من راح للربع الخالي اوسمع به يدخل

[قناص القرائن]

ياشباب يقلون ان الربع الخالي عالم غريب إن رحت إليه لازم تكن معكم ثلاث سيارات وماتمرحون جنب بعض عطوني معلومات اوقصص والله يعطيكم العافيه

[الباهي]

هلا والله

بالنسبه للربع الخالي انا دائما اروح له سنويا خمس مرات في السنه تقريبا وما فيه خوف عادي لكن لابد من الحرص والواحد لابد يصير حريص حتى بالديره ومافيه الا العافيه وانا كم مره اروح لمده يومين اوثلاثه بسياره واحده ومعي واحد من الربع لكن يوجد لدينا جوال فضائي وسلامتك:redcar::butt3: :alarm: :alarm:

[mohamad1121]

قناص القرائن

بعد التحيه
المنطقه منطقة قنص ومقطعه ويفضل التزود بالماء والبنزين وبكل ماهو اساسي والحرص واجب والاكثار من السيارات يعتبر شرط اساسي اولا لحمل البنزين في توانكي او براميل ولحمل المياه وخوفا من تعطل السياره الواحده فالمسافه كبيره الى اقرب منطقه لجلب المساعده لاقدر الله في حالة الانقلاب اوالعطل ، وموضوع الخطر والخوف من قطاع الطرق محتمل والحرص واجب وللعلم ذهبت اكثر من مره الى هذه المنطقه في الاعوام 84م و85 و86 ولم نواجه اية مشاكل ولله الحمد ونادرا ما ترى القنوص او سيارات عابره وشكرا



ابوكاسر

[ابو خلود]

من جهة الأمان قد تعرضت فيه لحنشل عام 1407 هـ تقريبا.
جونا وحنا نايمين الله وكيلك ولا خذوا إلا جراكل الموية والبنزين تحت تهديد الكلاشات وجزاهم الله خير تركوا لنا بنزين في وحدة من السيارات.

إذا أنت راعي صيد فالربع فيه خير على خبري .

[mmsm53]

اخى يامن سالت عن الربع الخالي ايها الزملاء السلام عليكم ,,,,, وبعد

لما هذه الرجه وهذا الخوف من منطقة الربع الخالي ، انها من احسن المناطق البريه ولاكن حسد الناس
جعلهم يخوفون منها الأخرين -- لماذ ؟ قالو ان فيها صيد طيب -- وهذا صحيح , قالو أنها منطقة خطره على الذي لايعرفها -- وهذا صحيح ، الا أن لي وقفه مع هاؤلاء الناس في المواضيع التي ذكرت وسوف اوجز
فيها برأيي الشخصي :
1- صيد منطقة الربع الخالي من اجود الصيد ، أرانب دائمه وفي أماكن كثيره مختلفه منها المكان الخطر
نظرا للمكان وبعض الحناشل وبعض المهربين ونادر ماهم ،ومنها المكان السليم عامة ، الحباري والكراوين في وقتها كثير وفي أماكن مختلفه وأرضها مثل أراضي الأرانب من حيث خطرها وسلامتها ، طيور أخرى كثيره في أماكن مختلفه ولاكن ليست مثل الحباري والكراوين ، غزلان ووضيحي وهي قليلا جدا ونادره حيث أنها تدخل من الدول الأخر كعمان واليمن وتأتي عبر الطرق البريه بحثا من الأمطار والعشب والأراضي الخصبه في أواخر الربيع فقط ، وفي أماكن اشد خطر من حيث المكان والزمان وغيره عامة 0
2- منطقة الربع الخالي ليست كما هو معروف لدا الذين لايعرفونه ألأن بل كم يعرفها أهلها وهي ممتده
من خط عرض=== 20 و خط طول=== 51 حسب الأحداثيات المعروفه ، اي الحدود التقريبه هي رمال الكرسوع وسط ، وجنوب رمال المحراض جنوب شرق ، وجنوب غرب رمال بني معارض وزينان حتى مناطق رمال القعد جنوبا 0
3- المناطق الأخرى هي مناطق اكثرها سهول ورمال عاديه وفيها اماكن خطره على الغشيم فيها من حيث الدلالة ومعرفة السواقه في البر حتى لوسيارته دبل نظرا لوعورة بعضها وخلا ئه من السكان ، والبعض منها ماهول بالبدو أصحاب الأبل فقط وفيها بعض الأماكن التي يوجد فيها تعبئة بترول وماء وهو غير متوفر دائما في المناطق التي تقع في الوسط نظرا لبعد مسافة المزود وعدم وفرة السيارات الدبل الخاصه بأصحاب المحلات المذكوره 0
ملاحظة هامة جدا جدا جدا ؟؟؟؟؟
1- لاتذهب الى مع دليل من أهل المنطقه أو من يعرفها حيل حيل 0
2- لا تتكل على الماجلان فكم ضيع الكثير واهلكهم0
3- لاتذهب بسيارة واحده ، توقع العطل وان كانت جديده 0
4- تزود من الماء والبترول وعدت االرحلات البريه @ انظر صفحت منتدى لوازم الرحلات ، مكاتبات عدة الرحلات البريه 0
5- لاتذهب الا في وقت السماح بالقنص وفي المناطق المسموح بها فقط
للأ ستفسار يرجى مراسلتي 0
اخوكم طيب النيه

