القاه في الرياض

المري
14/08/2007, 08:19 AM
مرحبا اخوي قديد

التفريع .. هو ان الطير طال عمرك يرقد في السيارة بدون برقع...

اما الثوب اللي يلبسونه الطير اسمه : المهاد..

وسلااااااامتك يااقديد

***

هلا اخوي هنتر..

بخصوص التفريق بين الأنثى والذكر في الحرار .. اذا كانت الحر فوق مقاس 17 فهذا انثى

اما الذكر هو المثلوث او الحر الصغير..

اما الشياهين فلها مقاسات واوزان اذا جاتك الشاهين 15 الى 16 ونص فهذي انثى

اما الذكر من 14 ونازل..

اما عمر الطير: ينعرف فرخ وبكر وثنو واذا تعدى ذلك صعب انك تعرف عمره بالضبط..

وسلامتك

اخوكم - المري

Hunter66
14/08/2007, 05:32 PM
مشكووور يالمري بس معليه اخر سؤال وش احسن نوع صقور

البضيع
15/08/2007, 04:55 AM
اخوي المري السلام عليكم ورحمة الله وبركاته

لي خوي عنده جبلية شاريها من اسبوع تقريبا ومن مدة يومين صار لها صوت يطلع من مناخرها وانت بكرامة وتطور الصوت وزاد وصارت مثل اللي عنده ربو صار الصوت يطلع من صدرها وبالقوة تتنفس وتفتح فمها لاجت تتنفس وعيونها ذبلانة وما ندري وش فيها بالضبط ياليت تساعدنا

وشكرا لك

ابو شيخة
16/08/2007, 12:34 PM
والله يا اخي المري انا ما عندي سؤل لاكن حبيت اشكرك على سعة صدرك ومعلوماتك الطيبة وجهودك المبذوله
وانت فعلن من اهل الخبرة والاختصاص في مجالك وكفيت ووفيت والله يزيدك علم وينور لك دربك وسامحني على الاطالة لاكن حبيت اشكرك من قلبي الصادق وتسلم .

اخوك ابو شيخة

المري
16/08/2007, 01:19 PM
مرحبا اخوي كورولا وحياك الله يالغالي..

بخصوص هذا المرض يمكن انه اوله زكام يصيب الطيور وتطور المرض الى التهاب في الرئة

فياليت انك توديها للمستشفى يفحصونها..

***

مرحبا ابو شيخة .. وحياك الله يالغالي..

اقول لك : لاشكر على واجب .. وهذا واجب علي في هذا المنتدى العريض وأعضاءه الطيبين

وانت رايتك بيضاء وبيض الله وجهك على هذا الكلام الطيب..

وان دل هذا يدل على طيبك وطيب معدنك ...

والله يحفظك ويرعاك..

اخوكم - المري

أبوسبيع
17/08/2007, 02:27 AM
السلام عليكم ورحمة الله
س1 :
الطير إذا كثر من الشحم ياثر في لياقة الطير.
س2:
متى ابتدي الوح لطير.
س3 :
اشلون اعرف إذا الطير عرفني يعني مايصيد وبعدين يكفخ
وسلامتك.

المري
17/08/2007, 07:14 AM
مرحبا ابو سبيع

اذا اكتسب الطير الشحم والعدة تحصله يتعب بسرررعةه وخاصة قبل موسم الشتاء..

جواب السوال الثاني:

لوح للطير اذا بداء الجو بالبراد.

بالنسبة لي لي حوالي اسبوع وانا ادعي .. وش رأيك!!!

اجابة السوال الثالث:

غير واضح

الرجاء التوضيح.

اخوك - المري

أبوسبيع
17/08/2007, 02:15 PM
لاهنت مشكور على التوضيح
والسؤال الاخير خلاص انا فهمته

فنجون
17/08/2007, 02:38 PM
بو معيض ويش علاج الطير المتنكل الضروب على احبارى من وجهت نظرك

ابو جلعود
19/08/2007, 04:06 AM
بكر , ثنو , تنكيس,

والشواهين متى مفروض تكون انها تامة فى الاصل يعني.

وشكرا

القرم 500
26/08/2007, 07:30 AM
السلام عليكم اخوي واستاذي المري سوال محيرني يختلف لون كف الطير ومخالبة شفت صورة لون كف الطير اصفر ارجو التوضيح

المري
26/08/2007, 08:00 AM
مرحبا اخوي فنجون..

بخصوص الطير المتنكل على الحبارى : ماله الا الجوع وفراعه وقت هدد الطيور على الحباري في الموسم

بعدين تهده مع طير صايد على حبارى ... ولا عاد ترويه الحمامه..

***
مرحبا اخوي ابو جلعود

بخصوص البحريات اذ جاء مقاسها 15 وطالع هذه مافيه جدال , اما 14 وتحت ماهيب تامة.

وسلامتك

*****

مرحبا القرم وحياك الله ...

صحيح تختلف لون كف الطير من طير الى اخر.. وأكثر قرانيس الهواء تجيك لونها صفراء من كثر ماتاكل

من العلف المشكل..

**

وسلااااااااااامتكم

اخوكم - المري

رآعي آلبآترول
26/08/2007, 11:32 AM
مساكم الله بالخير جميعا
يابو معيض الله يطول عمرك عندي طير حر وافي باقي فيه الموس والطويله ومن فترة وهو موقف ماحذف ولا غسل علما ان الطير فرخ وتراه حاذف العمد
وش الحل يابو معيض الطير موقف له اكثر من ثلاث اسابيع او شهر

نواف السبيعي
26/08/2007, 12:14 PM
السلام عليكم
انا ما عندي سوال لكن اقول يا اخوي المري
جزاك الله الف خير والله يعطيك العافيه على هالموضوع الطيب
(وانت طيب ومواضيعك اطيب).................

نواف السبيعي
26/08/2007, 12:17 PM
السلام عليكم
انا ما عندي سوال لكن اقول يا اخوي المري
جزاك الله الف خير والله يعطيك العافيه على هالموضوع الطيب
(وانت طيب ومواضيعك اطيب).................

نواف السبيعي
26/08/2007, 12:24 PM
السلام عليكم
اخوي المري
اعذرني انا كتبت الرد مرتين
لان حصل خلل في الجهاز ونسخ الرد

المري
26/08/2007, 12:30 PM
مرحبا اخوي نواف السبيعي.. وحياك الله

وخل الجهاز لو ينسخ الكلام عشر مرات .. زيادة خير..

وتسلم على المرور.

***

اخوي راعي البترول..

ان شاء الله طيرك على وشك يحذف هالأسبوع.. واكثر مايؤخر الطيور بعض الامراض تصيبها

وهي في المربط..

من كوكسيديا الى دود الى غيره..

خل الطير وان شاء الله انه بيحذف..

