مدرســــــــة الصقــــــــارة , ادخل واسأل

[المري]

السلام عليكم

كيف حال اخواني في مكشات عساهم كلهم طيبين ان شاء الله

يوجد الكثير من المدارس مثل: مدرسه للقياده ومدرسه لتعلم الكتابه والقراءه , ومدرسه لتعلم الميكانيكا , ومدرسه لتعلم الكهرباء وووو...الخ, اما مدرسة لتعلم الصقارة فأنها قليله , تجدها في الخارج اذا واحد يريد يصير صقار عندهم يعلمونه وثم يعطونه رخصة صقار.

فأنا حبيت انزل هذا الموضوع وهو بعنوان (( مدرسة الصقارة))

وذلك لان بعض الاعضاء والزوار لديهم حب للصقاره ولكنهم متخوفين من تعلم الصقاره وهي :بسيطه جدا

والصعب فيها هي المقناص , فأنها اصعب من تعلم الصقاره فهي تريد ممارسه وصبر ونباهه وذكاء ووو..الخ


اما تعلم الصقاره فهي تخلتف تماما فربما يجيك شخص يعرف ينقل الطير ويعرف يدعيه ويعرف يعشي الطير

ولكن معرفة في الانواع والفصايل تجدها قليله جدا.

فلما اقول تعلم الصقاره فأنا اقصد تعلم (( كيف ينقل ويعشي ويدعي الطير ...الخ)) ولا اقصد المعرفه في الطيور.



ففهي هذا المشاركه اريد من كل عضو ان يستفسر عن اي شي في الصقاره , ايضا بعض الاخوان من اكبر

الصقاقير في المنتدى اذا شاف شي ماأحد سأل عنه يسأل عنه حتى ولو هو يعرفه علشان تعم الفائده.

في انتظار استفسارتكم...

اخوكم/المري

[أبو فيصل]

ومادام أنك فتحت باب وسيع عندي سؤال يا طويل العمر

س1: كيف تعلم الفرخ (شبك الهوا) على الحبارى؟

س2: كيف تعلم الفرخ (تفريخ ما هد على حسابه) على الحبارى؟

س3: كيف تعلم الطير المغلس (اللي عجزو فيه الصقاقير أو خربو طبعه) على الحبارى؟

واذا علمت الأخير أطلق عليك أسم (.............) بعدين أقول لك بعد ما أشوف الرد

أخوك أبو فيصل

[المري]

مرحبا والله يابو فيصل وين هالغيبه لا عاد تمر ولا تشارك الظاهر ان العمل ما خذ وقتك


كله , الله يعينك.


بالنسبة لسوالك الاول :

كيف تعلم الفرخ (شبك الهوا) على الحبارى؟


الجواب: الفرخ (شبك الهوا) تجد تعـلومه سهل جدا جدا, لان شبك الهوا تجده قد صاد

في الهوا قبل شبكه يمكن بشهرين وهو يصيد بكفه فتجد العملية ((عملية صيده)) سهله.

اما كيف تعلمه؟؟ وانت ابخس منى بس تريد طرح الموضوع للاخوان:

تحاول اول ان يكون الفرخ جاهز لان بعض الفروخ يعلمونه وهو توه وحش فتجده اذا

اطلقو له الحبارى تجد هايب ((خايف)) من الطيران على الحبارى فتجده يتمسك بالدس

بشده .

طريقة التعلوم: تأخذ الحبارى وتضعها تحت الطير , والطير يكون على يدك او على الوكر

وثم تأخذ قطعة لحم صغير او ثندوه حمامه وتضعها من عند داغر الحبارى واذا نزل الفرخ

عليها واكل قطعه منها ترفعه من الحبارى ومن ثم تجعلها بعيده اشوي وتحاول ان

الحبارى تكون مبرقعها لكي لا تخوف الطير في البدايه .

ومن ثم اذا شفت الطير (الفرخ) تعلم على ان يأتي الحبارى اكثر من مره تحاول تهد

الحبارى وتكون اطيار ومن ثم اذا شافها طار وراه وصادها ان شاء الله.


بالنسبة للسوال الثاني:

س2: كيف تعلم الفرخ (تفريخ ما هد على حسابه) على الحبارى؟

الجواب:

اولا : تحاول ان تجعله يصيد الحمامه ويصيد الوز وهكذا حتى يصل الى مرحلة الحبارى

ومن ثم تأخذ حبارى ميته وتحذفها له وتخليه يعلف منها واذا حصل وحده ثانيه يكون

افضل, او تعلمه مثل الصور اللي تحت:

http://falconsforsale.org/7_on_lure_1.jpg

http://falconsforsale.org/facing_camera.jpg

http://falconsforsale.org/biteing_1.jpg

http://falconsforsale.org/7_feeding_on_lure_1.jpg



وتحاول انك تهد لك طير صايد وتجعل هذا الفرخ يرى بعينه عملية الصيد,

ومن ثم تطلعه حيه ان الله قدر ذلك, وتعلمه نفس تعلومه الفرخ (طرح الهوا) وربما انه اصعب

اشوي من الفرخ (( طرح الهوا)).


اما سوالك الاخير:

كيف تعلم الطير المغلس (اللي عجزو فيه الصقاقير أو خربو طبعه) على الحبارى؟

الطريقه الاول:

تحاول تضعه في حجرة وتخليه طلق ومن ثم تدخل عليه حبارى والافضل ان تكون صغيره

وتخليه كم يوم هو والحبارى, اما بتلقاه صايدها او بتلقاه جايه جنون البقر.

الطريقه الثانيه:

وهي: انك تهده مع كذا طير وسوف يهد معى طير منهم اذا هد ولا ماعاد فيه طب طبيب.



بشّر يابو فيصل عساني استاهل اسم (.................)

وتقبل تحيات اخوك/المري

[أبو فيصل]

تراني سميتك (.............)

بعدين لصار بينا تلفون علمتك ...

وش رايك باللي يحفرون لهم حفره ويربطون الطير اللي عجزو في علمته مع الحبارى ويحذ فونه فيها.
أنا ماعمري جربتها لأني أبشرك أبتعد عن المغلسات اللي تملى السوق وقت الهدد.

الطريقه هاذي كنها الله يكركم راعي الكلب اللي ما يحمى الغنم من الذيب. يقولون أنه عين له ذيب طا يح في بير فحذ ف عليه الكلب وخلاه معه. يوم خذاله وقت ورجع عين الكلب ذابح الذيب و مستسعر. بعدها معاد قربت الذيابه حول الغنم.

وش رايك بانتداب من 15 اكتوبر حتى 10 ديسمبر؟ ومن 25 فبراير الى 30 مارس؟

الله يجزاك خير على المعلومات الطيبه لأعضاء و زوّار المنتدى وكلّك زوء مثل مايقولون بعض الناس لعطوك الفاتوره في مطعم قبل ما تحاسب ...

أخوك أبو فيصل

[السنافــــــي]

السلام عليكم ورحمة اللة وبركاتة
حيا اللة اخوي المري

عندي سوال لو تكرمت

كيف تدعي الطير سبب؟؟؟؟؟؟؟؟؟؟
وجزاك اللة خير

[تالي الاولين*]

.


المري هذا العلم وانا اخوك وهذا المرجو من مكشات الرائع

وجود اعضاء مثلك وشرواك وشروى بقية نجوم هذا المنتدى

مستعدين لنقل ماتعلموا لغيرهم ,, ماكنوه وبخلو به

الله لا يحرمك اجر ماتفعل .وبيض الله وجهك وانا اخوك

وارجو من الله العلي القدير انه يجمعني بك وبأعضاء

هذا المنتدى قريباً في الدنياء بدون كيبورد.. وفي جنتة في الاخره


اااسف على الاطالة بس لابد من ذكر الى بالخاطر وعموماً

انا عندي استفسار وانا اخوك ...

*** طير سبوق ونفسه طويل بس انه مايعرف يعلق في السماء

يلحق الى ان ينزلها على الارض .. بس انت عارف بعض الطرايد

ماتنزل لو تعلاها الطير وتروح علية في الغالب وشلون اعلم هالطير التعليق

مع العلم اني شفت طريقة الى هي بالطايره الورقية بس صعبه شوي

اذا فيه طريقه غيرها يكون احسن .........



تحيات اخوك تالي الاولين


.

[المري]

حياك الله يابو فيصل


والله طريقه ذا الحفره زينه بس يمكن يزول عقله مره وحده!!!!!

يازين ذا االانتداب يابو فيصل ويازين تاريخه!!!!!


ولا تنسى الاسم تراني بأنتظاره... i am waiting


تقبل تحياتي
المري

************************************

هلا اخوي السنافي

وتسلم يالغالي .

بخصوص الطير اول مايدعى الطير يدعى (( بسبب )) وهو حبل يربط في اسبوق الطير او جريره

ويربط الطرف الثاني في الوكر او في اي شي , علشان لو ماجاء الطير على الدعو

يمسكه الحبل((السبب)) لا يغدي , ويفضل اول شي ان يوضع في راس السبب حمامه علشان الطير يتجرى

على الصيد وانت حوله, ومن ثم حاول قدر المستطاع ان تعلم الطير على الملواح لان في الاونه الاخيره

تجد بعض الطيور مايجيك على الملواح يعنى كل ليل لازم حمامه .

http://www.ncfalconersguild.org/images/lurefly.gif


وشكرا لك يالسنافي

اخوك/المري

*************************************

مرحبا ياتالي الاولين

بالنسبه للطير اللي مايلعــق صيدته يعنى (( ارفـــل )) هذا والله مشكله ودائما يجيب

الجير مثل كذا مايعلق لانه ماتعود على كثر الصيد اطيار, عكس الطيور قرانيس الهواء

فأنها تجدها تعلق بسرعه , فأذا لحق صيدته خلاص عدها في العلقه.

والله دواء الطير اللي مايعلق اتوقع تكثر له من هدد الحمام وتهده على الكراوين

يمكن ينفع فيه.

تقبل تحيات اخوك/المري

[قشاع الرمث]

السلام عليكم ..

اشكركم على الموظوع المهم ز وعندي سوال هو:


اذا كان الطير يصيد الحبارى (الدجاجه) لاكن يهاب الخرب ولاهد عليه يطرح . وشي احسن طريقه ليعلم على صيده

[المري]

مرحبا اخوي قشاع الرمث.

بالنسبة للطير اللي يصيده الحبارى (الدجاجه, الربدى, الحفانه, يعنى صغيره)) ان شاء الله

سوف يطرح الخرب منه واليه من دون ان يحتاج علومه بس حاول انك تطيره له اول

مره وتخليه يعلقه في السماء فاذا علقه وحول في الارض اتوقع مراح يهده.

شكرا لك اخوي الرمث.

اخوك/المري

http://www.marvel.it/falcuc/FalcoMuvi.gif

[السنافــــــي]

السلام عليكم ورحمة اللة وبركاتة
وش حالك اخوي المري
عندي سوال ولا تهون
س/ وين الي افضل في العلف في المقيض وهل الضبان زينه وتنفع
ووين الي احسن هي ولا الجرابيع وهل جربت الضبان؟؟؟؟؟؟؟؟؟؟؟؟؟؟؟؟

وشكر لك يابو شيبــــ.................

اخوك: السنافــــــــــي ويعطيك الف عافية

[السنافــــــي]

الســــــــــــــــــــــــــــــــلام عليكم يا المري

س/ كيف تعرف الطير (الحر)اذا كان فرخ ولا بكر وهل تعرف من دقة ريشه؟؟؟؟؟؟؟؟؟؟؟؟؟؟؟؟

وشكرا لك يا المري مع تحيات اخوك:السنافــــــــــــــي

[السنافــــــي]

عندي سوال اللة لايهينك

س/ وشهو شليل الطير؟؟؟؟؟؟

وحياك اللة يا المري اخوك: السنافــــــــــــــي

[المري]

اخوي السنافي : بالنسبه للعلف في المقيض فأحسن من الضب والجربوع هو الفأر .


اما بالنسبة للضب فأعتقد انه زين للطير في المقيض لان قرانيس الوحوش اغلب

علفها هو الضب لان الجربوع مالها نصيب فيه.

بالنسبه لي قد علفت من الضب ومن الجربوع ومن الفأر بس بالتحديد مأقدر اقول لك

ايهما افضل, بالنسبه الصقاقير اللي قبلنا يقولون الفأر احسن شي.

في سنة من السنين في واحد قيّض اطيوره على ضبان ولكن حدثت المفأجاه جاه

اخر القيض وباقي معها ثلاث .!!!!!

تقبل تحيات اخوك/المري
http://www.marvel.it/falcuc/FalcoMuvi.gif

[المري]

بالنسبه لسوالك يالسنافي حول الفرخ والقرناس فالفرق واضح جدا:

ريشة الفرخ تجدها متساويه في الجده وتجد دقوق الظهر تجدها صغيره واليك الصور التي توضح ذلك:

صور الحر الفرخ وانظر الى ريشة الظهر كلها متساويه:

http://www.alfalah.8k.com/Alswar/sqeer87.jpg


وانظر في هذه الصورة الى دقوق الطير تجدها صغيره ولكن اذا قرنس تجدها اكبر من ذلك:

http://www.alfalah.8k.com/Alswar/sqeer32.jpg


وانظر الى الفرق بين الصورتين الاتيتين قرناس وفرخ:


هذه صورة( شاهين) قرناس :

http://www.air-superiority.com/images/eyrie2.jpg


هذه صورة (شاهين) فرخ:

http://www.woodsfalconfarm.com/Page1a.jpg



الفرخ تجد كفوفه وضبة خشمه (( منقاره)) تجد ذات لون مميز , اضرب لك مثال: اذا طلعت سيارة من الوكاله كيف لونها بعد ماتطلعها بشهر ؟؟ وانظر لها بعد سنة وسنتين ؟؟ سوف تجد الفرق.. فالفرخ والقرناس مثل ذلك.

اما بخصوص الشليل فهو ريش الفخذ تجد بعض الطيور ريش الفخذ طويل الى ان يصل الى اصابع الطير

فيقولون ضافي الشليل, واليك هذا الصورة التي توضح الشليل:

http://www.alfalah.8k.com/Alswar/sqeer114.jpg

وارجو ان تتقبل تحياتي
المري

[سنجاري]

مجرد إستفسار :
الأخوة الأعزاء وبالأخ المري جزاك الله خير:
كيف تعالج الطير من بعض الأطباع السيئة .. كالطير النغاق و الكفاخ وبالأخص النغاق؟
حيث أنه مزعج بنغقه و يخيف الطيور الاخرى.

[ابو راشد]

الاخ المري جزاك الله الف خير على طرحك لمثل هذا الموضوع وانت صاحب الخبره الطويلة
اخي العزيز سوالي انة عندي طير اهداني اياة اخ عزيز من السنة الماضية وهذا الطير مهجن اصلة وكان تعبان شوي الرجل اخبرني بذلك بس انا اجتهت عليه وصار اكثر من زين وصدق اذا قلت لك ان في يومين
صاد اكثر من30 كروان لاكن العيب فيه انة لما يدخل الكروان تحت السمر او الاشجار مايراعي على نفسه
ويصاب دائما بجروح اقصد الطير

[تالي الاولين*]

.


ماشاء الله على هالطير

جزوم

وانا اعتبر هذي خوش عذروب


اسف على المداخلة بس وجهة نظر واخوي المري ابخص


.

