لوغيرت إلى كفر أنحف أرتاح من المشكلة , أم لا ؟

[sameer_1798]

السلام عليكم ورحمة الله وبركاته
أخواني أعضاء مكشات عندي gx.r عليه جنوط ألمنيوم فيه كفر مقاس 275/70 r16 نوعه دنلوب المشكلة و مافيها أنه عند المطبات قاسي ( لدرجة عيون البس يوم تدعسها تقال داعس حصاه شبر) و العضلات سليمة يالله لك الحمد

السؤال لو غيرت المقاس إلى 235/85 r16 أرتاح من المشكلة أم لا ؟

وبعدين كيف المقاس هذا راسي بالخط أم لا ؟
( طبعا الدانلوب )

[wmwm]

وعليكم السلام ورحمة الله وبركاته
كان عندي جي اكس ار 2002 مطلعه وكاله يازينه وزين مطبه يوم قدم شوي وصار ماشي فوق الميه وخمسين صار مطبه قاسي يوم اكل المطب تقول اني حاط الهوى 60 فحصت العظلات نسمت في الكفرات غيرت مساعدات ما نفع الآن في واحد صديق معه جي اكس ار 2004 ماشي فوق الميه نفس المشكله طبعا مشي فوق الميه مشي بر ومقناص هذا الي اقدر افيدك فيه اهل الخبره يفيدونك ان شاء الله والسلام عليكم

[sameer_1798]

جزاك الله خير أخوي wmwm على المشاركة و لكن ودي أتخلص من المشكلة , يالله ننتظر باقي الأعضاء ...

[winchester]

المشكله من نفس الكفرات دنلوب قاسي شوي فيـه هونكوك الكوري (لايفوتك)

والكفر القوي يتعبك ويتعب الموتر

دمـت بود

[هولوكس2005]

وعليكم السلام ورحمة الله وبركاته
كان عندي جي اكس ار 2002 مطلعه وكاله يازينه وزين مطبه يوم قدم شوي وصار ماشي فوق الميه وخمسين صار مطبه قاسي يوم اكل المطب تقول اني حاط الهوى 60 فحصت العظلات نسمت في الكفرات غيرت مساعدات ما نفع الآن في واحد صديق معه جي اكس ار 2004 ماشي فوق الميه نفس المشكله طبعا مشي فوق الميه مشي بر ومقناص هذا الي اقدر افيدك فيه اهل الخبره يفيدونك ان شاء الله والسلام عليكم



على كلامك هذا فيه مشكله يعني في قطعه بالموتر تبيد وتقل كفائتها





وعلى الكفرات مالها دخل وللمعلوميه كل ماصار الكفر عريض كل ماصار الموتر ارسى بالخط وأخف مطب والكفر يعض الأزفلت

[الدبل الثقيل]

لاتزيد ضغط الهواء عن 35..... إلا إذا كنت محمل ومسافر.... ولاتزيد إلا الكفرات الخلفية..

[GMC79]

ماراح تستفيد من تغيير مقاس الكفر

تاكد من ضغط الكفرات خله من 35-40

وبعد اذا كانت الكفرات قديمة تيبس مع الوقت ولو ماتسحلت غيرها

والدنلوب ممتازة ولينه وابعد عن الهانكوك ولايغرك رخصها تراهم يغشون الكفر تلقاه اصغر من غيره مع تساوي المقاس وجرب تلقى كلامي صحيح والهانكوك جنوبه ضعيفه مرة يبنشر من الجنب بكثرة

الله يكتب لك اللي فيه الصالح