[الباهي]

اخي الكريم
الربع الخالي ممنوع الصيد فيه وهذا الشي معروف وتكثر فيه دوريات سلاح الحدود لان المهربين يكثرون في بعض الاوقات من السنه

[ابو عايد]

السلام عليكم ورحمة الله وبركاته :

من ناحية الربع الخالي من احسن مناطق القنص للارانب



وهي منطقه شديدة الخطوره


من ناحية المال والبنزين



واخر مقناص لنا كان بعد عيد الاضحى جلسنا سبع ليالي ولم نكثر



من صيد الارانب سبع في اليوم


ولكن نذهب الى مكناطق بعيده حوالي 600 كيلوا بين شروره والخرخير



نذهب بالسيارتين كبسوله وشاص حوض



ولكن تكون في قمة الروعه في الشتاء الله يذكرها من ايام حلوه



ولكن انتبه من سلاح الحدود لانهم مشددين هذه الايام والماره



الله يكفينا شرهم


وسلامتكم


وتقبل تحيات :heart: العاشق الولهان :heart:

http://www.mekshat.com/pix/upload/images/7][.jpg

[قناص القرائن]

فوائد قيمه والله يعطيكم العافيه اخوي :الباهي؛mohamad1121 ؛ابو خلود؛mmsm53 ؛ابو عايد

[قناص القرائن]

طيب هل من مزيد

[mmsm53]

ألأخ الباهي حفظه الله
عليك أن تقرى جيدا وتتمعن في ا لملاحظات وهو؟؟؟:- رقم / 5 - ذكرت أنا فيه أن من يريد الذهاب للربع الخالي عليه أن يتحرى ( الوقت والارض ) المسموح بهما للقتص 0
علما أن المكان الذي يمنع فيه القنص بالربع الخالي والجنوب عامة هوكتالي :-
من حدود مركز سلوى جنوب وجنوب غرب ممتد بخط وهمي مرورا بمنهل بير زبده وبقلمة ندقان حتى محافظة شروره بالجنوب الغربي للربع الخالي وما تحده حدود المملكة العربية السعودية مع الدول الاخرى وهي ، اليمن ، عمان , الامارات العربية المتحده ، قطر ، ؟؟؟؟ ا
المرجع / اعلان وزارة الداخلية السعودية عن المناطق المسموح بالقنص فيها والمحميات لموسم قنص عام /1423ه 0
أخوك/ طيب النيه

[مهتوي]

بسم الله

السلام عليــكم

انا طلعت الربع الخالي .. قبل عيد الأضحى . وكنت اول مره اذهب فيها لربع الخالي . وهي من اروع المناطق طبيع وارض طيبه ما عبث فيها احد .