***

اخوكم - المري

القرم 500
26/08/2007, 07:46 PM
الله يعافيك يالمري

الصبحي
29/08/2007, 09:41 AM
السلام عليكم ورحمة الله وبركاته
الله يعطيك العافيه أخوي أبومعيض أبسئلك سؤال لو تكرمت ؟ كيف تعرف الشياهين أوشيهانه وهي طايره في الجو وما هي مواصفاته علماً بإن هناك انواع أخرى تغالط فيها مثل (الباز :البكه :الجليميه :ووووووووو)؟ ودائماً اشوف في وقت المقناص صقاره يرمون الزريق لها أذا كانت بعيده .
وتقبل مني كل الود والاحترام :: أخوك الصبحي

ـــ

المري
01/09/2007, 09:24 AM
مرحبا اخوي الصبحي..

بعض المرات اذا مرت الجليمية نحسبها شاهين الين نقرب منها او ندربل عليها..

وبخصوص الشاهين البحري الوافي يبين من حجمه ..

ويحصل فيه بعض التغاااالط بين الطيور وخاااصة تبوع الشواهين او الجبليات..

الله يحفظك ويرعااك..

اخوك - المري

فط فط
02/09/2007, 03:22 AM
اخوي المري اسلام عليكم ورحمة الله وبركاته اطتر

الساهر1
09/09/2007, 11:36 PM
السلام عليكم

الاخ المري الله يعطيك العافيه وكل من في المنتدى الغالي

السؤال /

اريد شرح كامل ومعلومات وافيه عن الجير بالنسبة
لاصله وهل هو فصيله مستقله عن الحرار والشياهين ام لا ؟
وكذلك فعله وهل جميع ما نرى من الجير تهجين ام هناك طيور مواكر
وكيف نفرق بينها ؟

عبدالرحمن 1
10/09/2007, 01:13 AM
هلا اخوي السنافي:

بالنسبة لسوالك عن اسماء اصابع كف الطير فهي:

اولا:

يوجد للصقر اربع مخالب وكل مخلب له اسم

المخلب الخلفي : يسمى ( التابع) وهو مايضرب الصقر به فريسته اي كانت او وين ماكانت في الارض او


طايره .

المخلب الداخلي : ويسمى ( العالف) لان الصقر اكثر مايساعده على مسك العلف هذا المخلب واذا وجدت

صقر مقطوع منه هذا المخلب فانه والله يتلعوز اشد التلعواز.


المخلب الوسطي وهو اطول اصابع الصقر: يسمى ( السنان) وهو يساعده في قبض الفريسه بعد صيدها

وهو مساعد للعالف ويساعده في الاتزان في الوقوف وخاصه اذا كان في السياره وفي مطبات فتظهر

فائدته في ذلك الوقت.

المخلب الخارجي : يسمى ( اللافح) وهو المساعده للتابع بحيث يضرب بها فريسته على جنب .

اذا ماتتضمن كف الصقر.
واللي يسمونه الصايد وين يكون اللي يقول فيه الشاعر <تلقا الفواد مظهره فوق صايده>

حر الشمال
10/09/2007, 06:10 AM
السلام عليكم ورحمه الله وبركاته
عندي سوال الله لايهينك
وش يعني الروباجه واسمحلي لاني ماعرف معنى هالكلمه الي سمعتها كثير من الصقاره
ولو اعرف كان ماسالت
اخوك حر الشمال

عبدالرحمن 1
11/09/2007, 01:58 AM
هلا بك يا اخوي مدام منت صقار انا مثلك مانيب صقار
بس اني بعلمك وشهي الروباجه هي طول الله عمرك
باقي العلف اللي ما يهظمه الطير من ريش وعظام وبلاوي
اذا تعشا الطير واصبح جدعها من فمه مجتمعه
ولك تحياتي

sss1000sss
11/09/2007, 03:08 PM
السلام عليكم ورحمة الله وبركاته
اخو المري الشاهد الله انك ماقصرت بشي وجعله الله في ميزان حسناتك
عندي موضوع بسيط او استفسار بسيط عندي طير فيه ضربه في زوره وديته للمستشفى وقالي خياطه لا كني هونت لان الطير غالي عندي ولا ابغيهم يتحرفنون في الطير وجلست اعالجه بخاخ مضاد حيوي +ايدين
توقعاتك هل يبرى جرحه ويطلع ريشه ولا هناك طريقه اخرى ولك جزيل الشكر وبيض الله وجهك

المري
11/09/2007, 09:55 PM
مرحبا اخوي الساهر1 وحياك الله

بخصوص الجير اليك هذه المعلومات :

يعتبر صقرالجير هو من اكبر انواع الصقور حجماً ووزناً واقواها شراسه وهو يعيش في المناطق الشماليه القطبيه من الكرة الا رضيه ولقد عرف صقر الجير من قل الصقارين في العصر العباسي وكتنوت يلقون عليه اسم (السنقر) وقاموا باستخدامه في الصيد كان المفضل لديهم عن باقي انواع الصقور وذلكلمقدرته على الصيد وكان يجلب من المناطق الشماليه البعيدة و في العصر الحالى عرفها الصقارون العرب من خلال اسيراده أو الذهاب في المناطق الشماليه مثل سيبريا
-----------------------------------------------------
صقر الجير يعتبر اكبر الصقور في العالم ويصل قياسه من طرف المنسر حتى حافه الذيل ال حوال 35سم ويصل متوسط وزن الذكر الى (1000 جرام ) وان كانت معظمها تتراوح بين ( 1500 - 1700 جرام ) وطيور الجير في مظهرها الخارجي تشابه المظهر العام (للحر)وان كانت تميل للضخامه وصقر الجير يكو جناحه قصيراً نسبياً لطول جسمه وليس هنالك شي يتفوق على سرعه طيران صقور الجير بشكل مستوفهي تصل وقت المطاردة الى سرعه (160 كيلو متر بالساعه )





