كيفية القيادة في الطرق الموحلة ؟

[رجل كريم]

السلام عليكم ورحمة الله وبركاته:

ارجوا من كل عضو جرب القيادة عل الطرق الطينية او الموحلة واستطاع ان يجتازها بنجاح ان يعلمنا بطريقته حتى تعم الفائدة ..




ولكم جزيل الشكر ...



http://www.shazly.net/~freehosting/1/tmi4vpz6_18.jpg



http://www.shazly.net/~freehosting/1/ue2rzno2_19.jpg

[sameer_1798]

بالنسبة لي لا شفتها أرجع دربي و ما قد غامرت وخشيت فيها , إلا عند الضرورة القصوى بشرط وجود أكثر من جيب .

[ابواحمد1]

سمعت انهم يربطون على الكفرات سلاسل لمنع الانزلاق بالطين " راعين طويله "

لكن انا اذا طحت بطين وبليت اطوووووووووس وربك يستر وعليك بالشجر الصغير لانه يساعد على الممشى

لكن اذا صادك الطين فقشر بصل ونم

واذكر كان لي موقف بطين طحتبه وانا غافل بالصيد قعدة تقريبا 10 ساعات بالبر وبخلى ولحالي لين جا واحد وساعدني

[تيتشر]

والله مالي خبره

بس يقولي واحد اذا طحت بالطين لا تجلس تدوس وتحوس بموترك

وقفه واحتر الارض لين تنشف

والا ان لقيت لك واحدن معه ونش .. كان بها

موضوعك حلو وانشالله يجون هوامير السواقه والبر ويفيدوننا

[غالي]

انا جربت مرتين تقريبا
لكن
ليس بطريق طويل
وانما اقطع وديان طينيه وتدخل الكفران جوه الطين اكثر من الصور الي انت حاطها اخوي
طبعا احط على الدبل الثقيل والزر الي يقوم السياره على الثاني (السياره جي اكس ار اوتماتيك)
ان جيت للجد
خطره جدا خصوصا الوديان
لان مو كل جهه هي مخرج لك
وعند لفة الدريكسيون تلقاء السياره تمشي سيده (تزلق)
حتى اذا طلعت من الطين تلقى الكفرات ملفوف عليها طبقة من الطين وفيها عدم توازن باللفه حتى تروح

هذي تجربتي نقلتها لكم
والله اعلم

[رجل كريم]

الاخ/sameer_1798

الظاهر هذا المفروض اللي يسويه الواحد لاواجه مثل هذي الطرق (انه يغير مساره)

وشاكر لك مرورك ..


الاخ/ابواحمد1

شكلك عانيت من جد لكن انا متأكد انك طلعت بنتيجه اقلها ماتروح خلا لوحدك .. وشكرا لطرحك لتجربتك ..


الاخ/ تيتشر

الله يحلي ايامك ..
فعلا ممكن ان يكون الضغط على البنزين يزيد الطين بلة ..

شاكرا لك مرورك وتعقيبك ..


الاخ/غالي

اشكر لك كثيرا طرحك لتجربتك المفيدة والتي بدورها افرزت لدي اكثر من سؤال.. ؟

اولها : هل ينفع ام يضر استخدام الدف لوك /قفل الدفرنس في مثل هذه الحالات؟
ثانيها : هل يلزم تنسيم الاطارات لتسهيل عبور الطرق الموحلة ؟



وشكرا لكم جميعا ..

[مدور ربيع]

اهم نقطة ... انك تمشي على الخطوط القديمه اذا توفرت
لانها متماسكه ومرصوصه ولايمكن يتخللها الماء



واذا كان مافي طرق قديمه ,, تحاول تمشي فوق الاشجار الصغيره ,, على شان ترفع الموتر

وتكون دوسة الموتر مشدوده على خفيف (بسرعه 50 كم )




واذا حصل وغرست فعليك بالاتي ::

- اكتشف المنطقه بدقه , لكي تحدد طريق الخروج بسهوله

- اجعل ضغط الهواء من 25 الى 20

-استخدم العفريته او الدف لوك , قبل التحرك اذا كان احدى الكفرات متعلق

- استخدم الدبل الخفيف مع نمره خفيفه (نمرة 2)

- ضع اشجار اوحصى مفروش , تحت الكفرات اللي تدور اسرع من الباقي

- دع الركاب يتمركزون في خلفيه الموتر في حالة التعليق , اويساعدون الموتر بالدف في حالة الحركه البسيطه