[السنافــــــي]

السلام عليكم وش حالك يا المري
مشكور على الرد السريع واللة يثيبك
واشكرك على التفصيل الرائع واتمنا لك التوفيق وجزاك اللة الف خير


اخوك :السنافـــــي

[السنافــــــي]

وش حالك يا المري
عندي سؤال لو تكرمت
س/ كف الطير يتكون من اربعة اصابع ولها مسميات اذكرها ولا عليك امر

[المري]

مرحبا ابو راشد وحياك الله

بالنسبة للمهجن تجده دايم حريص على العلف وتجده لايتصرف اذا شاف الصيد


فهذا طبيعي وماشاء الله على ذا الطير وعلى ماقالو اخوي تالي الاولين خوش عذروب.


شكرا لك ياتالي الاولين على المداخله الطيبه.


***********

اخوي السنافي تسلم يالغالي وماسويت الا الواجب.

اخوك: المري

[المري]

هلا اخوي السنافي

بالنسبة لسوالك عن الطبوع السيئه للطير والتي ذكرت اتوقع ان علاجها مستعصي.


وتقبل تحيات المري

[عبدالعزيز الدباسي]

بارك الله فيك اخوي المري ،،

الحقيقة ان الواحد يستمتع بمثل هذه اللقاءات والتي اشبه ما تكون بالندوات العلمية ، التي ينهل منها طالب العلم والمعرفة .

جزاك الله خير على ما تفعل وتقدم لاخوانك المكاشيت

[أبو فيصل]

مشكلة الصياح في الطير أسبابها و حلولها:

بعض الطّيور تصبح صياحه لكنّ لأسباب متنوّعة. يمكن أن تتعرض حتّى الطيور الوحوش لبعض محاولات الاتصال المكتسبة وليست غريزة أثناء فترة التدهيل والهدد تشعرها براحة الروتين . بعض الطيور تكتسب عادة الصياح في حال تغيير الروتين.

مثلا الطير أنتقل من يد صقار محترف مدهله و معلمه الطبوع الزينة أول ما صقره إلى يد صقار هاوي آخر يذبحه بالجوع ويخرب طبعه بطريقة إدخال البرقع في الرأس …الخ ثم يغير الأسلوب والبيئة اللي تعود عليه الطير في أول صقارته.

هناك طرق قليلة لتجنّب الطير يكون صيّاح منها:

1. تجنب نزول الوزن أكثر من وزن الهدد إلا في حالات لا تزيد على مره في السنة و في وقت قصير لبلوغ الهدف المنشود.
2. تجنب اللعب بأعصاب الطير مرة تعطيه لقمه إذا كفخ على العلف في اليد ثم ترجعه و تنقزه مرات عديدة. هذا يخلى كل اهتمامه إلى يدك ويصيح يدور العلف في يدك.
3. تجنب أخذ صيدته اللي هو صادها بأسلوب النهب من دون ما تعزلها بصيدة أخرى وتراهم سموه صقر.
4. تجنب و ضع الطير حول الطير الصيّاح يخرب طبعه.
5. تجنب تدهيل الطير أكثر من اللازم بحيث أنه يفقد معظم غرائز الجوارح.

وهناك محاولات لاستعادة الطبوع الزينة و لكنها أصعب مثل:

1. اجعل تركيز الطير على الصيد أكثر من تركيزه على يدك. مثلا أمش وهو على يدك مأخوذ برقعه علشان يكون تركيزه على العالم الخارجي.
2. هد الطير على صيده أكثر من أنك تقبل عليه بالعلف في يدك إذا أمكن. الطير إذا أنجرد في الهدد زانت كل أطبوعه (المشكلة معاد به صيد).

على فكره هاذي المعلومات بمساعدة صقارين أجانب أهل خبره مع طيور التفريخ اللى صياحها أكثر من طيور الهوى.

أخوك أبو فيصل

[ميراج]

الاخ المرى شكرا على الموضوع المميز والمعلومات القيمه التى ادرجتها التى تهم

الصقارين

وعندى سؤال

س - هل الشقلبه ضروريه للطيرعند اول دعوه وهو وحش اوماعاد لها لزوم
مع وجود السيارات وانها كانت مهمه وقت المقناص على الابل.

يهمنى رايك

[سبع البران]

السلام عليكم

كيفك اخوي المري بالنسبة لسؤال اخونا السنافي حق كيف تفرق بين الفرخ والقرناس عندي اضافه بسيطه ولاتهون ياصقار المنتدي( المري) هو ذيل الطير ( الذ نيبا) للفرخ تكون رؤوس الذنيبامن اخرها حاده مثل الابر اما القرناس فتكون ملساء عاديه ماهيب حاده مثل الفرخ.

[الدكتور00]

السلام عليكم ورحمة الله وبركاته0

صبحكم الله بالخير يا رجال المنتدى00

الله يعطيكم العافية على هذه المواضيع المتميزة اللي يستفتحها صقارينا وعلى رأسهم المــــــــــري 00

والله يكتب أجركم جميعا0


في الحقيقة أخوي المري ولا يهون الباقين , ودي إنك توضح زيادة كيفية التفريق بين القرناس والفرخ

من الحرار , لأننا صراحة منا بلم الطيور ولا حنا صقاقير لكن ها وهه
:p من هنا ومن هنا والبركة فيكم وفي مواضيعكم واطلاعنا الخارجي المتواضع0


اذا نأمل منكم التوضيح مأجوريـــــــن, وتحملونا شوي 00:D :o :D :o :flog:

[المري]

هلا اخوي السنافي:

بالنسبة لسوالك عن اسماء اصابع كف الطير فهي:

اولا:

يوجد للصقر اربع مخالب وكل مخلب له اسم

المخلب الخلفي : يسمى ( التابع) وهو مايضرب الصقر به فريسته اي كانت او وين ماكانت في الارض او


طايره .

المخلب الداخلي : ويسمى ( العالف) لان الصقر اكثر مايساعده على مسك العلف هذا المخلب واذا وجدت

صقر مقطوع منه هذا المخلب فانه والله يتلعوز اشد التلعواز.


المخلب الوسطي وهو اطول اصابع الصقر: يسمى ( السنان) وهو يساعده في قبض الفريسه بعد صيدها

وهو مساعد للعالف ويساعده في الاتزان في الوقوف وخاصه اذا كان في السياره وفي مطبات فتظهر

فائدته في ذلك الوقت.

المخلب الخارجي : يسمى ( اللافح) وهو المساعده للتابع بحيث يضرب بها فريسته على جنب .

اذا ماتتضمن كف الصقر.

[المري]

تسلم ياشقردي على التواصل ولك مني جزيل الشكر..

***************

اخي أبو فيصل بل استاذي

تسلم على هذه الطرق الرائعه التي يجب على كل صقار ان يعرفها لكي يجنب طيره

الطبوع السيئه من (( الحقل , والصياح )) .

وتقبل منى جزيل الشكر..

************

اخوي ميراج

حياك الله يالغالي...

بالنسبة للشقلبه للوحش زينه بس ماهو على طول اول يوم تمرجه تشقلبه توه غشيم

ونفسه ماهيب مضبوطه بعد يمكن يطري عليه طاري ولا شي.

اما بالنسبة لقرناس البيت فهي زينه ايضا لان تعطي الطير جهد اكثر من غيره بس

ماهو على طول اول ماتشيل الطير من المربط تشقلبه, وانا ارى كبار السن مايحبون الشقلبه. ماادري ويش السبب؟؟؟

تقبل تحياتي ..

*******************

اخوي سبع البران تسلم يالغالي على المعلومه الرائعه التي نسيتها , ولك منى جزيل

الشكر..

******************

اخوي الدكتور حياك الله يالغالي

بالنسبة للتفريق بينهما انظر الى ريش الظهر فاذا وجدته كله متساوي يعنى مافيه ريش

يختلف عن ريش فأعرف انه امام فرخ او قرناس بكر وحش .

والله مأدري ويش اقولك بس هي ايضا تعود على الفطنه والممارسه.

ايضا اقول لك معلومة وهي اني والله اغلط في بعض الطيور خاصة قرناس الهواء البكر

هل هو فرخ او قرناس وحش وغيري دائما يغلطون فيها (( بس لاتفضحنى)).

تقبل تحياتي واسف على اني ماافدتك اكثر من ذلك...



مشكورين جميعا

اخوكم/ المري..

[سنجاري]

أخوي أبو فيصل جزاك الله خير. لا هنت كفيت ووفيت وباخذ بنصيحتك واقلع الصياح بعيد
بس المشكله ما عندي الا مربط واحد, ابا اقلعه عند واحد من الربع يبتلش فيه :)

[السنافــــــي]

مشكور يا بعـــــــ المري ـــــدي على المعلومة الطيبة

واللة يجزاك خير*******************

اخوك: السنافـــــــي

[الصنااااف]

عندي سؤال محيرني ولعل عندك الإجابة الشافية :

الطيريلحق الحباري بالسماء حتى ينزلها للإرض . وبعدين يوقع جنبها ( يهابها )
واذا طارت لحقها حتى يردها وتتكرر السالفه هذي !!! وانا محتار!!!

ولك مني كل محبه

[المري]

هلا اخوي الصناااااف

سوالك ان شاء الله سوف اجواب عليه الجواب الشافي:

طيرك فيه احدى امرين:

1- ان يكون طير يلحق فهو يبغى الحبارى تطير او بالاصح يبـيــك انت تطيرها له.

2- ان يكون خايف منها بالارض لان الحبارى فهي الارض اكثر مقاومة لما تكون

في السماء وهي طايره.


الحل:


ان تصيد لك حبارى وتخليها عندك وتقوم على الطير وتخليه ليلتين بدون عشاء

ومن ثم تهد له الحبارى ليلة ثالثه وان شاء الله انه يصيدها.

ملاحظه:
هذا اذا كان طيرك صايد الحبارى من قبل , واذا هو غشيم فممكن انه مخوف من الحبارى.



وحاضر في اي وقت...

اخوك/المري

[السنافــــــي]

كيف الحال يا المري عساك بخير
وينك يااخوي وين مشاركاتك يا الذيب
عندي سول لو تكرمت
كان عندي طير وكري فرخ وعلمتة على الحبش واستجاب بس اهدلة حمام
ويلحق ومن ثم يعزل ودائما كذا واذا قصرت علية نفس الشي وقنصت با الطير واهدة على كروان ولايجية وكان معي ذاك اليوم بندق ورميت الكروان ويوم مات الكروان
اخذتة وحذفتة في الهواء وعلى طول حول الطير على الكروان وصدت حبارى با البندق
وجيت وعلمتة علية وهي ميتة وبعدها هديتة على الكروان ولاجاة ومع العلم اني قاصر
علية مضبوط ولافية فايدة ومع الحمام مرة يلحق ومرة مايلحق وش السوات في هذا الطير ويوم اهدة على الحبش علف الين قال بس ولافية فايدة؟؟؟؟؟؟؟؟؟؟؟؟؟؟؟؟؟؟

[السنافــــــي]

السلام عليكم
عندي عدة اسألة اللة لايهينك
(القرموشة) كيف تميزها من بد الطيور؟؟؟؟؟
(المثلوث) كيف تعرف انة مثلوث؟؟؟؟؟؟؟
(الجرودي) وشهو من الطيور وهل هو لون؟؟؟؟؟؟
فيه بعض الطيور لونها اخضر كيف يكون ذالك؟؟؟؟؟
********************************************
وتقبل تحياتي اخوك: السنافـــــي ولك الف شكر

[المري]

هلا اخوي السنافي

اليك الاجوبة :

القرموشة:
تكون أصغر في الحجم من الحر ، وألوانها الأسود والأحمر والأشقر
والأبيض ، وكف قدمها واصابعها صغيرة وطويله ، والفم صغير والمنخر ضيق ، وتمتاز
بالصبر والجلد مثل الحر تماما . وتصيد كل ما يصيده الحروتقرنص مثله .

ايضا تسأل عن المثلوث:

وهي في الغالب يسمى مثلوث الحرار, وهو صغير الحجم وشكله شكله الحرار

بس اللهم انه صغير ويمتاز بالسرعه وشين النفس . ودائما تلقى لونه زين اما

مغتر او احمر زين.

ويصل مقاسه الى 15 الى 15 ونص يعنى حول هالمقاس,,,

وان شاء الله يالسنافي اني افدتك.



اما عن الطير اللي لونه اخضر فهو الطير المجهم الذي يرد لونه الى السواد ولكنه

ليس اسود ولا ادهم فهو على ماقيل اخضر غامق ((حلوه اخضر غامق))


اما طيرك الوكري فهذا اكثر طبوع الوكري مايصمل معى الحمام والصيد يوم يصيد و

ويوم مايصيد يعنى فكنى من ذا الموضوع.......

وتقبل تحيات اخوك المري

[محتار]

عندي سوال سريع طبعا الشيهانه اسرع من الحر
طيب ليه الحر اغلى هل هو اقوى بالصيد والا فيه من ناحيه الجمال

[المري]

هلا اخوي محتار

بالنسبة للشاهين تشتريها اول الموسم 30,000 ريال مثلا واخر الموسم تبيعها 2000

ايضا تجد ريشها يتكسر بسرعه , ايضا ماهي محبوب في الهد لان سريعه في الصيد

وانا سمعت واحد يقول انا مأحب اقنص بشاهين ليش؟؟؟ قال ماتخلي القانص يتفرج

واخر يقول اذا جيت بأقنص بشاهين احسن لي اخذ الشوزن لانها مثل الشوزن..


وثانيا عملية المقيض لانها الشاهين ماتقرنس نفس الحر فهي تتأخر في الربطة

فيضيع عليها المقناص لتلك السنه.

ايضا الحر يتحمل عده ايام بدون اكل بس الشاهين ماتتحمل .


ارجو ان اكون قد افدتك...

[قشاع الرمث]

السلام عليكم ورحمة الله وبركاته
وش احوال ربع مكشات
سؤالي هو عن الشبوط وهل بعتبر تبع الطقور والا مع البواشك وطقته ؟
زسؤالي الثاني عن اسعر المثولث ؟
ولكم جزيل الشكر

[المري]

هلا اخوي قشاع الرمث

تشكر يالغالي.

بالنسبة للشبوط ترى ماهو تبع الصقور .


اما اسعار المثلوث : فأول الوقت تلقى الزين منها 3ونص الى الفين وفي اخر الوقت


تأخذ بـ1000

وتقبل تحيات
المري

[بن ذيب]

الاخ المري المحترم
الاخوة الاعزاء
اذا تكرمتوا احب اسال عن مرض ( السدّة ) اللي يصيب
رجل الطير , شنهو علاجة ,,,,
وشكرا لكم ,,,,

[مهتوي]

السلام عليــكم ..

تسلم يا المري على المجهود هذا .. ولا هانوا الشباب ...

عندي سؤالين سألتهم في موضوع اخر لكن لم أجد الرد عليــه ..



فيه فرق بين الـــحـــر والشاهــيـــن في التهديل ؟

مع رغم إن الشاهين يسمـــونـــه ابو ليلــه يعني بسرعــه يتعلم , وفي نفس الوقت ما هوب صبور . هل هذا الكلام في محلــه .

والشئ الثاني إذا كنت بصيد بالطير ومعي ســلــــق .... (( هنا تكون قمة المتعه )) كيف اهدل الطير مع السلق ؟ هل أعلف الطير بجنب السلق او فوق ظهرها ؟



ياليت تفيدنا في اللي قلت .
وسلامتكم


مهتوي

[المري]

هلا اخو بن الذيب وحياك الله يالغالي

بالنسبة لمرض السده اتوقع ان اعلاجه صعب اشوي او انه شبه مستحيل.

ولكني ارى ناس يودي الطير اللي في سده ويعملون فيه عملية وانه بفضل من الله

يطيب بس لازم يسوون عملية في الكف.....