من الصفات التى يتصف بها هذا النوع من الصقور والمنسر وكذالك عرض الصدر وقصر الجناح والذيل وسعه وضخامه الكفين وطول وعرض المخالب وبروز الحاجب فوق العيينين .
وصقور الجير لها ثلاثه ألوان مميزة وهي : الابيض والرمادي الداكن واللون الاسود فالابيض يعيش في المناطق ذات
الارتفاعات الشاهقه .أما اللون الداكن فيعيش في المناطق الجنوبيه الممتده .وتكون الافراخ من سلاله الصقر الجير الابيض بيضاء صدرها وظهرها يميل للسواد بشكل نقاط متناثره أو خطوط متوازيه وعند بلوغها سنتها الاولى وتبدل ريشيها يصبح لون أبيض تماماً أما منطقه الظهر فلا يبقى الريش الاسود الا قليلا على شكل خطوط جميله . أما السلاله السوداء من صقور الجير فلا يكاد يكون هناك فارق كبير من ناحيه اللون بين الصقر اليافع والصقر البالغ . اما السلاله الثالثه فيكون الفرخ من هذه السلاله لونه بنيا فاتحاً ويتحول عند البلوغ الى اللون لون رمادي فاتح تتخلله نقاط بيضاء ويكون مشابها لشكل الحر الجرودي مع بقاء اللون الرمادي الغالب على لونه ويزداد بياض صدره. وعلامات الصقور اليافعه من الجير تكون اجمالا شبيه بما لدى الصقور الحرارمن ناحيه لون جلد القدمين ومابين العينين والمنسر والقير ابيض مائلا للزرقه .
معظم سلالات صقور الجير تظل في مواطنها الشتويه ولاتهاجر فهي خفيفه الهجرة وتنتقل فقط في الاجواء الشماليه الاقل قساوة في الشتاء وتعتمد هجرتها او استقرارها على توفر الغذاؤء في مواطنها خلال فصل الشتاء القاسي شديد البرودة وتكون اماكن تكاثرها حول المناطق القطبيه الممتدة عادة فوق خط العرض 60 من اعالي الاسكا الي جرين لاند في منتصف الكرة الغربي ومن اسكندنافيا الى سيبريا في نصف الكرة الشرقي .
طريقه صيد الجير لفرائسه تتميز بالطيران السريع والقريب من سطح الارض للمساك بالفريسه ولا يميل الى حركات الانقضاض على الفرائس من مرتفعات عاليه وهذه المطارده تكيف عليها صقر الجيرفي موطنه وذلك ان فرائسه في الغالب هي طيور الحجل وطير الدرج لذلك فهو يحتاج الي الطيران القريب من مستوى سطح الارض لمباغتة فرائسه .
والجيرمن الصقور المفظله لدى الصقارين العرب وذلك لسرعتها وقوتها وحجمها الكبير فهى تتميز بشراسه الهدد حيث انها في مكان وجودها في المنطقه القطبيه وحيث ان النهار قصير تعتمد مراقبه كل شي يتحرك امامها لتهد عليه وتقوم بافتراسه .
ولكن هنالك مشكله تواجه الصقارين وذلك بحكم كونها صقورا قطبيه فإنها لاتستطيع التأقلم والعيش لفترات طويله خارج موطنها الطبيعيه التى استوطنت وتربت فبها .. أما من الناحيه الصحيه وقوه المناعه لديها فهي لاتلبث أن تصاب بألامراض الشائعه فهي لاتتحمل الطقس المعتدل والذي يسبب ازعاجا بسيطا لصقور الشاهين والحرار في الايام العاديه .
وغالبا ماتموت صقور الجير بسرعه لدى تعرضها مباشرة لشمس الصحراء في وقت الظهيره وذلك لعدم تأقلمها على حراره الشمس وعلى طبيعه الجو في الصحراء ولكن لو توفرت لها الاجواء المناسبه التى استوطنت فيها لكانت هي الصقور التى تراها على ايدي الصقارين في كل مكان ولكن الاجواء في منطقه الخليج والتي تميل للحراره فهي لاتلأئم بقاء الجير الجير وماومته للأمراض مما نلاحظ ان اكثر الصقور المصابه والمريضه التى ترد الي مستشفيات الصقور هي طيور الجير .
وكثير من الصقارين من حدثنا عن صقور الجير وشراهتها في الهدد وكثره التهامها للغذاء بحين انه احيانا يعطى حمامتين ويقوم الصقار باطلاقه على الحبارى في اليوم الاخر ويقوم بصيدها


هذه المعلومات منقولة من موقع مقناص البادية من اخوي سعيد المري..

****


مرحبا اخوي عبدالرحمن

الصايد المقصود به التابع اللي يضرب به الصيد..

****

اخوي حر الشمال

بيض الله وجه اخوي عبدالرحمن وترى عطاك الجواب الصحيح..


***

اخوي ssssss100

خلهم يخيطونه المستشفى علشان يتخايط ويبرى بأسرع وقت بأذن الله..

تراها احسن شي..

***

وسلااااااااااااااااااااااااااااااااامتكم

ومبروووك عليكم شهر رمضااااااااااااااااااااان

اخوكم - المري

عبدالرحمن 1
12/09/2007, 01:39 AM
اخوي المري وجهك ابيض وتسلم
عندي سؤال ثاني الله يطول لي عمرك
وهو <الشرق> وش يكون من
الطيور لاني سمعت شاعر يوصف
رجم ويقول:مدهال طفقات الشروق
المحاذيف>وبدر الحويفي يقول:
<شرق ووصايفها تواصيف شيهان>
ارجو الا فاده ولك مني جزيل الشكر

صحراوي uae
12/09/2007, 07:27 AM
الله يجزيك الخير.....
أخوي عندي طير ماشاء الله عليه. . قنصة به وبعد المقناص الطير سومر وأدخلتة المستشفى وكمل أكثر من 40 يوم بالبرقع . . . والطير الحين يكره شيء أسمه برقع أو يشوفه ومن يشوف البرقع يخافق ولايصك. . ولا أعرف له حل ...؟ فيدنا الله ينفع بعلمك ........

عبدالرحمن 1
14/09/2007, 01:59 AM
اخوي المري وجهك ابيض وتسلم


عندي سؤال ثاني الله يطول لي عمرك
وهو <الشرق> وش يكون من
الطيور لاني سمعت شاعر يوصف
رجم ويقول:مدهال طفقات الشروق
المحاذيف>وبدر الحويفي يقول:
<شرق ووصايفها تواصيف شيهان>

ارجو الا فاده ولك مني جزيل الشكر
وينك يا المري

المري
14/09/2007, 11:23 AM
مرحبا اخوي صحراوي ..

وحياك الله يالغالي..

بخصوص الطير حاول انك تبعد انه البرقع الين يهدا وهذا هي مشكلة الكثير من العيادات البيطرية اذا

دخلت الطير عندهم تحصل فيه الصياح , والمكافخ ووو

حاول تروضه على البرقع .. وحاول تقلل تلبيسه للبرقع ..

***

اخوك عبدالرحمن1

الشرق !!!! مافهمت وأول مره اسمع عن هذا !!!1

ياليت اذا فيه احد من الربع يعرف يجاوبك..