:j

[غالي]

والله اخوي
سؤالينك لم اجربهم لاني ولله الحمد وبأمانه مالقيت توقف يمكن لاني اجي وماخذ عزم متوسط
وكذلك لم يكن هناك طرق قديمه امشي عليها ولم انسم الكفرات بل كانت تقريبا على 40 او 35 بحكم المنطقه صخريه اكثر لكن الوديان طبعا طين
لكن بعد الاتكال على الله معي 3 جيوب او جيبين لو لا قدر الله تم اخفاق المحاوله للعبور
يتم سحبه

إما الدف لوك
اتمنى الاخوان الي جرب يفيدك
لكن بتوقعي انا (ولم اجرب)
حين التغريز لاقدر الله بالطين
لابد منطقه اقسى من منطقة اخرى تحت الكفرات وهذا في الغالب
وفي هالحاله بتصوري بتكون فائدة الدف لوك كبيره
بحيث يتم قفل الكفر الي يدور
ويتم تشغل الكفر الثابت او من الجهه الاخرى
ويتم ذلك بالتوالي (مثل الطفل الي يحبي) :)
مره يشغل هذا ومره ذاك
وهذا في الاندكروزر وقمت بعدة تجارب في الرمال عليه في طلعه لطعس
والممشى كان قليل جدا تقريباً 5كيلوات فقط لكي تتم التجربه وتحس بفعاليته
والله اعلم

[ابو ناصر2020]

انا صارلي موقف مع الطين بس اني علطول شغالت الدبل على الخفيف وحطيت القير على الثاني
وصرت اوزن دعست الموتر الي طلعت من الموقف وكنت اروح لم الشجر واذا شفت رفاع علطول ارتفع
والحمد لله عديت بسلامه .

بس اهم شي اذا صارلك مثل الموقف هذا لزم تشبك الدبل على الخفيف علشان الكفرات تدور الأربع ومايصير فيه
زلق والله يستر على الجميع يارب .

[السرحال]

فالصبخة يطويل العمر


مثل الي فصورتك بالضبط

خشينا وسطها وعديناها بجيب باترول موديل 83 ربع

والنصيحه انك تنسم وتشخط واذا شفت الموتر غرز ولو لملي واحد

1_ لا تكبس فرامل خل الموتر يقف لحاله ودور خويانك الي معهم جيوب او انك ترجع رويس اذا ان الصبخه ناشفه شوي

2_ اذا ما معك احد والله احررررررقله وحنا طلعنا منها كذا اي والله


وشكرا

[بحري999]

الحقيقه اخوي ان الغراز بالطين ماهو سهل
انا صاري لي موقف مع الطين الحقيقه اني تطينة بسبعين طينه وزياده القصه وما فيها اني ونا راجع مع رحله لي على شاطي البحر وبعيد عن الشاطي تقريبا 200 متر شفت جيب شيروكي مغرز طبعا بالطين قلت في نفسي خليني اساعد هارجال واعمل معروف فيه وانا جاي ابسحبه كان الشيروكي مغرز الى نص الكفرات بالطين وبطنه بلأرض وكل ماتحفرعن الكفرات يطلع عليك ماء الحاصل اني قربت من الجيب الشيروكي وهي التقريبه واغرز جنبه حاولت بالجيب :no: وكل ماتحرك نزل اكثر المفروض مااحرك الجيب في هذه الحاله انتظر جيب يسحبني لأن الكفرات عندي مابعد نزلت مع دفه من الاخوان من خلف مع وضع تحت الكفرات اشجار صغيره او حجر بدون حفر تطلع بأذن الله ولاكن هذا اللي حصل لأني اول مره اغرز بالطين الحاصل اني غرزت جنب الشيروكي والطين نص الكفرات والله ياخوان ان الطين صار مثل الغراء ماسك السياره جاء حرس الحدود حاولو يطلعوني ماطلع الجيب لا وازيدك من الشعر بيت شوي بغا يغرزون جنبنا طبعا تجمعو من كان على الشاطي وكل واحد يفتي من عنده ولا فادت الفتواى جانا جيب شاص وماقدر يطلعنا ما ابغا الطول عيكم الحاصل ما طلعنا الا قلاب 2,5 طن بالونش اللي قدام وهو بعيد عنا مايقارب 50 متر عن السيارات لان كان معه سلسله طويله .
للفائده
اذا حصل وغرزت في الطين شوف لك حراثه مزارع والا ونش كبير والا قلاب ولا وايت :D :D

[رجل كريم]

الاخ /مدور الربيع

نصائح جيدة تشكر عليها ..


