تفضل أخي واكتب أصعب موقف مر عليك في رحلاتك البرية وكيف كان تصرفك .

[ابو ريان .]

إخواني الكرام إن من أحب البر والتنزه لابد أن يظهر آثار ذلك عليه ، ومن ذلك خروجه إلى تلك المناطق والسعي إليها والتمتع بما فيها ، غير أنه لابد أن يكون هناك موقف صعب مر به في خروجه إلى تلك المناطق في رحلة ما .

السؤال : اكتب ذلك الموقف ، وكيف كان تصرفك فيه ، ليستفيد منه الجميع وأنت أولهم .

" وفق الله الجميع "

[جرير]

يالله يابو ريان مادام الاجازه مابدات ومقابلين هالكمبيوتر نستفيد علي قولتك
ولو من تجارب الاخرين المهم قصه حصلت لاثنين من الربع قبل حوالي 5 سنوات. نقوله بالعامي.
وكانوا متوجهين من حائل الي الجوف قبل الخط الجديد يعني نفود بنفود. ومعهم جيب شاص وعليه 3 قعدان (جمل صغير) لبيعها .
المهم قبل ياصلون بحوالي 90كيلوا وقبل هجرة المروت منطقه وعره صعافيق طبو في حفره وغرز الجيب وادعس ماتدعس واحفر وادفن مافيه فائده المهم مع الشد والجور انفرط الدفرنس الخلفي وجيمت العكوس وصارالعمود و الكفرات ماتدور ..
جاهم الليل وانحاست الشغله ..
استخدمو الجهاز ماحد رد عليهم ولعوا نار برأس طعس ماحولهم احد الى ان انتصف الليل . زملوا الربع هم وبعارينهم والماء قليل وبالصيف .وبعد فتره ويجيب الله لهم واحد يرد علي الجهاز ولكن طلع من اهل الجوف مركب ستيشن المهم شيء طيب .
علموه بالسالفه بس المشكله مايعرف الموقع لكن قالو له اتصل علي فلان من اهلهم وعلمهم لا يخلونا..
بعد فتره اتصل عليهم الرجال وقال انا جايكم واذا قربت ولعو النار .
مشى الرجال وحسب قوة الارسال عرف ان ماهم بعيد قاموا وجمعوا من الحطب حمل سياره من الحرص وشبوا النار. في اعلى موقع واحد يوقد النار واحد يرد علي الجهاز. لين الله قرب الرجال وشاف النار ..
يوم وصلهم حاولوا يسحبون الجيب مافيه فائده متحجر الكفر العكوس متداخله مع الكرونه والعمود مايدور .
الجماعه شاطرين وعندهم خبره طبعا تجارب سابقه فكروا وش يسوون يمشون ويخلونه لكن المشكله القعدان والرجعه صعبه .
هداهم الله لفكره .
قاموا اول شيء نزلو البعارين وفكو الكفرات وفكو الهوبات وسحبوا العكوس الخلفيه كامله ورجعوا الكفرات وصارة تدور بوش يعني بدون عكوس وشغلو الجيب وعشقو الدبل صار اللي يدور الكفر الامامي فقط يعني دفع امامي وسحبوه بالجيب الثاني لين طلع للعزاز .
يوم طلع رجعو وحملو بعارينهم وعشقوا ومشوا علي الدفع الامامي وخويهم معهم الي ان وصلوا الجوف باعوا بعارينهم واول ورشه وصلحوه ورجعوا مع دربهم يعني ماتابوا ..
انتهت السالفه اللي بعده...

[ابو ريان .]

شكراً لك ياغالي على استجابتك لي ، وذكر هذه القصة بتفاصيلها ، وجزلك الله خير وما قصرت ، والله يسلم الجميع .

[القسامي511]

فكره رائعه .. لي عوده بإذن الله

[جلمود الجبيرى]

موضوع جيد واسال الله ان ينفع به اللجميع--- من المواقف اللى صارت لى فى البر وهى قليله ولله الحمد-- طالعين مره للدهناء موتر واحد:no2: وهذاء خطاء يرتكبه كثير حيث المفروض اكثرمن سياره الزبده امرحنا فى نقره لأن الجو بارد وموجهين السياره للنفود جينا الصبح نبى انشغل الموتر ويلا والله ماحولك احد يعنى ما اشتغل تلفتنا يمين يسار مانشوف احد قمت قلت اللرفيقى ابرفع الكفر الخلفى بلعفريته وابدور الكفر وانت انتع السياره والحمد لله بعد ثانى محاوله اشتغل وكملنا الرحله هذا مااردت المشاركه فيه شاكر لكم

[المتوكل]

اما انا فمن المواقف التى مرت بى هذا الموقف عام 1425 فى الربيع وفى منطقه التيسيه شمال القصيم وفى احد الفياض وبينما نصلى العصر ونحن اربعه اشخاص سمعنا صوت حركه خلفنا عند المعاميل الى معى ما اهتمو قمت وقطعت صلاتى ونظرت واذا عراقى متسلل يشرب من القهوه وجه وجا اقشر ما يريح قهويته وقعدت اراقب حركاته ونظراته الرجل ما يريح انتهو الاخوان من الصلاه 000 ودردشنا معه 00 معنا شايب عطاه 100 ريال وعطيناه تمر وراح قلت للجماعه الرجال الى جاء مهو مظبوط يجب نغير مكاننا احتياط عن عين وماجرت000 ما يدراء ان كانه يخطط معه احد وجاى يستكشف المهم غيرنا المكان وما شفنا الا العافيه0000000 الخطاء المميت لواستغله العراقى هو اننا صلينا وقشنا خلفنا حتى السيارات عليهن المفاتيح و بهن سلاح بعد !!!!!!! هذا الموقف استفدنا منه دروس

[القسامي511]