*********************

اخوي مهتوي

فيه فرق بين الـــحـــر والشاهــيـــن في التهديل ؟

مع رغم إن الشاهين يسمـــونـــه ابو ليلــه يعني بسرعــه يتعلم , وفي نفس الوقت ما هوب صبور . هل هذا الكلام في محلــه .

والشئ الثاني إذا كنت بصيد بالطير ومعي ســلــــق .... (( هنا تكون قمة المتعه )) كيف اهدل الطير مع السلق ؟ هل أعلف الطير بجنب السلق او فوق ظهرها ؟

والله الفرق بين فرخ الحر وقرناس الوحش الحر ايضا

تجد تدهيل الفرخ ابسط بكثير من تدهيل الوحش.

اما الشاهين الفرخ فهو ابسط بكثير من تدهيل الشاهين الوحش.

اما قرناس الهوى الشاهين فهو اصعب من قرناس الهوى الحر

هذا حسب اعتقادي


اما عن هدد الطير مع السلوقي فهو في راي بسيط اول شي تخلي الطير يألف على السلوقي

اذا الطير يتعشى خل السلوقي بجانبه مره ومريت ثم يصبح يهد مع السلوقي


وتقبلو تحيات اخوكم / المري

[بن ذيب]

مشكور اخوي المري واللة يعطيك العافية
واللة يحمي طيورك وطيور اخواني اعضاء
المنتدي من الســــــــــــــــدة
ولك تحياتي,,,,,,

[اكرم بن نصر]

السلام عليكم ورخمة الله
حياكم الله وبارك فيكم على جهودكم الطيبه
ماهي افضل طريقه لتعليم الطير المجي الي اليد من مسافه بعيدة لان طيري لايأتي الي الا من مسافة 20م فقط
حتى ولو كان جائع

[وليد]

بالله يالمري أنت وابوفيصل : تراكم قاعدين تكلمون في ألغاز ( ؟؟؟ )
طلب : تفسرون الكلمات اللي تستخدمونها في كلامكم
شاكر لكم نقل الخبرة
وسلامتكم

[أبو فيصل]

حياك الله أخوي أكرم وبارك الله فيك و مشكور على الزيارة و المرور
أفضل طريقه لتعليم الطير المجي الى اليد من مسافه بعيدة هى أن تبعده كل يوم مسافه أبعد بقليل من الأمس و لكن يبقى الطير بنفس الوزن واللياقه والرغبه للعلف اللي تخليه يهد عليك بدون تردد.

واذا جاك الطير عطه الكميه كامله بحيث تكرمه ولكن يبقى الوزن على مقاس الهدد والطبع الزين و هذا يختلف من طير الى آخر.

أبو فيصل

[أبو فيصل]

الله يرضا عليك أنا و المري نتكلم أحيانا بلهجتنا و مصطلحات الصقاره (ماهي ألغاز). وترى ماهي صعبه على الصقاقير.

وحنا حاضرين بالتفسير اذا بغيت.

على هالطارى أذكر لي أصحاب من تونس أول شهر عرفتهم (طبعآ أيام الدراسه) كنت اتكلم وياهم بالأنجليزي!!!! لين قال واحد متهم اللة يذكره بالخير تراني صرت أتكلك سعوووووووودي؟!!!!!!

أنت شغل لك مسلسل مصري و خل واحد من الشيبان ولآ اللي مابعد شاف التلفزيون يعرف السالفه.

طال عمرك الممارسه تعللللللللللللم.

جزاك اللة خير وسلامتك

أبو فيصل

[المري]

شكرا لك يابو فيصل على التوضيح للاخ وليد .

وعلى ماقلت يابو فيصل هذا هي مصلحات الصقاقير واي كلمة يبغاها اخونا وليد


يرسلها ونحن نوضحها.

اخوك المري

[اكرم بن نصر]

السلام عليكم

[اكرم بن نصر]

السلام عليكم ورحمة الله
الاخوة في منتدى مكشات الرائع ارجو ان تضعو لنا توضيح يبين بألصور شكل اصقر النادر واللزيز والمحقوره
والقرموشه وكري الحرار ووكري الشواهين صحيح يمكن في شوية تعب ولكن هدا الموضوع مهم جدا وخاصة
للمبتد دئين والله لايضيع اجر من احسن عملا
والسلام عليكم ورحمة الله وباركته

[السنافــــــي]

عندي سوال الله لايهينك؟؟؟؟؟؟المري
*****************
الطير الخرم لونة وش ينقال عنه..........

................................
السنافـــــــــي

[المري]

اخوي اكرم بن نصر حياك الله

وابشر ان شاء الله راجع الرسائل الخاصه وتحصل كل ماتطلب..


****************


اخوي السنافي

هلا اخوي , ويش عرفنى بالطير الاخرم ويش لونه؟؟؟!!!


خلنى اشوفه اول واعلمك ويش لونه.

[ولد شقراء]

السلام عليكم



بصراحه طيري كان وفي وحبيب معي لكن الان تغير وصار مايطيع ياكل مني
وإلى جيت اشرربه مويه بابخاخ ينقز على يدي ويبقشها
صرت أظربه هل هو صح أني أظربه ولا لأ؟؟؟

:confused: :confused:

[السنافــــــي]

بنسبه حق طيرك منذ عرفت الصقارة اول مره
اسمع ان واحد يضرب طيره........
وللمعلوميه كلما ضربت الطير يتجفل وتزيد وحشيتة.....
ولاكن عليك بتدهيل الطير على الهداوه وليس الضرب.....
وكثر من نقل الطير((على اليد)) لكي يعود كما كان وافضل....
************************
اخوك: السنافــــــي

[بن ذيب]

اخوي المري , وللباقين التحية

الفرق بين الفرخ والقرناس عرفناة من صفة الريش

السؤال هو اشلون نعرف القرناس اذا كان
بكر او ثنو او قرناس ثالث او رابع وهكذا ,,,,,

واقبلوا تحياتي,,,,,,,,,,,

[المري]

مرحبا اخوي ابن الذيب وحياك الله


بالنسبة لسوالك عن القرناس البكر فهو يعرف بواسطة اذا كان باقي معه نجير

من ريش الفرخ, اما بالنسبة للقرناس الثنو والثالث والرابع فأنا ماأتوقع انه فيه


احد يعرفه بس اقدر اقولك ان الصقار يعرف الطير هل هو كبير السن ام صغير السن!!


شكرا لك على سوالك..

اخوك / المري

[السنافــــــي]

السلام عليكم ورحمه الله وبركاته..............
**************************
عندي سوال الله لايهينك ((المري))؟
كيــــــــف يقيسون جــــــرم الطير ؟؟؟؟؟؟؟؟؟؟؟
**********************
اخوك: السنافـــــــــي

[سبع البران]

السلام عليكم ورحمة الله وبركاتة
كيفك اخونا المري الحقيقة انا عندي سؤال عن كيفية تقييض ( قرنسة ) الطيور في الشبوك وخاصة لما تكون اكثر من طير وشلون الطيورماتهد علي بعض عند العلف وبعدين وشلون الريش حقها ما يتكسر علما بان الريش وقت القرنسة تكون ضعيفة كماهو معروف عندكم ارجو من صقارنا افادتي بذلك شاكرين لكم

[المري]

مرحبا اخوي السنافي

بالنسبة لسوالك حول كيف يقاس طول الطير فهو يقاس من رأس المنكب الى رأس


الذيل اما العرض فهو يأخذ للطير بطريقه دائريه اي من راس الزور وتلف المقاس


على جسم الطير بتساوي الى ان يصل الى راس المقاس من الجهه الاخرى..أرجو


ان تكون فهمت...

اخوك المري

[المري]

مرحبا اخوي سبع البران

بالنسبة لتقييض الطلق فهو سهل عند بعض الطيور اذا كانت كلها بنفس الحجم


يعنى اذا كانت بحريه وبحريه فهنا لاتوجد مشكله اما اذا صارت اجبليه وبحرية فغالبا


تأخذ علفها البحرية وليس دائما .

كانت عندي بحرية وكنت مطلقها وبعدين جبت وحده وكانت اصغر منها حجما

فكانت الصغيره تخلص العلف قبل الكبيره وتهد على الكبيره وتأخذ علفها..


اما الحرار جميعا فأتوقع ماعندها مشكله..

وتقبل تحيات اخوك / المري

[سعودالسهلي]

مشكور أخي العزيز المري
ولكن فيه سؤال أ بسألك أياه
س1:متى هجرة الطيور إلى المملكه؟
س2: وماهي أنواع الطيور المهاجره؟

[المري]

والله يأخي سعود السهلي


بالنسبة لهجرة الطيور الرجاء منك الضغط على اللنك الاتي:

http://www.mekshat.com/vb/showthread.php?s=&threadid=2679



وتقبل تحياتي
المري

[عبدالله الصالح]

وش رايكم ياشباب انكم تطرحون موضوع اكلات الطير المضلة وقت ((القرنسة))
لأن هذا الموضوع يهم كثير من هواة الطيور لأن الطير وقت القرنسة هناك
اكلات دسمة تضر الطير من كثر الدهون لذلك اقترح ان يكون هناك موضوع
عن اكلات الطير وهذا راجع للطير ومنفعة لة لسرعة القرنسة وشكررررراً....

[عبدالله الصالح]

وش دعوى ياشباب انا لحالي اتكلم ولا واحد رد علي الله يسامحكم بس؟؟؟؟؟

[المري]

مرحبا والله اخي القصمنجي وحياك الله يالغالي


واسف عن الاطاله والعذر والسموحة يابعدي ولا يصير خاطرك الا طيب


بس لي حوالي 5 ايام منقطع عن المنتدى , بالنسبة لموضوعك سوف احاول


ان اطرحه قريبا بس وقت القرنسه اخلصت ذا الحين...


تقبل تحيات اخوك / المري

[اعقاب]

السلام عليكم ورحمة الله وبركاته
نشكرك على هذه المعلومات يا محلفي
نامل منك الكثير
ولاتقصر فينا ياربعك

[مغــادر]

الله يعطيك العافيه يا المري على هذه الردود الوافيه واتمنى لك دوام التوفيق..



اخوك ((( مغــادر )))

[اعقاب]

شكرا جزيلا يا محلفي نريد منك المزيد اراك قريبا

[اعقاب]

القصمنجي
لاتزعل
لاتغضب
لاتكدر
نسمعك ولا نسفهك
السموووووووووووووووووووووووووووووووووووووحه

[عبدالله الصالح]

الله يعطيكم العافية ياشباب ويالمري ترى الموضوع مهم الحين
وبعدين لغيري ومشكورررررررررين......

[بن ذيب]

نسمع عن مدهنة الطير . ماهي

وما اثرها علي الطير اذا كانت خربانة

وسمعنا عن علاجها بدقها فكيف يكون

وما خطورتة على الطير
ولكم جزيل الشكر,,,,,,



http://www.arab7.com/up/file/1061804785.jpg

[_+(المغترب)+_]

بغيت اسال في وقت المقيض وش الافضل اعشي الطير على يدي ولا على الوكريعني اعطيه علفه واروح


مع اني الي اعرفه ان الطيور المقيضه ما تعلف على اليد الاحسن على الوكر


والسموحه يالربع اذا كان هناك خطئ مني لاني ماني بخبير لذيك الدرجه


والسموحه على الاطاله

اخوكم المغترب

[المري]

اخي عقاب:

مرحبا بعقاب ومرحبا بالمحلف كلهم وجعلك ذخرا


وشكرا على ردودك الرائعه وترى ماسويت الا الواجب وابشر باللي اقدر عليه..



اخوك / المري


*****************

اخي مغادر

مرحبا بأهل قطر وحياك الله يالغالي وان شاء الله تبقى معنا على طول..


اخوك / المري

***************

مرحبا بأخوي القصمنجي

بالنسبة للعلف في القيض فهو يتنوع بشكل مستمر ولكن اكثر مايعطى الطير في القيض

طيور السمن لانه متوفر في المحلات , ولازم ان الطير كل اسبوع تعطيه اما جرذان

ولا فيران علشان يروبج الطير وينظف معلفه من السمن ومن شحمها.

اما بخصوص الضبان فالربع قيضو اطيورهم عليها ولكن ماجابت نتيجه حتى ان البراد

جاء وباقي معها ريش..


وسامحنى على القصور اخوي القصمنجي.

اخوك / المري

[عبدالله الصالح]

افــــــــا بس يالمري كل الردود وتقول مقصر لا والله انك
اسنافي يكفي هالكلام بس مشكورررررررر ....

[معشوق]

ماعليك امر لو تعطينا نبذه عن اسامي الطيور وانواعها وصور يعني قرناس وبكر وهالشغلات لأني ودي اتعلم ولو تبين لنا المصطلحات اللي تقال بس بإختصار علشان ماتطول

[حران]

السلام عليكم
اخوي المري
1-وش افضل حجم بطيور "الحر, الشاهين"؟
2- وشو سبب مرض صرع الطير ؟وهل يمكن علاجة؟
مع تحياتي اخوك حران

[المري]

مرحبا ومسهلا بأخوي حران


وأنضمامك الى شرف يالغالي وأسف على التأخير...


افضل حجم للحر فهم يفضلون الوافي وهو ذات المقاس 17 و 17 ونص و18


فهم يحبون لاني وافي في الحجم ..


اما الشاهين فيفضلون 16 ولكنها قليله جدا جدا فتحصل عادة مع الصقار 15 ونص


وهي كلها وافيات...


اما بالنسبة للصرع فمنه حاالات تشفى بامر الله وحاالات مستعصيه ......


وهذا المرض يعالج ببعض الكبسولات اللتي تعطى للطير عن طريق الدكتور البيطري

وباذن الله يتم الشفاء واذا لم يتم فأنهم يرجعون للكي...


والشفاء بيد الله عز وجل...

وسامحنى على القصور...


اخوك / المري

[المري]

هلا اخوي القصمنجي

الا بالله مقصر في حق هذا المنتدى لان ارى اشياء من الواجب عملها ولكني لاستطيع

عملها وذلك لقلة الوقت وقلة الخبر في الكمبيوتر..


))))))))))))


اخوي سليبير

مرحبا بك ومسهلا قد طرح الموضوع هذا وسوف ابحث لك عن اللنك واتيك به..


واسف كل الاسف..............


اخوكم / المري

[معشوق]

يعطيك العافيه اخوي المري بس مادري لقيت اللنك ؟؟؟

[حران]

أخوي المري السلام عليكم
أستفسار الله لايهينك
1-عندي شاهينه فارسيه "قرناس ثالث " ماحذفت الامواس الى الحين هل يثر عليها اذا قمت بدعوها ؟
2-متى تنصح يبدى الواحد بدعو طيرة.؟
3-الطيراللي مايطلع ,هل يمكن يدرب على الطلوع.؟
مع كل الشكر.

[دهام]

اخوي المري مساك الله بالخير....

عندي طير فرخ وحش دهلت الطير وصار يعلف على يدي وادعيه من مسافة
قريبة ويجي ويعلف لاكن بغيت ازيد المسافة وادعية ما يجي وقف على مسافة
معينه تقريبا مترين وعليها شوي وله على ذا الحال اسبوع يعني اذا ابعدت
اكثر من ها المسافه يمسيني اليل وانا ما علفته مع العلم ان الطير يصيح يبي
العلف بس ما ادري هو ذال والا ايش السالفة ..

والله يجزيك عنا الخير..........