وقصتي هي الله يسلمكم .. انا معي جيب شروكي وطاق القارمن من الصيف اللي راح والنفسيه ماشاء الله تمام ومتحمس وانتظر متى يزين الجو علشان نقنص هناك ..
قالي خالي لي اخويا بروحون هناك تبي نخاويهم .. قلت قدام .. المهم كان التنسيق مع خالي
وغلطتنا إن حنا مشينا بعدهم بيوم وتواعدنا على نقطه بالأحداثيات داخل الربع الخالي ..و خذنا التوصيف منهم تقاطع شيبه يمين - محطة بوابه الحصان وهي اخر محطه بعدها نفرق يمين والوعد النقطه .
خذنا الوصف مثل ماقالوا .... وحنا نحط الأغراض قبل مانمشي اخذنا اربع جراكل 25 لتر قلنا 2 مويه وثنين بنزين جيت بعبي التانكيين مويه قال خالي لا وشوله خلها هناك بعدين . عبيت واحد ودخلته.
بعد ماوصلنا لمحطة الحصان شفنا النقطه اللي متواعدين عندها تبعد 100 كيلو عن المحطه ( قال خالي وشوله نعبي الجراكل بنزين , تانكي السياره يكفي والمسافه قريبه وربعنا معهم جراكل قلت له ولو احتياط خلنا نعبي قال لا تدوخنا بريحتها داخل السيارة وتحوسنا قلت برايك ) وهو اكبر مني ..
وهذا الكلام الساعه 12 في الليل . ( اظطرينا ندخل في الليل لأننا مواعدينهم نوصلهم المغرب )
سمينا بالله وفرقنا يمين ولا حنا عجلين .. ومشكلة الليل إنه مايسمحلك تشوف امهد الطرق وتروح معها أو تبعد عن مناطق الرباظات .. جازفنا بذا الليل ودخلنا وطحنا بكم تغريزه هي اللي صرفت البنزين ومن بعدها استوت الأرض وبعدنا عن المناطق الخطره وحنا في الطريق صدنا لنا ارنبين المهم الآن منتصفين نبعد عن النقطه اللي متواعدين فيها 50 كيلو والبنزين راح منه أكثر من الثلث ( فوق النص بشوي ) كل ذا راح بذا التغريز
من هنا بدت الهواجيس تطلع قلنا باقي خمسين عليهم وإذا مالقيناهم نبي نرجع 100 كيلو هذي صارت 150 كيلو ( احسب حساب الدبل وبعض التغاريز اللي يمكن لا قدر الله تواجهها )

ولا حنا معنا جهاز كنوود ونراسلهم بس 50 كيلو مايوصل الجهاز لا وكنود مهب تبعنا وقديم يعني يقول راعيه إذا خربت سماعته طقه طقتين ويشتغل ( يعني مايتكل عليه ) .
قلت لخالي يوم بقالنا عليهم 25 كيلو قلت له يمكن انهم نايمين خلنا نرقد هنا وإذا اصبحنا راسلناهم ازين من نقطع 25 كيلو وإذا مالقيناهم نرجع 25 كيلو هذي صارت 50 نوفرها دام بنزيننا مايوصل ... قال لا انا مواعد رجال .. قلت برايك ..

المهم عين على أمبير البنزين وعين على كم كيلو ونوصل

لين ماوصلنا للنقطع اللي متواعدين فيها :) :) :) :) :) أبتســــــامه كبيره


واخرتها مالقيناهم ندور جرتهم اثر لهم بس على الأقل جرت سيارة ( خرمس ماحولك احد )
ماقلت شئ الغايب عذره معه .
حولنا ولا الساعه 4 الفجر وصلخنا الأرنبين وحطيناهم في الثلاجه ولانا من التعب والهم ندور الفراش.
نمنا واصبحنا السعاه 11 وتقهوينا بدون نفس :) ولا الأمبير البنزين تحت النص بشوي

ولانا ندور الرجعه وفصلت الدبل علشان مايصرف .... وكانت الرجعه اسهل بكثير من الدخله بالليل صرنا نشوف الأماكن السهله ونبعد عن الرباضات.. الله من كم حطبة غضى مرينا من جمبها بس للأسف ما كنا فاضين لها ....

والحمد الله رجعنا للمزفلت قبل ما تولع لمبة البنزين

عبينا بنزين من المحطه المذكوره وغسلنا ( ولا مويتهم مالحـــه من جد يعني لونا متكلين عليها كان توهقنا )
وارجهنينا

وتعديناها وصلحنا غدانا من هالأرنبين ..
وقبل ما تغرب الشمس قبضنا خط الرياض وحنا مابعد طاب خاطرنا من البر ومن الصيد ..