___¤بسم الله الرحمن الرحيم¤___
الأخ الفاضل ¤ابو ريان¤ لدي موقف من بعض المواقف .. وهذا الموقف جميل وفي نفس الموقف صعب وأبي أختصره لك ..... سرينا باليل وحنا مجموعة سيارتين والرحله كانت عباره عن كشته على طلي لباني في أيام الربيع في هضاب الجثوم الواقعه شمال غرب عفيف بمسافة (_95_) كيلو تقريبا" صحراء .. الشاهد وصلنا حوالي الساعه 12 بالليل ونمنا ومع صباح الله بعد صلاة الفجر شبينا النار في الجهه الشرقيه الشماليه من الهضاب في هضبة" يقال لها أم شلال ثم طقينا الخيمه وبعد ماتقهوينا من المهيله وعينا من الله خير قمنا ذبحنا الطلي وعلقناه في طرف حصاة" كبيره وطلعنا كبده والكلى والقلب وقطعنا الكبد على مقاس الكف على شبه شرائح ثم ملحناها جميعها مع بعض لحم الضلوع وقعدنا نشوي وناكل الشوى مع البصل مع الشاهي واللي يبي ياكل بالخبز ياكل .. الشاهد كان الجو صافي وأيام ربيع لايتصور .. ليس الخبر كالمعاينه .. وكانت العزبه في ضل الحصاة الكبيره وكانت الخيمه مفتحت الأبواب ؟ وهذا الذي لم نحسب حسابه . وبعد الفطور الطيب ضربنا الراي براي وقلنا نخر الغداء إلى قبل العصر .. والله ونركز الشاره ضحويه ويبداء التنافس بين الأخوان .. بعده رحنا نتمشى بين الهضاب الجميله وبعد الضهر تجمعنا علشان اللي يبي يكسر عنه واللي يبي يسوي الغداء ..وكان الجو صافي.. وفي الساعه _2_ تشاورت مع واحد من الأخوان في الصعود إلى قمت الهضبه وكانت مرتفعه جدا" وخطيره لكي نعرف مصب الشلال من أين يأتي إذا جاء المطر .. فوافقني الرأي وبعد الوصول إلى قمت الهضبه والإستواء على رأسها تفاجئنا بسحابه سوداء كالليل المضلم من جهة الغرب الشمالي للهضاب والبروق فيها من أعلى السحاب إلى الأرض والماء منها منهمر وبدأت تقترب بشكل سريع ومخيف ثم قما نصيح على أخويانا بالصوت الرفيع لكي يقومو بإدخال العزبه إلى الخيمه مع الغداء ويغلقو أبوابها ولاكن من طول المسافه اللي بيننا وبينهم لم يسمعو فانتبهو إلينا ونحن نؤشر بإيدينا ولاكن لم يفهمو مانقصد لأن الجو بالنسبه لهم كان صافي جدا" ... ومع إقتراب السحابه قمنا بالنزول بسرعه وبحذر خشية الأنزلاق .. وعند وصولنا فإذا السحابه تكسونا بالماء الغزير والبرق الامع والرعد المخيف وإذا بخيمتنا تتشقق من شدة الهواء والمطر وإذا بالعزبه يجترحها السيل ومن حسن الحظ أن الأخوان أخذو قدر الغداء معهم في إحدى السيارات ولاشك أنا في أثناء الحدث مالنا بعد الله إلى السيارات ولاكن بالنسبه لي أنا وخويي وصلنا بعد الغرق وصرنا في السيارات نقول .. ياحيه يالبرد والحيان تراقل . . بعد توقف المطر .. الله يخلف على عزبتنا والخيمه .. ولاكن كان المنضر أجمل من ماتتصور . ذهبت السحابه إلى جهة الشرق الشمالي ونراها سوداء تتلامع فيها البروق ويقتفيها صوت الرعود . والشلالات تسكب من الهضاب في جميع النواحي وكان أكبرها شلال الهضبه أم شلال وجميع الشعاب اللتي تأتي من باطن الهضاب سالت سيل قوي وصوت الماء من على الصخور يطرب المسامع .. الله يخلف علينا في عزبتنا وخيمتنا . والسلام ختام .
محبكم _ ابو خالد _

[ابو ريان .]

شكراً لجميع الإخوان : جرير و جلمود الجبيري و المتوكل والقسامي .

إذاً الآن استفدنا عدة أشياء ، منها :

1 ـ عدم السير بسيارة واحدة في البر .
2 ـ استخدام جهاز الكنود ومنها الاسلكي وهو موجود عند دار موجه وغيرهم ومداه تقريباً 10 كيلو ويركبون له أنتل أطول ويزيد مداه ، وبعض أنواع العدة كالمفكات والحبال والوايرات وغيرها .
3 ـ عدم اليأس من خراب السيارة والمحاولة لإصلاحها .
4 ـ الحذر من هؤلاء الناس ( العراقيين ) ومن حولهم ، خاصة في الصمان .
5 ـ عدم الغفلة عن السيارات والعزبة ، ولابد من قفلها عند الذهاب للتمشي ، وعند النوم وهكذا .
6 ـ إذا رأيت خويك دائماً وخاصة في البر يصيح من بعيد أو يشر لك أو يناديك على طول جاوبه وشف يمكن حصل له مكروه .
7 ـ الحذر الحذر من الجلوس في مجاري السيول أو النوم فيها ، خاصة في المواسم ومراويح الصيف .
8 ـ عندما تتمشى بعيد عن أخوياك أقترح أن تصطحب معك جهاز لاسلكي مثل الكنود وغيرها .

اخواني أتمنى أن أكون قد وفقت لطرح ماهو مفيد ، وننتظر المزيد من الأعضاء وفقهم الله .