وسلامتك

اخوك - المري

عبدالرحمن 1
14/09/2007, 07:47 PM
اخوي المري الله يسلمك فيه نوع من الطيور
يسما شرق بس انا مدري وشهو اسمعه دايم
في القصيد يقول بدر الحويفي:من يوم جهال الولع جالهم ذوق اللي يحسبون البواشق شروقي>ويقول واحد شمري يوصف سرعة سياره::اوحاف شرقن هاوين من نباوه>
المهم انت ماقصرت وبيض الله وجهك ولك مني كل التقدير والود

حر الشمال
14/09/2007, 11:06 PM
اخوي عبد الرحمن1 بيض الله وجهك كفيت ووفيت
اخوي المري يعطيك العافيه

حر الشمال
14/09/2007, 11:07 PM
عندي سوال الله لايهينكم
وش يعني وكري الحرار
ناس قالو لي انه مهجن بين وكري وحر وناس قالو لي انه حر بس فيه مدامع مثل الوكري على شان كذا سموه وكري حرار
وسلامتكم

المري
15/09/2007, 09:40 AM
مرحبا حر الشمال:

وكري حرار هو اللي مقاس مقاس الحر ومدعج وراسه احمر هذا يقولون : وكري حرار

بس اشوف مالها داعي !!!

الساهر1
16/09/2007, 04:03 AM
بيض الله وجهك يالمري

الزاجل الازرق
16/09/2007, 06:43 AM
اهل الشمال يسمون الوكري شرق

وسلامتكم

حر الشمال
17/09/2007, 12:20 AM
بيض الله وجهكم
اخوي المري وش الي ماله داعي؟ السؤال تقصد
انا قلت لك حيروني ناس قالو لي مهجن بين حر ووكري
وناس قالو لي حر بس له مدامع مثل الوكر
وسلامتكم

المري
17/09/2007, 01:52 PM
لا .. ماهوب السؤال اللي ماله داعي !!! قصدي اللي مقاسها 17 ويسمى وكري !!!

بس هذا اللي عندي

وسلامتك

اخوك - المري

#الفارس#
19/09/2007, 02:22 AM
السلام عليكم
مشكور اخوي المري على جهودك
وكل عام وانت بخير ومبروك عليكم الشهر
السؤال الاول
انا ودي اعرف وشي المثلوثة والتبع ووش الفرق بينهم
وهل التسمية هذي بس يقولونها للطيور الحرار ؟
السؤال الثاني
وش معنى نقل الطير ؟
ومشكور وما قصرت

ابو جلعود
19/09/2007, 06:13 AM
الله لا يهينك يا المري ولا يسفهك بيض الله وجهك على المجهود الطيب

ابو معيض عندي سؤالين وطلب الله يجزاك خير :

س/ في بعض الردود لقيت كلمات مافهمتها ياليت توضحهاوهي( وراسه يابس ونزر وصلف ).

س/ ياسر التويجري يقول لجى اللزز والملاقا والقبس وش معناه..؟

اما الطلب يالذيب الامعط هوو
ابي صور للبحريات والجبليات

والله يجزاك الف خير وبيض الله وجهك .

محبك ابو جلعود.

المري
19/09/2007, 12:42 PM
مرحبا اخوي جلعوود:

الشاعر ياسر التويجري يقول:


والشاعر اللي معه عزوة خوال وعمام
.................... تفداه وايل وترقب مستعده مطير
35
والله فلا ينقهر والا يضيق ويظام
.................... لا جا اللزز والملاقا والقبس والنذير

الله العالم ان اللزز والملاقا والقبس والنذير : كلها في معنى الحرب والغارة .. مااتوقع انه لها معنى

في الطيور او انه يقصد (( اللزيز))

****

معنى ( راسه يابس ونزر وصلف) يعنى راسه قوي ولا ينصقر براحة.. واذا اقبلت علي قام يكفخ كفخ الشر.

***

وسلامتك

اخوك - المري

#الفارس#
19/09/2007, 03:02 PM
8
88
888
8888
88888
888888

اخوي المري

الله يهديك ما جاوبت على اسئلتي فوق
اخوك الفارس

حر الشمال
19/09/2007, 03:12 PM
السلام عليكم ورحمه الله وبركاته
اشحالك اخوي المري
الله يسلمك
واحد من الربع عنده طير وفيه حفاه
بس بغيت اعرف مرض الحفاه خطير؟؟؟؟
وهل له علاج
ووش هو علاجه
تحياتي

ابو جلعود
21/09/2007, 05:37 AM
الله لايهينك يا ابو معيض على التوضيخ والله انك اجودي ولا قصرت معنا ..

عندي بعض الاسئله جعلك في الجنه ووالديك ومن يقرا:

س/ اسمع دايم عزل الحبارى عزل الكراوين فوش معناها.؟
س/ وسرت الطير , ثندوة الطير , الروباجه
س/ وش لون افرق الخرب عن الدجاجه في غير كبر الحجم.؟
س/ وش لون افرق بين البحريه والجبليه .؟
س/ الافضل للمبتدء فرخ وحش ولا قرناس ولا وش الافضل .؟
وشكرا .

ابو جلعود
23/09/2007, 06:14 AM
السلام عليكم ورحمه الله وبركاته

ابو معيض وينك الله يجعلك تسلم.

VT 4800
23/09/2007, 07:39 AM
السلام عليكم عندي سؤال يا جماعه بخصوص الشاهين انا جتني هدو شيهانه عمرها قرناس سادس تصلح للصقاره ولا قضى الوقت عليها انطر الرد لله لا يهينكم

المري
23/09/2007, 08:48 AM
مرحبا اخوي الفارس وحياك الله يالسنافي , واسف على التأخير:
انا ودي اعرف وشي المثلوثة والتبع ووش الفرق بينهم
وهل التسمية هذي بس يقولونها للطيور الحرار ؟
السؤال الثاني
وش معنى نقل الطير ؟

المثلوثة : هي مثلوثة الشياهين وهي بين التبع والوافية..

التبع: هي تبع الشياهين ويأتي مقاسها صغير من 13 الى 13 ونص

اما نقلة الطير : انك تشيل الطير من المربط ( المقيض) هذه يسمونها نقلة الطير
بعد المقيض وفيه معنى اخر انك تنقل الطير على كفك حتى انه يرب ويستأنس عليك.

وسلاااااااااااامتك اخوي الفارس.

***************

مرحبا اخوي حر الشمال وحياك الله ..

بخصوص الحفاة:
تصاب باطن القدم الصقر بتغير ربما يكون واضحا منذ بداية حدوثة بأنواع الاصابات المختلفة . من الحالات هذه تبقى القدم متحفظة بمظهرها الطبيعي الخارجي وبدون أدنى وجود لورم أو أنتفاخ أو شعور بالألم من قبل الصقر ولكن تبقى هنالك دائرة من الجلد الصلب الداكن اللون تتوسط باطن القدم حيث يكون حافات هذه الدائرة المتقرنة بالتقائها مع باقي اجزاء باطن القدم التي لم تتاثر طبيعة الجلد فيها منطقة ضعيفة رقيقة وسهلة الاختراق من قبل الجراثيم المرضية وهذه الحالة التي يطبق عليها الصقارون تسمية الحفاه (منقول).

***********

مرحبا اخوي جلعود...

