مسافر باليوكن ومحتاج مساعدتكم يالنشامى .

[خالد 27]

حياكم الله

زي ماتعرفون في الإجازة الواحد وده يسافر ويبرد في الجنوب والطايف

وياخذ له عمرة في مكة ــ يالله من فضلك ــ

ويمر على المدينة ويصلي في الحرم يعني بالمختصر مالنا في السياحة

الخارجية يالله الجنوب وماحولها ...

وعشان كذا قررت اسافر اسبوعين نغير فيها جو ونوسع صدر البزران وأم العيال :)

وطالب فزعتكم ...

معي يوكن والمشكلة ان طرمبة البنزين تطلع صوت قوي (( ززززززززززز)) اخاف اوقف بالسيارة في مكان وتقول هذا محلي ..

عطوني رايكم ..........

وبالنسبة للكفرات ابغيرها وناوي اسالكم عنها بس قريت موضع في المنتدى وأقتنعت بكلام أخوي ابو عبدالرحمن الصفيان وهو يمدح الدنلوب .

[مخاوي قناص]

السلام عليكم الله يسهلك سفرك ويردك سالم غانم 1 البنزين 95لاينزل عن الربع 2غير السير وشيل القديم معاك 3 لا تمشي بالليل في طرق مقطوعه 4 تائكد من العفريته والاستبنه 5 افتكرني بدعوه طيبه مخاوي قناص

[مـدحـدر]

هذا مشكله في الجموس واليوكن والبليزر ذا الطرمبه بس انتبه لا تسافر الا انت مصلحها

انتبه وانت بعد معك بزارين وخابر الطرمبه غاليه بالوكاله بس انصحك تفحصها او تغيرها

مدام انك ناوي على سفر

والله مره خربت معي في مكان منقطع وبعد معاناه حصلت سطحه والله لا يوريك انواع الاستغلال

وبالنسبه للكفرات لا تأخذه الا من وكيلها لان فيه كفرات تقليد يقولون انها مستورده من دبي والله اعلم


والله يستر عليك ويوفقك في حلك وترحالك

[جلمود الجبيرى]

وازيد على كلام الأخوان الله يعطيهم العافيه خذ معك طرمبه سبير

[الدحبول]

لا تخاف عمر الطرمبة 4 سنوات يعني إذا سيارتك 2002 غيرها

[مفتاح الفرج]

خارج الموضوع


سلاح , نص وفوق .......... والمسلّم الله

[شعيب المسمى]

طع شوري غيرها وخذ القديمة معك وغير معها الصفاية
وان كان يبي تنزيل تانكي خلهم ينظفونة زين

[خالد 27]

مخاوي قنص ابشر من يدعي لك في الطريق وفي الحرم ان شاء الله ــ بس عساني اذكر ــ وبيض الله وجهك .

أبخص .... جزاك الله خير والحمد لله على سلامتك ونصيحتك محل الأهتمام

جلمود الجبيري .. وانت كمان الله يعافيك وان شاء الله مانحتاج للطرمبة

الدحبول سيارتي 2001 والظاهر ان عمرها الإفتراضي على كلامك أنتهى .... الله يوفقك ويجزاك خير

مفتاج الفرج .. السلاح زين بس وين الترخيص .. وزي ماقلت المسلم والحافظ الله سبحانه

شعيب المسمي الله لايهينك على نصيحتك وجزاك الله خير .....

[t5t5t5]

غير الطرمنبه مع الصفايه
وركب كفرات firestoneعند الوكيل ولا تروح لغيره
ولا تنساني من صالح دعاك

[.أبوعبدالرحمن]

تروحون وترجعون بالسلامة

اخوي خالد27 اذكان سيارتك 2001 غير الطرمبة وما انت خسران شيء بإذن الباري

ولا تنسى تغير السيور وتشيك على الكهرب في كل مناطق السيارة والبطارية


وبعدين اذكر والله اعلم انهم يرهمون طرمبة مرسيدس على الجموس وبعد ذلك يقولون انهم خلاص ينسون مشكلة الطرمبة

طبعا خبرك ( يقولون ) ما هي اكيدة


والله يوفقك الى كل ما فيه خير وبركة لك ولعيالك

والله يوفقكم الى الاعمال الصالحة

[مغلي]

غير الكفرات الى مشلان جفالي اصلي فرنسيه

والطرمبه حاول ان التانكي لا ينزل عن النص ابدا

[الضرغام]

الله يسهل عليك وعمره مقبوله بإذن الله تعالى
الطرمبة لا تهملها
ومثل ماقالوا بعض الأخوان غيرها
إلى طرمبة مرسيدس وريح بالك
والضمان بالله سبحانه وتعالى
أما الكفرات يمدحون المشلان

[ابو ناصر 1212]

تروح وترجع بالسلامة
وبالنسبة لموضوع الكفرات فانصحك بنوع اسمه بيرللي تراها قوية وتتحمل جميع الظروف وسعر الواحد حوالي (520) ريال بس لك وللزمن

[التوفير]

والله في زميلي معه جمس فيه الصوت وسفر عليه الي الطياف ومكه المكرمه وبكرء يبي يسافر الي الشام وطبيعي وترجع بي السلامه ان شاء الله

[راعي الركيات]

تروح وترجع بالسلامه ولاتنسنا من صالح الدعاء اما الطرمبه لاتهملها ابد تري اليوكن مشهور بالطرمبه والله يوفقك ويردك سالم غانم من كل شر

[خالد 27]

الله يعطيكم الف عافية على نصايحكم ودعواتكم

[كاشخ 24 ساعه]

يابن الحلال توكل على الله تراك منت رايح لتركيا

والله اللي يسمح ردود الاعضاء عليك يقول بتهاجر او بتمسك خط 5000 كيلو

أعقلها وتوكل وترا الدنيا لسه بخير وياما ناس تعطلوا وسياراتهم جديده والحافظ الله

انت اعمل بالاسباب وغير الطرمبه ان كان بها صوت وادعس ووكل الله