[المري]

مرحبا اخوي حران

اما قولك:

-عندي شاهينه فارسيه "قرناس ثالث " ماحذفت الامواس الى الحين هل يثر عليها اذا قمت بدعوها ؟

فأقولك :
لا يوثر عليها الموس وادعها وان شاء الله تصيد الحباري ,, وعلى فكرة ترى شاهينتك

ماشاء الله عليها مبكرة في القرناس لان اكثر البحريات باقي معها اربع وثلاث..

اما قولك:

2-متى تنصح يبدى الواحد بدعو طيرة.؟

فأقولك:

انصح بدعوى الطير هالايام لان الوقت المناسب ..


اما قولك :
3-الطيراللي مايطلع ,هل يمكن يدرب على الطلوع.؟

فأقولك:

نعم يمكنك ان تعلمه علىالطلوع بس ماهوب ذا الوقت خله اخر الوقت علشان اذا

تكسر ريشه ولا تملع مايهم لان الربطه وراه...


وتقبل تحيات اخوك / المري

[المري]

مرحبا اخوي ادهام وحياك الله يالغالي...

عندي طير فرخ وحش دهلت الطير وصار يعلف على يدي وادعيه من مسافة
قريبة ويجي ويعلف لاكن بغيت ازيد المسافة وادعية ما يجي وقف على مسافة
معينه تقريبا مترين وعليها شوي وله على ذا الحال اسبوع يعني اذا ابعدت
اكثر من ها المسافه يمسيني اليل وانا ما علفته مع العلم ان الطير يصيح يبي
العلف بس ما ادري هو ذال والا ايش السالفة ..



والله قريبه انه يجي مترين ويوقع , اتوقع ان تفريخ وان ماهو من الفروخ المطيره


يعنى مايعرف يطير مايعرف الا يسير على ارجوله ...




انصحك بانك تهده وتخليه يطير لحاله من دون ماتدعيه واتشوف هل يطير مسافة طويله

ولا مايطير................



تقبل تحيات اخوك / المري

[حران]

أخوي المري
الله يجزيك عنا الخير.
أخوك حران

:D :good:

[al-maajed]

عندي طير قاعد ادهله هذي الايام (تفريخ ) وبعد اسبوع بدى الطير يكافخ واليوم مع المكافخ انكسر راس الريشه النايفة الكسر حوالي 6 سنتمتر من راس الريشة...

لاكن الي الان راس الريشه ما طاح تقريبا كسر بس شكلها ماهي مطوله


اخوي المري هل يوثر الكسر في طيرانه والا لا واذا كان لها تاثير علمنا

الله يزيدك من علمه.......

اخوك الماجد

[المري]

مرحبا اخوي الماجد وحياك الله


بالنسبة لرأس الريشه ماتضر بطيار الطير بس انها تضر الريشه اللي بعدها لانها


يسهل كسرها , الحل الوحيد انك تذهب الى اللي يوسر الريش وتخليه يوسر لك

الريشه واذا انت اقريب حول الاحساء ان اجيك واوسر لك الريشه ,,وبس..




اخوك / المري

[معشوق]

اخوي المري مادري مارديت لي خبر حول سؤالي وانت قلت لي انه بتعطيني رابط ويينه ؟؟؟:)

[المري]

هلا اخوي سيليبر

من فضلك راجع الرسائل الخاصة....


ولك مني كل التقدير والاحترام..

اخوك / المري

[al-maajed]

بغيت اسئلك عن الطير اذا جاك هادي زيادة عن الزوم هل هذا الطبع زين والالا (مع العلم الهداوه هذي الاحظها عليه هذي الايام وقت التدهيل) والطير فرخ ماقدهديته الاالحين مشتريه قريب هل يتغير وقت الهدد او فيه طريقه اتبعها؟؟؟؟؟؟؟؟؟

وهل التوسير يخلف طيران الطير والا ماله اي اثر سلبي ؟؟؟؟؟؟؟؟؟؟

( واسمحلي اطلق عليك لقب معلم المنتدى )

ومشكور

اخوك ( الماجد )

[المري]

مرحبا اخوي الماجد وحياك الله يالغالي

وماشاء الله عليكم كل يوم تشترون فرخ ؟؟ من وين هالفروخ وحن بالاحساء ماجاء

ولا فرخ ؟؟؟


بالنسبة لتوسير ريشة وحده ماأتوقع انها تخل بطيار الطير ...


اما عن هداوة الطير فالوحش دائما على يد صقاره يكون هادي واذا كفخ يعرف الصقار

انه اصبح ربيب......



والهداوة طبيعيه في الطير الوحش...


وتسلم على اللقب وياليت تخلينى على اسمي (( المري ))

[حران]

اخوي المري ولايهنون الشباب
أستشاره الله لايهينك.
1-هل تدهين الطير بالزيت" مثل زيت الزيتون " ينفع ريش الطير؟
2-ممكن تذكرلي مسميات وترتيب ريش الطير مثل "الامواس,النايفه" ؟وش المهمه منها؟

وجزاك الله الخير.
أخوك حران

[المري]

مرحبا اخوي حران وحياك الله


اتوقع ان زيت الزيتون ماينفع ان تدهن ريش الطير به ....


اما اسماء الريش في جناح الطير فالرجاء منك ان تراجع هذا الرابط




وتقبل تحيات اخوك / المري

[حران]

أخوي المري
السلام عليكم
اخي وين الرابط.
تحياتي

[المري]

أبشر والله ياحران باللي يسر خاطرك , بس ماعاد هو رابط بل بما يحتويه الرابط:




المري
" مشرف " الأصايل "



عضو منذ » Jun 2001
المدينة »
المشاركات » 551

السلام عليكم ..... يتكون جناح الطير حوالي 22 ريشة مبتدئه بالريش القصيره


ومنتهية بالموس....


فالطير على ماقالو اللي عليها الكلام هي سبع او ثمان مبتديه بالريش اللي في معقل

جناح الطير الى الموس .. فتسمى الريشه السابعه والسادسه والخامسه والرابعه

ومن ثم رديفة النايفه (( الطويله )) ومن ثم تأتي النايفة (( الطويلة)) ومن ثم يأتي

في الاخير الموس وهو اخر ريشة يحذفها الطير....


اما الذيل يتكون من 12 ريشة يزيد ريشة او ينقص ريشه في بعض الاحيان........

وتسمى الريشتين العليا بالعمد ومفردها العمودية..

واللي تحتها ردايف العمد الى ا ن تصل الى الريشتين السفلى فهي تسمى الكلى..


ايضا يسمى ريش ظهر الطير بالنجير او التبن (( في وجه العدو)).


اخوكم: المري

[حران]

المري السلام عليك, شكراً وماقصرت. :good:

[الشاقي]

الله يعطيك العافية يالمري
س. لو شريت طير هالوقت هل يمدين ادربه ويصيد هالموسم(مع العلم ان عندي خلفية عن الطيور لأن العام جاني طير هدية على بداية الوسم ودربته ولكن صكته عين ومات )

[المري]

مرحبا اخوي الشاقي

نعم يمديك تدهله وترببه وتدعيه في خلال اسبوع واحد وان شاء الله ان يصيد في

الاسبوع الثاني.

بس عليك ان تنقله بكثره وانك تدهله لساعات .. في كل ليلة.



اخوك / المري

[ما أعرف أسمي]

أولا وقبل كل شيء صدقني يالمري أني ما سجلت بهالمنتدى الا بعد تمحيص بمقالاتك اللي أكثر من رائعة واللي تطفلت وحملتها بجهازي أرجوك (( سامحني )) ........
وثانيا لي ثلاث اسئلة أرجو منك التكرم بالاجابة عليها علني استفيد أكثر
1- الاحظ ان بعض الطيور يجي لون منخارها وارجلها ودائرة العين صفرا وبعضهن يجي لونها طبيعي مافيه صفار علما ان اللي شفتهن شياهين وحرار وكل النوعين يجي البعض أصفر والبعض رمادي عادي وابي أعرف وش يفرق هذا عن هذا سواء كان الصفار بالمنخار او بالارجل او بدائر العين او بواحدة منها أرجوك التفصيل في هذا الامر
2- انت تقول اذا انكسرت ريشة الطير فأن ذلك يؤثر على الطير سواء بالسعر او بالطيران وان الطير يغير ريشة سنويا طيب لو اشتريت طير بعض ريشة مكسور وخليته عندي هل يسقط هذا الريش بعد سنه وينبت له ريش جديد ويكون سليم أم انه يظل مثل ماهو .
3- أسمع الجملة التالية دائما وهي ( أن يكون الطير صنيع ) وش معنى صنيع ؟؟


أخيرا ارجو اني ما ازعجتك بس والله ولعتني بهالسوالف يالمري.... ولك الشكر

[اخو بتلا]

السلام عليكم ورحمة الله وبركاته
ياعطيك العافيه اخوي المري
وماتقصر
واما سوالي هو
شلون اعرف جرة الحبارى ياليت تحطهاا لي صوره
وسوالي الثاني
عندي طيري صف كل ريشه بس بقاء الموس
شنو اسوي له
تحياتي لك
ابومريم

[المري]

هلا اخوي ماتعرف اسمك (( والله انها غريبة شخص مايعرف اسمه ))

اولا: مرحبا بك في منتداك وحياك الله يالغالي.

بالنسبة لتساولاتك سوف اجيبك عليها ان شاء الله.

اما قولك:
1- الاحظ ان بعض الطيور يجي لون منخارها وارجلها ودائرة العين صفرا وبعضهن يجي لونها طبيعي مافيه صفار علما ان اللي شفتهن شياهين وحرار وكل النوعين يجي البعض أصفر والبعض رمادي عادي وابي أعرف وش يفرق هذا عن هذا سواء كان الصفار بالمنخار او بالارجل او بدائر العين او بواحدة منها أرجوك التفصيل في هذا الامر

الجواب:

بعض الحرار تأتي مناخرها وارجلها صفر وهذا من طبيعة العلف , فهناك علف معين

تأكله هذه الطيور حتى يصير كله شي فيها اصفر العين والمنخر والرجل....


وبعض الناس يقول هذا لانه قرناس وحش ولكن اقول بعض الوحوش تجينا ومناخرها

وارجلها بيض ليش مايصير اصفر؟؟؟


ايضا ربما اتوقع البيئة التي تعيش فيها ربما لها اثر في ذلك.

************************

وقولك:
2- انت تقول اذا انكسرت ريشة الطير فأن ذلك يؤثر على الطير سواء بالسعر او بالطيران وان الطير يغير ريشة سنويا طيب لو اشتريت طير بعض ريشة مكسور وخليته عندي هل يسقط هذا الريش بعد سنه وينبت له ريش جديد ويكون سليم أم انه يظل مثل ماهو .


الجواب: اما بالنسبة للحرار فأنها ان شاء الله سوف تبدل ريشها خلال القيض

اما بعض الشواهي فربما تاخذ عاما كاملا حتى تبدل ريشها , ولكن في جميعها لابد

لها ان تبدل هذا الريش بريش جديد.

************************
وقولك:
3- أسمع الجملة التالية دائما وهي ( أن يكون الطير صنيع ) وش معنى صنيع ؟؟

الجواب : انه عديد اي انه ليس بالهزيل ..


*************************

فالنهاية اقول لك : حااااضرين لاي استفسار بس اسأل وانا اجاوب...

اخوك / المري

[المري]

هلا اخوي الرمادي وحياك الله..


بالنسبة للموس اللي مع طيرك فالحل انك اما تشيله وتدعيه وتهده حتى لو حذف الموس وانت تهده فلا مشكلة

في ذلك..

او انك تخليه حتى يحذف موسه..



بالنسبة لصورة ثر الحبارى :

http://shaman.jeeran.com/images/hobara.jpg


وتقبل تحيات اخوك / المري

[ما أعرف أسمي]

والله ما قصرت يالمري
لكن ما علمتني هل اللون الاصفر بأرجل الطير او عيونه او منخاره يعد عيب بالطير أي ما الافضل الطير اللي لون ارجله صفر ام بيض وكذلك السؤال على المنخار وحدود العين أم انه ما يفرق !!
بعدين انا سمعت ان تبع الشيهين تجي ارجلها ومنخارها اصفر فهل كل ما شفت لي شيهانه لون رجولها ومنخارها اصفر أعرف على طول انها من تبع الشياهين .
كذلك هل ينطبق ذلك على الوكار . أي بمعنى أصح هل لون الصفار يحدد نوع الطير ؟؟؟؟ واذا كان جوابك لا هل مقاس الطير يحدد نوعة أي اذا كان عندي طير حر وقسته وطلع 17 أنش فهو حر بينما لو طلع 14 فهنا اقول هذا وكري مثلا وحينما يكون 15 انش فهذا مثلوث ..... أم ان هذه القاعدة غلط .

أشكرك يالمري على تجاوبك

[المري]

لا مايعد عيب لان الطيور بعضها يجيك ارجلها صفر واذا قيضته لمدة سنة او سنتين

تجده يرجع الى اللون الابيض.
اما تبع الشياهين فماهو شرط يجيك منخرها اصفر او ارجلها لان بعضها يجيك ابيض
كل شي.
الوكارى العادة يجيك الاصفر منها قرناس هوى والابيض فرخ.

فهي مقاس 14 وكري وفيه شاهين وفي ربع حر كلها مقاسها 14 ولكن كل شي

وله شكل خاص به.


وتسلم وفي انتظار اسئلتك.

اخوك / المري

[ما أعرف أسمي]

ماشاء الله عليك يالمري دايم ترد بأسهاب وسرعة يعني اسمح لي أعينك مشرف مع سبق الاصرار والترصد !!!
وأبي اكثرها عليك وش اسوي لقيت لي واحد كريم!!
قدرت يالمري استنتج ولو اني ماني صقار (( بس اعتبرني باحث بأدق التفاصيل )) ان الفرق بين الحرار والشياهين أن الشيهانه فيها علامة مميزة بلون الراس حيث ان اللون ينحدر من الراس الى الوجه وياخذ شكل الرقم سبعة بالعربي وتفرق بين البحري بلون الصدر الابيض بالاضافة الى الحجم ولون الظهر الرمادي او الاسود أما الجبلية فهي ذات اللون الاحمر بالصدر والاصغر بالحجم !! أرجو انك فهمت قصدي .
فما العلامة التي تميز الوكري والمثلوث والربع عن بعضهم البعض؟؟؟؟؟؟؟؟

[المري]

مرحبا ومسهلا بك اليوم ودوم يالغالي وخدمتك شرف لي...

المثلوث : كأنك تنظر الحر بس ان بصورة مصغره يعنى تلقاه زي الحر الوافي


بس كل شي فيه صغير الراس والبوز والارجل وكل شي ......


الوكري تعرفه بـ:::::::: بشكله والله ماادري كيف تعرفه بس شكله بين اي شي

تشوفه ماهوب حر ولا هوب شاهين اعرف انه وكري.. حلو هالتوصيف !!!!!!!!


اسمح هذه المشاركة ماجاوبتك عليها بدقة ولكن خيرها بغيرها...


تدري ان اتمنى منك شي واحد هو:



ياليتك تغير اسمك لان ماله داعي (( ماأعرف اسمي )) يعنى انك .....