[kwa_198]

اما الموقف الي بقوله هذا صار لي انا واحد من اخوياي عزمنا ان ناخذ اجازة اسبوع زنقضيها بالصمان الوجه كانت لواحد من الربع عند ابله كانت ابله في منطقه اسمها مناخ المهم عزمنا ومشينا يوم الخميس في اليل نمنا في الدهناء يوم اصبحنا كملنا مشوارنا المهم قضين الجمعه مع راعي الابل وقال عاد انا استاذن ابرجع عندي دوام ونتم عارفين بس الحلال حلالكم المهم مشا الرجال يوم اصبحنا يوم السبت جلسنا نتمشا انا خويي في مناطق مناخ وصلنا البقاله يعني تمشيه على خفيف وينكز خوينا الله يهديه ويقول وش رايك يابو عبدالعزيز نروح لم صحن قلت كم تبعد ناضر بالجهاز قال تبعد 50 الى 40 كيلو قلت توكل على الله المهم ونا نمشي مسرعين شوي الى نا كل ذاك الجرف الي كسر المقص ودخل في الكفر وهو يطيح على جنبه السيارة وننزل وناضر بعض ونلتفت يمين يسار ما حولك احد ونجلس ننا دي على الجهاز ونلقالك واحد الله ياخذة علمناه السالفه قال (حضر ) ازين ما جاكم مالكم ومال البر عاد شف الموقف والله لونا شايفينه وقتها كان صار من الموتاى بس الحمدلله المهم نناضر بعض وش السالفه قام خويي ورقا فوق التندة الى يقول ابشرك فيه ارسال قلت كم برج قال 4 قلت دق على الاستعلامات وخذ رقم شرطه مناخ قال اوكيه دقينا وكلمونا ومقصرو والله عطينهم الا احداثيه وجانا جيب دوريه من شرطه مناخ والحمدلله رجعنا للابل ورجعنا لعيالنا سالمين غانمين

[دمك]

بسم الله الرحمن الرحيم

اصعب موقف مر على طلعنا ثلاثه اشخاص للبر ومعانا ددسن المهم انه طاح غرز برمله ياولد حطينا كل خبراتنا السابقه ومافي فايده قلت

للشباب تدرو هيا نزلو العزبه ونسوي عشانا وبعدين نتقهوا ونتسلا عليه في الليل المهم قاعدين نسوي العشي تونا رمينا اللحم ومادرينا

الا وذيك العقارب السودكل واحد اجيد من الثاني كم العدد عد وتتعب من كثرها

المهم طابت النفس مره من المكان وقشينا العفش وبصندوق رمي طبخنا وكل علومنا رمي على بعض

الحاصل المحل ماعاد ينقعد فيه شكله مسكون اصلا والله وخرجنا الددسن ودوبه طلعب والكفر على الجنط متكي

ياولد بدل قلب امر الله المهم اخوكم المسكين ماعنده استبنه واقرب بنشر يمكن خمسه كيلو والساعه وحده ونص بالليل

والله ومشيبه اللين مابقي الا الجنط اللين وصلت البنشر وصلحناه وكرهنا ذاك المكان الى اليوم

[دمك]

بسم الله الرحمن الرحيم

اصعب موقف مر على طلعنا ثلاثه اشخاص للبر ومعانا ددسن المهم انه طاح غرز برمله ياولد حطينا كل خبراتنا السابقه ومافي فايده قلت

للشباب تدرو هيا نزلو العزبه ونسوي عشانا وبعدين نتقهوا ونتسلا عليه في الليل المهم قاعدين نسوي العشي تونا رمينا اللحم ومادرينا

الا وذيك العقارب السودكل واحد اجيد من الثاني كم العدد عد وتتعب من كثرها

المهم طابت النفس مره من المكان ونشقش العفش وبصندوق رمي طبخنا وكل علومنا رمي على بعض

الحاصل المحل ماعاد ينقعد فيه شكله مسكون اصلا والله وخرجنا الددسن ودوبه طلعب والكفر على الجنط متكي

ياولد بدل قلب امر الله المهم اخوكم المسكين ماعنده استبنه واقرب بنشر يمكن خمسه كيلو والساعه وحده ونص بالليل

والله ومشيبه اللين مابقي الا الجنط اللين وصلت البنشر وصلحناه وكرهنا ذاك المكان الى اليوم

[وكري2007]

بسم الله الرحمن الرحيم

أصعب موقف حصل لي وهو يوم الخميس ليلة الجمعه وكان يوم الجمعه عيد الفطر المبارك المهم

طلعت ذيك الليله لحالي للوادي وهوا بين جبال سود ترروع ياااااااااي المهم قنصت لي قماري وصلت الساعه 10 بالليل

المهم السياره كانت جيب شراع 85 وشفت لي على رأس النور أرنب ياحلالاه ومن الجنان طردت الأرنب وطلعت على رأس الوادي

ورأحت عليه وشلت وخبطت بالجيب لين كسرته المهم مشيت الى نور الجيب يضعف وطفى الموتر ومعاي حول 10 قماري خذيت منها 2

ونزلت وصلختها وظبت الشاي وشبيت النار الى ذاك الصوت اللي مو غريب عليه أنا قلت في بالي أنه كلب الله يعزكم بس طلع ذيب

ولسؤ الحظ طفت النار باقي الجمر بس والقماري طايحه بجنب الموتر وهو يكش في وجهي ولولا الله كان رجلي راحت غلطه وراحت بين أ

أنيابه المهم قلت بحذفه بالعصا حذفته وراح عني مسافت 500متر ونزلت من الموتر ورميت القمريه قدام خشم الموتر وجى الذيب

وهو جيعان وقبل يأخذ القمريه ظبطت السوجل وأحتريته لين جى قدامي ورميته ذيك الرميه اللي يحبها قلبك وصارت الساعه 3 ومارديت

البيت ومن التعاسه الجوال طافي من البطاريه ومحاولات مع الموتر وهندسه ومفكات لين الساعه4ونص بالتمام وأشتغل الجيب وشلت

الذيب على الصدام وربطته تمام وملطخ بالدم وشغلت الموتر ومشيت وأنا متعدي مع الخط وطاير الناس أطالع فيني ومستغربين الأمر

لأنه يوم عيد وصلت الساعه 600صباحا ولقيت الربع رايحين للصلاه ويفكرون فيني المهم وصلت بالسلامه والذيب حنطته عندي بالبيت

ذكريات عيد الفطر المبارك وتقبلوا تحياتي وآسفين على الأطاله

[محترف]

السلام عليكم :
فكره حلوه جدا ..يعطيك العافيه اخوي ابو ريان . وتسلم يمينك . والمصاعب والمشكلات التي تواجه الكشاتة يستفيد منها الآخرين وياخذون الحيطة والحذر منها لتلافيها ... وشكرا...,

[ابو ريان .]