س/ اسمع دايم عزل الحبارى عزل الكراوين فوش معناها.؟
ج / عزل الحبارى: اذا صاد الطير الحبارى وانت تبغاها حيه تجيب لك قطعة لحمه ويفضل ثنداه حمامه
وتضعها تحت الطير علشان يأكل من اللحم ويخلي الحباري وانت تسحب الحبارى من االطير .

س/ وسرت الطير , ثندوة الطير , الروباجه
ج / وسرت الطير هي الشكل الخارجي للطير من راس وكف وجناح ومنخر وعين الخ..
ثندوة الطير هي صدر الطير او بمعنى اصح منحر الطير ..
أما الروباجة : هي باقي العلف من العضام والريش والجلد اذا علفت الطير واكل الصيد يستفيد من لحم
الصيدة اما الريشة والجلد والعضام يرجعها عن طريق الفم في بعد حوالي 14 ساعة وهي تنفع الطير في
التنظيف ( تنظيف القانصة).
س/ وش لون افرق الخرب عن الدجاجه في غير كبر الحجم.؟
ج / الخرب من غير الكبر يجيك له مايسمى ( بالعرف ) وهو مثل الجدايل وتختلف من خرب الى خرب اخر
ويجيك الخرب في رأسه بياض .. وراسه يجيك كبير ..
س/ وش لون افرق بين البحريه والجبليه .؟
ج / الجبلية يجيك مقاسها صغير ولونها مختلف وهي بالممارسة.
س/ الافضل للمبتدء فرخ وحش ولا قرناس ولا وش الافضل .؟
ج / الفرخ افضل له من الوحش لان الفرخ يستأنس بسرعة على صاحبه.

المري
23/09/2007, 08:49 AM
مرحبا اخوي vt 4800

بخصوص قرناس سادس او سابع .. تصلح للصقاره واذا هي طيبه بالطيار مايتغير عليها شي

بس اهم شي ادعها وعطها حقها..

وسلااامتك

اخوكم - المري

الزئبق الاحمر
23/09/2007, 11:35 AM
اخوي المــري /

السلام عليكم ومبارك عليك وعلى العضاء الكرام باقي الشهر

واشكرك كل الشكر والتقدير على الموضوع الجميل والهادف



عندي سؤال بسيط وهو

المهجن وش رايك فيه وهل صحيح ان كل سنه اردا من الي قبلها في طياره خاصه ؟

وتقبل تحياتي /

اخوك / الزئبق الاحمر

المري
23/09/2007, 11:38 AM
مرحبا اخوي الزئبق الأحمر.

بخصوص المهجن بالعكس كل سنة اسبق او على اطياره الطيب, وبعض المهجنات فرخ مايعرف يطير

واذا قرنس بكر تحصله يطير اطيار زين..

هذا رأيي

اخوك - المري

a7a7
23/09/2007, 07:49 PM
السلام عليكم ورحمة الله وبركاته

اخوي المري عندي كم سوال

اول سوال وشلون اخلي طيري يعرفني

وكيف يجي على يدي وانا بعيد عنه

وكيف ادربه على الصيد اذا كان وكري او شاهين

وعن طريقت اطعامه من اللحم والماء

واقدر احطه في اي غرفه في البيت ولا لازم مكان مخصص

الف999
23/09/2007, 08:38 PM
هل اشنذر الطير اول مطلعه من الربطه ولا ادهله وشكرا

VT 4800
23/09/2007, 08:52 PM
كفو يالمري وبيض الله وجهك

ذيب السرايا
24/09/2007, 02:31 PM
السلام عليكم ورحمة الله وبركاته ، أرحب ياخوي المري ماشاء الله على سعة الصدر عندك
عندي سؤال الله يعطيك العافية ، كيفيت تدريب الوكري على الملواح بالتفصيل، هل هو مثل تدريب الشياهين .

ذيب السرايا
24/09/2007, 02:59 PM
يالربع ترا التوقيع ماهوب لي خذيت الأسم من واحد أعرفه والبريد الأكتروني .

حر الشمال
24/09/2007, 03:18 PM
كفو يالمري قدها وقدود
جزاك الله خير وبيض الله وجهك

المري
24/09/2007, 03:58 PM
مرحبا اخوي:

اول سوال وشلون اخلي طيري يعرفني

اذا بغيته يعرفك خلك ناقلة على طول وخله يعلف من يدك ويستأنس منك.


وكيف يجي على يدي وانا بعيد عنه

صحيح يجي على يدك لو كنت كيلو بس يبغى له تدريب اشوي.


وكيف ادربه على الصيد اذا كان وكري او شاهين

اذا بغيته يصيد الصيد جيبها حيه وحط له لحمه فوق ظهر الصيد واذا اكل كم لقمة
شيل العلف بطريقة خفيفه وهد له الصيد وان شاء الله انه يعلم.


وعن طريقت اطعامه من اللحم والماء

بخصوص الماء خله قدامه وهو راح ينز ل ويشرب اما اذا كان وحش حطه في
فنجال وحرك اصابعه واذا نزل راسه وجد الماء بتشوفه سبحان الله يشرب من
الماء


واقدر احطه في اي غرفه في البيت ولا لازم مكان مخصص

صحيح تقدر تحطه في غرفة بس خله في مكان يعتاد عليه.


وسلاامتك

اخوك - المري

المري
24/09/2007, 04:00 PM
مرحبا اخوي لف 999

ااذا طلعتها من الربطة نزل عدته شوي بسيط وقبل الشناذره بليله عشه عشاء طيب.. ومن بكره الليل شنذره..

وسلاااامتكم

****

مرحبا ذيب السرايا وحياك الله يالسنافي..

اذا طيرك وحش علمه كيف ينقز على يدك واذا نفز على اليد حط له العلف في الملواح وثم بعده متر وخله يطير ويوقع على الملواح

وياكل العلف اللي فيه وخلاااص بعد المسافة الين يجيك على بعد كيلو يبغى الملواح والعلف اللي فيه.

وسلامتك اخوي ذيب السرايا

وياليت تزور هالموضوع:
http://www.mekshat.com/vb/showthread.php?t=105037

الف999
24/09/2007, 07:01 PM
الله يجزك خير يا لمري على جهودك الجباره

عاشق الحرار
25/09/2007, 02:23 AM
السلام عليكم عندي استفسار الله لايهينك عندي طير ماعاد يرتفع فحصت عليه وقالي المستشفى ان فيه ريه بس مهوب انوع المزمن فا ياليت تفيدني؟

المري
26/09/2007, 09:22 AM
مرحبا اخوي الف 999 وتسلم وماسويت الا الواجب..

**

اخوي عاشق الحرار حياك الله يالغالي..

بخصوص الطير اللي مايرتفع في احدى الاسباب هذي:

1- اما انه تفريخ ماعلم على الأرتفاع.
2- اما انه معه في الظهر عوار مايخليه يرتفع.
3- اما معه كوكسيديا لانها ماتخلي الطير يرتفع.
4- اما انه ضعيف.. او معه مرض مايخليه يرتفع.