ارجو انك ماتفهمنى غلط ترانا اخوان



اخوك / المري

[ما أعرف أسمي]

لا يابعد من جابوا أدم وحواء والله اني ما أزعل منك بالعكس يوم قريت اللي انت كاتبة فوق قمت اضحك لأنه فعلا اسمي غريب بس صدقني يوم جيت اسجل بالمنتدى والله احترت مدري وش اكتب اسمي وبعدين قلت هلحين لو سجلت اسم زين يبي يرفضني النظام لأن الاسماء الزينة كلها محجوزة بس يالله أتقبلوني بهالاسم هذا .. والله يعينكم علي .
ونسيت أشكرك على ردك وهو فعلا السالفة تحتاج لعرف والصحيح أنا كان عندي شيهانه بحرية ووكري الشيهانه كانت نزرة شوي راعيها اماراتي المهم كلهن ماتن الشيهانه تركتها بغرفة سقفها زنك وذيك الليله امطرت علينا مطرة طيبة لمدة يومين وما ادري بعدها وش صار الا يوم دخلت على الشيهانه وهي واقعة من طولها ومقفية على وجهها اما الوكري فأنا مسوي حالي ابو العريف وجوعته اربعة ايام وبعد الاربعة ايام جيته واعطيتة فري ابية ياكل الا طيري ماهو باللي على خبري مسك الفرية بين مخالبة ومد بوزة ياكل لكن ما قدر ياكل شغلته بس يحط الفري ببوزة ويجيه لحظات كأنه مسلهم يعني ماهو مع العلف احركة بيدي وكأنه يصحى ويتذكر ان فيه فرية ببوزة فيأكل شوي ويوقف خفت على طيري وعرفت انه رايح فيها لا محالة وفعلا ما جاء المغرب الا هو مودع وهذي سالفتي .
والحين بعد ما فات الفوت لقيتك يالمري وياليتني لقيتك قبل هالوقت .

سامحني على هالاطالة بالكلام بس ما أدري يمكن أرتحت لك .
وشكرا لك ويعطيك العافية

[نشوان]

مشكور على جهودك الطيبه طاب فالك
سؤالي/ عن طبع الطير عقب القرناس البيتي؟
بعد ما طلعته من الربطة تغير وزادة وحاشيت الطير, ولا يبي البرقع ويكفخ اذا قربتله.
وش الطريقة المتتبعه في هالمشكلة,,,جزاك الله خير
وشكرا

[ابو عبدالعزيز]

ماذا تعني المقاسات في الطير
16في 16 او غيرها
ما هي مدلولاتها وهل هي متساويه دائما اقصد الرقمين
ومن اين يقاس الطير اذا تقدر صوره توضيحيه
والسلام

[المري]

هلا اخوي نشوان

طبيعة ان الطير بعد القرنسه يتغير حاله وتشين نفسه ويصير كأنه وحش ويمكن

الوحش احسن منه وترى ماهي كله بعض الطيور والله انّا نطلعه من الربطه ونهده

على حبارى ولا ندعيه دعو وعلى الطول.. بس الطيور ماهي سوى..


الطريقه انك تنزل في عدة الطير اشوي حتى يصير ينقزعلى يدك ومن ثم تكثر نقله

في المجلس ومن ثم يطيح راسه ويجي على كيفك..


اخوك / المري

[المري]

هلا اخوي نشوان

طبيعة ان الطير بعد القرنسه يتغير حاله وتشين نفسه ويصير كأنه وحش ويمكن

الوحش احسن منه وترى ماهي كله بعض الطيور والله انّا نطلعه من الربطه ونهده

على حبارى ولا ندعيه دعو وعلى الطول.. بس الطيور ماهي سوى..


الطريقه انك تنزل في عدة الطير اشوي حتى يصير ينقزعلى يدك ومن ثم تكثر نقله

في المجلس ومن ثم يطيح راسه ويجي على كيفك..


اخوك / المري

[سنجاري]

عيدكم مبارك و أيامك سعيدة .

بسأل عن علاج الجذره عندي شيهانه اصيبت بجذره فوق المنسر و عالجتها بفركها بالليمون لمدة 3ايام والحمدلله راحت بس صار لونها وردي خفيف هي كانت صغيرة واخاف تعود عليها . فهل من علاج غير الكي .؟ يمكن الليمون سابقه جديدة بس حبيت اجرب ولله الحمد خفت حيل . فهل هناك من مجرب سبق له علاج الجذره بلا كي ؟؟؟
ولا هنتوا ....

[المري]

مرحبا اخوي سنجاري وحياك الله يالغالي..

تدري اني اول مرة ادري بعلاج الليمون !!!!!!!!!!!!!!!!!!!!

ويش طريقته اخوي سنجاري وياليت تعطيني الطريقه الصحيحه


وانا في انتظارك... وياليت تنزل الموضوع في مشاركة جديده... وتكتب عنوانها:


(( علاج الجدره بالليمون))


اخوك / المري

[سنجاري]

الله يبارك فيك أخوي المـــــــــــري .

هي تجربه ولله الحمد ناجحه الى الأن . وانشالله تحت أمرك ابكتب الموضوع لتعم الفائدة .

[نشوان]

مشكور اخوي المري وكثر الله من امثالك

[عاشق الشمالي]

مشكوووووووووووووووووووووووووووووووووووووووووورر



وماقصرت ((يالمري))

علي الاسئله والجواااب الصريح منك ويارب لايحرمنا من امثااالك

وعساك ذخر للمنتدى مكشاااات

:::::::::::::::::::::::::::::::::::::::::::::::::: ::::::::
وماعندي اسئله

كل شي اعرفه من ابوي الله يخليه لي
<-عمره15 ويعرف العلوم كلها هههههههه


بس قولو مشالله مو واحد يصكني عين الحين الا انا موودع

هههههههههههههههههههه


عسى الله لايقوله انشالله


يالله تحياااااتي

ابــ عاشق الشمالي ـو عزيز:D

[الخضاري]

السلام عليكم ورحمة الله وبركاته


صبحكم الله بالخير

صبحك الله بالخير أخوي المري ودي أستفيد من خبرتك يأخوي عندي طير مخولف قام يحذف ريش من كل مكان حذف الخامسه والرابعه وأخرها الموس وش رايك أربط الطير للموسم الجاي ولا شسوي ياخوك وتسلم

[المري]

مرحبا اخوي الخضاري ..

والله أنها مشكلة حذف الطير ذا الوقت ولكن اذا الطير طيب اتعبه بالدعو هالثلاث اشهور

الجاي وكثر عليه الهدد وخاصة اذا جات الكراوين في شهر ثلاثه. ومن ثم اضعفه


وعقبها اربطه وأعطه عشاء وغداء لمده اسبوع كامل, وان شاء الله انه يحذف بس الله العالم انه بيتأخر السنة الجايه...


والله يعينك واذا الطير طيب اصبر عليه ترى الطيب هالسنين التاليه قليل جدا...

وعسى ان اكون افتدك.

اخوك / المري

[ابـو عــلـي]

كيفكم شباب اناعندي شاهين احمر وفرخ كم قيمته








ومشكـــــــــــــــــــــــــــــــــــــــرين على الموضوع الحلو

[الخضاري]

السلام عليكم ورحمة الله وبركاته


لاهنت يالمري والله يعطيك العافيه وأنشالله أني بسوي الى قلته والله يكتب الي فيه الخير ,
والطير يالمري والله أنه طيب ولو أنه طير عادي كان ماهمني بس الله كريم وتشكر مره ثانيه يأخوي المري

أخوك الخضاري

[المري]

مرحبا اخوي فرخ الحرار وحياك الله معنا في المنتدى

وان شاء الله تلقى اللي يساعدك في هذه الهواية..


انصح ان يشتري وكري ويفضل انه قرناس بيت وبعدها يشتري فرخ وكري وحش

علشان يتعلم فيه زين... وانتبه اخوك لايعاقب الطير ترى العقوبة ماهيب زينة..


اخوك / المري
وفي اي خدمة تراني حااااضر يابعدي

[ابـو عــلـي]

اخوي المري مارديت علينا فرخ الشاهين الاحمر كم قيمته :confused: :confused:

[المري]

هلا ابو علي

سوالك غير دقيق من الفروخ الحمر ماهو مقاس 16 و15 و14ونص

وفي من الشياهين الحمر الجبليات فهي تختلف اسعارها من حيث الكبر......


الرجاء منك تحديد النوع..


اخوك / المري

[ALAMIR]

عندي شاهين في بطنه دوود توقعاتي جذي

شنو حله وانا بالكويت الحين
في علاج له او ماله علاج

ياليت يالمري ترد باسرع وقت او الصقاره وتحياتي لكم

[معشوق]

اخوي المري اسمحلي ارد على اخوي :

ALAMIRاخوي
حسب علمي انه فيه حبه تعطيها الطير ولازم يكون جوعان (مو متعشي) وبعدها تعشي الطير وراح يمرش مرش اخضر ويطلع الدود باذن الله (وهذا كما صار بطيري)
وانا بالكويت واي شي انا بالخدمه
******************
اما سؤالي اخوي المري انا عندي طير وكري ولا جيت اعلفه يخااااف ويفرد جناحيه
مادري وش السبب والعلاج الله لا يهينك

واتأسف مره اخرى على التطفل والرد على اخوي

[المري]

تسلم اخوي معشوق وماقصرت ..

بالنسبة لطيرك اخوي معشوق فهو يفرد جناحية له يكوش ويوخذ منه العلف في السابق

فهو يحاول يغطي على العلف علشان ماتسحبه (( هذا توقعاتي))


اخوك / المري

[##الفارس##]

السلام عليكم ورحمة الله وبركاته

اخوي المري
انا من الناس الي يحب الطيرو الصقور
ولاكن معرفتي بهابسيطة وانا اتمنا اني امتلك طير
وادربة واقنص فية ولاكن ارجو منك

اعطائي النصائح المهمة لشخص مبتدي
وطريقة التدريب للصقور
وشكرا ....

[##الفارس##]

اخوي المري
انا واحد احب الطير
ولاكن مااعرف شي في الطيور
ولااعرف تدريبها
ارجوك عطني النصايح المهمة
لواحد توة يبي يبتدي
وشكرا............................

[معشوق]

توقعك 100% يالغالي
ولكن كيف اقدر اعالجه ؟؟
انا ما اخذ منه العلف ولكن قد يكون صاحبه السابق
وانا صارلي فتره ما اسحب منه العلف ومع العلم فهو يخاف بشده :(

[القناص الرهيب]

مشكوووووور اخوووووي

والله يعطيك العافيه

[شَعَّـاااال]

السلام عليكم ورحمة الله وبركاته

صبحكم الله بالخير



ويعطيك العافيه يالمري مجهود طيب



اخوك ابو صالح

[##الفارس##]

اخواني الصقارة
عساكم بخير
لو تسمحون نبيكم تعطوننا النصائح المهمة لشخص توة مبتدي
ولاعندة معلومات كافية عن الصقور
وكيفية تدريبها

[البرج الطويل]

هل من الممكن نقل الطير اثناء الربطه من مدينه الى اخرى وهل من قواعد يمكن اتباعها ولكم الشكر

[المري]

مرحبا اخوي البرج الطويل

وحياك الله في منتداك وابشر باللي يسرك..

نقل الطير اثناء رمية لريشه (( في الربطة )) يأخرحذفه يعنى مايصير متساوي زي

اول , بل اذا نقلته الى مكانه الجديد تشوفه يتأخر رميه للريش الباقي , والبعض

لا يرمي عادي..


أما القواعد التي يمكن ان تتبعها فمنها:

انتبه على الطير ان يكفخ واجد خوف على الريش الخضر..

2- انتبه ان تبرقعه بعد الكفخ وبعد التعب لانه خطر عليه انه يموت ولكن

خله اشوي في المكيف ومن ثم رشه بالماء وشغل مكيف السيارة قبل ان تشيله

علشان تبرد ..

3- انتبه لاتشيله وهو متعشي لان الكفخ يضر عليه ويمكن انه يقذف..


اخوي القواعد والنصايح واجد ولكن اسمح لي لضيق وقتي..


اخوك / المري

[البرج الطويل]

شكراً الله يعطيك العافية

[سفاري 99]

[السلام عليكم ورحمة الله وبركاته
الأ خ المري حفظك الله ما المقصود بالطير السنجاري هل هونسبه الي جبل سنجار
ام ماذا وشكرا.:) :cool:

[معشوق]

يعطيك العافيه اخوي المري
عندي سؤال ياليت تجاوبني
وشلون اعرف انه الطير فيه دوود ؟؟
وهل هناك علاج غير الحبوب ؟؟؟

[المجروب]

السلام عليكم ورحمة الله وبركاته
يالربع بعضكم يقول ادرب طيري على حباره بس من وين تجيبون الحباره
لاني لقي جوز الحباره باخمسة الف وقالي واحد من الربع درب طيرك على دجاجه روميه
الانها تشبه الحباره وتكفون يالربع افيدوني
لانها شيبة راسي

[عاشق الكراوين]

السلام عليكم ورحمة الله وبركاته
أخوي المري والحاضرين:
قرأت موضوعك في تدريب الصقور على الحباري وأنـــــــا عندي شــيـــهـانـــــة جبـــــــليـــــــة وأبغى ادربها على صيد الحباري مع العلم أني هديتها على ديك حبــــــشي عمره كبيــر مع العلم أنها ما اطلبته يوم نزلته لها وماطلبته ألأ يوم أنه طار وبعــــدها ذبحت الديك الحبشي بعــد مـــا كـــوبـــر ( وش السبب أنها ماطلبته من أول مرة الإ بعد طيرانه مع العلم إنــي كــــذا مره أهدها على ديكه وطنيه وتذبحهن ) وش رايك يــالــمري أنت ولإخوان تـــهد على حبارى وأبغـــــى حللول ونـــــصائـــح الله يجزاكم كل خيـــر.
والسلام خير الختام

[حادي العيس]

السلام عليكم ورحمه الله وبركاته .. يسعد الله صباحاتكم .. بتهاليله

موضوع اكثر من الافأده نفسها .. ونشكر كل القائمين ابتداءاً من المشرفين .. ( والمبتدئين أمثالي )..

---- مري / دمت رائعاً .

--- ابو الكراوين / الشيهانه الجبليه الله يطعمك من خيرها .. ( الدعوه سياسه ) - الشياهين فيها ريبه وخوف شديد من الارض نتيجه لسرعاته الفائقه .. مما ينشأ رهبه ابديه لديها بأنها متى مانقضت على الفرائس وهن منوخات ترتطم بالارض .. ( كثير من الشياهين تكون لديه هالعقده .. ولاجل ذلك تبيها طايره .. وحتى تتمكن من مناوره الطريده بشكل افضل من المنازلات الارضيه ( مصارعات الجودو مع الخرابه ) .. وايضاً الخوف من حجم الفريسه .. وقوتها .. عكس اذ ماكانت طائره ومقفيه .. لاتنسى السرعه سلاح قوي في المباغاتات الجويه ..
- وايضاً اذ اردت ان تعلم .. احضرلك صغار السن من الطرائد.. وبالتدريج حتى تأصل الى الحجم الحقيقي للحبارى ..
ونصيحه اخوى ارفق على الشويهينه وانا اخوك ساعدها .. تحدها انت والجوع واشهاب الال .. ( على الهدد ) والا لوها بكيفها مهدت على على ديك حبشه يكبرها بكثير حجماً ..
لاتنسى اشياء كثيره في التعليم على الفرائس منها سد فم الطريده لاجل الصوت ( مايجيب روابع للطير ) ولا يخاف .. وضع ربله صدام على منقار الطريده اذ كانت اكبر من الطير لكي ماتفتح جوشن طيرك بنقره !!!!
تقليم اظافر الديك .. ايضاً للحفاظ على جسم طيرك من المرافس ..
.. وتقبلوا فائق اعجاباتي بالمواضيع الجميله ياجميلين .

<---- شيهان ركن .