الاخوان وفقهم الله بعد النظر والتأمل في قصصهم المدهشة والتي لاتخلو من فوائد وعبر نستنتج أيضاً زيادة على ماسبق مايلي :

1 ـ الحذر من البادية الخونة ونحن لانعمم ففيهم الرجال الطيبين أهل النخوة والفزعة ، وأما الخونة أهل الحقد فاحذرهم خاصة عندما تطلب منهم وصف لمكان معين فقد يوصف لك بالعكس ( الله المستعان ) .
2 ـ الحذر كل الحذر من الحيونات المفترسة وغيرها فمره من المرات كان احد اخويانا سهران ومادرى إلا ناقة بجنب الخيمة في الليل المظلم وهذا لاشك انه خطرفقد ينام احد بالتانزاني وتدعسه الله يستر ، والحذر كذلك من الحشرات والزواحف ، فالبعض يصب ديزل دار مادارعلى الخيمة والجلسة علشان تطرد الحشرات خاصة عند النوم وهذا شيء طيب ، ولاننس دعاء النزول فهو أعظم من كل شيء ( أعوذ بكلمات الله التامات من شر ماخلق ) ولابد من اليقين أنه لايصيبك شيء إن قلته .
3 ـ كذلك مما استنتجنا من القصص عدم السرعة في البر لغير حاجة ، فهذا أخونا أسرع وطاح في جرف وتعطل .
4 ـ هناك ثلاثة أرقام تدقها في الجوال عند الحاجة والضرورة تسمى مكالمات الطوارئ وهي ( 112 ) لكن ماأدري هي تشتغل دايم والا بس مع وجود الأبراج ، وعليك التجربة .

ومازلنا ننتظر المزيد من القصص والروايات المليئة بالفوائد والعبر ، وارجوا التركيز على قصص الحرامية وقطاع الطرق ، والله يحفظ الجميع .

[هضيم الكشح]

مشكور اخوي ابو ريان على الفكرة ومشكورين الاخوان على التفاعل
قبل اربع سنوات طلعت ومعي اخوي الكبير لم المحارق يذكر به بوادر ربيع والله وناصله ونلقى ربيع جيد والسما ملبده بالغيوم
والجو ولا احلى منه
نقعد يابو علي قال نقعد مير ننزل اغراضنا والله وتصك السما سودا لا اله الا الله وتصب صب في غضون ثواني
شيل لا تشيل جدع الاغراض بالسيارة والمحارق ما يبيله صبت كل الشغايا فيه ويتحول من قزازه الى مطينة الى بحيرة وحنا تونا ما مشينا
والله ونعطي الموتر الدبل ونمشي بها المطينة لين طلعنا من المحارق الشعيب وكل همنا يمدينا ناصل الطيري قبل لا يسيل والله الدرب
ياجماعة سيول سيول ولا نشوف شي من المطر والجو بااااااااااارد المهم تسكرت علينا الدروب ما قدامنا الا شغيه وتمشي ولا يمدينا نرجع والدروب طيين والله ونختار لنا مقطع مع الشغيه ونتوكل على الله ونقطع مير والله يهلش الموتر ويطيح بالشغيه وياصل السيل للقزازة القداميه
وبدى الموتر يتحرك في السيل هذي وهي شغيه موب شعيب يالله السلامه واعشق الدبل الثقيل ومن ثاني او ثالث محاوله وبكامل الدعسه والله ويرجع موخري السيارة لكتف الشغية لان الموتر بدى يمشي مع السيل والحمد لله طلع الموتر من السيل والدنيا تصب سيول سيول ما عمري شفت مثلها ولا سرعتها والله وندور لنا مكان ثاني ونقطع معه بالملعونة واختها والحق لا تلحق الطيري ياولد وناصله يوم الله راد ولا الشعيب يزبد.
والسيل جاي من بعيد نسمع هديره والله ونمشي نباري الشعيب تقل نسابقه مسابق نبي نقطعه قبل ننحجر واراد الله ونلقى طلعه ونقطعه
والموتر من يوم طلعنا من الشغيه وهو يقطع ورايح نص عزمه والدخنه بيضا ورانا من الما اللي دخل المكينه
ما امدنا ناصل الجهه الثانية من الشعيب الا والسيل يقلب قلب ويرتفع منسوبه ال ان وصل لمستوى الارض اللي فوق ويزود الهجيج ياولد الحمد لله اللي نجانا من الموت المراد يوم طلعنا من الطيري ووصلنا للقار تشاورنا نرجع ولا نكمل لنفود حق التنهاة والله وناصل النفود ومن فوق نطالع التنهات بحيرة والشعبان كلها تصب فيها
طيب نبي قهوه وشاهي ما معنا حطب ونروح نحطب من العرق اللي ورى التنهات به حطب زين بس غرقان وارطى الا يا مولع
شقى يا رجل والله ياهو شقى ذاك اليوم بس على القلب مثل العسل والموتر ياحلالي يقطع والدخنه بيضا بس الحمد لله على السلامه

اللي بعده.....