وسلاااامتك..

شف المستشفى اذا عطاك علاج عطه واذا خلص ادع الطير حاول في الين تشوف نهايته..

a7a7
27/09/2007, 02:07 AM
السلام عليكم ورحمة الله وبركاته

اخوي المري عندي سوال واسف على تكرار الاسئله بس تعرف مبتدى

اخوي انا يمكن اشريلي وكري وحش وشلون ادربه بشكل عام

وشاكرلك جهودك

اخوك

a7a7

ابو جلعود
27/09/2007, 06:44 AM
السلام عليكم ورحمه الله وبركاته اخوي واستاذي ابو معيض عندي مجموعه اسئله وارجو انك تستحملني:

1- الله لايهينك ابي طريقة شبك الطير يعني اذا لبس الحمامه او السمانه الشبكه وش اسوي .

2-وطريقة ربط السبب في الطير وش لون بضبط.

3- ونوع الحمام المستخدم لتدريب الطير .واذا ما اثقل عليك ممكن صوره له.

4- والفرخ لازم يصير وحش وهل القى فروخ ميب وحوش ..؟

5-وطريقة تعليم الطير على الملواح ..؟ هل اني اخلى خويي يهد الطير وانا الوح له وبسبب ولا مايحتاج ولا وش العلم.

اخيرا وش الاشياء الي اتجنبها وقت شراء او نقوت الطير يعني .؟

وانا اعتذر على كثرت الأسئله لاكن الله يجعلها في موازين حسناتك وبيض الله وجهك.

وشكرا

المري
27/09/2007, 09:00 AM
مرحبا اخوي a7a7

بخصوص دريب الوحش .. ياليت ترجع للأجوبة السابقة تراه الشرح مووجود اكثر من مره..

واسف طال عمرك..

**********
مرحبا اخوي ابو جلعود وحياك الله ..

1- الله لايهينك ابي طريقة شبك الطير يعني اذا لبس الحمامه او السمانه الشبكه وش اسوي .
1- اذا لبست الحمامه الشبكة حاول انك تجي عند وجه الطير ولا تقرب منه واجد علشان مايطير ويجفل
بعدين نزل الحمامه او السمانه وحرك على طول.. وابعد من الطير ودربل عليه واذا شفت طار للحمامه
أنتظر لحظات مثل دربل على الحمامه شف ااذا صادها اقرب منه وان شاء الله ان تصيده.

2-وطريقة ربط السبب في الطير وش لون بضبط.
2- السبب طريقتين : في ناس يربطون راس السبب في الوكر ومن ثم يدخله من عند المرسل وعقبه يمدها
الى ان يوقف السبب , حتى اذا دعاء الطير وبغى يجنب على الداعي مايقدر .
والطريقة الثانية: يربطه في جرير الطير ويدعيه.

3- ونوع الحمام المستخدم لتدريب الطير .واذا ما اثقل عليك ممكن صوره له.
3- نوع الحمام المستخدم لتدريب الطير هو الحمام العادي ارخص شي في السوق .. صورته مايحتاج صوره

4- والفرخ لازم يصير وحش وهل القى فروخ ميب وحوش ..؟
4-صحيح تحصل فروخ ماهيب وحوش مفرخه في الأسر .

5-وطريقة تعليم الطير على الملواح ..؟ هل اني اخلى خويي يهد الطير وانا الوح له وبسبب ولا مايحتاج ولا وش العلم.
5-صحيح خويك خله يأخذ عن برقع الطير وانت تصيح بالملواح.. واذا مامعك خوي خله على وكره واخذ برقعه معك. ورح بسرعة وادع الطير.

اخيرا وش الاشياء الي اتجنبها وقت شراء او نقوت الطير يعني .؟
انتبه لايكون الطير مريض من حفاة ولا سومار ولا ارداد .. حاول ان الطير سليم
ايضا ريش الطير يمكن فيه ريش مايظهر او متكسر .. المهم عليك بالطير الصاحي..

ابو جلعود
27/09/2007, 09:53 AM
صبحك الله ابو معيض بس ما قلتلي جعلك تسلم الملواح بسبب ولا بدون سوال رقم 5 يعني ادعيه على الملواح بسبب.

ابو جلعود
27/09/2007, 09:54 AM
والله لا يهينك


اخوك ابو جلعود...

al-ganas
27/09/2007, 05:20 PM
جزاك الله خير أخوي المري على الموضوع ومثل هذا الموضوع يفيد المبتدئين مثلي فلك جزيل الشكر
أخوي المري كثر الكلام حول الشنذرة برايك ماهي أفضل طريقة للشنذرة؟
أخوك:al-ganas

المري
28/09/2007, 08:22 AM
مرحبا اخوي القناص وحياك الله يالسنافي .. وتسلم وماتقصر..وحاضرين للطيبين.. وترى مكشااااات غااااالي عندي..

هذا مشاركة لأخونا ولد حاااايل اشوفها مناااسبة جدا وصادرة عن صقار له خبرة طويلة في الصقارة:

http://mekshat.com/vb/showthread.php?t=105749

وسلاااااامتكم

اخوك - المري

a7a7
28/09/2007, 09:54 PM
اخوي المري عندي سوال الله يعطيك العافيه

والي هو فيه محلات اقدر احط طيري فيها غير وقت المقيض

جاني حاجه خارج البلد مثلا احطه عند هذا المحل وارجع واخذه

اذا كان عندك خبر ياليت تحط عنوان المحل

وجزاك الله خير

اخوك//a7a7

المري
29/09/2007, 10:00 AM
ماعندي خبر .. طال عمرك..تروح وترجع بالسلامة

ذيب السرايا
29/09/2007, 05:04 PM
الله لايهينك ويطول عمرك ياخوي المري ، والمعذرة على التأخير لي حول ثلاث أيام مادخلت الموقع.

الف999
29/09/2007, 06:48 PM
س 1هل الشناذر تظر ريشه الطير اذا الموس ما صك
س2 عندى طير حر روسي طلعته بشمس الصبح نص ساعه وطلع دم من منخر الطير
وشكرا

الف999
30/09/2007, 02:34 AM
وينك يا لمري نبى لفزعه

المري
30/09/2007, 11:05 AM
مرحبا اخوي الف

بخصوص ريش الطير .. اللي يضره الضعفه.. يثر على سوق الموس ..

اما الشناذرة .. دائم اشنذر اطيوري وامواسها نص وتسوق الين تصك !!!

**

أما بخصوص الدم اللي طلع من منخر الطير.. ! غريبة ماادري وش فيه..؟؟

ابو جلعود
04/10/2007, 06:16 AM
اخوي المري

هل القرناس الخلوي يشنذر ام لا

المري
04/10/2007, 08:03 AM
صحيح يشنذر حتى بعض الفروخ اذا شنذروها تقطع اعبر من قرناس البيت.