[عاشق الكراوين]

:good: وعليكم السلام ورحمة الله وبركاته
مشــــــــــــــــــكور أخوي حــادي العيس
على المرور

[عاشق الكراوين]

السلام عليكم ورحمة الله وبركاته
وش دعوة يالربع مأحد وجهلي جواب ونصائح إلإأخوي حـــــــادي الــــعيس الله يجزاه كل خير
وردة ونصائحة أبستفيد منها إنشاء الله وبيستفيد منها كل من يقرئها
وأرجوا من الأخوان المتواجدون في هالمنتدى أن يعطونا آرائهم حول الموضوع
الــــــمري
شقردي
تالي الأولين
ميراج
قشاع الرمث
القصمنجي
شعاااال
اعقاب
والأخوان المتواجدين بها المنتدى ومن له أي رأي يعرضة المـــــقـــصد الأســــــتـــفادة
صلى الله عليه وسلم

[عاشق الكراوين]

بسم الله الرحمن الرحيم
السلام عليكم ورحمة الله وبركاته
ســـــــكـــــــر نـــبــــــات الإيــــــــرانــــــي وش يــــــــفيــــــد الـــــــــطيـــر فيــــــه
صلى الله عليه وسلم

[المري]

مرحبا والله اخوي عاشق الكراوين

والله ماشفت موضوعك الا ذا الحين....


بالنسبة للجبلية حجمها صغير فتسهل عليها صيد الصيده اطيار..


لانها لو جاتها وهي بالارض فسوف توجعها الحبارى ..


ولكن اخذها قاعدة عليك بعلام الطير دائما اطيار ومن ثم يسهل عليه صيدها في الارض


هذا مالدي واذا فيه اي استفسار حااااضر من اعيوني الثنيتن....


اخوك / المري

[اعقاب]

الأصل كُتب بواسطة المري
مرحبا والله اخوي عاشق الكراوين

والله ماشفت موضوعك الا ذا الحين....


بالنسبة للجبلية حجمها صغير فتسهل عليها صيد الصيده اطيار..


لانها لو جاتها وهي بالارض فسوف توجعها الحبارى ..


ولكن اخذها قاعدة عليك بعلام الطير دائما اطيار ومن ثم يسهل عليه صيدها في الارض


هذا مالدي واذا فيه اي استفسار حااااضر من اعيوني الثنيتن....


اخوك / المري

[عاشق الكراوين]

السلام عليكم ورحمة الله وبركاته
مشكورين على المرور

[Abi]

السلام عليكم وحمة الله وبركاته
سؤالي للمري ولا يهونون الجماعه انا عند وكري باقي له الريشتين الأخيرات
سؤالي هو هل هناك مده معروفه بين كل ريشه وأخرى مع العلم ان تايخ حذف
الريشه الثالثه هو1-7
ومشكور والله يعطيك العافيه

[المري]

مرحبا اخي العزيز Abi

بالنسبة لأكثر الطيور تأخذ بين الريشة والريشة 19 يوما تزيد يوم تنقص يوم يعنى

حول هذا الايام..

[Abi]

مشكور أخوي المري والله يعطيك العافيه

[معشوق]

السلام عليكم ورحمة الله وبركاته
اخوي المري ولا يهينون الشباب
اخوي انا عندي وكري ولكن اليوم جيت ابي البسه البرقع وجات المشكله انه ماهو راضي وهذي مشكله لازم بعد القرنسه ولكن وش الحل ؟؟
والمشكله الثانيه اني انا سافرت وخليت الطير عن واحد من الربع ولكن رجعت وشفت الطير انه باقي له الموس من الجناح الايمن فقط وبعض ريش الظهر والصدر وانا اتوقع انه المشكله من قله العلف واذا قلنا هذا هو السبب هل بالامكان انه نقول انه العلاج ؟؟
ومتى افضل وقت اطله من المربط ؟؟

[محمد العتيبي]

واحد من الربع يقولي :



عندي فرخ حر مصاب بأهتزاز في الرأس هذه الحاله جاته بعد ظهور بعض الأعراض مثل ( خروج سوائل ذات لون شفاف مثل الماء وصاحبها اغماض الطير لعينية لفترات طويلة ومن ثم امتناعه عن العلف ) وحقيقة هذه الأعراض اول مرة تمر علي .... من مرة عليه هذه الحاله يفيدنا وما هو علاجها ؟

[معشوق]

السلام عليكم ورحمة الله وبركاته
اخوي الغالي المري ولا يهونون الشباب
لي طير ولاحظت عليه شغله توها باديه فيه وهي صعوبه الاخراج (المرش) وكأني سامع انه مرض ارجو انك تفيدني وكيف اتأكد انه مصاب ارجو الاجابه بسرعه

[abu saud]

اخوي المري السلام عليكم ورحمه الله عندي بعض الاسئله وارجو منكم المساعده
1-لاحظت على طيري انه لما يكفخ اشوي يتعب بسرعه ويصير يتنفس بسرعه حتى اني اسمع صوت نفسه مثل كدا خخخخخ خخخخخخ خخخخخخخ بسرعه وبعد دقيقه او نص دقيقه يرجع طبيعي وما ادري هل هو مريض ام لا.
2-اشلون اسقي الطير.
3-اشلون ارفق صور مع موضوعي

[المري]

مرحبا اخوي معشوق واسف على التاخير

بالنسبة لصعوبة التخريج يمكن مع الطير دود وترى ماني متأكد ..


*************

مرحبا ا خوي ابو سعود

انا مرة قيضت طير فرخ ويوم جاء بعد القرنسة قمت اسمع فيه صوت بعد الطيار او الكفخ مثل صوت طيرك

ذهبت به الى عيادة كانت في البحرين فحص عليه الدكتور قال طيرك مع رداد وانا كنت متأكد ان معه رداد.

ولكن يفضل منك ان تمر به على دكتور يفحصه ويعطيك الاخبار..

وعسى الله يشافيه..

وسلامتكم

اخوكم / المري

[abu saud]

]شكرا اخوي المري و يعطيك الف عافيه[/size]

[قناص الشرقية]

السلام عليكم ورحمة الله وبركاته
ياجماعة الخير انا رجال احب المقناص والطير لكن ينقصني كثير من التعلم ولانكم طرحتوا هذا الموضوع ودي اتعرف على رجال يعلمني الصيد وباكن شاكر له اخوكم قناص الشرقية وارجوا الرد على رسالتي باسرع وقت وهذا رقم جوال (0506858590) :bounce:
والسلام عليكم .............

[قناص الشرقية]

السلام عليكم ورحمة الله وبركاته
الاخ المري ارجوا الرد علي الله لايهينك :hot:

[تالي الاولين*]

.


اخوي قناص الشرقية

ياليت اقدر افيدك بس المشكلة اني

في الرياض وانت في الشرقية ..

واكيد الشباب ماهم مقصرين معك



.

[قناص الشرقية]

السلام عليكم
شكرا اخوي تالي الاولين والله يعطيك الفافيه :)

[بو نوف]

السلام عليكم

يا جماعة عندي سؤال، انا ان شاء الله ناوي اشتري طير و ابتدي مشواري بهالعالم الجميل ، بس عندي سؤالين،

1. المقيض حق الطير لازم شكبر يكون؟

2. كم راح ياخذ من وقتي الطير كل يوم في فترة المقيض ؟



تحياتي للجميع ،،،
بو نوف

[المري]

مرحبا اخوي بو نوف وحياك الله يالغالي

بالنسبة لحجرة المقيض على كيفك وعلى كثرة الطيور اذا كانت الطيور واجد كبر حجرتك واذا صار طير واحد


خله مترين في مترين بس الافضل انها تكون كبيرة علشان في المستقبل يمكن تكثر الطيور.


بالنسبة كم راح يأخذ من وقتك الطير في وقت المقيض فتراه بياخذ وقتك كله علشان لازم تكون انك حوله..



وسلامتك
اخوك / المري

[ابوحسين]

السلام عليكم
يعطيكم العافيه
عندي طير مثلوث حر فرخ السنه حذف ريشه من كل جناح هل اربط الطير ؟ وهل اقدر اهده على الكراوين هالموسم؟وكيف طريقة علفه اذا ربطته هل اشبعه يوميا؟
والله يعطيكم العافيه على هالمواضيع المفيده .

[المري]

مرحبا اخوي ابو حسين


بالنسبة للمثلوث اللي حذف الافضل انك تربطة للمقيض علشان مايتخربط مقيضه وعلشان يقرنس من بدري..


واذا هديته على الكراوين ماهوب معجبك لانه حاذف بعض ريشة...


دور لك طير للكراوين افضل من طيرك اللي حذف ريشه ..


اخوك / المري

[ابوحسين]

اخوي المري الله يعطيك العافيه , بالنسبه للعلف هل اشبعه يوميا ؟وبماذا تنصحني؟

الله لا يهينك


اخوك ابو حسين

[بو شهاب]

السلام عليكم اخواني الاعضاء : اشكركم على طرح هذا الموضوع المهم والجيد والجميل

...جزاكم الله خير

[بو شهاب]

السلام عليكم ورحمه الله وبركاته

اشكر الاخ المري على هذه الفكره واسأل الله سبحانه وتعالى ان ياجره ويباركله
واذا سمحت عندي بعض الاسأله
1 . طير شاهين صارلي 16 يوم من خذيته وودي اعلمه على الملواح ولكن اخاف انه ينحاش واريد الحل برايك وكيف اعلمه على الملواح بحيث انه مايطير؟
2.كيف اخذ الفريسه مثل الحبارى وغيراه من الطير اذا صادها وهو ماسكها بشده؟
3. الطير يحتاج ماء كثير ام قليل وبمعدل كم في الاسبوع؟
4.متى يبدء موسم الحبارى والكراوين؟
وجزاك الله خير

لاتنسى ذكر الله
سبحان الله وبحمده سبحان الله العظيم

[المري]

مرحبا اخوي ابو شهاب وحياك الله يالغالي..

بالنسبة للشاهين اذا صار فرخ علمته سهل مايأخذ معك وقت وهي ان تربط في الملواح علف (لحم) وترميه

تحت وكرة حتى ينزل عليه وتخليه يتعشى دائما على على الملواح حتى يعرف ان الملواح ابو الخيرات..

اما اذا كان طيرك قرناس شاهين فهذا اكيد انه يعرف الملواح بس يدلع عليك يبغى لك انك تقصر عليه ولا عاد

تهده على حمام لان الحمام هو اللي يخرب الطير عن الملواح ..


اما كيف تأخذ منه الحبارى فهذي بسيط جدا , تأخذ فخذ الحبارى وتقطعة وتخليه في الدس وتجيب الدس

وتخليه تحته على يأكل منه ثم تحاول تعرف الدس بشويش حتى يفك الفريسة ويركب على يدك ومن ثم يفك

الحباري او الفريسة..


أما بالنسبة للماء للشاهين فهذا ضروري جدا حتى في الشتاء , يعنى اذا جاء كل ثلاث ليال تحط الماء في فنجال

وتقربه منه وهو سوف يشرب اما اذا الطير جاء طرد قوي فلازم انك تسقيه ذلك اليوم, وحاول ان تضع له

صحن كبير في ماء كل اسبوع علشان يتسبح لان الشاهين يحب الماء واجد..


موسم الحبارى يبدا في اكتوبر شهر عشرة وينتهي بعد ثلاث اشهور

أما موسم الكروان يبدا حوالي 25 شهر فبراير وينتهي بعد شهر...


وسلامتك اخوي ابو شهاب وحاااااضرين للطيبين


واي استفسار لايرد شي


اخوك / المري
لاتنسى ذكر الله

[بو نوف]

اخوي المري

تسلم يالغالي و ماقصرت على هالرد ،،،

تحياتي لك ،،،
بو نوف

[بو شهاب]

مشكوور وماقصرت يالمري وجزاك الله خير
وبس عندي استفسار اذاممكن لوسمحت
اشلون اعرف عمر الطير واذا كان انثى او ذكر ؟
ومتى وقت التدريب وكم يوم حتى يكون جاهز للقنص ؟
واذا كان مخلب الطير مو حاد هل توجد طريقه ليكون حاد؟
وهل ممكن ان الطير (ينحاش) من صاحبه وقت التدريب على الملواح اوقت الهدد ؟
وفي مصطلحات موفاهمها عدل اذاسمحت تبينلي اياها مثل (طرد قوي)و(الطير السبوق) و(ادعي الطير)

وسامحنا ثقلناعليك
جزاك الله خير

لاتنسى ذكر الله
سبحان الله وبحمده سبحان الله العظيم

[متيهة البكار]

جزاكم الله خير يالمري وبقية الأخوان

مالي في الصقور

بس الإطلاع مرغوب

يعطيكم العافية على الوقت والجهد

[المري]

مرحبا اخوي ابو شهاب

يعرف عمر الطير اذا كان فرخ بريش الفرخ وهو واضح جدا للصقار .. اما هل هو انثى ام ذكر فيقولون

ان الطير الوافي 17 فما فوق هو الانثى وان الطير مقاس 16 هو الذكر والله اعلم..

وقت التدريب اذا شريت الطير ورأيته قد احتاج للعلف يعنى بدا ينقز على اليد وبدأ يعلف وانت عنده فذيك الساعة

علمه على الدعو وعلى الحبارى.

اما عن مخلب الطير فبعد القرنسة بعض الطيور تجد مخلبه يقرنس مثل ريشه وبعضها يسويها الصقار بطريقة

صعبة اشوي .

اما ان الطير ينحاش وقت التعليم فأقول نعم اذا كان الطير غير جاهز وغير قابل للتعلوم ذيك الساعة يفرك لها ..

طرد قوي) اذا طرد الطير فريسته فوق الطاقة يعنى مثلا طرد عشرة كيلو وماشابها
و(الطير السبوق) هو الطير اللي اطياره سريع
و(ادعي الطير) هو انك تدعيه بالملواح او حمامه يعنى تصوت له ويجيك..

وسلامتك

[العنييد]

الاخ المري السلام عليكم ورحمه الله وبركاته عندي سؤال اذا اشتريت طير مطروح وراعيه اللي طارحه غشيم ومايعرف للطيور ابد ويقول مالاحد علي حق هذا طير جو يعني مايتعرف عليك لو انعرف الطير عندك والطير يستاهل واجد وينحن منه وش الطريقه لو جاني راعي الطير وقال ابي طيري ولا لي شغل في احد او قال طيري مسروق وابي اعرف من وين جاك الطير ولا التهمه عليك انت واللي طرحه يقول مابعتك ولا ادري وش تكلمون عنه

[المري]

مرحبا اخوي العنيد وحياك الله يالغالي

بالنسبة يوم انك شريت الطير وانت تعرف ان الطير مطروح وانه طير عرب فلازم انك ترجع الطير لهله بدون مقابل اما اذا قالك

بائع الطير اذا عرف الطير عندك فافلوسك محفوظه هذا شي ثاني...


وسلامتك يالغالي..

