متى وقت اللفاح ياأخوان؟

[سمٌاري]

السلام عليكم ورحمة الله وبركاتة
ياهلا والله بأهل البحر الطيبين:)
منذ حوالي أكثر من سنة وأنا أحب أدخل البحر بطراد بسبب حبي للفاح
لدرجة أني أشتريت طراد ولكن أبغى من الخبراء يعلموني متى يكون وقت
اللفاح المزبوط يعني في
أي الشهور يحلى اللفاح من السنه
وفي أي الساعات من اليوم
وشكرا لكم
أخوكم سمٌاري

[الوراد]

عليكم السلام ورحمة الله وبركاته

ياهلاباخوي سماري


سمّاري وتحب اللفاح :good:

حبيت اشاركك واقول لك اللي اعرفه عن طلبك

بس ياليت اعرف انتي باي منطقه

وعلى العموم

لفاح الهامور في الغالب ماله وقت محدد من السنه

اما لفاح السبيطي فهو في اول دخول الشتاء واثناء شدة البرد

لفاح الكنعد في الخريف واول الشتاء(اذا بدت تنش)

تنش يعني تقفز الكنعده من البحر للهواء لصيد الاسماك الصغيره وتلاحظها دائمآ في وقت الفجر والمغرب اذا كانت موجوده فهي لازم تنش
ارزاق سبحان الله

تنش عشان تصيد
ويشوفونها الناس ويبدون يستعدون لصيدها
:D

[سمٌاري]

يامرحبا والله بالوراد
كفيت ووفيت بس عندي كم سؤال أذا ماعليك كلافة

رد على تساؤلك ............أنا من الدمام
أنا لي أكثر من سنة أدخل البحر جربت أصيد قريب الدمام وتعبت من الشعري أو القرقفان
وقلت في نفسي ياولد العالم تروح داخل البحر عند الجعيمه ورحت داخل وصار ماشاء الله الصيد كثير
وكبير ولكن برضو شعري_ ولد الود_ ودويلمي وكم حبة فسكر والحمدلله بعد كذا صرت أوفر هالمشاوير الطويلة.
وصرت الفح والحمدللة صدت الأنواع اللي أحبها الهامور والكنعد وعشقت هذي الطريقة من الصيد وشفت فيها المتعة:D
بس على فكرة الى الأن ماصدت السبيطي :confused:
وعلى طاري تنش ياهي حلوة وهي تنش
ومشكور على ردك الرائع

أخوك سمٌاري

[الوراد]

هلا وغلا باخوي سماري

اذا نشّت الكنعده ينشّ قلبي معها

اللفاح زين وممتع جدآ جدآ وخاصه بالسناره اذا سمعتها تون من قوة الكنعده او الهامور

طبعآ تعرف قصدي
اقصد سنارة اللفاح اللي مكينتها كأنها ونش صغير :D

لكن بهالحر والرطوبه ما ودك تطب البحر بالنهار الا وانت مركب لك مظله بطرادك


اما عن سؤالك بالنسبه للسبيطي فهو ينصاد لفاح عن طريق ربيانه بلاستك او ربر(ربل) مطاطيه نوعآ ما
يشكّون(يغرزون) فيها خيط من ذيلها لين يطلع من تحت راسها ويربطون فيه ميدار(سناره)ابو ثلاثه مقاس وسط

والخيط مقاسه صغير(50.60) بس
ولازم الربيانه تطافش فوق الماء واحسن شي انك تستعمل سناره طويله حتى تبعد ريشة الربيان عن صوت المكينه
اذا لقيت فرصه بصور لك صورة الربيانه وطريقة ترديعها بالخيط واحطها لك هنا حتى تعم الفايده للجميع

والف سلامه لك وللجميع

[سمٌاري]

مالومك والله يالوراد بس أنتبة على نفسك من أنة ينش برا صدرك ترا مشكلة:D
والله تسوي خير أذا تحط صورتها هنا والطريقة
مشكوووووور........ الله يعطيك العافية

[بوعبدالعزيز]

هلا اخوي سماري ،،،،،،
بالنسبة لللفاح فحبيت اشارك في موضوعك بخبرتي المتواضعه ،،،
بالنسبه للهامور احسن شئ يكون اللفاح له اذا كانت المايه تسقي ( ترش ) حيث ان الهامور في هذا الوقت يخرج للرعي وياكل كل شئ يتحرك يعني تقدر تلفح له بقطعة خيشه او تيوب ناهيك عن الدرية المخصصه له اخطبوط صغير او ريش احمر به ميدار ثلاثي ، اما اذا المايه ثبر او تثبر فقليل ماينصاد لأنه يكون داخل الفشت ، وهو يضرب على اللفاح طول السنه تقريبا.
اما السبيطي فيلفحون له بقطعة سلس ( نوع من السمك الصغير) او ربيانه بلاستيكيه حجمها نفس حجم الربيانه الطبيعية ولونها كذلك ، وأنت تشد الميدار بها لأنها بدون ميدار ويكون رقم 6 ويكون سُمك الخيط 100 حتى مايتعبك في السحاب وتكون سرعة الطراد من 5 الى9 كلم في الساعة، اما احسن وقت لللفاح له فهو من وسط شهرمارس حتى اخر يونيو وهذا الوقت يكون اكثر الصيد فيه لقربه الى الشاطئ وهذه الهواية من حوالي سبع سنوات امارسها وفيها الصيد اكثر من الحداق ، بالنسبة لي اشوفها جيده.:good:
هذا رسم تقريبي لربيانة السبيطي

http://www.mekshat.com/pix/upload/images2/12cu0003.jpg

[سمٌاري]