وفي الخط ينتق علينا من بعيد ذاك الأرنب وانا ماصدقت على الله وحطينا حرتنا فيه .. وسع صدرنا من جد :)


المهم وصلنا الرياض ونتصل على خوينا اللي مواعدينه ومغلق الجوال ..
وبعد اربع ايام يرسل لنا رساله يقول فيها مبروك الأرنبين .. وشلون اثره جاء لنقطه اللي متواعدين في الليل في نفس اليوم اللي مشينا .. فيه
والخلا ف اللي بيننا وبينهم إنهم داخلين الربع الخالي من جهة الغرب ووجهتهم شرق و المسافه اللي قطعوها لين النقطه اطول واستغرقت يومين والسبب لأنهم خايفين من سلاح الحدود أما حنا من الشرق ووجهتنا غرب والمسافه اقصر واستغرقت 4 ساعات .

وهذا والسلام بس رحله حلوه نبي نعيدها إنشاء الله
والفوائد حاول تستنتجها من القصه

[laith]

يا " مهتوي " ..:heart:

اسلوبك في السرد اكثر من رائع... ماشاءالله تقول اني معاكم..:D

هذه مشاركة من الاخ "هواوي " ثريه جدا بالمعلومات والمشاركات.. لاثراء الموضوع :

http://www.mekshat.com/vb/showthread.php?s=&threadid=101

شكرا للاخ " قناص القرائن " صاحب الموضوع...:good:

اخوكم ليث

[ابوقاسم]

من كثر ما نسمع بالربع الخالي نظن انه بلاد عجيبة من دخلها ما طلع منها والحين نسمع انها بلاد شرحة وانا ودي ادخل للربع الخالي بس ما ادري بالمكان الزين ..........
ودي لو تعطوني احداثيات واماكن شرحة ومكان صيد وعول او غزلان واذا حد منكم دليل ترا روحته على حسابي واذا يبي اجرة يطلب .
بس انسب وقت ما ادري متى ........
:cool:
:cool:
:cool:
:cool:
:cool:
نبي وعد من واحد خبير يطلع معنا

[الباهي]

اخوي الغضى

بالنسبه للربع الخالي مافيه لا وعول ولا غزلان هاذاك اول اما وانقرضت من عشرات السنين

وانا دايم اروح للربع الخالي واعرفه من سنين وكل من يعرفه يعرف ان مافيه الغزلان ولا الوعول

والله لو فيه كان ماحصلت احد قاعد في بيته واذا تبي الغزلان مافيها شي الربع الخالي الا داخل حدود

عمان الحدود العمانيه اللي بالربع الخالي وقد رحنا لها قبل 8 سنوات لاكنها بعيده يبيلك تقطع مسافه يومين
بالسياره على الخطوط حقه سلاح الحدود المحاذيه لحد الامارات ثم تمر على عده مراكز وبعدين بعد مسافه طويله وشاقه جدا اخر مركز هو مركز سحمه لسلاح الحدود القريب من الحدود العمانيه ويبيلك تصريح من الاماره وسلاح الحدود لعبور هذي المناطق اذا عندك واسطه ولا رحت فيها لانها مناطق حدوديه حساسه والحين
مااتوقع انهم يعطون تصريح .......
المهم يوم رحنا عارفين ان مافيه غزلان الا لازم ندخل عمان علشان نحصل الغزلان ودخلنا طبعا قطوع لان الحدود حقه عمان اللي حنا عندها مافيها لا عقم ولا شي بس لوحه من جهه مكتوب السعوديه والجهه الثانيه مكتوب عليها عمان وكنا خايفين من الدوريات العمانيه لان لوشافونا رحنا فيها ودخلنا حوالي 80 كيلو وحنا خايفين وحصلن صيد لاباس به وصدنا 7 غزلان ورجعنا للمخيم بسرعه بس طبعا مادخلنا الحدود مره ثانيه لانه فيه خطوره كبيره والغزلان ماتحصلها تدخل السعوديه لان اول ما يجي منها واح ولا ثنين ماخلوه سلاح الحدود يسدحونه علطول

وتقبلو التحيات الباهي

[المولع]