الاخ/ غالي

اشكر لك مرورك وتعقيبك .


الاخ/ابو ناصر2020


شكرا لطرحك تجربتك .. هل كنت وحدك ؟ وكيف كان شعورك اول ماطبيت في الطين ؟


الاخ/السرحال

اشكر لك تعقيبك .. واعتقد ان للسرعة دور كبير في تجاوز المناطق الطينية مثل ماتفضلت ..



الاخ/بحري999

واضح جدا انك عانيت بشدة من التغريز في الطين .. لكن هل فكرت تستخدم الدف لوك(الهزاز) .. ؟
وهل استفدت من الموقف اللي حصل لك .. وايش هي الفوائد؟

وشكرا لك ولجميع الاخوة اللي شاركونا بردودهم ..

[بحري999]

الحقيقه عانيت واستفت كثير ولا ابخل عليكم بالفوائد:

اذا غرزة في طين اول شئ لاتحاول تحرك السياره خليها واقفه انزل من السياره ونسم الكفرات الى 15 تقريبا ودورعلى اشجار واحجار وحطها تحت الكفرات بشكل كثير واذا كان معك رفقه خلهم يدفون السياره من وراء وانت عشق الدبل الخفيف والقير على الثاني وبشويش عشان الكفر مايحفر ويدورمكانه وان شاء الله بتطلع طبعا حسب الطينه .واذا طلعت لا تنسى تعبي الكفرات اكيد معك ماطورهواء ضروري في السياره خاصتا لأهل المكشات الحقيقه موضعك جدا ممتاز وياليت الاخوان يفيدونا بامعلومات اكثر :redcar:

[هاوي الله]

إذا غرزت في الطين يعني وقفت السياره .... بالنسبه لي أفضل طريقه لإستخدام الدبل = الدبل الثقيل + القير نمره 3 ( طبعاً في بداية تحريك السياره للأمام )

[عاشق سفر]

شوف يالغالي بقولك هالكلام وهو من واقع تجربة لأكثر من مرة اي والله وكلها انا اتعمد اني اسويها...

وعلى فكرة موتري ماهو جيب ولا هو دفع رباعي ولا فيه دبل...

بس احب اني اغامر بهالاشياء وخصوصا اذا كنت فاااااااضي هههههههه

طال عمرك انا من اشوف الدحول قدامي واعرف انها بتمسك السيارة وبتغرز تلقاني اوقف قبلها واعشق الموتر بالاول واثبت السرعة بقد ما اقدر واثبت الدركسون على نفس الاتجاه ولا احاول انه يتحرك سانتي ومن ادخل بالطين احس السيارة بتغرز فاللي دايم اسويه واللي المفروض الكل يسويه هو انه لا يرفع رجله عن البنزين ولا يزود السرعة يعني يخلي الوضع كما هو عليه ويواصل بنفس الثبات وصدقني ماااااااااااااااااااااااايغرز وانا مجربها اكثر من مرررررررررررررررررة ومتاكد منها سواء في الطين او في الرمل النااااااااااعم....

وجربتها بتوماتيك وسويت نفس الشيء ثبت دعسة السيارة والدركسون ومشيت....

هو صح انك تحس ان السيارة بتغرز بس خلها ماعليك ثبت شغلك وبتلقاها تمشي معاك....

وعلى فكرة انا الاحظ اغلب اللي يغرزون من سواقتهم تلقاه يجيك مهدي لين يدخل الطين ومن حس انها بتغرز قام زاد السرعة ويقوم الكفر يفحط مكانه وتغرز السيارة بس لو ثبت السرعة وواصل والله ماكان غرز...

هذا حسب علمي وتجربتي وسلامتك

[salehhd]

السلام عليكم

موضوع ممتاز وان شاء الله يفيد الجميع

الحمد لله ماصادني هذا الموقف الا مرة من اكثر من 15سنة بهايلوكس 82 والحمد لله الموتر طلع بعد اكثر من 5 ساعات عن طريق سحب السيارة

[دغيم1]

السلام عليكم
بالنسبة للقيادة في الأماكن الوحلة ( الطينية )
فمن واقع تجربة يجب عليك إنقاص هواء الكفرات مابين : 10 - 15 لأن ذلك يساعد على الخروج بإذن الله وإذا كان مع الوحل ماء حاول إبعاد الماء عن مقدمة الكفرات .
إستخدام الدبل الثقيل مع خفة في القيادة بكل سهولة وعدم الإحماء من أجل الخروج لأن ذلك لايفيد في الخروج .
وإليكم بعض الصور