روعة معلوماتك ياخوي بوعبدالعزيز:)
واضح الشرح بس ماقلت لي طول الخيط وهل أضع سيم ومدور مع الميداراللي في الربيانه ؟
أما بالنسبه للهامور أشتري سمكة اللفاح اللي بشكل الخثاق الصغير بسعر 50 ريال والحمدلله أصيد هوامير فيها بس اللي مجنني الدويلمي دايما يخربها علي وبذلك أضطر أشتري ثانية وهكذا .
فية سؤال ثاني عن الهامور أيضا
أذا قلنا دخلنا البحر وقت الرشة اللي تستغرق اربعة ساعات وكان ذلك اليوم فية رشة الصباح الباكر ورشة
من بعد الساعة الثانية ظهرا وش أفضل فيها الصيد ؟
بالنسبة لي دائما أدخل البحر في العصر وبصراحة أنت اللي نورتني بخصوص الرشه(السقي) ولذك راح أهتم
علشان يكون صيدي وفير .
جزاك الله خير

[الباهي]

معلومات مفيده
تسلم اخوي ابو عبدالعزيز
ويسلمون الاخوان المشاركين:)

[بوعبدالعزيز]

مرحبا اخوي سماري واخوي الباهي ،،،
بالنسبه للربيانه حق لفاح السبيطي مثل ماقلت لك يكون الخيط سمك 100 ويكون بدون مدور ولا سيم فقط تربطه وتزيد بإرباطٍ عسم يعني مافيه امل يقطع الخيط حتى ماتحسف عليه، ملاحظه اخوي السماري الربيانه طبعاً تكون طافحه فوق لأن لو وقف الطراد تقوع وتشير في الفشت وعقب تكون مشكله ميدار رقم 6 وخيط بو100 يبيله ونش يسحبه ولا سلم على يدك ، ثانياً وهذا مهم جداً يجب ان تكون لا ف الخيط على كف اليد وإذا ضرب السبيطي عليها لاتلين له الخيط وهذا اهم شئ لأنه يلفظ الربيانه ( معروف بذكائه السبيطي) يعني من يضرب عليها تكون شاد الخيط وتسحبه حتى تحطه في الثلاجه في الطراد ولا تعطيه فرصه ابد .

الهامور ،،،
بالنسبه للهامور يضرب الصبح ولا المساء على رشة المايه ماعندي علم صحيح لكن الهامور خمام ممسي يعني مايخلي شئ ، بس يمكن يمكن المساء يضرب ازيد لأن معروف الصيد المساء يكون جيد واغلب السمك يضرب بالنسبه لبعض الاسماك تضرب على سمكة اللفاح مثل الدويلمي وغيره فهذي مالها حل وانته وحظك حتى الربيانه يضرب عليه الشعري والهامور والجشه والغلي والحاقول وغيره من الاسماك .

[سمٌاري]

تسلم أخوي بوعبدالعزيز
طيب باقي طول الخيط كم ؟
وهل الربيانة تكون طافحة على طول والا راح تنزل قليلا بالماء ؟
ونبغاك تتكلم أذا سمحت عن الجنعد (الكنعد) لأنة يختلف قليلا عن صيد الهامور في طول الخيط أيضا السرعة تكون مختلفة قليلا حيث تكون أسرع
وشكرا على حسن تعاونك :)

أخوك سمٌاري

[بوعبدالعزيز]

مرحبا اخوي سماري ،،،
صحيح نسيت اقولك عن طول الخيط ، طول الخيط يتراوح بين 15 متر و40 متر مافيه اي مشكله بس إذا كان طويل الخيط يمكن تكون فرصة السبيطي ان يفرط اكبر يعني يكون 25متر احسن شئ.
- وأما الربيانه فلازم تكون طافحه على طول وتعمل لها من الموج مثل النافوره الصغيره والسرعه معروفه .
- وعلى فكره السبيطي لاحظته يضرب على السقي وعلى الثبر ماعنده أي مشكله .
- اما بالنسبة للكنعد فلا اعلم عنه شئ حيث انني لم الفح له ابداً متخصص فقط للسبيطي حتى الهامور ما ألفح له ابد .
ملاحظة:-
اخوي سماري ثرى معلوماتي هذه كلها عن تجاربي انا المحدوده ، واذا فيه نواقص او اي شئ يفيدونا النواخذه الكبار ((ومنكم نستفيد)) .

[مترف]

لا بالحبيب

إذا بغيت تلفح حاول في الصحو مو مغيمة

وحداق من الدمام يقول برضو صعبة

[بورهف]

ياحلو جمعة النواخذه
انا ماعندي سالفه بس حبيت اشارككم السوالف >>>>وانا ماعندي سالفه
مشكور سماري

[Alhzzen]

والله مااادري


شكرا