[شرشبيل]

الله لا يعيد المواقف الصعب لي ولكم ولك مسلم عايش على هذه الارض

أصعب موقف في حياتي مره علي 20 سنة لازلت اذكره واذكر أحداثه . كان عند الوالد ابل في القرعه وأنا وخواني وعيال عمي عندها في الربيع وعمي الله يهداه كان مدلع عيال اكثر من الازم مهو نفس ابوي العصا بيده ، يوم تغدينا في ذاك اليوم الاسود قام عمي وعطا الددسن لولد عمي وكان عمره 13 سنة وانا كذلك وقال روح تمشو واستانسوا في البر وهو بينام بعد الظهر وطبعاً ما عطاه الا علشان ابوي ماكان موجود كان حادر للكويت ، المهم الولد خذا وارد عراوي وخذا أخوانه الاربعه وانا معهم وخواني 2 وعيال خالي 3 يعني عددنا 11 واحد في الددسن يوم ابعدنا تقريباً عن مراح الابل حوالي 10 كيلو متر قام ولد عمي تقول سعيد الهاجري بأستعراض على الددس وانا اقول لا ياولد هدي لا ننقلب وماهي الي لحظه ولا تنقلب الددس الجديدة 5 قلبات بعد القلبات طلعنا من السيارة نتفقد بعضنا الي طايح والي مكسور والي يبكي ولي منشق راسه إلا واحد من اخواني فقدناه ندور عيه مالقيناه يوم بحثنا عنه لقيناه تحت غمارة الددسن بدون حراك طبعاً صار ارتباك بما انا وولد عمي اكبر اثنين في الموجودين حاولنا نعدل السيارة ماقدرنا والي معنا يبكون . ومن الروعه اطلقت ساقي الي الريح اركض بكل من طاقتي الي مراح الابل اطلب عمي وجدي وخالي كانوا كلهم موجودين المهم مالكم بطويله ركضت لين طلع الزبد من حلقي وشفت الموت بعيني وصلت الي المراح صحت على الراعي وين عمي الكبير مهو ابو العيال قال لي في الخيم نايم صحيت وصحا جدي وعمي ابو العيال معه وقال اشفيك دروا ان فيه علم كايد صاح عمي صاحب الددسن العيال فيهم شي احد مات قلت كلهم بخير ماعدا ناصر تحت الددسن وماقدرنا نطلعه ، المهم ركب عمي الوانيت هو وجدي وعمي الثاني وانا ادعس حد الدعسه ولقينا ولد عمي الخبل السواق جاي يركض صفقه جدي راشدي سدحه في الارض وركبه في البدي ويوم جينا الي الددسن لقينا المفاجئه لقينا أخوي قاعد مقابل الددسن ماسك صدر ويكح سألته شلون طلعت قال العيال حفروا تحت الغمارة وسحبوني ولأن الارض ممطور سهل الله عليهم الحفر وطلعو ولد عمي المهم (الله سخر للبزران كيف يتصرفون وانا وولد عمي الخبل الدجه ) المهم طار فيه جدي الي السعيرة ووالمصابين معه وفحص عليهم وطلعت كلها رضوض وبعض الكسور وهذا المشهد ما ينزاح عن راسي وأخر شي عرف ابوي بالعلم وأصدر قرارة الحازم بسحب جميع مفاتيح السيارات التي تصل الي الابل وهذا القرار للعلم لازال ساري حتي الآن وانا عمري حاليا فوق الثاثين وعندي ولد طولي لازال ابوي الله يطول بعمر بالصحة والعافية ياخذ مفتاح السيارة مني اذا جيته عند الابل . ونعتذر على الاطال وارجوا ان تكون القصة عبر لي ولكم جميعاً والدلع وتددل مايجيب الي المصايب ياشباب فحضروا من كل شي مهو في طبع اجدادنا زدمتم ساليمن

[شرشبيل]

هذا موقف مهو صعب بس لازال اذكر واضحك كل ماتذكرته ، وهو مره طلبو الشباب مني اني اطلع معاهم لصمان وكان عندي وانيت باتريوت جير عادي بدون دبل ، وطلعت معهم ويوم وصلنا الي الشيط قام الموتر يقطع ولا يبدل جيره دخلت الورشة في الشيط وطبعاً شاف اللوحة كويتية والعزبه في الصندوق قام يتفلسف علينا الهندي هذا بابه جير خربان لازم ينزل جير 2 يوم تصليح والسعر 3000 ريال المهم لعن ابو خير لأنه نصاب ويتكلم مع صديقة الهندي الثاني بالهندي وواحد من الربع يعرف عندي لأنه اشتغل في سفارة دولة الكويت في الهندي 4 سنوات وترجم لنا كلامه وانهم بينصبون علينا ، المهم طلعنا ووصلنا الي ذيك السدرية وحطينا خيمتنا وذبحنا الطلي وقعدنا اربع ايام نتمشا على الجيب والباتريوت جالس عند الخيمه ويوم بغينا نرد الوانيت مايعشق قمت وانا ولد ابوي وحطيته بنمر الثالثة ونتعت مع ضغط على البنزين لين قبل النمر ومشي ومن الصمان الي الكويت بنمر الثالثة تقريباً 400 كيلو ومريت على تفتيش وطفته ولحقوني ووقفوني وطلع العسكري رجال وقدر وقال رح الله يستر عليك في الطريق ، المهم تدرون كم صلحت الجير صلحت 20 دينار مع القطع يعني 250 ريال كانت طرمبت الكلش الفوقية خربانه

[الرجم العالي]

تشرفني المشاركه بهذا الموضوع (( بعد مشاركة شرشبيل بصراااحه ذكرني بموقف كنت ناسيه ))

عندما كان عمري تقريبا 10 سنه كان أبي رحمه الله رحمة واسعه كاشت بالعائله طبعا كانت في النفود وكان الأهل

جلوس في منخفض قليل نوعا ما تحتنا وبيننا مسافه تقريبا 200 الى 300 متر المهم كنت في وقتها مهوس بالقياده

لحد الجنون فكنت الح على ابي رحمه الله أن يجعلني اقود ومع كثرة اللإلحاح قال أذهب وقدها طبعا المفتاح معه بس

السياره لم يقفل عليها ولم يكن يخطر بباله ماسيحدث وهو أني قمت بمساعدة أخي من أبي ((المقرود)) وكان

يكبرني بسنه بفك الجلنط وتفضيت السياره وكانت بمنحدر كما اسلفت المهم قال لي أخي أنزل ودف معي نزلت أنا

>>> صحّيح .. وقمت بالدف معه طبعا كانت بالمنحدر بمجرد ارتفاع الكفراات عن الرمل ستطلق ساقيها للريح

>>> حلوه ساقيها .. المهم هذا ماكان أنطلقت السياره بسرعه ماذا فعلت الهمني الله وستر علينا بأن قمت بالجري