وسلاامتك

اخوك - المري

عواض
04/10/2007, 03:34 PM
ابو معيض , بيض الله وجهك عزالله انها من عوايدك وطيب اصلك حب الخير ومساعدة الاخرين

الله يحفضك ويوفقك.

المري
04/10/2007, 03:44 PM
هذا من طيب اصلك اخوي عواض..

وتسلم وماقصرت...يالغالي...


اخوك -بومعيض

taag1
04/10/2007, 04:39 PM
السلام عليكم عندي سؤالين لاهنتو...
1- هل لمرض الصرع درجات يعني يجي قوي ويجي خفيف .....؟؟؟؟
2- وش المرض اللي يصيب كفوف الطير من تحت وهل له علاج مادري حفاه او جدره....؟؟؟

حر الشمال
05/10/2007, 03:55 AM
صبحك الله بالخير ياخوي المري بخصوص الطير الوحش الي قلت لك عنه الحين الحمد لله ترك المكافخ وصار راكد بس صار له ثلاث ايام مايقبل العلف او اللحم في واحد من الربع قال عادي لانه وحش .
والطير مايقبل ياكل بالمره وش رايك اخوي ابو معيض هل هو عادي ولا كيف ان شاء الله تفيدني

عبدالرحمن 1
05/10/2007, 06:20 AM
السلام عليكم ورحمة الله وبركاته
اخوي المري اسئل الله ان يمنحك الصحه والعافيه وان يغفر لك ولوالديك ويعلم الله انك فخر وتاج لمكشات تقبل اعجابي وتقديري
اخوك عبد الرحمن

الف999
10/10/2007, 02:03 AM
عندى سؤال يا لمرى
عندى حر مقاسه 17 17 كم الوزن المفروض وقت الهدد علمن انا وزنه حاليا 980

الف999
10/10/2007, 08:47 PM
وينك يا خوى المري عطنا من وقتك كل يوم ساعه

VT 4800
11/10/2007, 01:32 PM
السلام عليكم يالربع ابي فزعتكم بمعلومات بسيطه ابي فروخ الشاهين اذا جت تفريخ تفعل ولا ماتسوى نقلتها شاكر لكم ناطر ردكم بأحر من الجمر

((الخالدي))
11/10/2007, 10:00 PM
الله يوفقك يابو معيض

الف999
14/10/2007, 11:56 AM
وينك يا ابو معيض

ذيب السرايا
14/10/2007, 04:19 PM
وش أنواع الوكارا.

naimsha
14/10/2007, 06:55 PM
كل عام وانتم بخير وجعلنا الله واياكم من المعتوقين من النار.
أعزك الله اخي المري علي المجهود الكبير ودمت نافعا,
أريد ان اسالك عن فراخ الصقور حيث لاحظت انها لا تتحمل اكل لحم الدجاج فهو يتعبها, وكذلك لي طير قد توعك العديد من المرات بعد اكله للاعضاء داخليه للحمام(كالكبد والقلب) رغم انه طازج وسليم. والبعض ياكل العظام الصغيرة الموجودة في فخذ فراخ الحمام.اعرف ان حالة اكل العظام تحصل عند الكثير من الطيور الاخري جراء نقص في الكالسيوم او الفسفور او الاملاح فحاولت ان انوع الغذاء
ولاكن لا فائده, ارجو المساعدة
أخوكم نعيم من ليبيا

خيال الصبحا
15/10/2007, 01:52 AM
الأخوة الأعزاء
كل عام وانتم بخير
ترى الموسم موسم مقناص
والعبور بدأ ، لذلك أرجو أنكم تطولون
بالكم على اخونا المري ، جزاه الله خير محتسب
ويرد عليكم بالشيء الي يعرفه ، فلا تستعجلونه بالرد(لان
الرد يحتاج اعدد وكتابه)هذا الي احب انوه له ، وشكرًا

بوعوف النصر
15/10/2007, 05:03 AM
اشلونك يا بومعيض عساك بخير بس الله لايهينك عندي مشكلتين ويا الطير اول مشكله اشوف حشرات كثيره في ريشه وي اعمل وياها وثاني شي انا كل يوم اعشي الطير ماله نفس يا كل والطير ناقض وذا كل كل شي بسيط بس ابغي الحل وياه الله لا يهينك

المري
15/10/2007, 09:51 AM
مرحبا بالاخوان جميعا , وحياكم الله..

بخصوص طيرك ابن عوف .. مر بطيرك على المستشفى .. لان هذه الحشرات ماتخلي الطير يصير

صنيع..

*******
مرحبا اخوي تاج , بخصوص اسئلتك اليك الجواب:
1- هل لمرض الصرع درجات يعني يجي قوي ويجي خفيف .....؟؟؟؟
ج1- صحيح فيه شي قوي وشي خفيف , بس الخفيف عادة
يزيد ويصير في درجة القوي.
2- وش المرض اللي يصيب كفوف الطير من تحت وهل له علاج مادري حفاه او جدره....؟؟؟
ج2-اللي يصيب رجل الطير حفاه واذا تطور يصير سده وذيك الساعة
علاجه صعب جدا..
بخصوص العلاج : افضل شي الرمل في وجه العدو , تقيضه على رمل
وان شاء الله انه يبرأ

***
وسلااامتكم

المري
15/10/2007, 09:54 AM
مرحبا اخوي حر الشمال وحياك الله .. واسف على التأخير..

بخصوص طيرك يوم أنه مايأكل احدى امرين:

يمكن علشان انه وحش او معه أقلاع وهي فطريات تصيب الطير من داخل ماتخلي الطير يأكل العلف..

مر على المستشفى او اخذ له حبوب اقلاع..

وسلاااااااااامتك

اخوك- المري

المري
15/10/2007, 10:12 AM
مرحبا اخوي الف 999

وحياك الله يالغالي..

ماادري كم الوزن اللي يهد عليه طيرك ؟؟!!!

شف الوزن اللي اطياره عليه زين ونفسه على زين هذا هو وزنه الصحيح..

وسلااااااامتك

اخوك - المري

****

مرحبا اخوي نعيم من ليبيا وحياك الله..

صحيح الكبد هي مجمع اكثر الامراض وحاول انك ماتعطيها الطير..

واذا الطير عنده نقص فيتامين او اي شي من هذا القبيل فيه حبوب لزيادة نسبة الكالسيوم او ماشابها استخدمها مع طيرك..