هذه الصورة قد غرست السيارة في الوحل بسبب ثقل السيارة وليونة الأرض بعد أن كانت مستنقع داخل الروضة

http://www.mekshat.com/pix/upload/images41/mk46848_mk12.jpg
ولم تفلح المحاولات في الخروج بالرغم من سحبها بواسطة جيب لاند كروزر صالون - وجيب تويوتا ربع مع بعض ، ولم يفلح الا رفع السيارة بعفريته تمساح من الصدام الخلفي ووضع الحجارة تحت الكفرات .

التوغل في الوحل والماء يستوجب عدم التوقف او تخفيف السرعة مع ضبط المقود بشكل جيد
http://www.mekshat.com/pix/upload/images41/mk46848_mk13.jpg


الخروج من الوحل بالطريقة المشروحة أعلاه


http://www.mekshat.com/pix/upload/images41/mk46848_mk14.jpg

ختاما تمنياتي للجميع برحلات سعيدة وبعيدة عن المنغصات
تحياتي

[رجل كريم]

الاخوة :

بحري999

هاوي الله


salehhd

اشكر لكم اثراءكم الموضوع بتجاربكم ومشاركتكم ..


الاخ/تركي بن عازب

قريت مشاركتك اكثر من مرة وصراحة اصابني منها العجب (طريقة جديدة) في الوقت اللي تتشابه تجارب الاخوان من بعض وجدت الاختلاف عندك .. ومع ذلك اتمنى من يجرب طريقتك يذكرها لنا بس تكون بسيارة دفع رباعي .. وشكرا جزيلا..

الاخ/دغيم1

اشكر لك مشاركتك وتدعيمها بالصور .. اغلب الاخوان ذكر استخدام الدبل الخفيف والقليل وانت منهم ذكرت الدبل الثقيل ..هل تستخدم الدبل الثقيل حتى لايسخن المحرك ..او لسبب آخر ..؟

شكرا لكم جميعا ..

[دغيم1]

السلام عليكم ورحمة الله وبركاته
حياك أخي الكريم : دكار
إستخدام الدبل الثقيل لحاجة الموقف لأن الدبل الخفيف لن يقدم لك الخدمة التي تستوجب الموقف .
السيارة عالقة في الوحل يعني وزنها كبير لأنك تعرف الماء يجذب السيارة ولايساعدها على الحركة خاصة إذا الكفرات قد دخلت للأسفل أما إذا كانت فقط دوران على الوحل والماء والسيارة لم تعلق فقط إنقاص الهواء مع الدبل الخفيف يكفي لذلك
تقبل تحياتي وشكري

[ابو ناصر2020]

الاخ/ابو ناصر2020


شكرا لطرحك تجربتك .. هل كنت وحدك ؟ وكيف كان شعورك اول ماطبيت في الطين ؟




كنت انا ومعي ولد عمي والمنطقه كاله مابوه احد كان بوسط الأسبوع وشعوري مثل شعور اي واحد
شايل هم انه اذا غرز يالله يالله بعد ماتنشف الأرض .


والحمد لله ربك ستر

[رجل كريم]

الاخ الفاضل /دغيم1

اشكر لك هذا التوضيح ..



الاخ الفاضل /ابو ناصر2020

الحمد لله انه كان معك رفيق ..والحمدلله على سلامتكم ..


دمتم بخير ..

[إبن فيصل]

والله الطين ما له حل ابعد عنه وعن المخاطره والتعب لأن الطين ما يرحمك يتزحلق الموتر وتنشب ولا عاد تقدر تطلعه بأي طريقه ودائماًِ أمش على هونك وإنتبه لطريقك عشان تقدر تتفادى مثل هذه المشاكل وتمشي رحلتك بسلام وفله وإنبساط.
وتقبلوا تحياتي....إبن فيصل،،،

[رجل كريم]

الاخ الكريم /إبن فيصل

انا معك ان الواحد منا يبعد عن مثل هذي الاماكن .. لكن ياخوي احيان تطب في صبخة بدون ماتحس خاصة في المساء..



شاكر لك مرورك وتعقيبك ..

[ذيب جبلة]

موضوع ممتاز

والحل عندي يا شباب .............