ورأها والقفز بها وفرررامل مباشره بعد وقفها بثوان معدوده الا وأبي رحمة الله عليه يستقبلني أستقبال حاااار بذاك

الكف الذي نكد علي ذلك اليوم والحمدلله أنها صفت على كف ولم تكون الكارثه لا قدر الله ((رحم الله أبي وجميع

أموات المسلمين))

[برق بريده]

اول شي شكر اخوي ابو ريان على الموضوع

ابي ابد با سالفتي على طول وابحاول بدون إطاله
في يوم العيد الضحيه 1426 طلعو ربع لي لم الصمان في
الحصبيات با التحديد دقو من هجره هناك تسمى ( مناخ ) علي ثاني ايام العيد يابونن اجي لمهم المهم عطون الاحداثيات
يوم وصلت لم ام رقيبه على طريق الحفر فرقت من المحطه وجهتي شرق لازم امشي 60 كليو قطوع
وكنت لحالي مامعي من يقول ربي الله
وكانت ذيك الايام مطر اهم شي يوم بقي على ربعي خمسه كيلو تقريبا
نزلبي الخط على فيضه من عند الجال غرز الموتر:j باالطين نزلت من الموتر وقعدت احول بوه
عسى يطلع ياما رحت قدام او ورى قعدت ساعتين عاى ها الحال
خذو بعلمكم ان السياره قاعده على الدفرسات اهم شي ايست ((خاب رجاي )) اني
اطلع نزلت من السياره ورقيت لم جال الفيضه ولقيت اكايس شعير طرت في بالي
اني احطهن تحت الكفرات
بديت افرشهن عند الكفرات :confused:
ركبت السياره وحركته والله وتقوم طلعت الحمد لله من سبت اكياس الشعير
الي لولا الله ثم هن ما طلعت
((( تراي اول مره اسرد سالفه في ها الموقع يعني لا احد ينقد علي ))):D :D
اعذرون على الاطاله
اخوكم ولد شلوى

[ميهاف]

بسم الله موضوع جميل\السلام عليكم" طبعا مع كثرة الكشتات والروحات والجيات يصير مواقف منها السهلة الطريفة والصعبة
باختصار شديد الشتاء طلعنا انا او واحد من العيال لم فيضة الوسيع مئة كم على طريق الشرقية كان معنا باترول 91 سلقة
وصلنا قرب الفيضة تقريبا الساعة 12 ليلا بعد ماتعدينا مصفاة البترول تبع ارامكو(للي يعرفون المنطقة) قلت لخويي خنروح قطوع اقرب
الشاهد كانت هي ليلة ماطرة والمنطقة كلها مناقع بغض البصر انه ارض صبخة يوم فرقنا من القار شبكنا الفرارات وتوكلنا على الله
طبينا بمنقع ماء ووصلت الموية الكبوت وتغطا النور لاكن ذيبان مشى ماطفاء (مع العلم اني اعرف المنطقة زين لاكن الليل عين وحدة)
رجعنا لنفود الدهناء 10 كيلو تقريبا ونمنا رجعنا الساعة 8 الصبح ودخلنا فيضة الوسيع ولاه كلها غادية منقع قلنا بنحيوط وهنا المشكلة الا وهي((البزعة)) وغصنا وراه وحنا كنا نحاول انروح يم فيضة ام القطا من الساعة 10 صباحا الى 12 ليلا ولا حولك لامطافي ولا احد يفزع ومشينا رجل قرابة 12 كيلو باليل وجينا بكرا بالشاص وطلعناه وكل هذا بسبة البزعة....
واسف على الاطالة

[راعي الفورت]

موضوع شيق وممتع ويعطي كوم من الدروس وأنا أبي أعطيكم موقف ودرس في نفس الوقت



والموقف إني كنت ماشي في الطريق وبدت السيارة تناتع

( بسم الله وش اللي صاير )

إللا أشوف ولا السيارة ما به بنزين

( ما انتبهت للبنزين )

واللي قدامي طلعه يعني البنزين يبي يدحدر



قلت أشد على السيارة وفعلا شديت عليه .... ولكن قمت بهز السيارة يمين يسار وأنا ماشي حول الستين

(( خطيره الحركه )) ولكن عديت على خير

يمين يسار يمين يسار يمين يسار يمين يسار



والمصيبه قدامي تفتيش ولكن ما انتبهو وأنا أضحك على هبالي




((( نصيحة قبل لا تمسك خط فكر بالبنزين )))

[حفيدابن بدران]

موضوعك جيد يابو ريان
مع ان سوالفكم سوالف حظر ولكنها مسليه بعض الشئ
.

[zaxs2010]

الله يعافيك يا الغالي

















Zaxs2010

[ابو ريان .]

شكراً لجميع الإخوان المشاركين وجزاهم خير الجزاء وحفظ الله المسلمين وسلمهم من كل سوء وكروه .

[أبو مهند الزهراني]

في أحد الطلعات البرية كنا مجموعة كبيرة من الشباب يمكن أربع سيارات وفي كل سيارة 3 أو 4 شباب المهم معانا الذبيحة وكل العلوم الزينة وتغدينا واللي علينا بالخير طبعا في وادي لومة قريب من قرية ربوع الفائجة التابعة للقنفذة المهم يجيك السحاب بعد الظهر من الشرق يرعد قلنا بعد ما تغدينا ليش ما نمشي مع طريق ترابي يمشي في الوادي بين جبال صار السحابة الممطرة خلفنا يوم مشينا يمكن 5كلم تقريبا ونلقى سيارتين مليانة فيها عائلتين مسرعين عكسنا ويصيح علينا السواق السيل جاكم السيل جاكم وعلى طول نعكس السير وهاتك سرعة ولا تقول باخشب صرنا ست سيارات وهاتك من يسبق الثاني وعين في الوادي خايفين من السيل والحمد لله وصلنا إلى بر الأمان واستلمنا مطر غزير مع برد بعدما خرجنا وحمدنا الله على السلامة بصراحة كنا نسوق السيارات بخوف ورعب من خطر السيل وفي مناطق لأول مرة نتمشى فيها لا تعرف من أين تأتي سيولها وما تعرف شعابها .