وسلاااااااااامتك

اخوك - المري

الحر01
15/10/2007, 10:41 AM
اهلن وسهلن بالاخ العزيز المري كيف حالك طال عمرك عساك مرتاح لوتسمح تضيفني بالخاص عندك عندي بعض الاسئله عن الصقاره اذا ممكن هذا ايميلي turki_0000اربع اصفار وشكرن والله يرزقك الحبارى وشكرن لك ولمواضيعك الشيقه والمثيره انا على الهوت ميل

المري
15/10/2007, 11:26 AM
مرحبا اخوي الحر وحياك الله يالسنافي..

بصراحة أبغى اقولك شي .... بخصوص الماسنجر ماعندي !!!!!

برسل لك رسالة على الخاص..

taag1
16/10/2007, 05:56 AM
الله يبيض وجهك يابومعيض نورتنا الله ينور دروبك لاهنت يالقرم ....

المري
16/10/2007, 08:22 AM
حااااااااضرين اخوي تاج

ونفرخ لخدمة اللي مثلك وشرواااك..

اخوك -المري

الف999
24/10/2007, 12:28 AM
اخوى المرى عندى سؤال وارجوا الجواب عليه

عندى حر قرناس خلوى دهلته ودعيته على الحمام بس ودى اعلمه على الملواح وابغى الطريقه الصحيحه لتعليمه لملواح

وشكرا لك

ابو جلعود
24/10/2007, 02:07 AM
مساكم الله بالخير جميعا

اخوي المري وشلونك عساك طيب .

عندي سوال الله لا يهنك

عندي شيهانه قرناس بكر ما تخليني امس عليها عجزت عنها

ان قربت وحطيت يدي عليها فحت وقرطت يدي لين اذنت

الحين يدي غدت كنها مشخله الله يجيرك وش الحل .؟

وشكرا.؟

ابو جلعود
26/10/2007, 03:51 AM
السلام عليكم ورحمه الله وبركاته

اخوي المري عسى ما شر ابطيت علينا جعلك ما تبطي على من يغليك

عسى الي رادك خير ان شاء الله

بو هاشم
28/10/2007, 08:39 AM
السلام عليكم
اخوي المري عندي مشكله بسيطه مع الطير وان الطير راكد في النقل وكل شي بس المشكله لا شاف البرقع يجن جنونه يقعديكفخ ايش العمل معه الله يرضى عليك

@قرناص@
29/10/2007, 11:03 AM
السلام عليكم..

بغيت اسئل,, الشرياص او الشبوط.. يصيد الفري واليمام؟

وليش يا الصقاقير تنكرون فعولهـ؟

بعدين الشبوط من الباز؟
ارجو سرعة الرد

اسف على ....

وشكرا

عاشق الطير

صقر عتيبه
29/10/2007, 05:04 PM
السلام عليكم ورحمة الله وبركاته
بغيت أستفسر عن أفضل الصقور للمبتدئ هو الحر أم الشاهيين أم الوكري؟وتراني طالب جامعي مكافئتي لا تتعدى 1000وش الطير الي يصلحلي (على قد حالي)؟
أفضل الشواهين البحريه أم الجبليه؟
كيف أعرف الطير طيب ولا لا؟

ابو جلعود
31/10/2007, 02:28 AM
اخوي المري شكلك بطلت الشغله كلها جعلك تسلم.

..........؟

VT 4800
31/10/2007, 05:57 AM
السلام عليكم اخوي ابو معيض سؤال للطير الخارب والتالب هل له علااج لانه يخبط ويكوش وينقز بالوجه هل له حل ولا خلاص ناطر منك الرد الله لا يهينك

الفوار2008
31/10/2007, 02:13 PM
السلام عليكم اخوي ابومعيض


عندي شيهانه من مكافخها انكسر من الجناح ريشتين الثالثه والرابعه او الثانيه والثالثه يعني طول الاصبع تقريبا وش رايك وش اوقف عن الهداد او اهد لين يحصل لي اوسر

بو هاشم
06/11/2007, 07:49 AM
وينك يا المري تاخرت علينا
لايكون تكبرت علينا

المري
06/11/2007, 08:36 AM
VT4800

مرحبا اخوي وحياك الله يالغالي..

بخصوص الطير اللي يكوش والله انها مشكلة وحلها صعب جدا ..

يبغى لها وسعة بال

******

مرحبا اخوي ابو العبدي ..

الا هدها الين توسرها .. لاتخليها من الدعو...

علشان ماتفقد بعض من اللياقة..

****

مرحبا اخوي بوهاشم وحياك الله..

حاول تحط له في البرقع علف (لحم ) وتخليه يعلف منه دائما اشوي اشوي وان شاء الله تنفع معه هالطريقة.

****

مرحبا اخوي ابو جلعود..

بخصوص الطير اللي يقرط والله ماادري وش حله .. ؟؟!!!!

****

حياك الله ياصقر عتيبة

بخصوص الطير للمبتدى هو الجبلية او الوكري .. هذا احسن شي..

******

مرحبا اخوي قرناس

بخصوص الشبوط صحيح يصيد الفري

وهو ماهو من فصيلة الباز.. الباز لحاله والشبابيط لحالها..

****
مرحبا اخوي الف 999

بخصوص طريقة تعلوم الطير على الملواح ..سهله جدا

بس ياليت تراجع الصفحات الاخير من هذا الموضوع لاني شرحتها اكثر من مرة..

وسلاااااااااااااااامتك وسلاااااااااااااااامتة الجميع

واسف على التأخير..

****

اخوي اللي يقول : انك بطلت الشغلة !!!!!!

ترى ماهيب شغله تراها علم غااانم والشغلة خلها لهلها بارك الله فيك..

وترى تشوف اظروف وتجينا مقانيص نروح بالأسبوع والاسبوعين..

فأسمح لنا على التأخير..

اخوكم - المري

بو هاشم
06/11/2007, 10:08 AM
يعطيك العافيه وبيض الله وجهك وماقصرت

جارح العين
06/11/2007, 07:20 PM
عالم...مشاء الله عليك يا المري

اشقر مغاتير
07/11/2007, 06:49 AM
السلام عليكم ورحمة الله وبركاته
استفسار بسيط اذا ماعليكم كلفه
كم باقي على المقناص وينتهي (مقناص الصقور) ولكم جزيل الشكر
وتحياتي لجميع الاعضاء

المشراق
07/11/2007, 07:07 AM
السلام عليكم ورحمة الله وبركاته
سؤال بسيط عندي صقر في المزرعة وله اسبوعين ويا كل من الحمام ومبسوط عندنا كيف اصيده وآمل التوضيح بالصور إن امكن وطريقة الشبك 0 ودمتم سالمين 0

الجعفري
07/11/2007, 10:25 PM
السلام عليكم ورحمة الله وبركاته

الله يعطيك الف عافيه على الموضوع يالمري
وانا قبل كل شىء ترى من المبتدئين بالصقاره وابي اسئلك كم سوأل وبعض النصائح...مشكوراً

_انا ابشري صقر لكن ما ادري وش النوع اللي اشريه كمبتدء؟