بسم الله الرحمن الرحيم

الحمد لله رب العالمين والصلاة والسلام على سيد المرسلين وبعد

اخي العزيز قناص القرائن حياك الله وبياك انت ومن شارك معك في هذه المشاركة

والربع الخالي من افضل المناطق القنص والجو ولكن ليس في الصيف وانما اذا هبت شمالية المربعانية ومعاد تقدر تجلس برا ذيك الساعة سقها ياسنايدي ولكن هناك مشاكل كثيرة في الوقت الحاظر عدة :
اولا: من اكبر المشاكل هي الدوريات التي تتواجد في المنطقة الغنية باالصيد واوجز لك المشكلات التي مرت بنا في هذه الناحية
1-في عام 1418هـ وقت المقناص رحنا هناك المهم وصلنا للمنطقة اللي حنا مثبتين النقطة عليها باالقارمن
لأن المنطقة هذي مليئه باالصيد وارانبها كبار وسمان ولذيذة وسبحان الله الرجع كل سنة عليها لدرجة ان كلى الأرانب مغطاة باالشحم المهم وصلنا على خير حوالي الساعة اربع العصر ودورنا مكان زين للمعشى واخترنا ذيك النقرة اللي على كيفك وكمخنا نلا ارنبين قبل المغرب للعشاء واستانسنا وتعشينا وقمنا عليها في الليل
والله لايوريك الشين دبغ في الارانب المهم جلسنا في مكانا ليلتين ويوم قلنا نغير المنطقة حسناها ودسناها
حنا وصلنا يوم الجمعة العصر ويوم الاحد الصبح مشينا سياراتنا ثلاث شيصان وبعدين مشينا تقريبا 30 ك
من محلنا وحصلنا منطقة فيها معاشي ارانب واجد لدرجة ان فيها شجرة صغيرة تسمى البركان والله ان دمن الأرانب حولها تقول مراح غنم وانا اوري واحد معي المشهد هذا الا والجيب معطينا اللحوق المهم لفيت السيارة على جنب عشان مايخذ رقم اللوحة والا اخوينا وراه وقف وقعدوا يسالونه سؤال جفس وشديد حتى يخوفونه واثره الله يكرمكم كلب متعاون مع الدورية والينه بدوي مارين على خيامه في الطريق تبعد عن موقعنا حوالي 100ك يوم جينا وين رايح وين جاي ماعطاهم علم بس يبي يعرف اعداد السيارات والوانها
وعطانا من الكذب بس يبي يخلينا لين تجي الدوريات وتشيلنا راح الله لايرده والوقت تقريبا الظهر وش الراي والعلم اتفقنا على ان حنا نجلس الى الليل ونتعشى بدري ونرجع نفس المكان االي مشينا منه ونفذنا مااتفق عليه والصباح بدري حطينا رجلينا لأن المروح اللي جانا بين انه رايح يبلغ ليش لأنه ماشي على جرتنا 30ك
والساعة 11 في الليل يوم الاثنين وحنا عند نهاية الرملة من شمال والحمدلله سلمنا0
في نفس اليوم كان واحد من الشباب معنا اخوة جاي للرملة في حملة ثانية وجو لنفس المكان اللي كنا فيه
الا والدوريات خمس جيوب طابه عليهم مابعد صادو شي وشالتهم وقالو لهم الدوريات حنا جايين عشان بلاغ عن ثلاث جيوب شيصان لكن حظكم شين حتى ان الاقشر معطيهم عددنا0 والوان السيارات0

2-مشكلة البنزين والتوانك المشقوقة اللي مايتأكد منها راعيها قبل يمشي ولها قصه
3-مشكلة الماء وقصصه
4-العدة والبنشر وخراب السيارة والركادة في القيادة وكل واحدة لها قصة
5-الرباضات وماادراك ماارباضات
6-خراب الأجهزة القارمن والأيكوم وملحقاتها
7-الونش وفوائده في الرملة
وللحديث بقية انشاء الله ماودي اطول عليكم0
8-
:type:

[البجلى]

السلام عليكم ورحمة الله
اخوانى الكرام هذا مثل منتم عارفين موضوع قديم للاخ القناص
وحبيت انى اثيره من جديد بعد هذه السنين وقلت اكيد ان فيه بعض الاخوان
لديهم الجديد عن الربع الخالى واسراره وقصصه الجميله المثيره
تحياتى للجميع

[نعناع الجبل]

يعطيك الف عافية ياقناص على هالإستفسار فديتك

[a1Ruwais]

الله يعطيك العافيه

[الصيهد.......]

مشكورين على المعلومات

[abhs]

موضوع جميل يستحق القراءه

[الشيخ قوقل]

الشباب ما قصّروا ما خلّوا شي
الشيخ قوقل كنت مستشار في رحلة :: ـــ (( الداخل مفقود والخارج مولود ))