[صقر شمالي]

مشكورين اخواني على هذا الطرح الجميل وانا واعوذ بالله من كلمة انا عندي عدة مواقف من خبرتي في البر والرحلات البرية التي لها اكثر من عشرين عاما والحمدلله مازلت اعشق القنص والبر صيفا وشتاء .
الموقف الاول حدث لي شخصيا في الاعوام الاولى في ربيع 1408 في حرة الحرة بين طريف والجوف حيث جاء داب (حنش او ثعبان)
وصار تحت السيارة فجأة واذا هو داخل من جهة القير وندور عليه ماحصلناه المهم زاولنا سيارتنا البطل هو اللي يسوق السيارة السيارة كانت نيسان بكب المهم بعد مشاورات واجتماعات اتفقنا ان واحد يقود السيارة ويلبس البسطار (الجزمة العسكرية الطويلة )عزكم الله وكنت انا صاحب هذه المهمة الى مدينة سكاكا على طول 180 كم تقريبا ملاحظة الاخوان في الحوض ويناظرون للخلف ممكن يقع الحنشل المهم وصلنا ودينا السيارة المغسلة وماعلمنا العمال بالسالفة وحنا نناظر واذا بالعمال افريكو لما شافوا الحنش وقع منالسيارة حنا شفناه من هنا هجمنا علية وقطعناه اربا اربا تقطيع مو عادي ليه لانه قطع علينا وناستنا والا وش رايك ياصاحب العقارب وشكرا لنا موضوع اخر ان شاء الله ودمتم

[ام صتمه]

السلام عليكم ورحمه الله وبركاته ...
يا جرير .. اهنيك على القصة ؟؟؟
والله ياهي حياة جديدة وربي رحمهم برحمته ...

[icom 2006]

انا اصعب المواقف الي مرت علي انا وواحد من الشباب في شتاء عام 1428هـ(الشتاء الي زل ) طلعنا بسياره وحده وقعدنا نطعس شوي ودخلنا منطقه رمليه واتوقع هذي المنطقه (رباظه ) الرمل فيها مرررررررررررررررررره خفيف المهم كان وقتها حول غروب الشمس والمشكله انا وخويي هذا نحب نستكشق اي شي المهم لقينا درب قلنا بنشوف وين ينفذ بتلنا الين طلعنا على منطقه كأنك في الربع الخالي والرمال على ارتفاعات عاليه وبعد ماغربت الشمس قلنا بنرجع نصلي في المحطه مع الجماعه المهم وحنا راجعين صارت النزلات الي كنا ننزل معها وحنا رايحين طلعت طلعات عدينا كذا طلعه المهم نشبنا في منطقه نزول ثمن ارتفاع على طول تقول نفجال بس المساحه اصغر طالعه باضبط كانها راس مثلث المهم حااااااااااااااااولناااااااااااا مانع ابداً الحمد لله صار حولنا شبك مزرعه مقصوص دخلنا في المزرعه بس لازل المشكله موجوده توقفنا شوي وشفنا وش حنا عليه من حال وجاء في بالي شي لو وش ماصااااار معك بتطلع منها مهما كانت مشكلتك تذكرت الواحد القهااار الذي يرانا ويعلم مافي صدورنا ... توضينا وصلينا المغرب وبعدهاا رفعنا يدينااا للعزيز الوهااب وطلبناه وبعدهاا سمينا بالله وتوكلنا عليه والحمد لله طلعنا من المئزق ولله الحمد ...

مما استفدت من هذي الرحله :

1/ عدم الطلوع للبر بسياره وحده فقط .

2/ تجنب المغامره في منطقه مجهوله وخاااااصه المنطقه الرمليه ..

3/ واهم ماأستفدت منه ان من طرق باااب الرحيم الغفار بيلقى حل لمشكلته اياً كانت مشكلتك .

4/ وتعرف على الله في الرخاء يعرفك في الشده ..

5/ لاتقول ان سيارتي دبل وتدخل وبس اهم شي توكل على الله ثم بعد ذالك عليك بالموتر الي مكينته تطرب راعيها .



وتقبلوا تحياااتي ...


ابو سعووووود ..

[سكب]

السلام عليكم

القصة قبل حوالي 17 سنه كنت املك جيب موديل 74 شراع طبعاالجيب شاريه ب3000 ريال المهم خسرني الجيب حوالي 12000

ريال لأني كنت جازم على أصلحه مهما كلف الجيب يعتبر تحفه المهم اتفق الشباب علي رحله والبطل فيه الجيب راعي الدفع الرباعي

طبعا أول مره يمشي فيها خط طويل والعزبة والماء والعلوم معي ومعي اعز صديق بعد مسافة 15 كيلو جاوب خرطوش الماء مع الحرارة وكان اخو صديقي في سيارة خلفي يم شاف الماء من تحت السيارة على طول تكشيح في النور وقلت ياساتر علىجنب والله والموضوع بسيط المحطة بعد نصف كيلو نصلح الخرطوش وكان اخو صديقي مربوشوحمقي اسمه صالح قلنا له يصالح خلك وراء الجيب إي ماء تشوفه على طول اشر بنور باقي حوالي 100كيلو على المكان وعيني على المرايا طول الطريق جت برأس المربوش صالح قال ليش ماالعب عليهم المهم اشر بشكل سريع أخوكم على طول على جنب الخط وجاك صالح ميت ضحك قلت يالله أكلنها وبعد كيلو وشر مره ثانيه وكلنها ويضحك مع خويه المهم مشينا وقلت والله لعطية درس كان الجيب كله خروم من تحت قلت لصديقي جيب الجالون ابو عشر لتروصبه من الخرم إلى تحت رجلك المهم صب الماء وصالح وراء يراقب قلت لصديقي لاتلتفت عليهم وجاك صالح يوم شف الماء جته الربشه من جد صار يجي إمامي ومن جنب ويطلع على التراب من اليمين وانأ مطنش اسولف مع صديقي الرجال جن جنونه وعصب لين جاء أمام الجيب وحد وحد وأطالع للرجال الى وجهه ألوان والله وأوقف ويقول حرام عليك من اليوم وانأ اشر وسب ومعصب على الأخر وقلت له من حفر حفره لأخيه وقع فيها وعلمته بلسالفه هناء ألزبده أخوكم صالح من كثر الضحك إغماء عليه وتاب بعدها يمزح مع واحد مكشاتي حلوه مكشاتي وسلامتكم