اخوك / المري

[ينبع]

السلام عليكم ورحمه الله وبركاته عندي سؤال للجميع ماهي افضل طريق لتركيب ريشة الجهاز على الطير على الصفره في الذنابه او في السبق وشكراً للجميع

[اعقاب]

افضل طريق لتركيب ريشة الجهاز على الطير على الصفره في الذنابه :light:

[بن حسن]

السلام عليكم
اشكر اخوي المري على طرح هذا الموضوع الجميل
وعندي استفسار وارجو الرد عليه
شلون اعرف الطير الحر والطير الوكري؟
ومتى تبدي فتره القرنسه عند الحر وشلون اعرف اذا بدء واذا انتها ؟
وهل ضروري اني اوكل الطير الحر كل يوم ؟
وهل يضر الطير اذا ظل البرقع فتره طويله على الطير؟
اذا شريت طير كم يوم و اقنص فيه وهل يكفي اسبوع او اسبوعين؟
وهل من نصيحه او تعاليم تنصحه فيها الصقار المبتدء ؟
وسامحنا على الطواله
ومشكور وماقصرت واتمنى رد الاجابه بسرعه

[عبد المالك]

السلام عليكم و رحمة الله و بركاته أخوكم أبو عبد المالك من الجزائر
هذه أول مشاركة لي في هذا المنتدى وأنا والله معجب كثير بهذا المنتدى و أعضائه الله يبارك فيكم و في جهودكم و في علمكم أنا من هواة الصيد بالصقور ولكن علمي قليل جدا وأريد منكم مساعدتي قدر الإمكان لكي أكون إنشاء الله من الصقا رين
في الحقيقة عندي أسئلة كثيرة جدا وسأعرض كل مرة شوية

1 هناك مصطلحات لا اعرف معناها مثل التدهيل الهدد.......
2 هل تدريب العقاب يكون بنفس طريقة تدريب الصقر وإذا كان مختلف كيف السبيل لذلك
3 عند مناداة الطير للقفز يوضع العلف على الداس ثم هل يترك يأكل على الداس أو يعطيه العلف باليد الأخرى
4 كيف يصنع البرقع (أريدها بالصورة لان عندنا لا يمكن الحصول عليها)
5 هل يمكن تدريب الطير بدون برقع لان طيري يرفضه ويكاد يموت من الخوف إذا رآه(صنعته بنفسي ولكنه غير مناسب).
واعذروني على الإطالة وأرجو أن تقدروا موقفي وجزآكم الله خيرا

[المري]

مرحبا اخوي بن حسن وحياك الله يالغالي.

الفرق بين الحر والوكري واضح جدا من ناحية الكبر والشكل ويطول شرحها

ثانيا :

ليس من الضروري ان تؤكل الطير كل يوم ولكن اذا انت في مقناص وطيرك غير جاهز للهدد

فيحتاج انك نؤكله يوم وتخليه يوم ثاني حتى يجهز تماما..

ثالثا:

نعم يضر الطير اذا خليت بالبرقع فترة طويله وذلك اذا جاء يروبج الطير لايستطيع ان يروبج ببعض

البراقع..

رابعا:

اما كم يوم وتقنص بالطير فهي على حسب الطير , فبعض الطيور تشتريه في الليل وبكرة الصبح

تقنص به لانه جاهز وبعض الطيور اسبوع وعلى حسب.


خامسا:

النصيحة لكل مبتدى ان يناظر الصقاقير اللي قدامه ويخلي مخه صاحي ويفتح لاني والله اعرف

بعض الصقاقير مايطور نفسه تجده كل سنه كما هو وبعضهم كل سنة احسن من السنة اللي فاتت..

فأنصحك انك تفتح مخك زين وتتعلم من اللي قدامك وسلامتك ..


اخوك / المري

[المري]

مرحبا أخوي عبدالملك ومرحبا بأهل الجزائر كلهم

اولا:

معنى التدهيل : هو ان تربب ان تؤنس الصقر حتى يتعود على الناس وعلى صقاره ويتجهزه ويتعلمه.

ثانيا: ام عن تدريب العقاب فأتوقع وليس جزما انه مثل باقي الطيور.

ثالثا:ينادى الصقر على الدس وفيه قطعة لحم ويترك الطير يأكل منها اذا قفز على الدس.

رابعا: لاأعرف كيف يصنع برقع الطير ولكن اعطنى عنوانك وانا ان شاء الله سوف ارسل لك كمية

من البراقع مختلفة الاحجام.

خامسا: البرقع شي مهم للطير لانك ياصقاره لازم انك تبرقعه في بعض الاحيان مثل في السيارة وماشابه

ذلك...


واخيرا وليس اخيرا ان شاء الله .. نرحب فيك اخو عبداللملك وفي الخدمة ..

اخوك / المري

[عبد المالك]

السلام عليكم
أخي المرى لك مني ألف شكر الله يعطيك العافية, الله لا يحرمنا منك و من علمك,
الإجابة واضحة وسوف أتعلم معكم إنشاء الله بسرعة, عندي بعض الأسئلة وأرجو المعذرة:

- معنى كلمة الهدد, يروبج ؟
- عند طيري غشاوة بيضاء في عينيه ما هو الدواء لإزالتها
- كم تكون كمية العلف في اليوم و ما هي المدة القصوى التي يترك فيها الطير بدون أكل
- هل يمكن إعطاء الطير في بعض الأحيان مع العلف شيء من زيت الزيتون و هل هناك فيتامينات لتقوية الطير
- إذا كان ذرق الطير ابيض و فيه بعض الخضرة التي تميل إلى السواد هل معناه أن الطير مريض و إذا كان كذلك ما هو العلاج
- سؤال أخير هل يمكن غسل الطير بمادة منظفة أو يترك له إناء كبير و هو يقوم بالعملية بنفسه؟

(سوف أرسل إليك عنواني في الرسائل الخاصة, الله يبارك فيك وفي عمرك)


تقبل تحياتي
أخوك أبو عبد المالك


لا تنسى الغاية التي خلقت لها

[المري]

حياك الله اخوي عبدالملك

كلمة الهدد : معناها اذا اطلقت طيرك على فريسه حبارى او كروان او ارنب فهذا يسمى هدد..

اما كلمة يروبج : عندما تعطي الطير مثلا جربوع او عصفور بعد حوالي 12 ساعة تشوف الطير

يرجع من فمه ريش او جلد او ماشابه ذلك ( اكيد ان طيرك يعملها) فهذا يسمى روباج (( يروبج الطير)).

اما عن غشاوة بيضاء في عيني الطير فلازم انك تراجع دكتور بيطري.. يصف على الدواء المناسب.

كمية العلف في اليوم : تعطيه اخر النهار يعنى قبل غروب الشمس بنصف ساعة تعطيه نصف حمامة او

مايعادلها, ام كم يوم يستطيع الطير بدون اكل من ثلاثة ايام الى اربعة وربما اكثر ..

- لماذا تعطي الطير زيت الزيتون!!! لاأعلم شي عن ذلك..

اما الفيتامينات فيوجد فيتامينات لتقوية الطير تباع في الصيدليات..

اما اذا رأيت مرش الطير يميل الى الخضرة فربما يكون مريض وربما لايكون ولاتعتمد على مرش الطير

ولكن انظر الى صحة الطير اذا رأيت الطير ضعيف اعرف انه مريض ام انه لايأكله..


شكرا لك اخوي عبدالملك وسامحنا على القصور.

اخوك / المري

[عبد المالك]

حياك الله يا أخي و ما قصرت و لكن نسيت أن تجيبني على سؤالي الأخير
هل يمكن غسل الطير بمادة منظفة أو يترك له إناء كبير و هو يقوم بالعملية بنفسه ؟
أخوك أبو عبد المالك

لا تنسى الغاية من خلقك

[عبد المالك]

السلام عليكم و رحمة الله و بركاته

بارك الله فيك أخي المري والله يجازيك عنا خير الجزاء و سامحنا تعبناك شوي

1. كم يستغرق نقل الطير على اليد ؟
2. بالنسبة للعلف هل ممكن أن نعطي جميع أنواع اللحوم للطير(البغال, الحمير.....) وهل تضره إذا أكلها لمدة طويلة و ما هو العلف الأفضل للصقور و للعقبان ؟
3. كيف تكون طريقة إعطاء العلف في المقيض نتركه يأكل بمفرده أم نقوم بتدريبات صغيرة مثل تنقيزه على اليد...؟


تحياتي / أخوك في الله أبو عبد المالك

[لهاب]

بسم الله الرحمن الرحيم ،،،،،،،

الله يعطيك العافيه أخوي المري وجزاك الله خير ،،،،،،

أذا تكرمت يا أستاذ ،،،، هذا السوءال بخصوص القرنسه ،،،،،

عندي فرخ (شمالي) قرنس وباقي فيه الموس والنايفه وأنا متخوف مدري متى راح يصفي اخاف يصفي بدري ويرد

يقرنس مره ثانيه مع العلم انه قط الثوالث صارله أسبوعين تقريبا،،،،،،،،

أشرايك يا أستاذ مع خالص الشكر للجميع ،،،،،،

[فهد الميموني]

اخوي لهاب وبعد أذن اخوي المري اقترح ان تقصر على الطير ولاتكرمه بعدما يصفي

[الهدهد]

السلام عليكم

وجدت في احد العيادات البيطريه اعلان عن اعلاف للصقور عباره عن صيصان مثلجه عمر يوم تستورد من هولندا

وسؤالي هو..................؟
1- هل تم تجربتها من قبل حيث انها توضع فى ماء فاتر قبل اطعامها للصقر .....؟
2- هل هي تفيد الصقر ام انها علف عادي ....؟
3- هل تأثر على ريش الصقر اثناء الربطه......؟مع العلم ان الاعلان يقول انها تجعل رباجة الصقر مثل رباجت الجربوع.
وشكرا جزيلا لكم.. :what:

[اعقاب]

الاخ الهدهد

انا جربت الصيصان ولاحظت انها تسوي للطير شبه اسهال اقصد المحط يكون مائي نوعا ما (ما فيه عقده)
ولا تعطيه الا مرتين في الاسبوع عشان ما يغتث.
اما بالنسبه للفائده فاضن انه مفيد لان في بطنه صفار بيض
والاخوه اللي جربو يدلون بدلوهم

[شَعَّـاااال]

السلام عليكم

اخوي الهدهد


تبي تجربه ما عندي

تبي قناعه حاضرين

وهي ان كل ما هو غير طازج وطبيعي غير مفيد للطير

وستظهر نتائجه السلبيه بع طلعة الطير من الربطه

لان العلف اثناء الربطه غير صحي .....


اذا اثناء الربطه يحتاج الطير ان يُعوض ما فقده اثناء المقناص من فيتامينات

وهي لا تتوفر بالتاكيد في مواد مثلجه ...


على ما اظن واراي لك


سلمك الله ..

[مؤيد]

مشكوار يالمري وماقصرت ويعطيك العافيه

[turhob]

الله يجزاك خير يالمري وشكرا

[المري]

يالربع الله يوفقكم في الدنيا والاخرة

هذا الموضوع ترى ماهو للنقاش الشخصي هذا الموضوع للسؤال والجواب ..

وسلامتكم

اخوكم / المري

[اعقاب]

الاخ شعااال
اولا انا اتكلم من محض تجربه
وايظا لأكثر من موسم
وبالنسبه للفائده للطير فالفائده موجوده
وانصح الجميع بتثليج العلف قبل اعطائه الطير وذلك للتاكد من خلوه من الجراثيم
وهذا كلا م اطباء متخصصين
واحترم راي الجميع :cool:
وهذا كما قال الاخوه للفائده للجميع

[شَعَّـاااال]

السلام عليكم ورحمة الله وبركاته

الاخ اعقاب

انا قايل انها قناعتي الخاصه احب الطازج واراه اكثر نفعا ...

وللجميع الحريه في اخذه او رده

عموما سلمك الله وبارك الله للجميع في طيورهم والله يستر عليكم جميع .

حفظك الله ...

[راعي مسكت]

الاخ شعااال
اولا انا اتكلم من محض تجربه
وايظا لأكثر من موسم
وبالنسبه للفائده للطير فالفائده موجوده
وانصح الجميع بتثليج العلف قبل اعطائه الطير وذلك للتاكد من خلوه من الجراثيم
وهذا كلا م اطباء متخصصين
واحترم راي الجميع :cool:
وهذا كما قال الاخوه للفائده للجميع
اشكرك :good:

[السرحال]

اقولك يا استاذ المري
انا بشتري وكري
1_بكم
@ اخذ فرخ ولا قرناس
3_في اسواق في الغربيه

[المري]

الوكري اخوي عاشق الددسن

في حدود 1200 الى 1700 ريال

ولا الفرخ احسن هالوقت تأخذه وتهله وترببه على كيفك والفرخ تراه مبرووك

فتوكل على الله.. واشتر فرخ

وسلامتك

اخوك / المري

[almaari]

شكورين على الموضوع وماقصرتم

[ابوطيف]

اخوي المري جزاك الله خيرا على المعلومات القيمة وعلى سعة صدرك والله يعطيك العافية ياعمدة الصقارين

[ابو عايد]

السلام عليكم ورحمة الله وبركاته

يستاهل الرفع

[المري]

الله يرفع قدرك يابو عايد

وبيض الله وجهك..


اخوك / المري

[مالك المقناص]

السلام عليكم ورحمة الله وبركاته

مشكور أخي المري على الموضوع

أنا عندي سؤال ؟


قبل يومين مسكت شيهانة جبلية قرناس وحش وش أسوي معها وكيف أدربها وهل أهدها الوقت هذا

ومشكور لك

[# نومـــــاس#]

اخي العزيز المري
السلام عليكم ورحمة الله وبركاته

وفقك الله على هالعمل الطيب اللي بكل صراحه يعتبر دوره مجانيه في عالم الصقور ، لاكن انا عني سؤال وذلك للفائده انشاء الله لكل مشاهد ومتعلم وهو

مرض السويرق ماهي اسبابه وما علاجه ؟مع التعريف للمسمى (السويرق)ان امكن؟

وتقبل مني كل تحيه وتقدير
اخوك نوماس

[1001001]

لو سمحت عندي كم سؤال
س/ الي يبي يشتري طير وش تنصحة بطير واحد توه عليمي يعني يبي يتعلم ؟؟
س/ طيب اذا عندك طير ولاهو متعلم اشلون يصيد اخاف اهده علشان اعلمه وينحاش
ويليت نصائح للمبتداين

وجزاك الله خير

[blehe2002]

ياطويل العمر وان سمحوا لي الشباب .... إذا بغيت تتعلم لاتتدعدى الوكري ..... واذا كان عندك طير ..لازم تدهله وتدعيه وبعدين تلوحله واخر شي تهده

[الشـ صقرـــام]

عشت (اخوي المري) سلمت يداك على هذه المعلومات الرائعة

والشكر للاخ (ابو عايد) على رفع الموضوع

[عبدالله الصالح]

يامل العافيه يالمري


وش رايك يالمري

بالدعى ضروري كل يوم ؟



اخوك القصمنجي ......

[مصطفى عجمى]

السلام علبكم ورحمة الله وبراكاتة اسمى مصطفى عجمى عضو جدداريد ان اسئل ما هى اهم المواصفات التى لايمكن التنازل عنها فى الصقر الجيد وفاض اللة عليكم بعلمه ونعمة وشكرا

[مصطفى عجمى]

بسم الله الرحمن الرحيم شكرا لاتاحة الفرصة الينا لنتعلم الكثير عن الصقور

[مصطفى عجمى]

ماهى الصفات الجسدية التى لايمكن التنازل عنها فى الصقر وهل وصول ريش القدم الى الاصابع مهم فى التاسيرعلى الطير فى القنس وشكرا

[محمد بن خليل]

السلام عليكم


عندي مشكلة في عين الصقر اليسرى بس وهو وجود بياض في وسط العين ماهو العلاج
وسئلت عن العلاج ولا كن مافي حل
ولا احد عرف
ياليت اذا احد مر علية هذا المرض ؟ يدلني وش اسوي

[محمود المصرى]

بسم الله الرحمن الرحيم
اولا انا عندى 18 سنه
انا مصرى
استطيع تدريب الصقر الجراد المصرى والمرز فى خلال شهر واحد و اصيد بهاالحمام والارانب البريه ولكنى اريد ان احصل على رخصه صياد صقور كيف ؟

[الأجودي]

السلام عليكم
1.وشريك بالوكري بحيث الصياد وا التدريب
2.كيف التدريب على الارنب
3.كيف التدريب على الكروين

[خالد - الخرج]

السلام عليكم

س1/ متى وقت تكاثر الطيور؟ وهل تكاثر عندنا بالسعودية؟
س2/ متى وقت هجرة الطيور؟ومتى عودتها؟

وشكراً

[ابو عايد]

للـــــــــــــرفـــــ لــــــلإفاده ـــــــع

[جرناص مصرى]

ما اكثر الاسباب الشائعه لعدم اكل الطير للعلف

[بن فريد]

السلام عليكم ورحمة الله وبركاته,

حبيت اني أستشيركم في طير شفته وهو جير حر (اسود) جرناس من انتاج مزرعة فالكن سنتر في المانيا.. والمزرعه معروفه بانتاج الطيور الجيدة و لكن فيه شي واحد وهو ان صايبه سومار وشفا منه تماما ...... و السؤال هو هل تنصحوني بان اشتريه وللا .....