صار مرره ودخلت وادي كبير في المنطقة الجنوبية من المملكة وللاسف غرزت ... سيارتي كانت جيب شاص وطبعا كنت امشي على ارض عادي ولكن كان يوجد منطقة طينية ... وكانت هذه المنطقة الطينية مغطاه بطبقة بيضاء من الرمل ... يعني ما تنشاف وهذا سبب انها منطقة مخادعة وخطيره لاي شخص الا الي يعرف طبيعة المنطقة .... على العموم ما لكم بالطويل نجي للمفيد

طبعاً السيارة معاد تتحرك لا بثقيل ولا خفيف مكانك سر !! .... انا ما حبيت ازيد الطين بله لاني كل ما ادعس السيارة تنزل زيادة


تعبت مررره ولا قدرت اسوي شي انا والي معي الا درجه كل ما نجيب شي نحطه تحت الكفر يغطس تخيلوا حتى الحجر الكبار مررره يعني حجر يشيله اثنين يغطس وكانت رجولنا تنزل الا الركبه من شدة الطيت .... طبعاً عجزنا وتعبنا وكنا بمكان بعيد شوي عن الناس وخفنا نترك السيارة لحالة لان المنطقة شوي صعبة تركنا واحد عند السيارة ورحنا اثنين ندور مساعده ... طبعاً كانت ايام عيد والناس محد يمك .... في الاخير لقينا واحد صراحه .... ادعيله للحين تدرون ليش ؟؟؟


لانه طلعنا ولانه عطاني درس ما انساه ابد واستفدت منه بالفعل بمواقف اخرى مشابهه


بكل بساطة تدرون وش الحل ؟؟؟




الرمل



نعم الرمل .... يا شباب تعرفون ان المنطقة الي حولك اكيد يوجد حولك رمل او تراب ناشف

لان مشكلة الطين هو انه ملئ بالماء وهذا يجعل الكفرات تدور على الفاضي ....


المهم الرجال وصل وراح اخذ فراش خفيف وراح لقرب رمل بالوادي وعبئ الفراش بالرمل وشلناه سوى حتى وصلنا السيارة

وش سوينا ؟؟

حطينا الرمل الناشف على الكفرات حتى غطيناها بالرمل بالكامل ... وبمجرد ما تمشي بالسيارة وتحركها يختلط الرمل بالطين ويصير ان الطين على طول يصير قاسي وبالراحة تطلع السيارة وبسوله وبشكل تركني متسمر في مكاني وماني مصدق انها طلعت بذي السهوله ....



يعني يا شباب


" اذا غرزت بطين وحسيت ان السيارة ما راح تطلع بالتنسيم او الدبل ... لاتسوي شي وتزيد الوضع الا وضع اسوء ..كل ما عليك تسويه تبحث عن رمل او تراب ناشف وبتلقاه قريب اكيد ... وتوصله لسياراتك باي طريقة وتغطي كفراتك بالرمل ... وبتلاحظ ان الطين باختلاطه بالرمل ينشف على طول لما يختلط بالرمل وتصير الكفرات تتحرك بالراحه ""


اتمنى انكم تستفيدون مثل ما استفدت انا من هذا الرجل الله يوفقه

بالتوفيق

[هاوي صيد]

الطـــــــــــــــــــــــــــــــــــــــــــــــ ــــــــــــــــــــــــــــــــــــين ماله حل اذا غطست قفل الموتر ودور لك احد يسحبك

[الدحبول]

في إطارات مخصصة لقيادة على الوحل الطين

[رجل كريم]

الاخ الكريم/الجمش 5 كم

الفكرة التي ذكرتها رائعة بل ومدهشة , وسؤالي لك هل غطيت الكفرات بالرمل لدرجة انها اختفت يعني كأنها مغرزة من كل جهة من الامام والخلف والجوانب ؟ ولوتقدر تسوي صورة للكفر .. اكون لك من الشاكرين وجزاك الله خيرا ..


الاخ الكريم /هاوي صيد

اتمنى تكون متفائل اكثر من كذا وبعدين لابد من المحاولة مرة او اكثر قبل ما تبحث عن المساعدة ..


الاخ الكريم /الدحبول

نعم يوجد اطارات للطين .. لكن اعتقد هذي الاطارات غير مناسبة للطرق المعبدة عشان كذا مانقدر نركبها في سياراتنا الا اذا كنا عارفين ان طريقنا موحل ..

للجميع لكم تحياتي ..