طويله اسف حبيت المشاركه

[راعي الخطوط]

أشكر أبو ريان على الموضوع اللي فتح جروح عندي والله من المواقف الشينه اللي مريت بها لو تعطيني 10000صفحه علشان أكتبها ما كفت
أقولكم يا الربع الكشته اللي أرجع منها بدون موقف حرج وصعب أوصل البيت وأنا مانيب مصدق أن الطلعه عدت على خير بس عندي ملاحظه الطلعه اللي ما فيها نكبات ما لها طعم
وصيفنا مع أهلنا أحلى وتقبلو تحيات أخوكم راعي الخطوط

[khaled99]

السلام عليكم

أصعب موقف مر علي...

كانوا الشباب كاشتين في الدهناء قريب من ام القطا..

ودقيت سلف أنا وواحد من الشباب عشان نمرهم..

أرسلولي الإحداثيات وحطيتها في الجهاز وتوكلت على الله..

إلى الآن وكل شيء ممتاز..

لمن قربنا من الموقع ما لقيت أحد وجلست أحوس لين طحت في

نقرة شينه..

ولأن الموقع منخفض ما في إرسال..

حاولت أتصل بهم ما قدرت..

وجلست أتذكر أنا وخووي سواليف اللي ضاعوا بالصحراء:D

وشربوا موية اللديتر..:p

جلسنا تقريبا ساعة وشوي

والحمد لله وتطلع السيارة

وأدق على الشباب

وقلت أرسلولي واحد إلى أقرب شارع..

وتواعدنا ووصلت عند الشباب الحمد لله

ولقافة مني قلت خلني أسجل موقع المخيم وألاقيه يبعد عن

الإحداثيات اللي معطيني أول مرة
((90 كيلو متر))
وأتوقع إن تسعين ما هي شوي

وطبعا لا بد من تصفيق اللي معطيني الإحداثيات غلط

عشان يمر بالمحنة اللي مريت بها

والله يحفظنا وإياكم من كل مكروه

[ذيب العين]

مشكور تسلم يمينك على الموضوع الرائع

[سكب]

السلام عليكم
موقف صعب وطريف



القصة قبل حوالي 20 سنه كنت املك جيب موديل 74 شراع تايوتا طبعا الجيب شاريه ب3000 ألاف ريال وكان مسرح للأطفال في الحارة متروك عند باب راعية من سنين المهم خسرني الجيب حوالي 12000إلفريال لأني كنت جازم على أصلحه مهما كلف الجيب يعتبر تحفه المهم اتفق الشباب علي رحله والبطل فيه الجيب راعي الدفع الرباعي وكان ثلاث غيار لأكن قويطبعا أول مره يمشي فيهاخط طويل والعزبة والماء والعلوم معي ومعي اعز صديق بعد مسافة 15 كيلو جاوب خرطوش الماء مع الحرارة وكان اخو صديقي في سيارة خلفي يم شاف الماء من تحت السيارة على طول تكشيح في النور وقلت ياساتر على جنب والله والموضوع بسيط المحطة بعد نصف كيلو نصلح الخرطوش وكان اخو صديقي مربوش وحمقي اسمه صالح قلنا له ياصالح خلك وراء الجيب إي ماء تشوفه على طول اشر بالنور باقي حوالي 100كيلو على المكان وعيني على المرايا طول الطريق. جئت برأس المر بوش صالح قال ليش ماالعب عليهم المهم اشر بشكل سريع أخوكم على طول على جنب الخط وجاك صالح ميت ضحك , ,وش فيه قال امزح معاكم قلت ياالله أكلنها وبعد كيلو وأشر مره ثانيه واكلنها بنفس الطريقه انا معذور لازم اصدق ويضحك مع خوية المهم مشينا وقلت والله لعطية درس كان الجيب كله خروم من تحت تعرفون قديم قلت لصديقي جيب الجالون أبو عشر لتر وصبه من الخرم إلى تحت رجلك المهم صب الماء وصالح وراءيراقب قلت لصديقي لا تلتفت عليهم وجاك صالح يوم شف الماء جاتة الربشه من جد صار يجي إمامي ومن جنب ويطلع على التراب من اليمين وانأ مطنش اسولف مع صديقي الرجال جن جنونه وعصب لين جاء أمام الجيب وحد وحد حتى طلعة عن الخط وأطالع للرجال الى وجهه ألوان من الخوف والله وأوقف ويقول حرام عليك من اليوم وانأ اشر وسب ومعصب على الأخر وقلت له من حفر حفره لأخيه وقع فيها وعلمته بالسالفة هناء ألزبده أخوكم صالح من كثر الضحك إغماء عليه وتاب بعدهايمزح مع واحد مكشاتي حلوه مكشاتي وسلامتكم


تري خوينا صالح في احد الرحلات من الربشه مرة دعس ماطور الكهرباء رجع علية وراء بالجمس وليلة مطينه
تدرون هذا صالح فيه كرم وشجاعة وطيبه نادرة بين الرجال




موضوع رائع
تحياتي

[الشقردي 999]

اما انا كنا جايبين ولاعه
خربانه فما عندنا شي جينا كلنا راجعين للبقاله
وحنه بالبر بالطريق لقينا بدو نفاهمنا معهم وعطونا كبريتين
ما قصروا

[الشقردي 999]

المشكله كنا في وسط النفود

[AbduSalam1]

ما قصرتوا ..

لكن واحد من الشباب ضيق صدري بسالفة قتل الذيب .. ؟؟

[عاشق z71]

ما قصرتوا ..

لكن واحد من الشباب ضيق صدري بسالفة قتل الذيب .. ؟؟


حتى انا ظاق صدري حيل :D