وجزاكم الله خير

[طير مهاجر]

السلام عليكم ورحمة الله وبركاته

اخوي المرى ارجوا الاجابه على اسئلة اخوي صقر مستجد لانها صراحه اسئله تفيد جميع الصقارين الي توهم متعلمين والي انا واحد منهم

[img]http://www.mekshat.com/pix/upload/images18/mk30431_image142.jpg[/img

[المري]

وين أسئلة صقر ؟؟ ماشوفها ..

[طير مهاجر]

مشكور وماقصرت اخوي المري:good: ونا اسف على الرد المتاخر

معك اخوك طير مهاجر وعندي كم سوال لاني من هواة الصقور المبتدئين ووفق الله الجميع


1-كم تقريبا سعر فرخ الحر والشاهين لذكر والانثاء
2-كيف اميز بين الحر والشاهين باختصار ولاهنت
3-هل فيه انواع اخرى غير الوكري للمبتدئين ولماذا الوكري للمبتدئين
4-كم سعر فرخ الوكري الذكر والانث
5- وكيف يمديني ازاوج الصقور

وناسف على الاخطاء ان وجد

ويعطيك الف عافيه ولاهنت يالغالي

[المري]

مرحبا بالاخ العزيز طير مهاجر وحياك الله يالغالي..

سعر فرخ الحر يختلف من طير الى طير , فيه فروخ حرار اسعارها من 5000 ريال الى 8000 ريال وفيه افروخ على 15 الف

وفيه ب 30 الف وهكذا ..

ويرجع السبب الى رخص الطير وغلاها الى عدة اسباب: منها: اللون والحجم والوجه والقحف ووووو

يعنى مااقدر اعطيك كم سعر فرخ الحر بالضبط..


اما الشاهين , ففيه فرخ الشاهين البحري وهو غالي جدا ( الوافي منها) من 25 الف الى 45 الف او اعلى او اقل اشوي..

اما فرخ الشاهين الجبليه فهو رخيص جدا من 1000 ريال الى 3000 ريال..

**

أما كيف تميز بين الحر والشاهين , فهي ماتبغى عرف ولا معرفه لانها سهله جدا..

لان شكل الحر يفرخ بكثير عن الشاهين ولو يناسب لي الوقت الان كان حطيت لك صورة الحر وصورة الشاهين.. بس الاتصال

عندي ضعيف وبطى جدا..

اما بخصوص انواع غير الوكري للمبتدئين فيه الشاهين الجبلية بس يبغى الوكري هو الطير المناسب للمبتدئين..

سعر فرخ الوكري الأنثى 1500 والذكر 1499 ريال ههههه يعنى مافيه فرق..

اما بخصوص تزاوج الطيور يبغي لها مواضيع ماهوب موضوع واحد .. او يبغى لها سنين..

هذا مالدي ياخي العزيز..ولا يوجد لديك اي خطاء

وحاااضرين لاي أستفسار

او سوال..

اخوك - المري

[جو الشيخ]

اخوي قشاع الرمث ولا يهنون الربع بغيت افيدك بسؤالك وماهو تعدي على اخوي المري طيرك ماتنقصه شجاعه طيرك مايبي الخرب لانه ماهو محتاج اقصر عليه ويطلع فعله

[mazen]

السلام عليكم

حياك الله اخي المري

عتدي سؤال واحد ورجوا ان تعذرني لاني ما زلت مبتدء في الصقور

1. كيف تربط السبق مع المرسل

مشكور سلفا اخي
والسلام عليكم

[(بوعلي)]

مشكووووووووور اخوي المري على المعومات الطيبه

[بوشكري]

السلام عليكم
لو سمحت سؤالين
1 نا توني شاري طير كيف اعلمه على اسمه وكيف ادعيه
2 احنا الحين بشهر9 ممكن احط الطير برا البيت يعني الحوش

[المتهلهل]

معلمى الفاضل المرى لقد اوسع اللة عليك بالعلم والخبرة واريد طرح بعض الاسئلة عليك اذا سمحت لى
س اريد ان اعرف ما هو افضل الصقور تتعلم صيد الغزال؟وكيف يتم تعليمة علة صيد الظبى(الغزال)؟
س وماهو نوع الطائر الذى بيع بمليون ريال والذى شاهدنا صورة بالمنتدى؟
س عند صيد شاهين كيف يتم التعامل معة فى البداية وهل يعامل الحر مثلة؟

[المري]

مرحبا ابو شكري وحياك الله يالغالي..

بخصوص اسم الطير خلك دائما تدعيه بأسمه علشان يصير عنده الاسم مألوف..

بخصوص انك تحط الطير في الحوش ترى عاد الجو حااااار..


****

مرحبا اخوي المتهلهل وحياك الله يالغالي.. واشكرك على مدحي بهذا الكلام الطيب وتراني دون الحكي كله..

بخصوص تعلوم الطير على الظبي اشوفه صعب اشوي وذلك لكبر حجم الظبي بالنسبة للطير.. ولا يوجد اظباء كثيره علشان

تعلم الطير عليها..

نوع الطير اللي بيع في الصور هو جير بيور تفريخ مزرعة فالكون سنتر ( حسب كلام صاحب الموضوع) واعتقد ان مليون ريال

واااااااااااجد في هذا الطير..


بخصوص الشاهين التعامل معها في منتدى السهوله لانها لاتتحمل الجوع ماعليك الا ان تفوتها من العلف ليل واحد ويجيك راسها

وراس جدها..

وسلامتكم جميعا

اخوكم - المري

[المري]

بخصوص ربط السبق مع الجرير تبغى لها جلسة لان مااقدر اوصفها بالكتابة

وسلامتك

اخوك - المري

[راعي شواش]

اخوي المري اقتراح ممتاز وبادره طيبه وانا ادعم هذا التوجه بأ قا مة مدرسه للصقاقير ولاكن (مايقدم في القوم الا خيارها ) وانا اقترح ان تكون مديرا لها وذالك بناء على ردودك الوافيه ومعرفتك للطير 000 الله يوفق الجميع000000000000000
اخوك راعي شواش00

[المري]

ماعليك زود ياراعي شواش وماقصرت يالغالي..


وشكرا لك على المرور.

اخوك / المري

[المتهلهل]

شكرا يمعلمى (المرى) على الرد على اسئلتى

و
اريد ان اسئلك سوؤال
س ماسبب عدم تفضيل الصقر الباز فى الخليج العربى ؟

[المري]

الباز الله يسلمك يستخدم للغابات وحن ماعندنا غابات ..

وثاني شي هو مايستطيع ان يطرد اكثر من ربع كيلو يعنى فيه انطلاقة وبعيد يرتخي جناحه ..

وفيه أسباب كثيره بس هذا اللي استطيعه الان

ولا شكر على واجب

اخوك / المري

[2002]

الصور لم تظهر

[المتهلهل]

اخى المرى الله يبارك فى معلوماتك القيمة
اريد ان اسئلك اذا سمحت
س ماهو سعر الشاهين الجبلى _والبحرى؟ فى مصر؟وما هو الفرق بين الشاهين البحرى والجبلى ؟
ففى مصر يعتقدون ان الشاهين البحرى يستخدمونة فى جلب اللؤلؤ من البحر وانا لا اعتقد ذلك فكيف
ففى مصر لا يوجد الصيد بالصقور الا فئة قليلة جدا واذا وجدت لماذ لا ادرى وشكر اخى (المرى)

[2002]

انا طالب جديد وعندي طول الله اعماركم ميول للصقارة اريد اولا ان اعرف المصطلحات التي يستخدمها الصقار

[لاهوم]

يقال الي مايعرف الصقر يشويه

http://www.mekshat.com/pix/upload/images19/mk33198_tomy.gif

http://www.waselaty.com/loadimages/uploads/a895e1556a.jpg




:good: :good: :good:

[2002]

ممكن يا جماعة مصطلحات الصقارين انا طالب جديد وعندي هواية

[المري]

اخي المتهلهل:

وش عرفنى بأسعار الطيور في مصر وانا في السعودية؟؟!!!!!

بخصوص اسعار الجبليات عندنا في السعودية من 1200 الى 2500 ريال ..

والبحريات من 4000ريال الى 8000 ريال والطيب غااالي جدا..

وسلامتك

اخوك / المري

[المتهلهل]

شكرا يامرى لاكن عندكم الصقور رخيصة
ان ارت اسائل معلومة فقط لان سمعت ان سعر الشاهين فى مصر يتراوح بين 30000الف جنية مصرى و65اللف
فما رايك فى هذا السعر ؟

[المري]

صحيح فرخ الشاهين الوافي البحري يسوى عندنا في بداية الموسم 40000 الف جنيه


لان الفرخ يجي اغلى من القرناس

وحاضر وتحت امرك ياباش مهندس

[المتهلهل]

شكرا اخى (المري) على ردك على وارجو ان لا اسبب لك مضايقات بسبب اسئلتى الكثيرة

س :ما الفرق بين الشاهين البحرى والشاهين الجبلى وأرجو التفصيل بالصور لهذان النوعان؟

[ولـد الدوادمي]

أخي الكريم المري انا شكلي ابتعبك معي شوي

انا توني طايح بالصور

وابي اربي طيبر كيف ابي درس من الالف إلى الياء

[ولـد الدوادمي]

ياجعل عمرك طويل يا المري والله يكثر من امثالك

في الحقيقة أخوي المري ولا يهون الباقين انا مثل ماقلتلك مبتدى هل ال12ونص*12ونص تصيد اذا دربتها

وني دري بسط جدا جدا لتدريب الطير


واكون لك شاكرأ

[أبو محمد!؟]

يعطيك ألف عافية على الموظوع المفيد والراءع ان شاء الله في ميزان حسناتك
عندي سؤال لاهنت
س., الشيهانة كما هو معروف عند الصقاقير أنها بسرعة ينكسر ريشها وبسرعة تمرظ وأنا مجربها لكن هل الجير شاهين مثلها ؟
س والجير حر والوكري يطلعون؟
س أسهل طريقة لتعليم الطير على الملواح وشي ,اذ جيت العبة على الملواح اصير على بعد كم من الطير
س والحر الوافي والجير حر يصيد الكراوين؟

وشاكر لك مرة أخرى أبو محمد

[أبو محمد!؟]

السلام عليكم
مرحبا يا لمري كل عام وانت بخير ومبروك عليك الشهر معليش عندي سؤالين لا هنت معليش
ثقلنا عليك
س أذا جيت أدعي الطير شلون اعرف انه طلبها , يعني أذا نزل راسه ورفعه عدة مرات يعني يطلبها؟
س وشلون طريقة عزل الطريدة حية بعد مامسكها الطير؟

[اسير الهوا]

اخوي المري ماقصرت على الموضوع الزين

بس الله لا يهينك بغيت اعرف وشلون اشرب الطير ماء وشلون ادري انه عطشان

[هبوب]

المري الشيهانه الوحش كيف اسرع طريقه لتدريبه وعلى الملوح تجي وتركد على الاقل

[محتاج 111]

السلام عليكم ....

عندي سؤال

س\ هل يستطيع الشاهين صيد الحبارى ؟؟؟؟ سؤال يحتاج إجابه...

[أبو محمد!؟]

أبطيت علينا يا لمري الله يحفظك

[المري]

نعم يصيد الشاهين الحباري ولا يمنع من عدم صيدها الى الخوف فاذا كان الشاهين من النوع الذي يخاف فلا يستطيع صيدها ..

ايضا في بعض الشياهين الجبلية حجمها صغير لاتستطيع صيدها..

**

بخصوص تعليم الشاهين على الملواح فهي طريقة سهله حاول انك ماتعلمها على هدد الحمام لانه هو اللي يخرب الطير من الدعو على الملواح... ضع في الملواح اول شي حمامه حيه وادع الطير على هذه الطريقة 3 ايام وبعدين ادعه بالملواح وفيه حمامه ميته ,, وهكذا حتى يجيك على الملواح لو مافيه علف.

**

بخصوص كيف تسقي الطير ماء؟ ضعه الما ء في فنجال القهوه وقربه من الطير سوف يشرب من الفنجال , او ضع عند الطير صحن في ماء وهو سوف ينزل على الصحن ويشرب ..

**

ابو محمد ليس شرط اذا الطير قام ينزل راسه ويخفضه , يعنى يوعد (( هذا الكلمه الصحيحه) ربما يوعد على شي ثاني..

بس انت شف الطير اذا كان نظره الى اللي يدعي ام لا.. الشغله تبغى لها ممارسه وذكاء اشوي..

بخصوص كيف تعزل الطير؟ اذ صاد الفريشه وجيته وحللتها اقطع رجل الفريسه ( حبارى أو حمامه) اقطع منها ثنداها او رجل وضعها في الدس , واجعل الدس بينه وبين الفريسه , سوف يأكل من العلفه اللي في الدس , حاول ترفعه بطريقة هادئة حتى يركب على الدس..

وسلامتكم

اخوكم / المري

[العنييد]

السلام عليكم يالربع

مساك الله بالخير يالمري ولا يهونون الربع
عندي طير نفسه شينه وهو فعله طيب يلحق واذا جهز اللي بيروح عليه يمكن ماعاد يرده طير الا واحد في الالف من الطيور المشهوره بفرط اللحوق والمشكله كيف اجهزه واليقه اذا كان الطير مايحب الداعي ولايطرد الحمام (يعني اذا دعيته بالحمامه حيه في الخيط يجيك مره ولاهو بعجل وفيها كم لفه كنه بيجنبك وكم مره مايجيك ولو انه على وجاب والحمام مره بيطرد ويستكتل و100 مره ماهو بطارد
(اذا نزلته الين تضعف نفسه تردى طياره واذا خليته عديد ابطا ماجهز ولا جهز الا متاخر)

لكن اذا هديته على صيده يطرد لين يصيد ولا يطيح مايرجع ابد
مع العلم انه مشنذر وقاط اللي معه

[المري]

مرحبا اخوي العنييد وحياك الله يالغالي..

بخصوص طيرك ترى مثله كثيييييييييير ودايما هذا سنع الطيب منها.. وكلامك صحيح اذا اضعفته شان اطياره واذا عديته شانت نفسه..

الحل: لايـــــــــــــــــوجد لدينا حل وانت أبخص .. في طيرك

ادعه من بعيد وشقلبه ولا تكثر له على كلامك انه يوقع ,, وحاول تدعيه الصباح والعصر وباذن الله انه يزين نفسه واهم شي انك ماتخلي

الطير من الدعو يوميا.. ولو نص كيلو كل يوم.. وعسى الله يبارك لك في طيرك..

اخوك / المري